وش السواة أحد الورش المتخصصه غشتني في تركيب الونش؟ [الأرشيف]

مشاهدة النسخة كاملة : وش السواة أحد الورش المتخصصه غشتني في تركيب الونش؟

ملاعب الريح

07/04/2007, 01:56 PM

بسم الله الرحمن لرحيم

السلام عليكم ورحمة الله وبركاته

مساكم الله بالخير جميعاً

هذي سالفتي في تركيب الونش مع أحد الورش المتخصصه (للأسف)

السالفه وما فيها إني شريت لي لاند 97 وجاني هديه ونش من صديق عزيز الزبده نشدت وسألت وين أفضل الورش لتركيب الونش وشارواعلي بورشه في مخرج 18 متخصصه بتركيب الصدامات والتوانك وتجهيز سيارات البر وللأسف رحت لهذي الورشه يوم السبت قبل 3 أسابيعوتفاجئت بأنه يعطيني موعد بعد أسبوع وقال لي تأكد من إن الونش يشتغل وقلت ما فيه مشكله وأتفقت أنا والشخص السوري اللي ماسك الورشه على مبلغ 500 ريال (قلت ليه بس شق الصدام وتخريم للونش قال لا قاعدتك ما تتحمل وبنستخدم وحده غيرها وبتكلفنا قلت ما فيه مشكله) ورحت وجيته بعد أسبوع (طبعاً بعد ما جربته عند كهربائي أعرفه وطلع شغال ولله الحمد) وحطيت الموتر والونش عنده وقال لي بيطلع بكره بالليل وكلمته يوم الأحد الصبح وقال ما بعد بدينا ليه يا مسلم قال مشغولين (صبرٌ جميل)

طيب متى يخلص قال بكره يعني الإثنين

وتفاجئت بإتصال من الشخص السوري يقول فيه قطعه ناقصه عشان تشغيل الونش (صبرٌ جميل) وأطلع من الدوام وأنقز للورشه وش السالفه قال الأسلاك وعلبة الفيوزات ليست موجوده وأروح لتشاليح الحاير وأرجع له بالقطعه قبل أذان العصر وقلت هذي القطعه قال إيه طيب متى أستلم الموتر قال قبل المغرب تكون خالصه مع مراعاة أني من سكان شمال الرياض المسافه للورشه فوق 40 كم ورجعت للبيت ودق علي بعد ساعة من صلاة العصر وتفاجئت بأنه يقول (شبكنا القطعه وصارت خربانه ولا أقدر اشغل الونش) تعال خذ السياره خلصت من عندي ودها لكهربائي وصلحها

وجيته بعد المغرب وإستلمت السياره وقلت له وين القاعده اللي أنا جايبها وقلت لي إنها ما تتجمل وبتركبون وحده غيرها قال إستخدمناها قلت طيب نقص لي بالسعر لأنك رافع علي السعر عشان هالقطعه ورفض ينزل ولقيه راش الونش ببويه سودا ومشوهه الشكل بدون أن يعطيني خبر

الواير كان برا الونش وربطته بأسيام على الصدام ومشيت بإتجاه صناعية أم الحمام أعرف لي كهربائي جيد هناكويوم وصلته شرحت له الوضع قال عطني الأسلاك وعطيته وتبكها بالونش و بالبطاريه وتفاجئت إنها تشتغل (ما بغيت أكلم السوري قلت يمكن فيه خراب ثاني) وقررت إني ما أكلمه لين أنتهي من الشغل تماماً

قال لي الكهربائي يبغاله شغله طويله جبه بكره

وجبت له السياره من بكره (الثلاثاء) وإستلمت السياره تالي الليل وشغاله تماماً وطلع حسابه225:eek: بعدها عرفت إن شغلته صعبه و بتطول والسوري صاحب الورشه اللي في مخرج 18 ما يبي يشتغل (صبرٌ جميل)

حاسبت الرجال ومشيت ومن بكره دقيت على السوري صاحب الورشه اللي بمخرج 18 وقلت له ما تخاف الله تغش المسلمين قال وش السالفه قلت القطعه شغاله ولا فيها شي وكلفتني فوق 200 ريال ياخي إذاما تبغى تشتغل قل لي ما أبغى أشتغل لا تقول لي خربانه قال أنا ما قلت لك إني مددتها وما إشتغلت قلت أجل وراك خليت السياره عندك يوم جبت لك القطعه وسكت وما قدر يتكلم

وقلت له بأكلم راعي الحلال وبقوله عن علومك كلها قال أنا راعي الحلال وش عندك وش بتسوي:eek: (صبرٌ جميل) وأنا أعرف أنه ليس صاحب الحلال لكن وش أسوي حسبي الله ونعم الوكيل

وش رايكم وش السواة

وإعذروني على الإطاله لاكن من غبنه فيني كتبت هالموضوع الطويل:(

جفيل

07/04/2007, 02:12 PM

هه شوفوا يالربع مثل هالأشكل ودك تحطه بفرامه وتفرمه وتطه بكياس في عتيقه

شي يحوم الكبد والله .. ملاعب الريح (صبرٌ جميل) .. والله يعوض الي راح انشالله

تحياتي لك وبالتوفيق،،

عطارد

07/04/2007, 02:28 PM

السلام عليكم ورحمة الله وبركاته
شكراً على إيضاح معاناتك مع هالغبي اللي ما يدري وين مسقط رأسه والمفروض انك تذكر اسم السوري واسم الورشه علشان الناس تحتاط منه أو تعرف كيف تتعامل معه.
انا حصل معي مشكله مع ورشة الدفع الرباعي بالدمام راعيها حاط له سودانيين مايدرون وش السالفه ورحت اركب بطاريه إضافيه وحاسولي الدعوى وسعرهم مبالغ فيه 1200 ريال :confused:

غيانا

07/04/2007, 02:36 PM

باترول98

07/04/2007, 02:38 PM

ماشاء الله عليك ياملاعب الريح والله انك صبور
لوني في مكانك كان ذبح وذبيح انا ورعي الورشه
والي يقهرني في هل اجانب انه في ديرتنا وينفح ( الحلال حلال ابونا والقوم طردونا)

وارجو ذكر اسم السوري والورشه لكي لا نقع في الذي وقعت فيه

والله يئجرك على مصيبتك

بواسامه

07/04/2007, 03:13 PM

اسم الورشه المميز
والسوري اسمه محمد المصري
وهو راعي الحلال حسب علمي
كان قديما عند ابو خالد الزلفاوي الورشه ام دعامه كبيره واسمها المواهب
وماتصالحو وافترقو وصار يشتغل لنفسه وبنغاليه من الشارع
اعيب عليه ان مواعيده خرطي ويمزع بك بالساعات ان لم تصل ليومين
وانه يمحطك بالسعر ويصمخك بعلباك
وهذ الكلام من تجربه معه قديمه وتوبه اتعامل مع هالاشكال
والتشطيب والبويه لك عليه في شغله
وحتى لحاماته وسط ويغطيها بالمعجون والله اعلم
وحسبنا الله ونعم الوكيل
الجنبه لاعبين بهالديره

هاوي الله

07/04/2007, 03:33 PM

عندك الشرطه وإذا ماردو لك حقك مالك إلا تاخذها بيمناك . حسبي الله على ذالأشكال من الأجانب

في الشغلات الميكانيكه إنتبه تقرب السوري والسوداني

راعي الهـــدد

07/04/2007, 03:33 PM

وفي ظل غياب دور حماية المستهلك

يسقط الكثير والكثير

وليسجل التاريخ آخر من سقط اخونا ملاعب الريح

________________________________________

أخوي الغالي ملاعب الريح الحمدلله على السلامة

ومثل هذا والله مايكفيني منه اذا كان بهذه الصورة من الدناءة والغش وسوء الأخلاق غير آخذ حقي منه بالقوة

واذا ماحصل بالقوة تبعته وتفاهمت معه في طرف شارع او حارة
وبعدها يصير الي يصر

انا عرفت الورشة واخونا ابو اسامة اكد الخبر

وانصح الأخوان بعدم الذهاب لهم

والله يا أخوان ان ابو خالد في ورشة المواهب انهم سمحين وشغلهم تمام ورهيبين

وأخلاق وتعامل طيب

تصدقون عاد ان روحاتي للمواهب ما اعدها لتصليح غرض لاوالله مع تصليح الغرض سوالف وأخذ اخبار المقانيص والبر من ابو خالد صاحب الورشة المحترم

اقول مرة اخرى السوري هذا لازم تتفاهم معه

وانا معك بالي تبيه اي فزعة ابشر ياغالي

دمت بود ومحبة يابعدهم

ع.ف.الدرويش

07/04/2007, 03:35 PM

ملاعب الريح.. هلا وغلا

بدايةً ما أقول إلا الله يعوض عليك..
يليه إن كانت لديك الفواتير لكلا الورشتين وعندك أيضاً فواتير بالقطع فعليك
بالذهاب للشرطة وهم ياخذون حقك منه ويعوضونك
ويمسحون فيه الأرض ويتركونه عبره لمن لا يعتبر
وتذكر (((ما يضيع حق وراه مطالب)))
هذا رأيي والله يكون بعونك..وكل هذا من تجربة
لكن مع الفني في ورشة الرماية ركب لي مساعد دركسيون وطلع فيه مشكلة
ولما واجهته تهرب فما خليت شيء الا سويته فيه
حتى الاردني اللي في التخصصي ما سلم مني
والحمد لله صلحوا الخلل وكل شيء تمام إلى الآن
وهالسالفه لها اكثر من سنة..!
لذلك لا تسكت على شيء لك..

أخوك.. أبو فهـد

ملاعب الريح

07/04/2007, 03:41 PM

ماكان ودي أحط إسم الورشه ولا أقطع رزق الرجال لاكن درئاً للوقوع في المشكله مره أخرى الورشه هي (المميز).......

مـدحـدر

07/04/2007, 04:55 PM

ملاعب الريح

يا صبرك ياصبرك

لو مكانك ريال واحد ما يمسكه واطلع السياره من ورشته بالقوة

بس ما اجيه لحالي هههههههههههههههههههههههههههههههههههه

ابو ســــاره

07/04/2007, 05:00 PM

تبي الصراحة وانا اخوك وبدون تحيز اذا تبي شي مظبوط زود بالدريهمات .
لو رحت لم ورشة السليماني وهي الوحيدة المتخصصة في بيع وتركيب الونوش وركبت الونش عندهم سعر تركيب فقط 1000 ريال او ازود اشوي وسعر القاعدة 400ريال بعد هذا لو الونش شاريه من عندهم ولا مثل شغلتك اتوقع يزيدون عليك اشوي .
ومن المعروف وانا اخوك ان الونش اهم شي في تركيبه القاعدة يعني الورشة الي تقول عنها طيح عليك حدود 1000 ريال وسالفة ان الكهربائي اخذ 250 ريال هاذي ولله الي يبي لها كلام واجد عليه مره وانت شكلك تبي الونش راكب زي شد البلد وشولة وانا اخوك خله زي ما هو وركب له فاصل عادي بدون الرموت حتى .
لكن من وجهة نظري تبيقى الورش الي في منطقة القصيم في الصدراة من ناحية الجودة والسعر الجيد .

ملاعب الريح

08/04/2007, 04:26 PM

أشكر كل من رد وشارك وواسى:)

وأخص بالشكر أخوي أبو حمد (راعي الهدد) وأحب أقوله إن سعرهم غالي خاصه بالتوانك والسله اللي فوق الموتر لاكن أنا أتفق معك بالنسبه للجوده والتعامل والأخلاق الرائعه لصاحب الحلال اللذي يشرف على العمل بنفسه ولا تكاد تمر على الورشه إلا وتراه موجود........

تقبلوا تحيات أخوكم (ملاعب الريح)

المتامل

08/04/2007, 04:47 PM

رح لورشته وتفاهم معه واذا مانفع كلم الدوريات وخلهم يصفون عندكم واذا قالت الدوريات هذا شغل الحقوق المدنية قل ابي محضر ( علشان تمرمط فيه بالشرطه والمحضر يلزم المدعي عليه كفيل حضور )

او اطلب تحويلكم لضابط خفر الحقوق المدنية اذا اخلت الشرطه مسئوليتها في مثل هذي القضايا

بالطريقة هذي يمكن يطلع لك شي من المبلغ اللي دفعته

وخل صوتك رفيع ( خذوهم باصواتكم) علشان يقول هذا راعي مشاكل وخلنا نفتك منه

المهم لا تخليه قد ماتقدر

لاتنسا تطري الامارة بالشرطه لانهم يخافون من الامارة ومايبون اوراقها تمر عليهم :)

تحياتي

M o b d a

08/04/2007, 05:48 PM

يا خوك ..

والله إنك صبرت

لو إني مكأنك إقسم لك

السوري هذا ما يرجع لورشته مره ثانيهـ

إني لخليهم يحفروون قبرهـ ..

طيب ليه ما ذكرت لنا إسم الورشه ..

حتى لا يقع البعض في زي مشكلتك ؟..

الله يكون وياك إنشالله

ويعوضوك ويخسر هالسوري اللى فلها

بدون رقابهـ ..

ملاعب الريح

08/04/2007, 06:12 PM

أخوي المتأمل ما تسوى علي ظربة المشوار وحوسة الشرطه عشان 200 ولا 300 ألقاها إن شاء الله يوم لا ينفع مال ولا بنون.......

m o b d a مشكور على ردك والورشه إسمها المميزحسبي الله عليهم.....

تحياتي(ملاعب الريح)

شبح الصحراء

08/04/2007, 07:13 PM

يا خوك ..

والله إنك صبرت

لو إني مكأنك إقسم لك

السوري هذا ما يرجع لورشته مره ثانيهـ

إني لخليهم يحفروون قبرهـ ..

..

الكلام سهل :mad: انت تكتب ورا الكيبورد ولو كنت مكان اخونا ملاعب الريح ما ظنيت ترفع يدك عاد وشلون تخليهم يحفرون قبره؟! :no: هذا كلام واحد جبان ما يحب الخير لأخيه ، الدعوى ماهي فوضى فلا تحرث الشر الحق اذا ما صار في الدنيا يصير الآخرة وأفضّل أكون مظلوم أفضل الف مرة من ان اكون مجرم أو خريج سجون فلا تحرث على الشر .
أخونا ملاعب الريح حاول انك تقدم شكوى وتشهر بالورشة في المنتديات وتذكر القصة للجميع لكي يعلم الناس الغش الحاصل في الورشة ولا تنجر لكلام بعض الناس بالضرب والتعدي على صاحب الورشة فالمسألة ماهي عرض تروح فيها رقاب المسألة بسيطة إن شاء الله .

صلاح الدين

09/04/2007, 11:46 AM

الدرندس

09/04/2007, 12:00 PM

كان رحت لورشة المواهب او ورشة النويصر هم المتخصصين فيه

والسللللللللللللللللللللللللللللللللام

جي اكس أر 3

09/04/2007, 12:26 PM

السلام عليكم
كان الله في عونك اخي العزيز ملاعب الريح
يجب عليك اخي الكريم اخذ مشوره الربع
بهذا المنتدي الغالي علي الجميع وانشاء الله
هم من يدلونك علي الخيرين مثل اخوي ابو
خالد الله يحفظه من كل شر والله اني اجيهم
واعمل قواعد وتلحيم ولا يحاسبوني بشئ
ولاكن مدام الفواتير معك عليك الجوء الي
جه الاختصاص ،،
تحياتي

راعي الهـــدد

09/04/2007, 12:40 PM

السلام عليكم يا جماعة الخير

******

هدوا اللعب يا شباب

******

فيه نقطة أنتم مغفلينها هنا، تدرون وشي؟! أنا أعلمكم ...

هالمنتدى اللي أنتم تكتبون فيه

******

كم الردود؟

كم القراء؟

******

وكم واحدٍ يبي يسولف ويحذر إذا جاه أحد وطرا الورشة المذكورة أو سأل عنها؟

******

حسب علمي من أخي ملاعب الريح إنه هدده براعي الحلال والكتابه في المنتدى

لكنه ما حسب حساب ردة الفعل

******

بكل بساطة قاطعوه لاحد يطب عنده هو ومواعيده اللي بالأسبوع وزياده

******

وإن حصل طبع الموضوع بردوده وإرساله على فاكس الورشة المذكورة أتوقع إنه يبي يحسب 1000 حساب مع من يتكلم ووش لون يتعامل مع زباينه

******

وإلا أنا غلطان يالربع؟

******

واحد يتكفل بالفاكس بس وارقدوا عنه والله إن يضرب أخماس في أسداس

وإن حصل توزيع الفاكس عند باب الورشة هههههه مهوب شين

:D

تراني أمزح بالتالية لأنه ما يستاهل العنوة والله

بس موضوع الفاكس أنا أتصور إنه

OK

*****

والسلام عليكم ورحمة الله وبركاته

*****

والله وطحت وماحد سمى عليك يا راعي الورشة

أخوي صلاح الدين

رايك ممتاز

واستطيع القول انا لها

ابشر من ينفذ رايك ليقف عند حده هذا المستهتر

والذي اخذ سمعة على حساب غيره

ابشر والله من ينزل سمعته في الحضيض

وانا ومن هنا اجعل له فرصة اسبوع واحد من تاريخ اليوم الأثنين

21 / 3 / 1428هـ له فرصة اسبوع من هذا التاريخ

اما ان يرجع لأخينا والغالي على قلوبنا ملاعب الريح حقه

ويعتذر من تصرفه

او يبشر بالتشهير به في المنتديات جميعها

وسيصله الفاكس اليوم

وبعدها اذا لم يرد الحق فسيوزع في الشارع عند محله
وسينشر في المنتديات

اخوي صلاح الدين شكراً لك رايك مفيد في ارجاع حق اخينا

ويعلم الله لم نريد التشهير ولا التعدي على الغير ولكن من بدأ بالظلم فيستحق ماجاه ومع ذلك له فرصة الرجوع كرماً منا

قال تعالى : ( والذين اذا اصابهم البغي هم ينتصرون
.. وجزاء سيئة سيئة مثلها فمن عفا واصلح فأجره على الله إنه لايحب الظالمين .. ولمن انتصر بعد ظلمه فاؤلئك ماعليهم من سبيل)

أي ليس عليهم إثم المنتصر لنفسه وحقه وجزاء سيئة المسيء عقوبته بما أوجبه اللّه عليه. .

ولمن انتصر بعد ظلمه اي من ظلمه ضالم اياً كان مثل هذا الشخص السوري فأخذ بحقه منه فأولئك ماعليهم من سبيل اي

لمؤاخذتهم او نقدهم او قول مالك سنع يافلان ليش تسوي كذا

فأخونا ملاعب الريح لم يبدأ بالظلم

اخونا صاحب الورشة لك مهلة اسبوع

رد المظلمة والا التشهير عقابك وسيصلك فاكس بهذا الموضوع

اتمنى تزودوني يا أخوان بفـــــاكس المحل لاهنتو عـــــاجــــــلاً

escape_man

09/04/2007, 12:58 PM

انت في السعودية
المسؤوووووووووووووووول عن مثل هالمشكلة من هو ؟؟؟؟؟
وهل سينصفك والا رح جب خصمك؟؟؟
تمتع بالونش اسأل الله انه قدم خير عليك0
والامر لله0
الحمد لله فيه ميزان يوم القيامة ما يضيع لك حق
اخوك محمد الحزيمي

بيض الله وجهك يالحزيمي على هالكلمة

للاسف في هالمواقف ماتلاقي من ينصفك

مالك الا تربغ الرجال لين يعض الارض

ولا تكبر راسك وتحتسبها عند الي مايضيع شيء عنده

واحرص انك تنصى ولد الديره

حتى لو يلعب عليك فهو اولى من هالحنشل الحاقدين

الرهدن

09/04/2007, 01:40 PM

المميز شبعان ويكلمك من طرف خشمه00
لايفوتكم أبوخالد في المواهب 00 علوم رجال وسوالف غانمة ويكفي إنك تشوفه بالورشة لمتابعة عملك00
وأبو خالد من درب هاالأشكال اللي لحم أكتافه من خيراتنا00وأنا عارف مارايح تطلع قلوبكم00 لأنه سوف ننغش مرة ومرتين وعشر00لأنه لو كل واحد قاطعه منا 00 والله إن يهش الذبان 0
والسوري هو صاحب الورشة للأسف00
وأظن مادون الحلق إلا اليدين00 مخمس تدير صابره وتجعله يضرب لنا ألف حساب ويحترمنا ويحترم رجال بلدنا00
آه ياالقهر وبسسسسسس 00
ومن زود القهر إذا هددته بالشكوى قال وبكل برود رح إشتككككك :confused:
ليش يقول كذا00
لأنه أمن العقوبة فاأساء الأدب00
أحيانآ تشعر إنك غريب في بلدك ومابيدينك حيلة00
فما أقول إلا حسبي الله عليهم ونعم الوكيل وحسبي على من تستر عليه وعلى أمثاله00
فهو والله وافد أجنبي إغترف من خيرات وطننا وبلدنا فكان جزاء وطننا ورجالنا من هذا الجاحد أكل أموالنا بغير حق00
أقول00
خلوني أسكت أزين00

.

عابد

09/04/2007, 01:46 PM

الأخ في الله ملاعب الريح
السلام عليكم ورحمة الله وبركاته

اسأل الله تعالى أن يخلف عليك بخير في ما أخذ منك بغير وجه حق وأن يعوض يخير منه ز
أخي الفاضل
احتسب ما أصابك وأصبر والله سبحانه وتعالى يمهل ولا يهمل وتأكد بأن يوم من الأيام سعض أصابع الندم إن كان فعلاً قاصداً غشك.

أما الآن فعلينا جميعاً أن نحذر من هذه الورشة وغيرها من الورش التي تأكل أموال الناس بالباطل .

أخي الفاضل
لاتستغرب رد السوري عليك بهذه الفضاضاة فمن أمن العقوبة اساء الأدب

سفير الصمان

09/04/2007, 02:08 PM

كثيرا ماضاعت الحقوق على اهلها نتيجة عدم معرفتهم لأجراءات التقاضي

جفيل

09/04/2007, 02:16 PM

يابن الحلال..اذا كان راعي الحلال مايجي الورشه ولايشوف الشغل..أجل وش نبيبه هو وورشته.

الجفالي

09/04/2007, 02:24 PM

السلام عليكم انا حصلي الموقف هذا كانت ترتفع درجة الحراره في البر كل ماغصت داخل النفذان والعراقيب والمهم رحت لورش كثيره منها ورشة دومة الجندل يوم كنا طالعين للبر في جبه ويقولون بواجي ورحت لورشه ثانيه في الرياض وكل واحد ادج من الثاني يقولون فيه ورش في عنيزه ورحت لعنيزه وخربو الموتر بدال ما يصير جيب لكزس صار هيلكس مصدومه ورحت وقلت لهم رجعوه مثل ماكان عيو ورحت مسكت الزول وتمردغت في بطنه ويجي الكفيل واعلمه في السالفه ويقول الزول هذا دايم يجي هنا يسولف مع الهنود الي هنا ودايم يتجمعون هنا زوله الله يقلع من ما يعرف شي في المواتر هههههههههههه والدبره اخوي امسكه واللعن الي جابه عشان ما يتلقف على المواتر ويخربها ههههههه

راجح

09/04/2007, 03:08 PM

عوضك الله ..
ومبروك عليك الونش ...
والظاهر ان السوري هو صاحب الورشة ...

ابوعبدالله9999

09/04/2007, 03:32 PM

قل (( حسبي الله ونعم الوكيل ))

سفير الصمان

09/04/2007, 05:35 PM

(كثيرا ماضاعت الحقوق على اهلها نتيجة عدم معرفتهم لاجراءات التقاضي)

أيمن

09/04/2007, 07:07 PM

رد الله لصاحب الحق حقه ..

والحمد لله على كل حال ..

بإمكان صاحب الحق أن يدعي عليه وحينها سيصل لكل حق حقه بشكل وافي .. وبرضى إن شاء الله ..

قرأت الردود ووجدت فيها كثير من التشجنج وإصدار الأحكام وتنفيذها حتى من دون طلب صاحب الشأن .. وفي المقابل أيضًا ردود مشرفة عاقلة متزنة دالة على الخير موصية به .. فالمسلم متزن حتى في ردود فعله ..

وسأخبركم أمرًا أغفلناه - بلا شك - أنه: من الظلم والحيف أن تصدر حكمًا بعد سماعك لطرف واحد، ليس هذا انتقاصًا من الأخ الكريم صاحب الموضوع لكن الشرع حفظ لكل فرد حقه وطلب من المدعي البينة وللمتهم الدفاع عن نفسه وكل ذلك في مظانه من شرط ومحاكم ..

كما أن المنتدى وإدارته بريئة من كل عمل غير نظامي، تجاه صاحب المحل ..

أرجو منكم تقبل ذلك بكل رحابة صدر، كما نستسمحكم بإقفال الموضوع ..

تحيتي