رايكم يهمني في فتك ربع 2015 توماتيك

[راعي المقانيص]

احبتي الكرام أعضاء مكشات
السلام عليكم ورحمة الله وبركاته

كما هو موضح بالعنوان حبيت استشيركم اخواني الافاضل في باترول الربع الفتك قير توماتيك 2015 من جميع النواحي مع العلم اني ابي استخدمه بر ومدينه هل هو نشيط وهل فيه كثرة أعطال بخلاف القير العادي وصيانته هل هي معقده والا لا وهل يختلف عزمه عن القير العادي وكيف ممشاه في النفود مع العلم ماني راعي مطامر والا مراقي ولا جور على الموتر
هذا وتقبلوا فائق احترامي وتقديري وارجو الافاده اللي تبرد الصدر

[راعي المقانيص]

احبتي الافاضل مافيكم احد جرب القير الاتوماتيك والا يعرف احد جربه ؟ ؟ ؟

[المميـز]

:

الفتك الصالون تماتيك مجربه ممتاز جدا وقوي وصبور ولايطلب
وانت بتاخذ ربع فتك يعني ماشاء الله اخف وانشط
عليك بالاستخاره بعد الاستشاره والله يكتب لك اللي فيه الخير
وانا مؤيد لرايك الله يوفقك

:

[راعي المقانيص]

:

الفتك الصالون تماتيك مجربه ممتاز جدا وقوي وصبور ولايطلب
وانت بتاخذ ربع فتك يعني ماشاء الله اخف وانشط
عليك بالاستخاره بعد الاستشاره والله يكتب لك اللي فيه الخير
وانا مؤيد لرايك الله يوفقك

:


الله يبيض وجهك وييسر امرك ياغالي وبعد اذنك انا اسمع من الكثيرين ان مشاكل الباترول في الكهرب ومشاكل طرمبة البانزين والكتاوت والكمبيوتر
ياليت يالغالي توضح لي اذا مر عليك من المشاكل هذي واسف على الاطاله

[AL-OTAIBI]

السلام عليكم,

سجل عندك واحد حبة شاص فتك تماتيك.
القير التماتيك قوي وصبور و مايعيبه شي جربته في وعر و في نفود ما يفرق عن العادي الشي.
لكن لا أخفيك اني تمنيت اني ماخذ عادي, مو عن شي لكن العادي له متعه و فزه حلوه.

من الناحية الميكانيكية تعتبر قيور الفتك الأوتو من أقوى القيور اللي صنعتها نيسان.

[saad1985]

خذه ولاتشاور موتر كفو وموفق خير

[الفهيد بدر]

خذه موتر شيخ ماشاء الله عليه

[مسير عليكم]

تماتيك نيسان ممتاز وصبور خصوصن الفتك لاكن كانك تبي الطرب بالعادي خصوصن البر والتغاريز مافيه زي العادي وبعد كانك من النوع الي ينسى البطاريه وتفضى التماتيك ماينتش

[مناسبات]

ممتاز جدا .
بس الواحد يخاف من القيرات الاوتوماتيك اذا لقا له واحد مغرز وبغى يسحبه .
ما هو مثل القير العادي تشد عليه ما تخاف .

[المميـز]

الله يبيض وجهك وييسر امرك ياغالي وبعد اذنك انا اسمع من الكثيرين ان مشاكل الباترول في الكهرب ومشاكل طرمبة البانزين والكتاوت والكمبيوتر
ياليت يالغالي توضح لي اذا مر عليك من المشاكل هذي واسف على الاطاله

ووجهك ابيض
بالنسبه للطرمبه .. لاتخلي بنزين الموتر يفضي للاخير يعني لاوصل الربع عبه بنزين
وبكذا تحافظ ان شاء الله على الطرمبه لو خليت البنزين فاضي مره تبي تحتمي الطرمبه ومع
الوقت وتكرار هذي الحركه شي طبيعي تنحرق بأي موتر
مشاكل الكهرب نادره وماتطلع الا بالفتك المكروف
والكمبيوتر كذلك مايخرب الا لاصار الموتر مستعمل واللي قبلك لاعب بالكمبيوتر
والكتاوت الان نزل كتاوت جديد لونه اخضر معدل ونادر يتعطل ان شاء الله
ولامانع من وضع كتاوت احتياط بدرج السياره
بالاخير اذا الفتك بتاخذه جديد على يدك لاتخاف منه ان شاء الله
الخوف من المستعمل ماتدري وش جايه من تعديلات وتغييرات
الا اذا اخذته من رجال تعرفه وفاكه جديد على يده
الله ييسر لك امرك ويكتب لك اللي فيه الخير

[بربنجي]

الله يبارك لك والله يعطيك خيره ويكفيه شره وجميع المسلمين

كم سعره وكاله للتماتيك والعادي

اعتقد من مميزات العادي لا قدر الله خلصت البطاريه تقدر تنتعه باذن الله

والله يحفظكم

[راعي المقانيص]

بيض الله وجيهكم ورحم الله والدينا ووالديكم احبتي الكرام يشهد الله كفيتوا ووفيتوا

وبالنسبه لو فضت البطاريه ومشكلة النتش او النتع مثل ماتفظلتوا امره بسيط باذن الله تعالى وهو المحول الكهربائي باذن الله انه يفي بالغرض ولا استغني عن رايكم بهذا الموضوع

وبالنسبه لاستفسارك اخي الكريم ( بربنجي ) انا لحد الان ماشريت ولا سعرت من المعرض ولا الوكاله ولكن شفت اسعاره على النت ماتتعدا 110000 مائه وعشرة الاف ريال رفارف .
وانا قلت استشيركم اخواني واحبتي الكرام قبل لا اطب ( ماخاب من استشار ) واذا نويت اشتريه باذنه تعالى وسعرته ابشر باللي يكتب لك تفاصيل سعره
هذا وتقبلوا فائق احترامي وتقديري

[مكسر الشداد]

انتبه من القير العايدي لا يقربك حنة هايلوكس قديمه

[محمد1415]

سعر الباترول فتك 2015


يبدا من 107 الى 143 الفل كامل فتحه


وللعلم الستاندر بدون مساحه خلفيه وبدون وطايات وبعضه يجي مراتب متقابله

[سقم المعادي 1]

مثل ماقال اخوي مكسر الشداد
الفتك قير عادي ماينفع حاشر مره و صرفيه البنزين فيه اكثر من التماتيك
التماتيك اريح للموتر ولك و الفتك مايحتاج عادي ماشاء الله نشاط و خفه نفس توني ماخذ واحد تماتيك
لكن مايجي قير تماتيك الا GL وفوق اللي هو نص الفل يجي مرايات نيكل و مساكات الابواب نيكل وفيه دفلك و بعضه يجي ثلاجه و من برا رفارفه سود
اما الستاندر S اللي تجي مراياته سود و مساكات الابواب سود هذا مايجي تماتيك الا ان كان فيه مورد يوفره الله اعلم انا بحثت في المعارض ولا حصلت بهذي الفئه تماتيك

[راعي المقانيص]

اسئل الله تعالى لي ولكم بالسداد والتوفيق وان يجعل دروبكم كلها سعادة ومشكورين وماقصرتوا