السوم بدون تكملة اللسته وبدون مشاهد الصور وبدون ذكر عيوب الطير( هل السوم جاد)

[(هزاع)]

بسم الله الرحمن الرحيم
السلام عليكم ورحمة الله وبركاته
ياخوان لو ابي انزل موضوع بيع طير
مثلا حر 17×17
بدون صور وبدون ذكر عيوب الطير ولا اذكر انه مابعد حذف بعض ريشه بالوقت ذا
وسامه فلان من الناس ب (10000)ريال
وكتبت اني بعته على فلان بالمبلغ ذا
وجا فلان يشوف طيره اللي سامه بعشر الاف ولقا الطير به شي مايجوزله ولاكتب راعيه ملاحضاته
هل بياخذ الطير
اكيد لا
طيب ليش ماتذكر ياراعي الطير عيوبه !!؟؟ وتنزل الصور
وحتى لو ماتعرف لتنزيل الصور نزل الموضوع وكتب لاتسومو الين انزل الصور
والاخوان مايقصرون بيفزعولك وياكثر اهل الخير
وليه ياللي تسوم / تسوم شي ماشفته
على اي اساس تسوم
وهل بتهون من السومه لاشفت بالطير شي مايعجبك
وماذا يفعل راعي الطير لاهونت من سومتك
ارجو من اخواني اخذ الموضوع بجديه وصراحه والبيع والسوم والشراء ذمه
ان اصبت ادعو لي والوالدي
وان اخطئت سامحوني من حرصي على مصلحة المسلمين

[كشات نجد]

ابيض وجه يا ابو مشعل الله يوفقك ويخليلك والديك عز الله هذا الكلام

[الغرشوب]

. / بيض الله وجهك يابو مشعل وكلامك سديد وفي محله والله يرحم والديك / .

[مشرف الخيل]

بيض الله وجهك يابو مشعل ولا هنت ورايتك بيضاء


ماربعض الناس ونا اخووك لانزل طير بامنتدى زود علا طول ويسحب علا راع الطير

تقبل مرروووري

[صقارعزاااام]

ابو مشعل دايم سباق للخير

[البرنس الليبي]

اشهدك انك صادق يابومشعل واوافقك 100% المشكلة إن بعض الاخوان الله يجزاه خير يسوم قبل الصور .

اسأل الله انه يطول عمرك ويرضى عليك وعلى والديك .

[هاوي هدد 11]

وعليكم السلام ورحمة الله وبركاته
كل عام وأنت بخير
يابو مشعل
موضوع مهم وخا صة للشاري لابد تصوير الطير من جميع الأ تجاهات
وكذلك كفوف الطير وفرد جناح الطير
لآن هناك مسافات بعيده بين البايع والشاري
لأن الطير عند صاحبه ويقدر يصور20صورة
----------
لأن حصل لي موقف مع شخص الله يهديه
1-صور الطير من أتجاه واحد
2-قال على وشك يحذف الموس
ومدح الطيرفوق الخيال
وصدقته لأنا في شهرفضيل ويوم جيته
وجدت مايلي في الطير
1-منخر الطير مشروم
2- باقي عليه من الريش الموس والنايفه
والمشكله كان المشوار 6ساعات
-----
أين الضمير؟

[(هزاع)]

اشكركم على تفاعلكم
ياخوان المشرفين مهم مقصرين الله يجعله بموازين الاعمال ينبهون ويرسلون اللسته لجل يعبيها راعي السلعه
لاكن
يجب ان نتعاون معم ونخفف عليهم
بأن
نلتزم باللسته وبالنضم الخاصه بالمنتدى
من ناحية اللسته وتعبئتها وعدم حذف بعضها
مثل اهم شيء
عيوب الطير والصور
وعدم السوم بدون صور
ياخوان سؤال الاجابه عليه مايختلف عليه اثنين
اللي يسوم شيء ماشافه هل هو جاد بسومته ؟؟؟؟

[بو عزه]

و آلله آنــك وآآآفي يــآ بو مشعل و صأأأدق بـــكلآمك و آآآشــــكرك على حســــــن آآآلـــنيــه

[عيد العازمي]

عليكم السلام ورحمة الله وبركاته

بارك الله فيك ماقصرت


والله يرحم اثنين جابوك


قسمن بالله كلامك ميه بالميه ولا يهونون الاخوان

[BO-SALEM]

الله يجزاك كل خير ويرحم والديك والمسلمين جميع

كلامك كله صحيح وما يجي منك الخطأ يا ابو مشعل

والله يصلح ويهدي الجميع واهم شي الذمه والضمير واخلاق المسلم

واتمنى من المشرفين حذف اي موضوع غير كامل والسبب انه في مواضيع مثبته توضح
كيفية عرض السلعه ولستت البيع
وادري ان المشرفين ماهم مقصرين لكن نطلب منهم اكثر

والله الموفق

[ذراع الذيب]

السلام عليكم ورحمة الله وبركاته..
مسيت بالخير يابومشعل..


الألتزام باللسته والاجابة على جميع الاسأله من صالح البائع قبل لاتكون من صالح المشتري..
شوف اخونا هاوي هدد الله يلوم اللي يلومه وش ذنبه الحين يومه تعنى وسافر وبالآخر طلعت علوم الطير غير العلوم اللي ذكرها الرجال!!!..
لو انه رجع هاوي هدد وهو مسافر ودعى عليه بالله دعوته راح يردها ربي ما أضن ودعوة المسافر لاترد حنا زينا اللسته والشروط وقلنا فتره مانحذف ولانغلق اي موضوع مخالف
الين الكل يتعرف على الشروط واللي يحذف الاسأله عن عيوب الطير ما ادري وش قصده هل ان بالطير لاتوجده به عيوب؟؟
ولايجوز حذفها اذا الطير مافيه عيوب لازم يجاوب على السؤال ونصيحه لجميع الاعضاء لايسومون السلعه حتى يشوفون صورها
والله يوفق الجميع لما يحبه الله ويرضاه وتحياتي للجميع..

[أبو معاذ 2006]

اشكركم على تفاعلكم
ياخوان المشرفين مهم مقصرين الله يجعله بموازين الاعمال ينبهون ويرسلون اللسته لجل يعبيها راعي السلعه
لاكن
يجب ان نتعاون معم ونخفف عليهم
بأن
نلتزم باللسته وبالنضم الخاصه بالمنتدى
من ناحية اللسته وتعبئتها وعدم حذف بعضها
مثل اهم شيء
عيوب الطير والصور
وعدم السوم بدون صور
ياخوان سؤال الاجابه عليه مايختلف عليه اثنين
اللي يسوم شيء ماشافه هل هو جاد بسومته ؟؟؟؟

:good2::good2::good2::good2::good2:

[اقدم صقار]

السلام عليكم ورحمة الله وبركاته

اخوي ابو مشعل الله يقويك ويعافيك ويكتب لك الاجر وكلامك في محله وكلام عاقل ورديت عليك اليوم اول ما شفت موضوعك على الخاص ولاكن

اما اللي يسوم شي ما شافه انا اقول انه ماهوب صامل وياناس شوفوني اسوم واعرف اشتري ، كلام فاضي ويعتبر سومته ملغيه

بصراحه اللي اشوفه ان اي سومه قبل تحميل الصور او عدم تعبئة اللسته تكون ملغيه مثل اي سومه من اي واحد ماهو معروف ويسوم بالمنتدى بدون رقم جوال وتكون هناك متابعه مستمره من المشرفين لحذف المشاركات سواء من سوم او اي تعليق اخر ما عدى من يضع رقمه للمساعدة في تحميل الصوره :good::good::good:

في يوم من الايام معروض طير وماكانت علومه موضحه (طبوعه) ودقيت على راعيه لي نظر في الطير ولاكن يا ليتني ما دقيت ، شي يجنن العقل اللهم لا شماته
قال لي بالحرف الواحد الطير يكوبر ويفرد جناحينه على الاكل ويخبط لما تمد يدك عليه :eek::eek::eek:

لا احد يقول لي ليش ما كتبت هالشي تحت موضوعه وبينت للناس ان الطير كذا وكذا

يا الربع ما نيب وكيل ادم على ذريته وكلن توقااه ذمته ومحدن بداخل مع احد بقبره

اسف على الاطاله
اخوكم ابو منصور

[عبدالله بن الشيخ]

الله يرحم والديك يابومشعل

[القرناس المهاجر]

حي الله ابومشعل .. وفيت ولاهفيت
كلامك عين الصواب .. ونأمل من الجميع التمشي بقوانين الخيمة


عن أبي عبدالله نعمان بن بشير رضي الله تعالى عنهما
قال سمعت رسول الله صلى الله عليه وسلم يقول
(إن الحلال بين وإن الحرام بين وبينهما أمور مشتبهات
لا يعلمهن كثير من الناس فمن اتقى الشبهات
فقد استبرأ لدينه وعرضه ومن وقع في الشبهات
وقع في الحرام كالراعي يرعى حول الحمى يوشك أن يرتع فيه)
فيجب على الجميع تبرئة ذممهم مخافة الوقوع في الإثم
وتمشياً مع دينهم واخلاقهم الإسلامية النبيلة
وعدم ترك الشيطان والعياذ بالله يدخل في قلب النوايا
وفق الله الجميع لما يحب ويرضى :)

[ذيب القرى]

كلام في محله ورحم الله والديك ووالدي الجميع

[@السيف@]

بيض الله وجهيكم جميع وكل عام وانتم بصحه وعافيه
لكن نقدر نتقي هذا كله ان اي موضوع بيع لازم ماينعرض الا بعد ان يوافق عليه المشرف ويكتب اسمه تحت الموضوع بكذا نسلم من تنقيص اللسته بنيه ولا بحسن نيه

[اقدم صقار]

بيض الله وجهيكم جميع وكل عام وانتم بصحه وعافيه

لكن نقدر نتقي هذا كله ان اي موضوع بيع لازم ماينعرض الا بعد ان يوافق عليه المشرف ويكتب اسمه تحت الموضوع بكذا نسلم من تنقيص اللسته بنيه ولا بحسن نيه



اخوي السيف
كلامك احترمه ولاكن المشرف ماهوب مرابط 24 ساعه على النت خلنا نتكلم بعقل كل واحد عنده مشاغل والتزامات

طيب طرى علي وانحديت ابيع طيري اقعد ارقب المشرف متى يفعل موضوعي !!!:eek::eek::(:(:(:(:( يوم يومين ثلاثه

احترم وجهة نظرك ويبقى كلامي وجهة نظر تخصني

اخوك ابو منصور

[ابوحزااااااام]

زين واذا البايع ماالتزم بشروطه اللي في اللسته وش الحل مثلا انا شريت طير شارط راعيه فحص المستشفى ولقينا فيه عيب من اللي يتحمل الفحص انا ولا البايع اللي شرط الفحص

[(هزاع)]

اما انا وعوذ بالله من المفاخره بالنفس وعوذ بالله من الغرون
لوابي اعرض منا وبعد طير بيتي لاكتب لااضمن الاكياس الهوائيه
والديدان ونه لااضمن انه مر عليه فيما مضى اقلاع
مستشفى الرياض مخرج 9 لازم يذكر بطيرك ديدان ونقص فيتامينات واكياس هوائيه
يروي لي احد الاخوان البارزين جدافي خيمتنا
انه جاب طيره وقالو به اكياس وبه تضخم كبد وبه وبه وبه قلت ذالطير موات
ورجعت لديرتي وقنصتبه وفعل فعول اطيب من كل طيورنا
يعني ذالمستشفيات ذي توهم الواحد لجل يشغلو دكاترتهم والله اعلم

[ماجد الهلالي]

كل عام وانتم بخير

بيض الله وجهك يابو مشعل والله لا يهينك

وسؤالك في محله

اللي يسوم شيء ماشافه هل هو جاد بسومته ؟؟؟؟

ليش ما توقف عضويه المخالف 3 ايام

مثلاً الي يحذف شي من النموذج المخصص ( لستة البيع )

او الي يسوم بدون عرض الصور واكتمال اللسته

او الي يسوم بدون ما يضع وسيله اتصال

وبنفس الوقت
ليه ما تكون اخاصيه العروض في المنتدى متاحه الا للأشخاص الي مشاركاتهم فوق العشرين ( 20 )
لكي يكون عنده خبره في المنتدى وكيفيه البيع والشرا

وجه نظر

[تميم2222]

جزاك الله خيررر كلام جميل

[برق المغيب]

رحم الله والديك يابو مشعل وهذا الكلام الصحيح وهنا يأتي دور المشرفين الأفاضل في توجيه المعلن الى اتباع سياسة البيع والشراء في المنتدى ... واذا لزم الامر حذف إعلانه ...

[هاوي وكارى]

الله يرحم والدينا ووالديك والمسلمين اجمعين

[اقدم صقار]

زين واذا البايع ماالتزم بشروطه اللي في اللسته وش الحل مثلا انا شريت طير شارط راعيه فحص المستشفى ولقينا فيه عيب من اللي يتحمل الفحص انا ولا البايع اللي شرط الفحص




ابو حزاام مساك الله بالخير ومن يقرى

اللي نعرفه ان الفحص المبدئي للطير هو عن العماء او الصرع او الرداد او النهيته او السده او التوسير او كسر او اشياء ثانيه واضحه بالعين هذي الاشياء اللي نقدر نفحصها في الطير بالسوق
اما الاشياء اللي بالمستشفى ويرجع الطير منها مثل التهاب الكبد او تسمم الدم او كسر في الجناح او الرجل او لقيت مليفه مخنز :D:D:D إلا اذا اتفق البايع والشاري وصلحو بكيفهم

اما اذا لقيت الطير مريض بعرف الصقاقير من اللي موضحه فوق لا والله الطير يرجع والفحص على راعي الطير الاول


اما ابيع طير ويفحصه راعيه ويقول فيه ديدان مصارين او فيه اكياس هوائيه او فيه ديدان كبد او فيه شي يعالج ويطيب فهذا من وجهت نظري ان الطير ما يرجع الا ذا اتفق البايع والشاري وصلحو بكيفهم

يا الربع الطب تطور وزين ولاكن وين الدكتور الصادق اللي يشتغل بذمه كلهم نصابين يدور العموله وياخذ راتبه وراتب غيره واجار المحل والفوايد من حسابنا ، ما عمرك رحت بطيرك للمستشفى وقال سليم ، حتى الوحش اللي انت شاريه من شبته يقول فيه كل بلا وجلا ، وبصراحه انا فحصت طيره كانت عندي 3 مرات فحص شامل وكل مره يقول سليمه في مستشفى فهد بن سلطان والطيره ماهيب طيرتي واخر شي رحت للدرع ولقو فيها ديدان واصله حتى معلف الطير وخذيت لها علاج وبعد 14 يوم هديتها والحمد لله طيرتي الاوله طابت

في نظري الدرع افضل من مركز فهد بن سلطان وكلن يمدح ما واجه اقل شي يدخلونك مع طيرك ومافيه بنج وصدوق دكتورهم الفلبيني وجيد

اسف على الاطاله ولاكن موضوع يستحق النقاش

اخوكم ابو منصور

[(هزاع)]

الدرع اشوف الناس يمدحونه ونا والله ماعمري جيته
وبومنصور يمدح الدكتور ويقول يخلونك تدخل مع طيرك
اما مستشفى الطيور مدري وش صاربهم اول تعاملهم زين وتالي اضن الماده طغت
قامويطلعون بالطير سبعين عله
مابودك تمدح احد يمكن يتغير العام مدحته والسنه تغير يادافع البلا
يمكن يوم العالم انكبت عليه الله اعلم
يعيش الادمي ويتعلم
لاكن السوم بدون مشاهد الصوره وتكملة اللسته وحذف بعض الفقرات يبقى مجال النقاش في جدية السوم ؟؟؟

[جلاد الحباري]

جزاك الله خير يابو مشعل وياليت الجميع يتكاتف ويكونوا على حسن نية ويخافون الله في مسالة البيع والشراء واللي يحصل كله غش وقد حرم الله الغش في البيع والشراء

[@السيف@]

اخوي السيف
كلامك احترمه ولاكن المشرف ماهوب مرابط 24 ساعه على النت خلنا نتكلم بعقل كل واحد عنده مشاغل والتزامات

طيب طرى علي وانحديت ابيع طيري اقعد ارقب المشرف متى يفعل موضوعي !!!:eek::eek::(:(:(:(:( يوم يومين ثلاثه

احترم وجهة نظرك ويبقى كلامي وجهة نظر تخصني

اخوك ابو منصور

الله يصلحك ترا ماهو مشرف واحد موجود ترا فيه اربع وكلهم خير وبركه تتوقع كلهم في نفسي الوقت مشغولين
ولا بس تبي تهرج اركد وكبر عقلك ووجهة نظرك الكل يحترمها بس لا تعلق علي كلامي وهو ماهو موجه لك حتي احترم وجهة نظرك
الله ينور بصيرتك بعض الهرج يقول لراعيه كبني

[ابوصالح .]

كلامك في الصميم
والاحظ دائما يسومون وماشافوا شئ وهذا شئ غريب انك تسوم شئ ماشفته ولاأعتقد هناك جدية في السوم

[خيال الهيلا]

جزاك الله خير كلام جميل يابومشعل وانا مع اخوي اقدم صقار في الدرع افضل من غيره في المستشفي الطيور لي اكثر من ٦سنوات افحص الطيوري عنده وشكرآ

[عواد الشمري2]

كلااام سليم بيض الله وجهك يابو مشعل

[حزم الفيضه]

الله يجزاك خير يبومشعل موضوع في الصميم :good:

[(هزاع)]

يتصل علي بعض الاخوان ممن يعرضون طيور بدون صوره او لسته
ويقول فلان سام وهون
اقول اسمحلي معه حق يهون ولاتزعل انت غلطان
يلقا السوام غير الجاد العذر
ادناها ماجازلي يوم شفته
ولا ماهوب اللي بدماغي
ماجازتلي ارضيته
لو ريشته كذا وكذا
منسره لو انه كذا
وخذ من الاعذار
عطه اللسته كامله وكتب مدحك بطيرك وكتب عيوب طيرك وصوره
ون ماقدرت تنزل الصوره اكتب ياشباب لاحد يسوم لين فلان ينزلي صورة طيري
اما السوم بدون مشاهد الصوره احتمال عدم الجديه وااااارد

[(هزاع)]

الرفع للتناصح

[جيرالحر]

تسلم ابو مشعل جزيت خيراً:good2:

[استاذ]

كلام واضح وصريح وأراء الاعضاء كله تمام
لاكن كيف الطريقه المثلى للقضاء على بعض العروض اللي اهلها عرف عنهم الغش
ونا يابو مشعل قد اتصلت بك العام وطلبتك ان نشهر بهم
ونت نصحت بعدم التشهير وعللت ذلك ان يمكن يتوبو لله
ولكن لازالو موجودين وبين الحين والاخر يتصيدون المبتدئين وينهبوهم بنفو المحلات على انها طيور السعد والسعد عنها بعيد

[(هزاع)]

حياك الله يا أستاذ
الله يصلط على الظالم المحتال
نعم تذكرتك ولازلت مصر على عدم التشهير
يمكن يتوب ولا يبعده الله ويشغله بنفسه عن المسلمين
لان المحتال ضعيف معقوليه ماقدر على الطويلات ولتوا وتحايل يبي المرجله ولاتحصله بامر الله
بعيده المرجله على النصابه

[((غريب الدار))]

حياك الله يا ابو مشعل

انا مع التشهير فيهم حتى يكونوا عبره لغيرهم

[جفنان ينبع]

بيض الله وجهك يابو مشعل ولا هنت ورايتك بيضاء