وش رايكم (فتك ولا فكسار ) !! [الأرشيف]

أبو الوليد 14

30/08/2013, 05:36 AM

السلام عليكم ورحمة الله وبركاته
اتمنى احد من الاخوة المشرفين يسوي تصويت لاني ما ااعرف الطريقة

واحد من الشباب يستفسر ومعه حدود ال80 الف ريال
فتك سوبر سفاري قير اوتو موديل 5-6-7
فكسار قير اوتو موديل 3-4-5

من ناحية الصرفية (لذلك هو مستبعد القير العادي )
من ناحية الراحة والرساوة
من ناحية الممشى و الخفة في البر والرمل
ومن ناحية الاستخدام بشكل عام

طبعا الرجال رجله مهب حارة ولا هو راعي تطعيس ومراقى بس يبي موتر يمشي في الخط والرمل مهب لا غرز ما طلع

وهو يبيه 3 سنوات قدام على الاقل

طبعا فيه مواضيع كثيرة عن الباترول واللاند كروزر لكن للاسف كان الاغلب يرد تعصب للسيارة
انا ودي مايرد الا المجرب للموديلات هذه فقط ب

أبو الوليد 14

30/08/2013, 01:00 PM

ياليت احد المشرفين يسوي استطلاع للخيارين اللي فوق

بندرفهد

30/08/2013, 01:05 PM

كلها تقوم بالواجب وكلها تادي المطلوب وتقضي اللزوم بس انا افضل الفتك وخاصه القير العادي وعسى الله يوفقك فالاختيار

GMC89

30/08/2013, 01:18 PM

انا افضل الجيب الفكسار الؤلؤي موتر مجربه انا ولكن جكسار
والنيسان ماجربته ولكن يمدحه اللي استخدمه

عساها تساهيل

30/08/2013, 01:25 PM

فكــــــــــسآر مع حبي للفتــــــك

الفيصلْ

30/08/2013, 01:31 PM

كل السيارتين جبارة وقويه بس الي بيشتري لازم ينظر للسياره للخدمات بعد مايشتريها
التويوتا متوفر قطعها في اي مكان واعطال شبه معدومه الا للاشياء الدوريه ومادام الرجل رجل محافظ سوف يخدم معه لاكثر من ثلاث سنوات وقطع الغيار اسعارها معقوله
البترول سياره قويه بمعنى الكلمه ولكن خدمات الصيانه صفر وتتعب وانت تبحث عن بعض القطع لو تعطلت لا قدر الله
وغاليه قطع غياراها
والله يكتب لك الي فيه الخير

باوزير

30/08/2013, 01:42 PM

اهم شئ اذا حصل نظيف ياخذه

خيال الغلبا

30/08/2013, 01:45 PM

الفي اكس ار مافيه كلام

لكن مااظن المبلغ يكفي للموتر النظيف

المميـز

30/08/2013, 01:47 PM

:

كل السيارتين غنيه عن التعريف وكلهم لهم نفس المميزات
وبما انه يبي يدور مستعمل مايقدر بحدد فكسار او فتك
كل اللي عليه انه ينزل المعارض ويدور النظيف
ان لقا فكسار نظيف وعلى قد ميزانيته لايوفره
وان لقا فتك نظيف وعلى قد ميزانيته لايوفره
يعني النظيف هو اللي يحدد له المصير فتك او فكسار
وان لقا كل الاثنين نظاف عليه بالاستخاره والله يكتب له اللي فيه الخير

نتمنى ان لايكون هناك ردود تعصبيه تجاه سياره معينه
حتى لايتعرض الرد للحذف والعضويه للايقاف والموضوع للاغلاق

:

abo naser 1

30/08/2013, 01:50 PM

فكــــــــــسآر مع حبي للنياسين
الأختيار الشخصي فتك
لآكن خويك يمشي معه الفكس v8 اذا ممشاه خطوط وديره ومكشات خفيف

سفير الجزيرة

30/08/2013, 02:03 PM

والله كلها من قوم ( خيره حيره )

لكن من ناحيتي رزة وشكل الفي اكس اجمل بكثر من الفتك

ومن ناحية مسكهن للسعر
الان صار ماتفرق
الفي اكس ار يمسك سعره
والفتك يمسك سعرة

لكن احرص على النظيف اهم شي

sgl2002

30/08/2013, 02:11 PM

بيتعب خويك ولا راح يحصل فكسار نظيف بهالقيمة

ونفس الشي للفتك الله يعينه مارح يحصل نظيف

كل هالمواتر اعوذ بالله اغلب مستخديمنها يكرفونها كرف الويل

لذك خله ينزل المعارض واللي يحصله اول شي فتك والا فكسار نظيف ياخذه مع اني متاكد انه ماهو محصل فتك نظيف ابدا

أبو الوليد 14

30/08/2013, 02:13 PM

يعطيكم العافية جميعا
بس ياليت ياجماعة الخير الافادة تكون في النقاط المطروحة فوق
الصرفية والرساوة و ممشاه في الخط والرمل
مثلا الفكسار اقل صرفية لا الفتك
قطع الغيار والصيانة السيارتين كلها معروفة وقطع غيارها متوفرة

أبو الوليد 14

30/08/2013, 02:19 PM

هو حاليا يدور النظيف يا فكسار يافتك بسعر قريب
لكن لابد من الاستشارة عشان يركز البحث على سيارة وحدة
ثم الاستخارة

بومالك

30/08/2013, 02:24 PM

سبق وجربتهن كلهن VXR 98 وفتك 2004 بصراحه الفكسار ممتاز بس يطلب قطع اكثر من الفتك عيب الفكسار كثرة

خراب كويلات البواجي . الجكسار صبور اكثر

الفتك موتر بر فقط رفيع وخفيف نفس يعاب عليه كتاوت البنزين حاليا معي فتك 2013

الولهان807

30/08/2013, 03:38 PM

لا تقرب الفتك يبي يشغلك بالحرارة

التعـ King ـديل

30/08/2013, 04:50 PM

فتك بعد تجربتي المؤلمه مع التويوتا

أبو الوليد 14

31/08/2013, 01:00 AM

جزاكم الله خير
وننتظر الافادة من بقية اللي جربوا الموترين كلها

ابوحسام9

31/08/2013, 01:43 AM

انا اوافق رئي مشرفنا المميز

الدليله1

31/08/2013, 01:53 AM

فففففففففففتك ولا تشاور

نايس × كول

31/08/2013, 10:27 AM

نيسااااااااااان واحرص ع اللولوي ترى مطلوب وقت البيع اكثر من الالوان الباقيه

المتلولس

01/09/2013, 01:02 AM

كلهن ممتازات مع ان موتري فتك

راعي الرود

01/09/2013, 04:34 AM

انا معي حول هالمبلغ و تعبت وانا ادور بالمعارض و انسى تلقى فكسار بهالمبلغ الا ان كانه 2000 - 2003 فوق هالموديلات مطيرين باسعارها

الفتك بالسبعين بتحصل 2005 شبه نظيف لك وينه اغلبهن مفحجه و مجلوده نص راعين الفتك حقين طرد ومقانيص

قررت ادور لي فتك 2004 نظيف ان طار سعره بيوصل 60 الف للنظيف مره و اوفر باقي المبلغ معي و إلى الآن ماحصلت شيء يستاهل

الله يعينك على الدوران بالمعارض كل عصريه

أنصر نبيك

02/09/2013, 10:35 AM

مع تخبط الحمراني وعدم توفر قطع الغيار للموديلات القديمة من قبل الوكيل الجديد انصحك لوجه الله الكريم
لا تبلش نفسك بشركة نيسان التي تركها الحمراني كالارض المحروقة

عرين نجد

02/09/2013, 10:38 AM

فكسار مايتقارن بالفتك ولا يصفط لا فى الراحة ولا فى الخط
الفتك يقارن بالجكسار لان مكاينها 6 سلندر
الفكسار 8 سلندر وروعة
احلا موديلات 2004 2005 2006 2007 وبس

أبو الوليد 14

02/09/2013, 11:14 AM

يعطيكم العافية
بالنسبة للمقارنة انا قارنت الفتك مع الفكسار واستبعدت الجكسار
بسسب ...
الجكسار ثقيل يالله يمشي في القومة
عند التجاوز على سرعات عاليه سيئ مرة
يصرف بنزين
مطب قاسي
في الرمل اداءه ضعيف
مايسوى قيمته
اما الفكسار ماااجربناه ابد
طبعا الكلام هذا من تجربة وهذا راي خوينا فيه ونا نفس الشي

SaMi83

02/09/2013, 12:33 PM

للرمله والخفه عليك في الباترول

abohmad

02/09/2013, 12:43 PM

شف وانا اخوك كانك راعى بران لاتقرب التيوتا لافكسار ولاجكس ار عليك في الفتك اما راعى الديرة سوا الفتك ولا التيوتا كلهن بتمشى معك بس اهم شى النظافه والله يوفقك

ابونبيل

02/09/2013, 04:52 PM

ارشح لك الفكسار فهو اريح وافضل بالخط
اما البر الفتك اتوقع اخف شوي بس النيسان وكيله سيء وفيه بعض المشاكل الي تكرهك بالموتر مثل هواء الرديتر !! ونقص الزيت

ولد الغلباء

02/09/2013, 05:34 PM

السيارتين كلها تقوم بالواجب اكن من ناحية تجربتي الخاصة افضل الفكسار لاسباب
صبر المكينة للفكسار شفت الفكسارات بالسوق بعضهن ماشي 600 و700 ولاشكو منهن ومعروف الثمانية سرندل تكد
الموصفات والفخامة ترجح لكفة الفكسار
الراحة بالخط وقلة اصوات الهواء ترجح للفكسار
الخفة بالمدينة السيارتين متقاربات وذالك لقوة مكينة الفكسار
سعر البيع على حسب محافظتك على السيارة والممشى والبدي
السعة الداخلية ترجح للفكسار وبقوة
الخرابات على حسب المحافظة على السياارة لو السيارة صينية وتحافظ عليها تكد معك ههههههه
الموديل بالقيمة اللي انت ذكرت ترجح لصالح الفتك
الشكل الخارجي على حسب ذوقك الخاص
بالاخير لاتنسى الاستخارة //وكل السيارتين عينين براس واحد وكل جيب له عشاقة
اتمنى اني افتدكم بما استطيع والمعذرة على الاطالة

4x4ofroad

02/09/2013, 08:34 PM

انا لي حول 4 سنوات اتنقل بين فكسار وفتك
كلها مواتر ينشد بها الظهر
بس بالنسبه لاستخدامي شفت ان الفتك يناسبني اكثر
بس اذا خرب مالك الا ورش معينه تصلحه
عيب الفكسار صيانة بطنه تكلف واجد مو مثل الفتك
صرفيه البنزين متقاربه
الرساوه وعزل الهوا متقاربه
عزل الصوت لصالح الفكسار
بالبر ما مثل الفتك
بالديره الفكسار اريح وبالبر الفتك اريح مع العلم ان الفكسار زين بالبر والفتك زين بالديره
والله يوفقك
على فكره جارنا عنده فتك يسوقه سواقهم وقد سالته اذا بيبيعه لما كنت ادور موتر وقبل يومين كلمني يبي يبيعه
سفاري 2 بني تماتيك ممشاه دون ال180 موديله 2006
اذا تبيه علمني على الخاص

لهايب نجد

03/09/2013, 10:13 AM

السلام عليكم
انا مستخدم للفي اكس ار صار لي 4 سنوات ,وقبله جكس وقبله فتك
رأيي الفي اكس ار ولا يبيلها نشده
السبب :
- وفرة قطع الغيار , رخص القطع , ورش الصيانة
-عزل الصوت , التحمل
- ما يتفكك
- مكينة تتحمل جور وكثرة استخدام ولافيها مشاكل
- البواجي تاخذهن ب 350 ريال تمشي عليهن اكثر من 200 الف كيلو, والعيب الوحيد تغيير سير التيمن كل 150 الف فقط
واللي يقول كويلات تخرب ومدري كيف هذا ما عنده سالفة
وانا اتحداكم اذا كان شفتو في اكس ار يدخن او ينقص وعداده دون ال 700 الف

ابومحمدالهاوي

03/09/2013, 11:16 AM

السلام عليكم
اذا انت سعودي وتعرف معنا حماية المستهلك اشتر فتك هههههه
انحش وانا اخوك انا قلبت الرياض فوق تحت ادور صوفة قير ماحصلت ركبت تجاري وخربت الحمراني متناشب هو والعيسى عشان قطع الغيار رافض يشتري قطع الغيار 2007 وتحت وانشالله بيحلونه بعد كم سنه والتجاره تتفرج
وعلى فكره ترا 60% من الباترل ينقص الرفرف الداخلي مع نص الرفرف واذا طلعت السوق شف بعينك
اسف ياملاك الفتك هذي تجربتي
VXR افضل

بومالك

03/09/2013, 11:18 AM

اما بواجي امشي عليهن 200 الف كيلو ود اصدق بس قويه

ولد الغلباء

03/09/2013, 05:19 PM

اما بواجي امشي عليهن 200 الف كيلو ود اصدق بس قويه

كلام اخونا صحيح انا معي فكسار ماشي فوق ال 210 والبواجي ماشكيت منها نهائيا

لهايب نجد

03/09/2013, 06:06 PM

اما بواجي امشي عليهن 200 الف كيلو ود اصدق بس قويه

اول شي مساك الله بالخير
طبيعي ردك لانك ما اقتنيت السيارة ولا جربت ، اذا انت تتكلم عن بواجي الجكسار تراها تفرق عن الفكسار قيمة بواجي الفكسار 350 تراها اريديوم والجكسار 50 ريال بواجي عادية
فلا تكذب الرجال وانت هزوة بينهم .
احترم تجارب غيرك وتكلم عن تجربتك كان لك تجربه او الزم الصمت لقيلة حيلتك
وياليت الاخوان يعقبون علي صحة كلامي من عدمه

ابوسند9

03/09/2013, 07:11 PM

اخوي
الفكسار يمتاز انه اوسع من الداخل من الفتك يعني اذا عائلتك كبيره انصحك بالفكسار
اما اذا انت راعي بر ومطامر انصحك بالفتك
اما الاعطال الفتك اعطاله خفيفه ومعروفه
اما الفكسار اذا انت راعي مطامر وبر اعطاله معروفه اذا قير اوتو توضيب وصوف ومقصات ودودة دركسون نظام فرامل اي بي اس ومره كارونه خلف ومره امام واللي يقول الفكسار ما يتفكك احب اقوله اللى هو ابو التفكك وقصوص البدي لكن اللي يدري سيارته ويحافظ عليها هذا شي ثاني لكن من ناحيه الجلد والكرف اشوف الفتك اصبر واقوى تحمل من الفكسار وهذا شي اشوفه بسيارات زملائي سواء جكسار او فكسار
الشي الاخر اللي اشوفه ان قطع غيار تويوتا الان اغلى من النيسان
واذا على البواجي عندي البواجي والله اني ماشي فيها الان فوق 200 الف وما عندي نيه اغيرها والفحمات كذالك تمشيك فوق 200 الف ومع هذا السياره اوتو
وسعر فحمات الفتك خلف ب 230 ريال وامام ب 220 ريال اصلي
والجكسار اخذها قبل سنتين من النهدي قدام فقط ب 480 ريال اصلي لموديل 2002 وما تمشيك 50 الف

قلب الاسدaaa

04/09/2013, 01:25 AM

الفتك يعاب الكهرب

4x4ofroad

04/09/2013, 02:40 AM

بدون عنصريه وتحيز بطن الفكسار مايتحمل مثل بطن الفتك
لكن مركب الفكسار اريح من الفتك
قطع الغيار حسبنا الله ونعم الوكيل كلها من غلا الى غلا
توفر القطع لصالح الفكسار
وبالنسبه للبواجي انا اغيرها كل 180 الف مع سير التيمن والفتك حولها وسعر بواجي الفكسار 350 والفتك 270
ياغالي الشباب ماقصرو كلن ادلى بدلوه وانت لك الخيار
وانزل السوق ودور النظيف ترى كلها مواتر بطله وفيها حقها من المميزات وفيها حقها من العيوب والمسئله مسئله اذواق وتعود

أبو الوليد 14

04/09/2013, 07:48 PM

بيض الله وجيهكم جميعا
وجزاكم الله خير
عقب هالردود والتصويت بدينا نميل للفتك بس ان شاء الله نحصل نظيف
ان حصل فكسار نظيف وبسعر معقول توكلنا على الله

4x4ofroad

05/09/2013, 03:49 PM

الله يرزقك بالمتر اللي يطيب خاطرك

رووس النايفات

05/09/2013, 11:35 PM

اختصاراً .. ومن تجربة لكزس وتويوتا وفتك ..

اذا لقيت فتك نظيييف خذ وانت مغمض ..

sgl2002

07/09/2013, 05:15 AM

ومازال شقران في المقدمة

ابولمارالحربي

09/09/2013, 09:52 PM

سبحان الله وبحمدة سبحان الله العظيم

تميم2222

10/09/2013, 10:51 AM

اما عن. القديم فاقولك فكسار. اما الجدد. فتك. ولا تشاور. بس احرررررص. علئ النظيفففقف

ابونوره 2004

10/09/2013, 11:05 AM

السلام عليكم من ناحيه الصرفيه معروف ان الفتك يصرف بنزين والرساوه والراحه السيارتين حول بعض ، والخفه في الرمل الباترول افضل . والاستخدام بشكل عام الvxr افضل. اللي تلقاه نظيف وممشى قليل توكل على الله السيارتين كلها ممتازه .

joblak

10/09/2013, 03:01 PM

والله اني متابع الاستطلاع وكنت متأكد ان الفي اكس بيشفط للفتك ما فيه مقارنه يالربع الا نسم الفتك بالفزه بس

اتجاه السحاب

11/09/2013, 09:27 PM

^^
الأستطلاع قريب من بعض الفتك 81 والفكسار84 وين الشفط؟!!مافي فارق كبير ..وكلهن سيارات ممتازة لكن الفتك للبر أفضل والفكسار للطريق أفضل.

تميم2222

12/09/2013, 05:11 AM

والله اني متابع الاستطلاع وكنت متأكد ان الفي اكس بيشفط للفتك ما فيه مقارنه يالربع الا نسم الفتك بالفزه بس

وش شفطه انت بعد. تسمع. بالمقارنه. شف النسبه وتعرف. قال شفط قال خخخخخ

الذئب الاليف

12/09/2013, 11:29 AM

فتك وبس

فتك وبس

بومالك

12/09/2013, 11:09 PM

الدليل على نجاح الفتك استمراره بجانب بطل الدروب

الفكسار المطلوب بالمقارنه تغير جذريا"

فالأمهات ادرى بعيالهن الصالحين

sgl2002

13/09/2013, 12:04 AM

هههههههههههههههه

صراحه بعد هذا الاستطلاع والنتائج اللي وصل لها

عرفت ليش دايم فيه مهاترات ومشادات بين اصحاب اللاندكروزر والباترول

لانهم افضل سيارتين بالخليج

joblak

14/09/2013, 07:31 PM

لا يكون انتوا شركا في شركة نيسان تدرون شلون عندي ان بومبو ابرك واريح واحسن من التيوتا و نيسان

الربع زعلوا فزاعه للنيسان هههههههههههه

sgl2002

15/09/2013, 12:39 PM

ومازال شقران بالمقدمه

انفاس الصباح

15/09/2013, 05:58 PM

يقول المثل : اذا تبي تحيّره خيره..كلهن فيهن حقهن بشرط النظافة
وما كنت بشارك لان الموضوع تطرق له كثير ..
لكن لفت انتباهي بعض الاخوان اللي يتكلمون عن صرفية البنزين للفتك فمن تجربه شخصية نص التانكي الكبير يوصلك من الشرقية الى داخل الرياض ولكم الحكم وظروف السيارة فتك كامل 2005كاملة الركاب وقير عادي وبدون مثبت والمكيف شغال اكثر الوقت والسرعة ما بين ال130 الى 160 احيانا

ولد الغلباء

16/09/2013, 07:43 PM

هذا الاستطلاع ان دل يدل على السيارتين عينن براس واحد كما قلت بالسابق

sulaiman.fj40

17/09/2013, 10:02 AM

من موديل 99 وانا معي فكسار 8 سرندل والان 2005 فكسار/ لايمكن مقارنته بالنيسان من جميع النواحي/صرف البنزين اقل/ اقوى لانه 8 سرندل/ اريح بالخطوط الطويله/ ارخص في قطع الغيار/ شيك لو بتبيعه/ رساوه بالخط/ وعدم قرقعه/
الفكس ار هو ملك الجيوب في الجزيره العربيه بدون منازع/

زحلول

29/09/2013, 04:35 PM

الفتك ومافيه مقارنه حتى بالعزم صحيح انه 6 سلندر لكن جبار وبالبر تمشي وتطرد ولاتخاف مشكلة التويوتا بطنه من تحت ماهو دفرنس من قدام لو تضرب جرف وهذا يحصل مع اي واحد راعي بر على طول رح للعضيب واشتغل بالفريولات انا ارشحح الفتك وحتى بالقطع رخيص عكس الفكسار نار وطلباته كثيرة
بس وانا اخوك اهم شي خذ فتك نظيف مرره واحرص على سلامة الكهرباء قبل المكينة والقير
انا معي فتك 2003 استخدمه بدون رحمه وهو سيارتي الوحيدة بر وديرة وادخله الوكالة بدون مايطلب شيء كل سنتين صيانه يكلف من 3000 -4000 وكلها شغلات استهلاكية انا اتعمد اغيرها لان مااحب اخلي الموتر لين يطلب واعتقد كل سنتين تحط هالمبلغ ولا شي بسيارة تخدمك في جميع رغباتك ،،،

أبو الوليد 14

29/09/2013, 11:18 PM

شكرا لكم جميعا على المشاركة و الافادة
وهذا متوقع والله من اعضاء مكشات بيض الله وجيهكم جميعا
للي معه فتك وللي معه فكسار اللي يطعمك من خيرها ويكفيكم شرها

الدليله1

30/09/2013, 05:35 AM

فتك اوبس مع احترامي للفكسار

محمد ابن عيد

01/10/2013, 10:43 PM

-

انا من عشاق الفتك قوه ورساوه وعزم
ولا هان الفكسار
والله ييسر امرك

الحبييب

01/10/2013, 11:49 PM

أبو الوليد 14

02/10/2013, 11:09 AM

السلام عليكم
انا متابع بصمت للموضوع ودورلي موتر باترول او في اكس ار
من قبل اراء الشباب الظاهر اني ابجزم على في اكس ار
و الدراهم حدود 80 الف والي رحنا وطي :D
ملاحضه انا ماجربت الباترول ولا الفيكس ار
الله يرزقنا وييسر امرنا والمسلمين اجمعين

الله يعينك للاسف الفتك شبه مقطوع من السوق معارض الشفا ما شفت إلا يمكن 2 ويوم جمعة وفي المعرض مهب في الساحة
والفكسار مالي السوق بس غالي سعر مثلا موديل2001 بحدود ال70
ويوم اكتب الموضوع كنت اشوفه بحدود ال60
انت إذا حصلت نظيف وسعره معقول زين

عريدان

02/10/2013, 02:54 PM

الفتك يتغلب حتى الان

وليد46

02/10/2013, 05:54 PM

الكدن1

03/10/2013, 11:32 AM

انا من ملاك للفتك لكن الرجال استشار ومثل ما يقول المثل( من استشارك دخل بذمك
)
لكن موصفات راعي الموضوع
تناسب الفكسار
لكن وين النظيف

بن كلثم

03/10/2013, 11:44 PM

من ناحية الصرفية (لذلك هو مستبعد القير العادي )
من ناحية الراحة والرساوة @ الرساوة والهداوه عندك الفتك ...
من ناحية الممشى و الخفة في البر والرمل @ ممشى وخفه عندك الفتك بﻻ منازع .....
ومن ناحية الاستخدام بشكل عام @ عندك gxr v8 اذا ناوي ماتزيد وﻻ تنقص في وكالته اما إذا بتعدل وترهم خلك على الفتك ﻻنه يستاهل الخسارة فيه ..... باختصار إذا المبلغ جامعة بمشقه خذgx واذا انت موظف وبخير خذلك فتك بكل المقارنات على التيوتا صك