وش رايكم في البالون للباث

[سرّاوي]

السلام عليكم ورحمة الله وبركاته

حياكم الله جميعاً ..........

اخواني وش رايكم في البالون اللي يركب في الياي للباث فايندر

هل هو عملي ؟
بالنسبه للمطبات هل تكون بعد تركيب البالون قاسيه بعض الشي ؟

هل يوجد لها أي البالونات عيار للهواء عند التعبة ؟ وهل فيها خطور على السيارة


بالنسبه لليايات الأستراليه أو المساعدات حلوة ولا ينزل الموتر لا كنها قاسيه وتفقدك الراحة وأيضاً ترفع الموتر


وجزاكم الله خير ..............

والسلام عليكم ورحمة الله وبركاته

[gx555]

السلام عليكم
انا مجربها. لها على الكروزر 3 سنوات عمليه جداً جداً في البر والا الديره والا سحب البرتبلات
خذها وتوكل على الله

[سرّاوي]

هلا والله اخوي gx555

لكن السؤال هل هي تغير من راحة السيارة يعني هل يصير المطب قاسي

واخيراً مشكوووووووور وما قصرت

[salehhd]

السلام عليكم

انا شفتها لاكن ماجربتها وعرف ان لها مقاس مثل الكفرات

وانا اشارك لاستفيد ايضاً من المجربين

[باث فايندر 04]

السلام عليكم ورحمة الله وبركاته ،،،




أخوي سرّاوي ،،

بالنسبة للبالون أنا مركبه من سنة وثمان شهور وهو للعلم مريح عند التحميل والموتر ماينزل أبد وهو يعبأ هواء عن طريق بلف (زي الكفر) وتزيد وتنقص الهواء على حسب الثقل اللي معك ولكن ما ينقص الهواء عن 10 ــ عشان ما يقرطه الياي ولا يزيد عن 30 ، طبعاً حسب علمي أنه أفضل من المساعدات الاسترالية الي تقسي المطب وتفقد الموتر راحته أما البالون فيمكنك تنزيل الهواء وزيادته حسب الحمل المراد تحميله ...





ملاحظة // إذا كان الموتر فاضي يكون مطبه قاسي

[.أبوعبدالرحمن]

السلام عليكم


كم سعره ووين القاه؟؟؟؟؟؟

[سرّاوي]

هلا والله اخوي salehhd

مشكور على مرورك

هلا والله اخوي باث فايندر 04

اخوي با ث فايندر......
اذد صار فييها الهواء عشرة تقول يصير المطب قاسي والسيارة بدون تحميل

السؤال ليش يصير قاسي أنا ما غيرت لا مساعدات ولا يايات وش السبب يكون المطب قاسي بس عشان البالون

لكن اتوقع والله اعلم ان البلون اخف بواجد عن الياي والمساعدات الأسترالية

اخوي محب الباري
شكرً على مرورك

مشكورين وما قصرتو ......................

[paaath]

السلام عليكم
اخوي إذا كان قصدك انك تبي ان الموتر ماينزل مع التحميل وانت عندك ياي استرالي
فنصيحتي لك انك تركب الياي الاسترالي ومساعدات البلد وراح يكون المطب دلع
وافضل من مطب البلد ولا الفرق والموتر ماينزل لاني كل شي سويته وهذا افضل حل وجدته
ملاحظة : لاتركب يايات ومساعدات استرالية جميع لانه راح يكون شاصي مو باث
وانت جرب وما راح تخسر شي
واعذرون على الاطالة ...........

[هواي البر]

السلام عليكم

اخوي (( باث فندر 04 )) و (( paaath ))

وين احصل البالوون في الرياض ؟

وكم سعره ؟

وهل تنصح بالشراء افضل من الياي ؟

واهم شئ توصف المكان في الرياض الله لايهينك ؟؟

وشكرا

[باث فايندر 04]

السلام عليكم ،،

أخوي سرّاوي ,,

نعم إذا كان الموتر فاضي ومافيه حمل يكون المطب قويسي لأن الباث بديه خفيف ولا يكون البالون عملي ومريح إلا عند التحميل ،، وممكن تجرب ما قاله أخونا Paaath وركب ياي استرالي مع مساعدات الوكالة وإذا ماجاز لك الوضع ركب البالون ...وإذا الموتر فاضي خل الهواء (5) وما عليه إن شاء الله .

وبالنسبة لموقع التركيب هو على طريق العروبة باتجاه الغرب بعد ما تتعدى جامع الملك خالد على يسارك تجيك محطة على اليمين والمحل فيها اسمه ( سيارات الدفع الرباعي) والسعر قبل حوالي سنه وثمان شهور 940 ريال ........


أرجو أن أكون أفدتكم ,,,,,,,,,,,,,,

[أبوناصر]

السلام عليكم


أخوي أنا مركب اليايات الاسترالية والمطب ولله الحمد والمنة ما أختلف علي أبد

بشرط انك تخلي مساعدات الوكالة

أو تغيرها بمساعدات منرو الأمريكية

أنا مجرب الحين المساعدات الأمريكية هذيو لها الحين على الموتر حول اسبوعين واطلع بها للبر ولا اختلف علي المطب أبد لأنها زيت وغاز


واليايات لها الحين حول السنة ونصف ولله الحمد المطب ما اختلف وتشيل حمل الموتر وتخليه ما ينزل

بس عيبها يرتفع الموتر من ورا اذا كان الموتر ما حمل شي أما مع التحميل يصير مضبوط


والبالون ما جربتها لكن كثير يمدحونها


وعيبها ما تحمل حتى تتفخها يعني ما يصير تحمل بعدين تروح للبنشر تتفخها

والأمر الثاني احتمالية قرصتها وارده مع المطب القوي وأنت محمل

وأيضا سعرها المرتفع مقارنه باليايات


والخيار لك


وبالتوفيق

[سرّاوي]

هلا والله بجميع من شاركوا بآرائهم ...............
اخوي paaath حياك الله

اخوي الباث 04 مثل ما قلت سعر البالون غويلي شوي

بالنسبه للياي والمساعد الأسترالي اللي أعرفه ان اللي يخلي مطب الموتر قاسي ويرفعه هو الياي فقط وهذا على حد علمي

اما المساعد فهو للتحميل يعني ما يخلي الموتر ينزل مثل أول وهذا أيضاً على حد علمي

جتني فكره :

ألا وهي أني اركب مساعدات استرالية فقط مع الياي حق الوكالة

هل تنفع كذا ................؟؟؟

حياك الله اخوي هواي البر ........ مشكور على مرورك

اخوي ابوناصر

اخاف اغير الياي والمساعد يطلع الباث شاص مثل ما قالو بعض اللي ركبو مساعدات ويايات مع بعض
تدري ليش : الباث مهوب مثل الاند ثقيل ويخفف من مطب الياي والمساعد الباث خفيف مقارنه بالاند

عل العموم ابوناصر مشكور وما قصرت


نشوف اراء الأخوان .......

[هواي البر]

هلا اخوي سراوي

ابشرك رحت اليوم وركبت البالوون عن الدفع الرباع !!!

صح ان المطب صار قاسي شوي بس يمكنه جديد !!

ان شاء الله يليين بعديين ؟؟

ولا الزين بعد يضمنه لك مده 6 شهوور على التركيب والقطعه ؟؟

وسعرها غالي مره ب 900 ريال

وانا سألت راعي المحل قلتله ليش انت غالي قال لاني اجيبها من برا من امريكا !!
يعني هنا مالها وكيل
هو الي يجيبها بس ......

(( على حد قوله )) <<<<<< متعوب عليها :)

وكيذا سعرها غالي ؟؟

والله يعين


وشكرا حبيت الافادة فقط

[صصعفق]

السلام عليكم


كم سعره ووين القاه؟؟؟؟؟؟
....مساء الورد فيه ورشه في الرياض يركبون بلونات من نوعARBاستراليه ممتازه انا مجربها على لاند كروزر 2002 GXR وكذى واحد من الشباب توضع بوصط اليايات الخلفيه ويطلع منها لي يخرم له في الصاجة ويوضع له بلف هواء عند التحميل ينفخ فيرتفع الموتر بشكل عجيب وسريع القيمه 900 ريال الورشه قبل ورشه ماي كار على طريق العروبه في اتجاه الغرب قبل مستشفى العيون والسلام عليكم ..........:j

[صصعفق]

ممتاز جدآ جدآ جدآ
لاتشاور تبي تدعيلي
وراعين الاستبنات الي تحت لاحكه ولا طقه بعد اليوم

[سرّاوي]

مشكورين وما قصرتو كلً بسمه



وبأذنه تعالى ابركّــــبه ...........

[أبو الكيف]

لمن أراد البالون سواء للباثفيندر أو الاندكروزر


فهو متوفر لدي بكمية


و السعر 550 ريال للطقم ( الخلفية )

فقط أرسل رقمك على الخاص