لأصحاب الخبرة في الباترول استفسار عن الحرارة

[SALEH66]

السلام عليكم ورحمة الله وبكاته
أخواني

معي باترول موديل 99 بخاخ
عليه مراوح سوبارو

فيه مشكلة الحرارة إذا وقفت السيارة أو صار الاستخدام داخل المدينة ترتفع خاصة مع اشتغال المكيف

أما بالخط الحرارة طبيعية

سيخت الأديتر ومازالت المشكلة

فكرت ألغي مراوح الكهرب بحيث يكون فيه مروحتين أمامية مع المكانيكية

مع العلم أنه الآن تعمل السرعة الثانية للمراوح بالإضافة إلى مروحة امامية مع اشتغال المكيف

لكم شكري وتقديري مسبقًا لتعاونكم وحسن تجاوبكم.

[SALEH66]

أرجو من المشرف نقل الموضوع للمكان المناسب

وأعتذر عن وضعه هنا بالخطأ.

[الوعل888]

انا معي ٩٩
فيه مراوح كهرب فقط لكن لا أعلم بنوعها لاني شريته كذا
وهو كبليتر اكلني بالبنزين كل ٢٣٠ كيلو لازم اعبي التانكي
المهم محور حديثك تبي الجد دخلت مره النفود ٢٠٠ متر بالصيف اخر العصر
حرمت ادخل بعدها الحرارة على طول تجاوزت النصف وطلعت
قلت مابدهاش ما ادري شو فايدة الجيب
يمال العمر يالتويوتا

[التعـ King ـديل]

عندك مشكله بالتسليك والكتاوت

مر على ابو ريما ( سليمان الخطيب ) بصناعيه الدايري وان شاء الله امورك طيبه

[المميـز]

:

كم توصل الحراره اذا ارتفعت ؟
وهل تم مسح رأس المكينه قبل كذا ؟


ينقل للخيمة المناسبة

:

[sgl2002]

انا معي 99
فيه مراوح كهرب فقط لكن لا أعلم بنوعها لاني شريته كذا
وهو كبليتر اكلني بالبنزين كل 230 كيلو لازم اعبي التانكي
المهم محور حديثك تبي الجد دخلت مره النفود 200 متر بالصيف اخر العصر
حرمت ادخل بعدها الحرارة على طول تجاوزت النصف وطلعت
قلت مابدهاش ما ادري شو فايدة الجيب
يمال العمر يالتويوتا



ياطويل العمر عندك مشاكل بالموتر

اول شي الكلبريتر عندك شكله معدوم لان الصرفية غير طبيعية

الصرفية الطبيعية 350 بالتانكي و450 اذا ماسك خط ومهدي


الحرارة غير طبيعية وانا مستخدم نفس موترك واجد وادخل النفود بدون تنسيم ولا يتعدى الربع الحرارة


سيخ الرديتر ورجع مروحة البلد لان مروحة الكهرب ماتنفع وتأكد من عمل المراوح الامامية وغير البلف والماء والغطا مره وحده وتاكد ان طرمبة الماء تعمل


وبعدها ماتعرف الحرارة

[ابو فهد...]

انا معي زي موترك بس سلقه مكينته كلبليتر مركب مراوح سوبارو بالنفود وبدون تنسيم تاصل الشخط الثاني ولا تتعداه ولهن الحين حول 5 سنين زي الفل
اما بالنسبه للصرفيه اذا كان عندك كربون فان المكينه يبيلها تصفيه اول شي غير البواجي وبشرنا وش يبي يصير عليك

[حزم الفيضه]

هذاء طبع النيسان وبو طبيع مايجوز عن طبعه


وده للمعارض وارتاح هذي وجهت نظري

[مدرس بالغصب]

معي 95 غيرت كل شي له علاقة بالحراره ولا زالت فوق النص شكلي ابحرق به

[شاص نيسان 93]

^^^

وش اللي صلحته بالموتر
عطنا المشكلة يمكن نلقالك حل

[الوعل888]

ياطويل العمر عندك مشاكل بالموتر

اول شي الكلبريتر عندك شكله معدوم لان الصرفية غير طبيعية

الصرفية الطبيعية 350 بالتانكي و450 اذا ماسك خط ومهدي


الحرارة غير طبيعية وانا مستخدم نفس موترك واجد وادخل النفود بدون تنسيم ولا يتعدى الربع الحرارة


سيخ الرديتر ورجع مروحة البلد لان مروحة الكهرب ماتنفع وتأكد من عمل المراوح الامامية وغير البلف والماء والغطا مره وحده وتاكد ان طرمبة الماء تعمل


وبعدها ماتعرف الحرارة

الله يجزاك خير

والله هالموتر أكلني ومستمر بالأكل ما يشبع
نحط فيه وما يشبع
يركب عليه بخاخ لاجل أحل مشكلة الصرفية ؟!

[مدرس بالغصب]

كل مايتعلق بالحراره من رديتر وخراطيشه والبلف فاكه والسيور والمروحة وكلتشه زينات
اخاف ان الامبير قراءته ماهي صحيحه

[abo naser 1]

انا معي 99
فيه مراوح كهرب فقط لكن لا أعلم بنوعها لاني شريته كذا
وهو كبليتر اكلني بالبنزين كل 230 كيلو لازم اعبي التانكي
المهم محور حديثك تبي الجد دخلت مره النفود 200 متر بالصيف اخر العصر
حرمت ادخل بعدها الحرارة على طول تجاوزت النصف وطلعت
قلت مابدهاش ما ادري شو فايدة الجيب
يمال العمر يالتويوتا


معنا 98 كربريتر ربع عليه سوبارو وفرار وهدرز وبواجي البنزين يمشينا مايقل عن 450 والى 600 كيلو حسب رجلك

والحرارة ترتفع مثل وضعك والسبب عندي المراوح سوبارو الصغار وما تغطي الرديتر هذا الي أشوفه والشتاء ثلاجة في أقسى الظروف

[abw1122]

اخوي اذا على الخط الحراره زينه
وفي الديره ترتفع
معناها نقص في هوا التبريد
اما ركب المروحه المكانيكيه مع التماتيك اصلي
او ابحث عن الخلل في المراوح الي عندك

[مهند 2009]

وعليكم السلام و رحمة الله وبركاتة

أسهل حل ركب مروحة البلد وشف الوضع

مع العلم أن مراوح السوبارو ماينفعن على الباترول

عندك مروحة قراند شروكي او فورد ( هذولي ممتازات للباترول )

ولا تتعدى البلد أذا ماتبي وجع الراس و الحرارة ومشاكل الدينمو

[شاص نيسان 93]

مراوح السوبارو هي الأفضل

إذا كانت اللي على موترك صغار لازم تفكها وتركب كبار سرعتين

[عنزي من نجد]

شيك على المراوح اللي قدام اللي تشتغل مع المكيف وبتلاقي وحده منهم اسرع من الثانية لان الدينمو حقها ضعيف أو لو تنتبه لها تحصل وحده منهم ما تشتغل أحيانا وإذا سرعتهم سوا شف لك مؤتمر زي موترك وقارن السرعة وهذا احتمال ضعيف أن المروحتين كلها ضعيفه أنا عندي مثل موترك وخربت علي ثلاث مرات ونفس الوضع حراره بالبلد وإذا مسكت خط ما ترتفع وإذا موقعك بالرياض وتبي تتأكد من سرعة المراوح راسلني وأبشر بسعدك

[مركز حراره]

ممكن عندك مشكله بتسليك او الدينمو ظعيف لابد تفحص

[SALEH66]

الله يجزاكم خير يا اخوان

مريت مركز حرارة بعنيزة وانحلت المشكلة

[العطاوي a511]

وشلون حل المشكله

[الوسم]

طيب ؟؟؟ وش صار معك ؟؟؟ لا تبخل بالمعلومه الله يجزاك خير