ماجيت الا ابي فزعتكم بمشكله عجزوا الكثير عنها ..

[ابراهيم صالح]

السلام عليكم ورحمه الله وبركاته ..

مساكم الله بالخير جميعا .. انا متابع للموقع بشكل يومي كزائر ولكن اليوم احتديت اسجل للمشوره ..

المشكله يااخوان انا معي باترول 91 شاريه من صديق لي .. الموتر قبل لا اشريه قال ان فيه ونه في رمان القير يطلع الصوت خفيف واذا اسرعت زاد لكن اذا وضعت رجلي اعزكم الله على الدعسه يختفي الصوت واذا رفعت يرجع مع العلم الصوت يظهر سوا كان القير معشق او على الفاضي او ضاغت كلتش او لا الصوت موجود .. ذهبت لورشتين قالوا كارونه ولكن صاحبه يقول اني مريت ورشه وفحص قالو احتمال رمان قير .. مع العلم ان الصوت له سنتين معه وماضره ويسافر عليه ويروح ويجي .. الصراحه هبل بي ذا الصوت وضيق صدري ماودي المس لا كارونه ولا قير الا لما اتأكد ومثلكم اخبر ,, اتمنى من الاخ كبسوله يفيدني وباقي الاخوان الي لهم خبره في هالموضوع .. والله بتفرجون علي

[ماجد الحايلي]

وعليكم السلام اخوي ابو صالح
انا والله ماعندي اي خبره بهالامور
بس اذا فيه مشكلة برمان القير
انا اضمن لك انه ماراح يكون فيه
مشكله ابدا مجرد صوت مزعج وبس
وكان معي جيب ربع 2008 تويوتا
وفيه نفس الصوت ماصار له شي مع
اللي قبلي ولا معي ولا مع اللي بعدي
وهالحين ماشي اكثر من 300 الف
واللي اشتراه مني حار عليه بالحيل
هذا اذا المشكله عندك من رمان القير
والاخوان مايقصرون معك

[ابراهيم صالح]

بيض الله وجهك يامآجد .. طيب بسالك هل الصوت معك يطلع اذا فكيت الدعسه ويختفي اذا حطيت رجلك عليها .. ؟ وسواء كان معشق او لا ..



لان ابي اعرف وش المشكله بالضبط والتصليح امره هين ان شاءالله

[ماجد الحايلي]

لا اذا كان معشق مايطلع شي ابد
والصوت يطلع اذا انا مثبت الدعسه
على السرعات الخفيفه من 100 وتحت
او اذا خليته بنمره ثقيله وابطيت مابدلت
التعشيق يطلع الصوت
ومثل ماقلت لك ماعندي اي خبره
ميكانيكية بهالامور
والله يسمح دربك ويوفقك الى
مايحبه ويرضاه

[ابراهيم صالح]

لاهنت والله يالغالي .. ماقصرت ..

وننتظر الشباب يزودونا بحل المشكله ..

[بدوي جنوبي]

غالبا اذا فيه صوت في الرمان وضغط كلتش يختفي او يخف

[خبايا انسان]

هذي فحمة كلتش ,, اذا ضغطت الكلتش يروح الصوت , والله اعلم

[ابراهيم صالح]

الصوت مايروح اذا ضغطت الكلتش .. ولا يظهر الا اذا الموتر كان ماشي ..


لاهنت اخوي خبايا انسان ..

[SGL]

أذا أكتشفت أنها من رمان القير الداخلي أنصحك بتركيب جربكس ثاني لأنه نادر اللي يظبط
الجربكس بعد فكه قطعه قطعه

[ابراهيم صالح]

لاهنت والله ياخوي
sgl (http://www.mekshat.com/vb/member.php?u=154672) لكن انا ابي اعرف المشكله بالضبط وشهي . اذا لك خبره بصوت الرمان الداخلي ياليت تفيدني ولو صار جربكس بركبه جديد ماعندي مشكله ..

[SGL]

أول شي هل مركب فرار لأنه يمكن يكون من العمود أو رمانات البنيو أمكن الزيت ناقص أوماينفع وشوف الدبل أمكن مافيه زيت شيك وشوف وحاول تفصل الدبل وتشوف يروح الصوت أذا مركب فرار تمام وذا موراكب فرار فك العمود

[ابراهيم صالح]

الا يالغالي مركب فرارات .. وطبعا الصوت بدون مااشبك الفرارات لكن ماجربت اذا كاانت الفراراات مشبوكه .

[التعـ King ـديل]

العلم الاكيد بعد الله سبحانه وتعالى عندك ورشه باترول في الصناعيه القديمه

وانت على الدائري الشرقي ووجهك جنوب بيجيك مخرج 17 ادخل يمين وانزل غرب امش لين يجيك نفق بعد النفق ثاني اشاره يسار وبعدين ثاني تقاطع يمين اول ملف يمين تدخل معه و بعدين تدخل اول يسار تمشي 200 متر هذي الورشه يسارك اسم الورشه ورشه باترول اسأل عن صاحبها ابو صالح التركي ( تراه سعودي مب تركي :D)

[العمده 0ون0]

وعليكم السلام ورحمة الله وبركاته
الله يمسيكم بالخير جميعا
اخوي ابراهيم ولايهون الجميع احتمال وعن تجربة حصلت معي في سيارة دينا والمهندسين كلا يفتي من عنده اللي يقول من القير والي يقول من الكرونة والبنيون ورمان العكوس واخيرا طلع من رمان الشيال مركبه بنفسي واخفى صوت الونه للابد0
اكشف وتأكد زين من (شيال عمود الكردان) والسبب( تلف او قطع) بسبب الجور والتحمل الزايد على الموتر في (جلدة شيال العمود) و دخول الوحل والرمل مع التغاريز الى الرمان حق (الشيال) وتسبب بخراب الرمان وظهور صوت ونه فيه واحيانا يسبب رجفة خفيفة للموتر مع السرعة0
اما اذا كان فيه صوت ويختفى مع دعس الكلتش اويضعف فهذا غالبا من رمان فحمة الكلتش تصديقا لكلام مشرفنا الغالي بدوي جنوبي0
هذا والله اعلم0
وسلامتكم
:r:f:r
:s

[sgl2002]

الكارونة تطلع مع الدعس صوت ونه قوية وتختفي اذا شلت رجلك

[SGL]

ياالعمده الباترول مافيه شيال

[ابراهيم صالح]

كنق التعديل .. العمده ون .. sgl

اشكركم جزيل الشكر .. وبيض الله وجيهكم ..

لوني من اهل الرياض كان قطعت الشك باليقين بس باذن الله بروح للورشه الي قالوها الشباب

[ابراهيم صالح]

الاعراض اعراض كارونه ولكن لو انها كارونه هل من الممكن انها تصبر سنتين ؟؟؟ ماعتقد حدها اذا كثرت 6 شهور

[MSAN]

خذ العلم..
كارونتك مافيها شي باذن الله.. المشكلة في رمانات العكس داخل الدفرنس.. شغلتها بسيطة..


بالتوفيق

[MSAN]

لو هي كارونة كان تسمعها اذا ثبت رجلك على الدعسة..


شيك رمانات العكوس

[ابراهيم صالح]

خذ العلم..
كارونتك مافيها شي باذن الله.. المشكلة في رمانات العكس داخل الدفرنس.. شغلتها بسيطة..


بالتوفيق


صدقت يالغالي .. مريت ورشه اليوم وقال رمان كارونه ماادري هو يقصد الي انت قصدته او لا .. لكن سؤالي اذا بغيت اغيرها هل لها علاقه بالتروس وهالحوسه لان اذا لها دخل بخليها اذا لعبت بالتروس ماراح ترجع الكرونه زي ماهي ع خبري


ولك جزيل الشكر

[البسطوني]

المشكله معروفه رمان عمود السرعه بالقير(يصول الحركه من المكينه للقير ) اما اذا كان الصوت ما يزعجك ماعليك منه قعد معي الصوت ذا اكثر من سنتين ولا فيه اي مشكله

[ابراهيم صالح]

المشكله معروفه رمان عمود السرعه بالقير(يصول الحركه من المكينه للقير ) اما اذا كان الصوت ما يزعجك ماعليك منه قعد معي الصوت ذا اكثر من سنتين ولا فيه اي مشكله



يامرحبا فيك يالغالي .. يقولون البعض زي ماقلت ولكن اذا كان المشكله زي ماقلت المفروض تروح اذا ضغطت الكلتش

[MSAN]

صدقت يالغالي .. مريت ورشه اليوم وقال رمان كارونه ماادري هو يقصد الي انت قصدته او لا .. لكن سؤالي اذا بغيت اغيرها هل لها علاقه بالتروس وهالحوسه لان اذا لها دخل بخليها اذا لعبت بالتروس ماراح ترجع الكرونه زي ماهي ع خبري


ولك جزيل الشكر
هلا بك وغلا أخ ابراهيم..

تغيير رمانات العكوس الخارجية لا يتطلب فك جرم الكرونة وإخلال وزنيتها.. فقط فك غطاء الكارونة وإفراغ الزيت بالطبع ثم فك الخابور الداخلي الي في وسط الكارونة ثم يفك الـ (تيلة) الي تثبت العكوس.. ويسحب العكوس من عند الكفرات وتطلع.. ثم يفك الرمان الخارجي الي عند الكفر ويكبس الجديد ويرجع يركبه...


أتمنى لك التوفيق..

[hail_ksa]

أخوي ..
هل أنت رافع الموتر من الخلف بـ ( ياي استرالي ) أو كعكات ؟؟؟؟

أتمنى الإجابه

[ابراهيم صالح]

مرفوعات بكعكات وانا اخوك وعذرا على التاخير بسبب الدوام

[ابراهيم صالح]

هلا بك وغلا أخ ابراهيم..

تغيير رمانات العكوس الخارجية لا يتطلب فك جرم الكرونة وإخلال وزنيتها.. فقط فك غطاء الكارونة وإفراغ الزيت بالطبع ثم فك الخابور الداخلي الي في وسط الكارونة ثم يفك الـ (تيلة) الي تثبت العكوس.. ويسحب العكوس من عند الكفرات وتطلع.. ثم يفك الرمان الخارجي الي عند الكفر ويكبس الجديد ويرجع يركبه...


أتمنى لك التوفيق..


شكرا لك يالحبيب ماقصرت ولله