كفراتي مخزنة أركبها وإلا ..لا ؟؟

[الداير11]

السلام عليكم ورحمة الله وبركاته وبعد ...

حيالله كلن باسمه ..

عندي كفرات ميشلان يابانية مقاسها 265/ 75 /16وتاريخها 2003

المراد اني فكيتها قبل سنة تقريبا وحطيتها في ملحق هي وجنوطها ومخلي كفراتها معبية فيها على ثلاثين

وعلى فكرة تراني موقفهن توقيف ولا فيهن ولا واحد منسم من فضل الله ,, ومشيت بهن 30000كيلو وحالتهن ممتازة

عاد محاتسيكم تسنه حن لهن ووده يركبهن علما بان السيارة جمس ونيت عاد انتم وش رايكم ..

أركبهن والا ؟؟؟؟؟؟؟؟؟؟؟؟؟

[بواسامه]

كانك منتب راعي سرعه اتوقع تمشيك زود سنه
كانها محفوظه في ظل
توني مغيرها من عام 2001 وميشلان وماشي عليها بس 60 الف كيلو
وبعتها ب300 للكداده حقين الجح
كفر صبور ويتحمل حمل موب سهل ولا يبي سرعه

[الداير11]

اخوي أبو اسامة مشكور على الرد

ومن ناحية السرعة من هالمية وعشرين وفيها وفي حالات قليلة ازيدها شوي .. بس أنا راعي سفر كل اسبوع تقريبا أخت منا والا منا

[ناصح]

أول مرة أسمع ان فيه ميشلان ياباني ...!!

لكن المهم هو تاريخ الصنع لا تكون قديمة مرة

[ابن الكرام]

إذا الكفرات تشوف فيها بذوح شقوق صغيرة أفضل عدم أستخدامها وخصوصاً أنك راعي سفر والقيمة ماتسوى أنها تبنشر عليك وتعطلك أوالله يحفظنا وأياك يجيك من وراها ضرر .

[بواسامه]

اذا انت راعي طورقه اشتر سلامتك وانا اخوك
والسلامة مايعدلها شي
بسلامة الكفرات وبيعطونك ابو يمن قيمة زينه فيه

[sabaax]

والله ياخوي ما انصح

ولد عمي توفي بسبب التواير المخزنة

الله الحافظ

[ابوعزيزm]

أخوي الداير 11

السلام عليكم ورحمة الله وبركاته

أذا تبي النصيحة من أخوك الصغير لا تقرب لمها أبداً إذا كنت راعي خطوط أو سرعة عن 80

لأن الكفرات هي أمان السيارة . . . وبعدين خلنا نفكر شوي . . . تعال >>>>>>








يالله حيّه . . . عندنا عملية حسابيه بسيطة وهي كالآتي :

السيارة نبي نقول قيمتها خمسين ألف (ويمكن تكون بمئة أو أكثلار من كذا) وطقم كفرات ما يتعدى ألفين ريال

وش رايك ، لو أنفجر أحد الإطارات له ثلاث حالات :
1- أنقلاب السيارة ويحدث كسور أو وفاة لا قدر الله
2- يتقطع الكفر ويأثر على السيارة ويتلفها من تطاير الكفر
3- ينفجر الإطار (وهذا أسهل) لآكن راح تتعطل بالطريق ويكفيك روعة الحدث ، وإذا كان معك عوائل فأيضاً راح تتمشكل

وإلا تغير الكفرات وتسوق بإمان بإذن الله = مع العلم بإن مدة الكفر لا تتعدى سنتين

والنبي صلى الله عليه وسلم يقول في الحديث ( أعقلها وتوكل)

ومن ناحية التجربة تبين أن جميع الكفرات المخزنة لا تستطيع التحمل ( لأنها صنعت هاكذا)

وبما أنك راعي خطوط فالواجب منك عدم التساهل بها لأن حرارة الطريق تأثر على الكفرات

وهذا اللي عندي :)

[شبح الصحراء]

اذا كانت مخزنة في ظروف مثالية من ناحية الظل والحرارة اظنها تفي بالغرض ان شاء الله ولكن افحصها بالأول من التشققات ، اذا كانت سليمة من التشققات فهي لا زالت صالحة للإستخدام .

[سحاب1111]

ماء شاء الله والله الخبرة تسرح وتمرح
يالله لك الحمد على هل جهد الطيب

[salehhd]

السلام عليكم رايي من راي الشباب
اذا تستخدما داخل المدينة وما تسرع عليها ركبها

لاكن اذا راعي خطوط فأنصحك عدم استخدامها لانها اصبحت قاسية من قل الاستخدام

[أسامة]

بما انك راعي سفريات كل اسبوع فحياتك اغلى من الفين ريال فلا تستخسر هالمبلغ . والا انا غلطان ؟
انا كل سنة اغير الكفرات ابيع القديمة بحالة ممتازة بمائتين ريال وادفع فرق الجديدة
والله يحفظك من كل مكروه وجميع المسلمين

[الداير11]

السلام عليكم ورحمة الله وبركاته ... وبعد

الله يجزاكم خير كلكم آآآآآآآآآآمين ,,

إخواني من جد تشكرون على الردود وعلى النصح ,, والله يجمعني بكم في الجنة كما جمعني بكم في هالمنتدى الطيب

دمتم سالمين .. دمتم