الجهاز الأفضل

[القماري]

تحية للجميع وأتمنى أن اكون ضيف خفيف ظل معاكم
خويكم يموت في البر وعندي سيارة دبل (4X4) لكني غشيم في سالفة التطعيس والسياقة في الرمل
وبغيت منكم الله يحييكم تفيدوني بمعلومات عن كيفية السياقة في الرمل (يعني كم يكون ضغط الهواء ، ويش هوه أفضل الكفرات الي نقدر نستخدمها للسير على الرمل وفي الشارع ، وكيف أتصرف لين غرزت السيارة في الرمال - يعني بغيت كل شيء يتعلق بسياقة السيارة وتجهيزها للرمل إذا أمكن .
وسؤالي الثاني الله لا يهينكم ( أني ناوي أشتري لي جهاز الأحداثيات GPS ومحتار بين االماجلان وبين الجارمن ) وبغيت أعرف وين الأسنع فيهم وكم سعره عندنا في البلد ووين يبيعونه وإن أمكن في الشرقيه .
في الختام مشكور يلي تعنيت وقريت كتابتي ومارديت على طلبي ، ومشكور وماقصرت يلي قريت ورديت. :)

[راعي عنيزة]

هلا وغلا بالشيخ

للتطعيس قلل هوا الكفرات ل 15 بس انتبه لا توطي حصا او تكثر المشي على الاسفلت وانت ما عبيت الهوا عشان ما يخربن كفراتك

اما بالنسبه لاحسن كفرات فانت ما حددت لنا وش نوع سيارتك ومقاس الجنط عشان نجاوبك

واذا غرزت اشبك الدبل الثقيل واكسر الدركسون وحاول تطلع من سكة السياره واذا ما نفع امرك لله قلل هوا الكفرات لين تطلع

اما الجي بي اس فالدارج بين الشباب نوعين لا ثالث لهما جارمن جي بي اس 3 او جارمن جب بي اس 162

[راعي كيف]

ماعلى راعي عنيزه تعليق وهم سراحه اهل التطعيس




تحياتي وأشواقي
http://www.mekshat.com/pix/upload/images/mogheselh2.jpg

[القماري]

مشكور أخوي راعي كيف وأخوي راعي عنيزه ، ماقصرتوا ، وبالنسبة لسؤالك عن نوع سيارتي فهي نيسان باترول ربع ( ستاندرد ) مديل 2000 وكفراتها الحين هيه الأصلية الضعيفة وودي أغيرها بنوع ممتاز للرمل والشارع ومحتاج نصيحتكم .
ومحتاج الله يعافيكم موقع إن كان موجود في هالأنترنت يعلمني كيف أتصرف في الرمول ولطعوس ( هاذي هيه مشكلتي دوم أغرز في ارمول وأحياناً أشوف سيارات سيدان مشي في الرمال وكنها البخت وماعليها كلام )
وسؤالي الثاني بخصوص جهاز الجي بي أس جارمن 3 بلس ( كم سعره ؟ ومن وكيله ؟ ) لو تكرمت أخوي.
مطلوب الفزعة ياشباب ومشكورين مقدماً

[الهاوي]

تحية طيبة للجميع
اخو القماري الله يسلمك
بالنسبة للجهاز احسن جهاز والغالبية يستخدمونه من الشباب وهو ما يحتاج قارمن ( بلاس ثري ) قيمته حوالى 1400- 1500 مع الشاحن والقاعدة والجراب يعني مدري رخص والا لا
المهم نصيحة لاتتعداه ...
اما الكفرات الرملية 100% هي بالون 900 والشاهين مقاسات مختلفة بس انصك تدور كفرات رملية حجرية يعني لك ولزمن واذا بغيت تروح للرملة حط بالون وانس الموظوع الموتر بيتندح معك على الرمل
والله اعلم يقولون احسن كفرات يوكوهاما نقشت 2000 يعني ترى معلوماتي قليلة في الكفرات بس اللي على النيسان البرجستون الله يقلع الشركة ما تنبغى ولو بلاش امتحنتني .
على العموم سلامي للجميع :cool:

[راعي عنيزة]

ما على كلام اخوي الهاوي زود

لكن فيه معلومه بسيطه وبحكم انك جديد وتغرز بالاسفلت :D فاتوقع انك ما تعرفها

الا صرت تمشي بنفود شين او تبي تطلع طلعه خذ عزم للسياره يعني حطها بالثاني ودوووس على كل الدعسه ولا تغير للثالث عشان ما يبرد عزمها

[القماري]

ما خاب الظن فيكم ومشكورين على المعلومات والله يسلمكم

[الخبير]

السلام عليكم
يا شباب انا الصراحه الاحظ ان الشباب لازم يحرقون مواترهم لين يطلعون طعس .
ياخذ عزم من الجنادريه عشان يرقى طعس التحدي ، التطعيس يا جماعه وتاسه و سياسه مهوب حرق اعصاب.
التغريس شئ اساسي لازم تغرز عشان تتعلم ومثل ما قال المثل كل طقه بتعليمه.
المسئله كلها مسايس لا تخلي الكفر يدور واجد على الطعوس ، خله يمشي مثل ما يمشي على الزفلت.
سؤال : انت الان اذا بغيت تطلع طلعه وانت تمشي على الزفلت هل الكفرات تصارخ من التفحيط و البرم على الزفلت ولا تدربى عمرها وتمشي صح.
اتوقع انك الان تقول اجل كيف ارقى الطعوس بدون حن على الموتر ولا عصبيه و تزعق على الي جنبك وخر رجلك عن القير يا شين :mad:
الطريقه سهله مره وما كنت اتوقع انها بهذي السهوله . انا منيب قايل لك الجواب ودي تحاول بنفسك لكن ابي اقرب لك الوضع المسئله ما فيها دبل ثقيل .

اما بالنسبه لل GPS انا الموجود عندي ثري بلس وانا انصح به لاي واحد.

[القماري]

حياك الله يالخبير وبصراحة أنت وهقتني ، كيف بالله عليك أرقى الطعس وبدون حرق الموتر؟؟!!
أنا وبالحرق وما أوصل نص الطعس ( محتاج خبرتك يالخبير ) لا تبخل علينا بمعلومة الله يجزيك خير ( أنت قولها وأحنا إن شاء الله ننفذ ونشوف الوضع ) ، وعندي سؤال (هو هل من الممكن السياقة في السبخة وكيف الطريقة ، لأني وبصراحة بغيت أتورط يوم أني دخلت منطقة سبخة وما كان عندي فكرة عنها وما فكني من ذاك الوادي غير رب العالمين .
وبمناسبة الجهاز GPS جارمن 3 بلس عندنا موزع واحد على ما أظن بالشرقية وضارب السعر للسماء يبغيه ب 1450 ريال وبدون سلك الشاحن للسيارة وبدون الجراب ، بس معاه سلك الكمبيوتر لا وطالب لسعر السيدي إلي معاه 450 ريال . علشان كذا إذا فيه موزع ثاني دلوني عليه أو دلوني على الوكيل حقه بالرياض ، ومشكورين على المساعدة .

[الهاوي]

تحية طيبة للجميع
فيه عدة محلات بالرياض مثل دار البوصلة ومحلات شمالات وموقع المحلات في المرسلات عند مبنى شركة الاتصالات ويمكن تحصل بعد غيرهم وفية وكيل القارمن في عمارة الصالحية على طريق الملك فهد
واما السيدي اذا حبيت احاول اشوف طريقة السويلك منها نسخة نو بربلم بس حتى الان ما عرفت استفيد من cd .

[الخبير]

السلام عليكم
يا الحبيب ودي انك تجرب وتشوف ، تراها سهله والله

[إلياس المطلق]

حــــلــو ,,,