مشكلة في قير جمس 2005 ( حرارة+نتعه)

[Brhoooom2009]

السلام عليكم ورحمة الله

ياجماعة الخير عندي مشكلة في قير جمس سوبربان موديل 2005 8 مسمار 2500
المشكلة تظهر تدريجيا وتزيد كل ما احتر القير

شيكت على الزيت وطلع فيه شوية برادة لكن لايوجد فيه نقص وشفطت علبتين وغيرت علبتين جديده
لكن لازالت المشكلة موجودة !!
الموتر وهو بارد القير ناعم وسلس وتبدا حرارة القير ترتفع وتزيد الخشونة لين يحتر القير ل 150 وتطلع رسالة transmission hot بعدها طفيت الموتر

الله لايهينكم نبي حل لذي المشكلة لين كل ورشة يعطيني كلام والموتر توه موظبه مكينته ولاودي اوظب قير من جديد

[العمده 0ون0]

وعليكم السلام ورحمة الله وبركاته
اخوي انا حصلت لي نفسك مشكلتك قبل فترة وغيرت زيت القير ومن اسبوع تقريبا رجعت نفس المشكلة الصباح ما عندي اي مشكلة اما الظهر خاصة اذا كان مشواري طويل مع الحر وانحلت الحمدالله وكان سببها وجود هواء ونقص في ماء الرديتر0
جرب
ياالغالي اذا كان مبرد زيت القير داخل رديتر الماء شغل السيارة وافتح غطاء الرديتر واضغط بنزين بشكل قوي ومستمر بنفس الوقت ولاحظ مستوى ماء الرديتر اذا كان ما يغطي مبرد زيت القير فهو سبب في حرارة زيت القير 0
هذا والله اعلم

[Brhoooom2009]

لاهنت اخوي س ياليت توضح اكثر شلون اعرف الماء ناقص او لا

[1824]

حرارة زيت القير وصلت 150C او F لانها تختلف اذا C مصيبة هاذي عندك خلل في دائرة التبريد او زيت القير ناقص كثير تاكد من احدهما ولا تمشي على السيارة حتى تحل المشكلة ولا القير بيخبط بسبب الحرارة العالية للقير

[Brhoooom2009]

الحرارة وصلت لاخر شرطتين الحمراء

[العمده 0ون0]

ياليت توضح اكثر شلون اعرف الماء ناقص او لا
لاهنت اخوي
الصباح باالعافية والسلامة والموتر بارد شييك على ماء الرديتر اذا كان ناقص زده0
واللي اقصد من كلامي ياالغالي ان حرارة زيت القير مرتبطة بسلامة دورة التبريد في المكينة يجب ان تكون سليمة بشكل عام من جميع النواحي يعني هل حرارة المكينة طبيعية او فيه خلل نظام التبريد لاسمح الله0

[MSAN]

حرارة زيت القير وصلت 150C او F لانها تختلف اذا C مصيبة هاذي عندك خلل في دائرة التبريد او زيت القير ناقص كثير تاكد من احدهما ولا تمشي على السيارة حتى تحل المشكلة ولا القير بيخبط بسبب الحرارة العالية للقير


فعلا اذا ان الحرارة توصل 150 درجة مئوية فـ هذي مصيبة.. انتبه للقير للا يودع

ركب مبرد قير خارجي وريح راسك


بالتوفيق

[Brhoooom2009]

الحمد لله حلينا المشكلة
طلع مبرد القير فيه ترسبات وشبه منسد
سوينا له تنظيف وتسييخ وغيرنا زيت القير واللفلتر ورجعت الحرارة طبيعية