....... تدهيل الشايب للطير .........

[قلب ذيب]

http://www.mekshat.com/pix/upload05/images252/mk48933_abudhabi exb.008 026.jpg
اسعد الله اوقتكم بكل خير .
الطير علاه له قصه جميله تؤكد ان الصبر على الطير والتعب معه , مهاره لايجيدها كل صقار ولايتحملها , قنصنا موريتانيا في احدى السنين الماضيه , وقد أحضر احد الاخوه
الطير اعلاه معه , وكان الطير توه منقول من الربطه , كان الطير كثير الخفقان لايهدأ تقول وحش , كلما شله واحد على يده وكشف برقعه ظل يخفق لأكثرمن 10 دقائق متواصله ! زهّق بالجميع البعض قال لصاحبه خساره انك تجيبه معك والبعض الاخر قال . هذا الطير لايمكن تربيبه وتدهيله ؟ ابتلشوا فيه قام راعيه وعطاه شايب قانص معنا ماعنده طير , المهم الشايب قام ينقل الطير على يده ليلا يعشيه على يده وهدأ الطير لكنه ظل على طبيعته يخفق ولايركد على اليد او على الوكر.
.. المهم انكفنا وخذى الشايب الطير معه لمقر ابله في شرقية السعوديه ,وقام يدهل الطير ويركده الى ان هدأ , وقام وربطه في عشه عند ابله !
دارة سنه , واذا اخبار الطير تصلنا بأن الطير صاد حبارى وقت العبور ! وبأن الطير ياتي على الملواح من احسن مايمكن , في الربيع مريت على الشايب اسلم عليه واذابالطير على الوكر في طرف الخيمه كما هو في الصوره
سبحان الله هذا اطير ؟
قال : نعم هذا (قشبار) !
قلت : والله انك صبرت عليه , لوكان عندي كان فكيته .
قال : الطير يبغي له صبر لين تعرف قرارة نفسه .
قلت ليه سميته قشبار . قال كان مشبر ماحد يبغيه !؟
... تلك هي واقعة ذلك الشايب الذي صبر وتحمل ونجح في اعادةذلك الطير الى مكانته .
دمتم بخير .

[طيار قطر]

اكييد اخوي الطير نفس وتختلف من طير لطير واذا الصقار عرف نفسه باذن الله بينومسه

[راعي لادن]

ما شا الله الطير شكله زان الله يرحم راعيه تسلم يمينك على الموضوع

[Hamad18]

اخوي قلب ذيب شيبانا مانتعلم الا منهم الله يطول عمارهم
ويرحم من مات تراكم السنين والخبره تخلي نظراتك بعيد
وتزيدك صبر وعلى ماقيل اكبر منك بيوم اعرف عنك بسنه
تحياتي وتقديري لك

[لبيه يمنادي]

مساك الله بالخير يابو ماجد

الشيبان هم الخير والبركة وهم المدارس اللي نتعلم منهم ونكسب الخبرة من تجاربهم ....

السنه كانت لي تجربه وقصة تحدي مع احد الربع علي احد الطيور ...التحدي هل ممكن أن الصقار يقدر يعلم الطير ويصبر عليه لين يتلعم ويصيد .. وهل يقدر الصقار يقوم بدور الوالدين للصقر في التعليم خاصه ونحن نعلم بان الطير يتعلم من خلال المشاركه من الابوين او الطيور اللي مثله. .. وهل يستطيع الصقار تعليم الطير كل شئ من الألف لين الياء ..... طيران وصيد وتعليق وغيرها الكثير من الأمور ..... الطير شاهين شاهين وكان الطير عند أخوي خليفة المرر عسي ربي يطول بعمرة ويبقيه .... الطير كان هو حاجزة وكان بيني وبينه اتصل وكنت اسأله عن طير شاهين شاهين فقال أنا طالب طير اذا وصل وجاز لك تراه واصل .. لأكن تراء الطير ماشاف نور الشمس من غرفة التفريخ علي الطيارة علي طول ولا يعرف شئ أبدا .... قلت في نفسي هذا التحدي اللي أدور عليه من زمان ...
بعد مدة اتصل علي أخوي خليفة وقال لي حياك .... يومها كنت في دبي .. قلت له أبشر باكر المغرب القهوة عندك أن شا الله .. وصلت علي الموعد يوم دخلت المجلس وتقهوينا .. قال لي يابو مرشد أبشر أن الطير وصل .. وهذا هو الطير ... شفت الطير مشا الله عليه .. وأنا كل تفكيري في التحدي اللي بيني وبين نفسي علي إنجاح هذا الطير مهما كلفني من الجهد والوقت ... أخذت الطير وبديت معاه رحلة من المتعه والتشويق في إشباع رقبتن في نفسي في ترويض وتعليم هذا الطير اللي مايعرف حتي ابسط الأمور اللي يعرفها الطير العادي ... يا جماعات الخير حتي الوقفة علي المنقلة مايعرف ..... أخذت معاه أسبوع أعامله كأني أعامل طفل ياهل .. أداريه في كل شئ أتكلم معاه مثل ما أتكلم من واحد من العيال .. مرت الأيام وأنا أشوف تجاوب الطير معاي كل يوم يزيد تشوقي لتعليمه وصيده أكثر والحمد لله بعد شهر تقريبا وبعد ماعلمته علي التلواح وبعض البط والحمام وغيرها من العلايم. بديت معاه علي اول علومه وهي الحبارى .. وكانت جهوزيت الطير تقريبا للتعلم ٩٠٪ .... ربي وفقني وحصلت علومه وأخذتها كانت غاليه شوي لأكن مايهم .. وجاء وقت الهدد قررت في نفسي وحسب ماشفت من فعله عقب التعليم أني اهد له الحبار هدد طيار .... والحمد لله كان ظني فيه طيب ولا خاب ... هديت الحبارا من راس ذاك العرقوب ويشهد الله ياجماعه انها طارت تقول طايرة من المخمر .. يوم صار بيني وبينها قاربت ١٥٠ متر أخذت برقعه .. ألا وهو يأخذ عمره .. يا جماعات الخير يشهد الله انه طار من كفي وطار قلبي معاه ... شوي إلا وهو معلق الحبارا ... قلت في خاطري الحمد لله تعشاء عساه عليك بالعافية .. خليته لين شبع ... وكانت ذا السنه وذا الطير أغلاء ماجاني من اخوي خليفه المرر عسي ربي يطول بعمرة ..

يا لربع بالصبر والجهد نقدر نحقق كل شئ ونوصل للي نبي ... كم من الصقاقير نشوف تعاملهم مع طيورها والله العظيم أن الواحد قلبه يعورة علي الطير ... يشهد الله أني شفت احد الصقاقير يظرب طيره بالمنقله علي راسه .. وش تنتظر من طير تظربه واتشين فيه ...

شكرًا لك ياخوي بو ماجد علي هذا الموضوع اللي شوقني

تقبل تحيااااتي

[ذراع الذيب]

السلام عليكم ورحمة الله وبركاته


هلابك يابوماجد


يالله حيه


الصقارة بالطير يبيلها صبر وطولة بال وانشهد ان هالشايب ماجات صقارته من عبث


وحنا نتعلم منكم جميع ولآهنت يابوماجد على السالفه امتعتنا بذكرها ولآهان اخوي ابومرشد امتعتونا جميع كفيتوا ووفيتوا

[قلب ذيب]

طيار قطر . هلا وغلا حيا الله ربعنا وجماعتنا هل قطر الطيبين ماسطرته هو عين الحقيقه .
راعي لادن . حياك الله اللي عطى الطير توفى واللي دهل الطير مازال حي يرزق الله يعطيه طولةالعمر .
Hamad18 . اثمن حضورك , صدقت الشيبان خير وبركه ومنهم نتعلم .
لبيه يامنادي . شكرا على طرحك تجربتك الفريده , والتي تؤكد خبرتك المفيده في الصقاره , اثريت الموضوع
بهذا الموضوع , حقيقه انا استفدت من طريقتك وصبرك ونجاحك , الكثير من الصقاقير يريد الطير جاهز للهد بدون ان يتعامل معه منذ بداية تعليمه , والبدايه مع الطير هي الاهم في الصقاره والمقناص . اثمن حضورك .

[قلب ذيب]

ارحب يامشرفنا الغالي / ذراع الذيب .
تواجدك يسعدني , دورك دائم مميز في دعم الحاضرين ومصافحة مايكتبون .
الله يبارك فيك ويسلمك ويوفقك . . . امين .

[جير دبي]

موضوع متميز من متميز ....
الصبر يابو ماجد ،،
كانوا شوابنا ينقلون طيورهم مفرعات
ويمشوبهن بالسوق بقصد تدهيل الطير
وعندهم هذا الشي اساسي في الصقارة
،والطير كل مارب تسهل نقلته
تحياتي وتقديري .

[رعد المطر]

شكرا اخي الكريم على الموضوع الجميل شوقتنا ونشطنا
لاعدمناك يالذيب00

[الوريمان]

عليكم السلام ورحمة الله وبركاته

ومشكور على هالموضوع الطيب
والله انهم مدرسه صحيح هالشيبان وماشاءالله عليهم كلهم صبر على الطير .
وحصل معي انا هالموسم شريت طير فرخ وحش اول الوقت ولافيه فيه فايده لاهو اللي يبي يجي على دعو ولاهو اللي يلحق الحمام ولا اللي يهد على البط والحبش ولابي الهدد اين كان والطير مكافخه واجد ومزعج فالموتر ولافيه حليه اخذ معي من تاريخ 10\9 ميلادي الي شهرين تقريبا؛ وكل مابغيت افتك منه الا واحد من الربع ابلشني استخير هالمره ثلاث يردني عنه اصبر اصبر؛الله يجزاه خير؛ ويجي يوم من الايام الا الربع معهم جير وبي يورنه بطه وقالم شف عن طيرك جرب فيه هالمره المهم وقلت شوركم واهداية الله ان شاء الله واريه البطه من متين متر تقريبا واهو يتل وماله الا الرقبه جنه يقول ماعندك اجزل منها واعزله وابعد خمسميه متر او اكثر تقريبا وينطلق مني وسبحان الله من عقبها انطلق معي الطير وصار يطلع على الرومي اكثر من كيلوين وركد على اليد وصاد معي من غير تعلوم الكراوين طلوع وصاد من الحويم قومه وقعده وقوى وجناحه مع الكراوين والحويم ولحوقه طيب والحمدالله مايرغب على الحمام بالمره والحين مابدله فالطيور وكل يوم يزيد غلاه . :l:l

[النااااااادر]

السلام عليكم ورحمة الله وبركاته


الشيبان هم اهل البركه وهم من اوصل لنا هالهوايه وعلمنا عليها


فاكيد خبراتهم وصبرهم على الطير غير عننا


فالك الجنه

[قلب ذيب]

ارحب ياجير دبي . تواجدك يفرحني .
الوريمان . من صبر ظفر المهم تعبك ماراح سدى .
النادر . هلا بك مرورك يسعدني .

[نجم404]

هلا وغلا يابو ماجد دائم تمتعنا بمواضيعگ المميزة وعلومگ الغانمة


تحياتي لگ

[تميم2222]

الراكاده في تدهيل الطير مطلوبه وبعض الناس عجله في التدهيل ... والشايب حكيم

[عبدالرحمن بن ذياب]

الطير يبغى له رجالٍ حليمين
تصبر عليه و لا تحسب الخساره
و تعليم طيرك لا تظنه بيومين
أعرف طباعة ثم ساير مساره
وخلك مع اللي بالصقاره قديمين
واكسب بخوتهم أصول المهاره
و الطير طبعه مختلف شين مع زين
و أحيان ليله يختلف عن نهاره
لا تنهره تراه يرقبك بالعين
يعرف مزاجك كان فيه إعتكاره
هذي بعض أشياء محنا خبيرين
و النقص يوفونه رجال الصقاره
مكرم الضيف
#poem_5171e3916df05 TD { FONT-FAMILY: Tahoma, Verdana, Arial, Helvetica, sans-serif; FONT-SIZE: x-large; FONT-WEIGHT: bold}