السلام عليكم افيدوني جزاكم الله خير ابي شخص مجرب؟

[مولع بالطير]

مساكم الله بالخير كل بسمه اخواني الاعزاء ابلي كانت فيهم ناقه فيها جرب خفيف وعطيتها ابره وغسلتها بالجاره وبعدها بفتره اعدت البل كلهااا والبل لحقها ضعف مع اني مكرمها ولي اسبوع غسلتها مرتين بالجره وفي ناس انصحوني قالو حط الجره مع كلوركس وفيري وغسلها وتزين ان شاء الله .

ابي شخص مجرب يا اخوان ونا خايف ادقهن ابر وهن توهن معشرات وكم تاخذ فترت العلاج وماعليه استحملوني اذا طولت عليكم .

[مريقب العيفار]

بالنسبة للكلوركس مع الجاره انا استعملتها ولا فيها ضرر

اما الابر فيه ابره للجرب برازيليه لونها ازرق اسمها دكتوماكس او اسم قريب من كذا ما تضر النياق المعاشير

وباذن الله مامونه

ولا تنسى تغير مراح البل

[ابو الشبرميات]

الاخ مولع بالطير
بالنسبة للجرب اذا جاء للمراح فهو خطير ويضعف المطية

لكن علاجه سهل باذن الله

اول الخطواتة واهمها
عزل المجروبة عن السليمة

اما العلاج فهو كالتالي :
ابرة الجرب الصفراء والزرقاء الدكتوماكس تعطي المجروبة جرعة حسب الوزن ثم تكرر الابرة بعد سبوع او 10 ايام بالكثير ثم مرة ثالثة بعد اسبوعين
وفي كل مرة تعطي الابرة رش المطية المجروبة والسليمة بالجارة تركيز عالي وكذلك المراح

اذا نجح العلاج والا كرره لين ينظف مراحك

واستخد م الكبريت الحجري
وطريقته كالتالي تاخذ من العطارين كبريت مكسر زي الحصى
وتقوم بوضعه في قطعة قماش وتربطه
وتعطش الابل كلها المجروبة والسليمة
ومن ثم تضعه بالماء وتحركه لين يتعكر الماء ويتغير لونه ومن ثم تسقي الحلال
وتكرر العملية يومياً لين ينقطع عنك الجرب عن حلالك نهائياً
والكبريت يعطي مقاومة للسليمات من المرض وانتقال العدوى

تمنياتي لك بالتوفيق وجميع المسلمين
,,,

[مولع بالطير]

الله يجزاكم خير بجرب ان شاء الله ماقصرتم وعسي الله يباركلنا ولكم وجميع المسلمين بحلالهم وعيالهم

[مولع بالطير]

وين اهل الخبره افيدوناااا ؟

[قزيزالنعام]

مرحبا اخوي العزيز الحمدلله العلاج متوفر وطرق كثيره بس الحرص واجب على الحلال .
1-جبلك من السودنين الى يغسلون الابل وخلهم يغسلونها بجاره 60هم يعرفون طريقه مقاس الماءوغسل الابل كلها السليمه ولى ماهي سليم وبعده اغسل الحوش والاعمده وشبك ولارض كلها يغسلونها لك السودنين
2-عندك ابره الجرب الامريكيه اضرب الناقه الكبيره 20والصغير15 وضربها من فوق لى تحت على شان الدواء مايطلع معا الابره
3-اغسلها بعد15يوم وان شالله تبراء

[ابولمارالروقي]

حسب خبرتي ,, حك المكان اللي فيه جرب بحصاة حرشاء لين ينظف ثم ادهنه بزيت محروق و ان شاء الله وحده بوحده

[راعي سهوه]

انتبه من البنسلين والله انها تطرح ولد الناقه لايغرك كلام البيطرين ثلاث نياق الي طيقنها بنسلين وطرحن عيالهن

[مولع بالطير]

الله يجزاكم خير ماقصرتو وعساكم ماتشوفون مكروه وكل المسلمين

[salem63200]

مريقب العيفار عطاك اسم العلاج

وازيد عليه من غير قصور في الباقين

غير مراحها واشبك المراح الاول واغسل معالفها وجميع ماكانت تستخدمه بالجره والماء

وعد عليها الابره بعد اسبوع ولاكن خل ضربك للابر قبل المغرب وقبل العشاء حقها

انا مجرب قبل فتره الايام اللي راحت جا الابل جرب والحمد لله خلص منها الحين

[btt]

يعطيك العافية