افضل مكان لفحص السيارات المستعمله

[تي في]

السلام عليكم

افضل مكان لفحص السيارة المستعمله جيب خليجي ..في الرياض....

الغروب _ كارتك - البريدي.....

اللي سمعته البريدي يعيب في السياره كثير

وكارتك كوويس...

واناابغى افضل محلين ...افحص عندهم وش تنصحون...

وافكر فكارتك والغروب وإذا في غيرهم دلوني

تعرفون الواحد يخاف من السيارات الخليجية وإن فيها تعديل او رش مايبين واهم شئ يكونون ممتازين فمعرفة حالة المكينة والقير والدبل والدفرنسات ....وإن العداد سليم

وهل يجربون السيارة على الخط ولا لا ؟
وإذا طلبت جربونها يجربون؟

[ابو صقر 111]

انا لاأعرف البريدي ولست من سكان الرياض ولكن الناس شهود الله في ارضه وحسب سماعي من الناس انه رجل ذو ضمير يتحرز حتى لوغضب عليه من غضب000 والغاضب هو من يريد تمشية بضاعته بأية طريقه وهذا شيء متوقع خخوشكرا

[ابوعواض55]

كارتك من واقع تجربه موتري شريته وفحصته عندهم ما شالله عليهم .واكثر الاخوان ينصحون فيه

[Aقناص الجنوبA]

كارتك وبلا منازع البريدي والله كذا سياره فيها رش ومشت عليه والعكس سيارات سليمه ويقول فيها رش
اما كارتك 100%100 ان شاء الله وانا اتكلم من واقع تجربه مو سياره ولا ثنتين ولا عشر ولي سعر خاص عندهم
اذا تبي اخدمك انا حاضر

[ساري 111]

يقولي واحد راعي بيع وشراء بالسيارات ان افضلهم البريدي

قلت له اسمع الناس يسبونه ؟؟
قال مايسبه غير الشريطيه حتى ان بعضهم اذا قلت ابفحصه عند البريدي يرفض ومايبيع عليك

[رحال300]

البريدي بلا منازع صراحه يعطيك عيوب السياره كامله

[بر وعزبة]

السلام عليكم ورحمة الله وبركاته
كل عام وانت بخير شهر مبارك
حبيبي البريدي وكارتك كلهم ممتازين وكلمة حق ما مثلهم أحد لكن أسعارهم غالية جدا

لكن في مركز جيد بشارع المعارض اسمه الحوت يفحص الكهرب للسيارات الجديدة والكثير يغفل الجانب هذا
جانب الكهرباء فتجد البعض يفحص البدي والمكينة والقير والعبرة الأيام ذي بالسيارات الجديدة
صاحبة التقنية العالية من كمبيوتر وغيره الكهرب وما أداراك ما الكهرب .

أبعطيك موقف صار لي يوم من الأيام نويت أشتري موتر نيسان مورانو موديل 2007 او 2008 والله ناسي
المهم رحت لم ورشة وفحص المكينة والقير والبدي وقال الموتر تمام ما فيه عيب بدي وقير ومكينة
من أفضل الأشياء لكن نصحني إني أفحص الموتر عن طريق جهاز خاص بالكهرب السيارات
وهذا الجهاز موجود فقط عند ورشة الحوت وعند الجميح رجال اسمه عبد الرحمن بطريق خريص بالريان
للسيارات الأمريكية اما اليابانية فعندك مركز الحوت نهاية شارع عبد الرحمن بن عوف ( المعارض )
من جهة الشمال .
وبعدما فحصت الموتر طلعت أنواع الفضايح في كهرب السيارة وطلع لي أن طرمبة البنزين خربانه
وحساس القير خربان وحساس الهواء هذا قيمته حوالي 1800 ريال وسألته ليش فحص الكمبيوتر
ما يطلع الأشياء ذي قال لي بالحرف الواحد فحص الكمبيوتر ما يطلع خربات الكهرب لأنها
كهربائية وهو يفحص مدى قوة المكينة .

وجزاك الله خير على فتح الموضوع

[راعي الاكورد]

والله الاحظ في البريدي ان يبالغ في الخرابات

مثال تندية الزيت حق الدبل يقول صووفة عكس والتندية الخفيفة شئ طبيعي في الدبل

[الاميراال]

البريدي وكارتك ماعليهم كلام
بس البريدي اسلوبه جاف شوي

[عبد الله 99]

نصيحه لوجه الله لا تفحص عند كارتك
شريت قبل فتره ميركوري ماونتنير المهم فحصته ب 350 البدي كلامهم 100\100 اما محركات و قطع ميكانيكيه ما عندهم سالفه من زود القهر كاتب الفحص الميكانيكي مساعدات الكبوت (بالله عليك يعني لهاذي الدرجه انا غبي ما ادري انها خربانه ) و الموتر طلع سليم بنسبة 89 \100 و الحمد لله شريته و دخلته لصيانة البيان و والله انه كلفني حول 5000 ريال (حرام ادفعها و كارتك يقول سليم ) كان فيه صرصره في بكرة المكينه و الرمان و ما جاب خبرها على انها كانت تصفر
عشان كذا انصحك لوجه الله تبعد عن كارتك لانه خذ سمعه قبل سنه ونص و الحين ما عندك احد
و كانك تبي الشور لا تبعد عن البريدي رجال كبير بالسن و له خبره يعني ما تمشي عليه حركات الشريطيه
انا يوم جيت افحص رفضو اني افحص عند البريدي و تعذروا انه زحمه و قلق (افحص عند كاتك يبن الحلال بس خلاصنا ) <هذا كلامهم و والله اني متحسف
الشريطيه يسبونه لأنه يفضحهم و يشرشح مواترهم
عشان كذا انصحك به و بقوه بعد ....

[مغلي]

احترنا .... مين الصاحي من هالورش .... الله المستعان

[الفهيد بدر]

البريدي افضل واحد لا تدور غيره كارتك مرة ومرة

[سبيل الرشد]

قبل شهرين , فحصت باترول 96 فحص شامل عند الغروب وكانت النتيجة البدي وكالة ما عدا الحزام الذهبي مرشوش ( تجميلي ) فقط .

قبل يومين , رحنا أنا وواحد يبي يشتري الموتر وفحصنا الموتر في نفس المركز بدي فقط والنتيجة كانت الحزام الذهبي مرشوش بالإضافة إلى الرفارف الأمامية مرشوشة والشنطة مرشوشة والكبوت مغير ومرشوش .

ما أقول إلا حسبنا الله ونعم الوكيل ..

[ابو انس111]

البريدي يطلع خرابات غير موجوده في السياره .

[مسير عليكم]

استخر قبل لا تشتري وبعدين افحص وباذن الله ماتندم
اسال مجرب البريدي والغروب وكارتك كل واحد ويجي منه زله او يكون لعماله طريق فيه خصوصن الشريطيه الي مايخافون الله يزبط الفلبيني ويدفه بالمقسوم ويجيك فحص ميه ميه ويطقطق عليك بكلمه تصفيه وتهريب صووفه وزن اذرعه والخ من شغلات الصيانه الدوريه الي تعبي الورقه
واحيانا تنغش من ولد عمك اجل كيف بغريب

[fffsub]

حسب خبرتي المتواضعه:
كارتك لابأس به
البريدي غير عقلاني في إظهار العيوب، الشريطية يحبونه إذا بيشترون سيارتك لأنه يظهر العيوب بشكل مبالغ وبعدين يحطمون سعر سيارتك.

[راعي الرود]

انا جربت الغروب مرتين و البريدي مرتين مره بيع و مره شراء
الغروب ممتاز شغلهم بالكمبيوتر اغلبه لكن بعد مايرفع الموتر و يكشف على البطن ماش ما من دقه خصوصاً اذا صار فيه سرا سيارات وراك يبون يمشونك بسرعه

البريدي ممتاز ماعندهم كثره كمبيوترات فقط كمبيوتر لفحص الكهرب و المكينه و بعدين بالرافعه يفحصون الموتر من تحت و يدققون هذي ميزتهم حتى لو فيه زحمه ماعليهم لكن عيب البريدي اذا فتح الرديتر و شاف الماء ناقص ولو شوي او شاف الماء وصخ يكتب في التقرير ( تغيير راديتر و فحص رأس المكينه ) و اذا كنت تبي تبيع الشاري ممكن ينفر من هالكلمه انا شريت كروزر كان الماء ناقص يوم يفحصونه من تهريب خرطوش الثلاجه و قال لي راعيه يوم شافو الماء ناقص قالو افحص الراس و حلفت راعيه هل فيه حراره الموتر او تنقيص مستمر و اقسم و حلف لي ان المشكله في خرطوش و ورانياه و توكلت على الله وشريته كان نظيف الموتر والحمد لله غيرت الخرطوش و ماشكيت من شيء لا حراره ولا غيره

[مزن طيبة]

الشريطية الله يصلحطم كلن يمدح بضاعته لونها ماتسوا

[تساهيل1]

طيب ياشباب

بريده وش المحل المضبوط فيها للفحص
وشكرا

[أبو سليمان...]

افضل محل فحص في بريدة عندك مركز ضمان ابوصطيف شرق المعارض

[تساهيل1]

كارتك وبلا منازع البريدي والله كذا سياره فيها رش ومشت عليه والعكس سيارات سليمه ويقول فيها رش


اما كارتك 100%100 ان شاء الله وانا اتكلم من واقع تجربه مو سياره ولا ثنتين ولا عشر ولي سعر خاص عندهم

اذا تبي اخدمك انا حاضر


هذا بلا ابوك ياعقاب

ههههه


ابو سليمان شكرا لك

[S.A.F]

والله يالبريدي يبرد الكبد
ويقدم لك نصائح استعمال وانواع الزيوت المناسبه للموتر وانواع يحذر منها والباين انه خبره ميكانيكا وتجربة الموتر بالمطاب ركبت مع السوداني الي عنده بالموتر الي بشتريه ضرب المطب وهو يمشي حوالي 90كم قلت له سلامات قال ماتبينا نفحص موترك قلت الا بس مابيك تكسره😣 قالي يبي لك مساعدامامي يمين وطلع كلامه صحيح 100٪

[تساهيل1]

والله يالبريدي يبرد الكبد
ويقدم لك نصائح استعمال وانواع الزيوت المناسبه للموتر وانواع يحذر منها والباين انه خبره ميكانيكا وتجربة الموتر بالمطاب ركبت مع السوداني الي عنده بالموتر الي بشتريه ضرب المطب وهو يمشي حوالي 90كم قلت له سلامات قال ماتبينا نفحص موترك قلت الا بس مابيك تكسره�� قالي يبي لك مساعدامامي يمين وطلع كلامه صحيح 100٪


اكيد بيطلع كلامه صحيح

لانه طبق المطب وفقع عليك المساعد

هههههههههههههه

والله اشوف ناس تنبه من هالرجال الله يستر ماعنده الا مرشوش كامل
http://www.toyota4arab.com/forum/t171452.html

[alsahli]

وعليكم السلام دور احد يعرف راعي المحل الفحص او احد فيه غيرها افحص في كل محل وتعرف ليه وبتوفيق

[أبو خوذة]

يمدحون البريدي ولا عمرنا جربناه
ويقولون انه ينفخ احياناً على الشريطيه
وانه يجي معصب ( صاحب المحل ابو اصابع مقصوصه) يجي معصب يقول وين المشتري.. سم انا المشتري يقول تعال ابيك وياخذك على جنب ويكرش البايع ابعد هناك لو سمحت وهمن يهل عليك عيوب الموتر

[Esam]

انا يامحاكيك فحصت السيارة عند كارتك وقال ميكانيكياً مابها خلاف ابد وعطاني نسبة زينه

وفي يوم استلام السيارة من المعرض طقت مكينتها قبل اصل للبيت

اما البدي شغلهم فيه ممتاز

[وسيع البنايد]

معارض الشفاء وشهي افضل الورش

[التعـ King ـديل]

مع ان الموضوع قديم ولكن للفائده بكتب هذا الرد

الغروب وافضل وقت تروح للغروب بعد صلاه الظهر مايكون عندهم زحمه ويمخمخ على موترك وسعره معقول 500 ريال بينما كارتك ب 700 والبريدي ب 800 على ايش

فحص الغروب تفصيلي فحصت موتر عند الغروب وعطاني الرش في الرفرف الامامي والكبوت ولكر على باب المعاون اول ماشريت الموتر ويوم جيت ابيعه المشتري قال بفحص

عند البريدي قلت سم وابشر وقبل نروح قلت له الموتر فيه الرفرف الامامي والكبوت ولكر باب المعاون مع ان المشتري من خارج وقال الناس تمدح البريدي رحنا للبريدي

البريدي قاله مسامير الرفرف والكبوت مفكوكه وماجاب سيره للرش

[خيال الغلبا]

اخوي البريدي باع علي جيب 93 في اكس ار ادعى انه مافيه اي خدش وبعد الشراء بسنين ظهر المعجون معجون السمكره في كامل الباب والرفرف

هذي تجربتي مع البريدي صاحب معرض الكشف عن الصدمات

[خيال الغلبا]

الإخوة الأعضاء
السلام عليكم ..

أولا .. أشهد الله سبحانه على صدقي في جميع المعلومات التي سأوردها في هذا الموضوع , وليس بيني وبين اطرافها قبل حصولها أي عداوة او مودة ..

ثانيا . في عام 2008 اشتريت سيارة لكزس 2007 من شخص أعرفه , قال لي هناك ضربه خفيفة في الرفرف الأمامي , أخذت السيارة إلى معرض كارتك (في معارض النسيم) لفحصها , قال لي الفني انها نظيفة جدا جدا جدا ... فتوكلت على الله ...

في عام 2010 وبالتحديد في تاريخ (28/9/2010) رغبت ببيع السيارة بغرض السفر , وضعت اعلانات وابلغت الزملاء والمعارف , اتصل بي أحد المشترين من الكويت ... عرض سعرا ممتازا جدا .. كان 185 الف , قلت على بركة الله ... قام الرجل بالحجز (ذهاب فقط) ليعود بالسيارة.

بعد وصوله .. ذهبنا إلى المعارض لفحصها .. قال لي اسمع عن (معرض البريدي) .. قلت وانا كذلك سمعت عنه .. فذهبنا له ..

مركز البريدي
دفع الرجل قيمة الفحص ... عشر دقائق وإذا به يناديني ... ذهبت فإذا به يقول ان السيارة (مرشوشة بالكامل)!!! قلت لا يمكن كيف ترش بالكامل ؟؟ انا أعرف مالكها السابق !! ثم اني قد فحصتها قبل الشراء ... أيضا قال الفني لا مرشوشه بالكامل !!!

قلت لا يمكن .. أين المدير ؟؟ فأشار إلى غرفه في آخر المعرض ... ذهبت فإذا برجل سعودي كبير في السن قليلا "هو البريدي نفسه".. شرحت له الموضوع فقال دقيقه .. ونهض .. تفاءلت خيرا لا أعرف لماذا.. خرج خارج الغرفة .. و وبتصرف اهوج ..ارعن.. لا أدري لماذا !! قال وبصوت مرتفع.. سمعه كل من كان هناك :انت الذي صنعتها ؟؟ قلت لا !! قال : انت مالكها السابق ؟؟ قلت لا !! قال تعال معي .. فوضع جهازا صغير على السيارة وقال انظر .. قلت :إلى ماذا ؟؟ قال أربعين او أربع مائه (لا أذكر) قلت: وماذا تعني ؟؟ قال يعني مرشوشه بالكامل .. السيارة مرشوشه بالكامل !! كان بأسلوبه الفض والأقرب إلى السوقي يضعني في موقف الكاذب أما المشتري والموجودين .. قلت أقسم بالله العظيم ان كلامك غير صحيح ..قال مهوب بكيفك !!! (علما ان هناك بعض العبارات التي قالها ,والتي لم أذكرها.. لا أدري لماذا لم أتعامل معها التعامل المناسب بما يليق بأسلوبه بالكلام حينها .. أتراه فارق السن ؟؟)
قلت للمشتري نزل السيارة وانا أفحصها على حسابي عند غيرهم .. بعد انتهاء الفحص .. ذهبنا إلى معرض آخر حدده المشتري , وهو( معرض الغروب ) .

معرض الغروب:

دفعت انا قيمة الكشف .. حسب الاتفاق .. وبعد دقائق جاء فني لبناني وآخر مصري وقالوا انها فعلا مرشوشه بالكامل !!! والله انها صدمه ما بعدها صدمه ... كدت ابكي من الموقف .. والأعظم ان المصري قال ان لونها في الأساس ابيض ثلجي وتم تغيير اللون إلى أبيض حليبي (كما اسماه ).
خرجنا .. كنت صامتا .. لا أعرف لماذا .. من الخجل , القهر , الإحراج .. لا أعلم !! قال الأخ الكويتي : 145 ألف أنا شراي !!!!!! أربعين الف مرة وحده !!

لم ارد .. قلت عموما .. الله يحييكم على عشاكم .. والسيارة ان شاء الله لها اللي يدبرها .. اعتذر عن قبول الدعوة.. وعند نزوله ناديته وقلت اسمع .. هناك كلمه لا احبها ولكني مضطر ان أقولها .. قال وما هي ؟؟ قلت علي الحرام اني ما أدري ان السيارة هذا حالها !! قال :حصل خير .
انطلقت فإذا أنا عند الإشارة اللي في المعارض وإذا بي ارى( معرض كارتك) الذي فحصتها فيه قبل شرائها.

كارتك:

دخلت المعرض وطلبت الفحص .. قالوا لي ادفع .. شرحت لهم الموضوع قالوا كلم المدير .. جاءني شخص سعودي وشرحت له الموضوع وقلت انا فحصتها عندكم .. والاوراق التي عندي منكم تثبت أنها غير مرشوشة .. وهناك اكثر من معرض قبل قليل قال أنها مرشوشة بالكامل ..
سألني سؤالا استغربت منه جدا !!! قال لي: انت ذهبت بها إلى البريدي والغروب صح ؟؟ قلت كيف عرفت ؟؟ قال دقيقة .. ونادى الفنيين ثم قال افحصوها بالكامل ومجانا .. أريد فحص أدق من الدقيق .. (ترى السيارة بتكلفنا 200 ألف )!!! هكذا والله قالها.

دقائق وإذا به يعطيني جواله ويقول كلم . قلت من ؟؟ قال : صاحب المعرض (:اسمه /خالد الدريبي) . كلمته والله لا أعلم ماذا يريد .. جاء في بالي انه سيحاول اللف والدوران ... قال لي هكذا :
بكم قال لك المشتري(يقصد الكويتي) .. قلت 185 ألف . قال : اسمع .. ان ثبت ان تقريرنا السابق خاطئ .. أتعهد لك الآن بان أدفع لك القيمة المذكورة بالكامل !!! وقال : كنت استطيع أن أؤجل المكالمة حتى تظهر النتيجة .. إلا أنني تهمني سمعه محلي قبل كل شيء .. وانا ما زلت عند كلامي .. قلت جزاك الله خيرا .. والحقيقة انني ارتحت قليلا .
دقائق وإذا بهم يقولون .. لا يوجد سوى رش في الرفرف (كما قال لي المالك السابق)!!! إلا أن الأرقام التي تظهر على الجهاز كما هي عند البريدي والغروب !!!
فقلت كيف ؟؟ قال السعودي الذي في المركز: هم لا يعلمون .. نعم هم اقدم منا .. ولكن والله يجهلون .. وهذا هو السبب عندما سألتك في البداية قبل الكشف إن كنت فحصتها عند هذين المعرضين , دائما تأتينا نفس المشكلة .. وسبق - حسب ما علمت لاحقا- أن البريدي (الشايب ما غيره) تهجم على مالك المعرض بجميل الألفاظ وأعذبها لهذا السبب .. وقد نشب بينهم خلاف حيث ان البريدي يقول لهم .. لا تقولون للناس ان سياراتهم غير مرشوشة !!! لدرجة ان أحد الملاك حسب كلام الدريبي مالك كارتك (تهجم عليه بالضرب في مكتبه في رمضان قبل الفائت.. لنفس السبب) .

نعود لمالك كارتك .. اتصل بي أخرى وقال ما تعليقك ؟؟ قلت معرضين ضدكم ؟؟ لو كنت انا أو أنت مكان المشتري من سنصدقهما .. للكثرة والشهرة .. قال بيننا الوكالة .. افحصها غدا وأخبرني . وما زلت عند كلمتي ... قلت بارك الله لك في مالك وتجارتك.

الوكالة

ذهبت للوكالة "طريق الملك فهد" وأدخلتها للفحص وشرحت لهم الموضوع , واعدوني في قبيل العصر.
ذهبت وانا والله خائف جدا ... قال الفني :لا يوجد سوى رش في الرفرف الامامي فقط , ولا يوجد أي رش آخر !!!!
والله اني فعلا حسيت وكأن جبل انزاح من على صدري .. أول ما فعلته بعد حمد الله .. ان اتصلت على الكويتي .. رد علي برسميه زائده جدا ..علما انه محترم وخلوق جدا جدا .. كعادة من عرفته من الكويتيين .. قلت هل سافرت ؟؟ قال لا . قلت انا الان عند الوكالة ومعي تقرير منهم يثبت صحة كلامي .. وأنني لم أكن اكذب عليك .. قال فعلا !!! قلت نعم ... قال :الآن آتيك .. قلت لا .. انتظر .. انا لن ابيع السيارة لك .. ولم يكن هذا سبب اتصالي .. سبب اتصالي هو انني أقسمت لك البارحة انني لم أكذب عليك .. وكنت متأكداً أنك لم تصدقني ..ولا الومك .. لكن لن أبيع السيارة لك .

بسوء تصرف مني .. وبكرم أخلاق من خالد الدريبي مالك (كارتك).. اتصل بي في المساء وقال ماذا تم ؟؟ انتظرتك ولم تتصل ؟؟ اعتذرت عن عدم اتصالي .. وقلت أسألك الله أن يبارك لك في أهلك ومالك وتجارتك .. وان يضيق على البريدي بالذات (لسوء ادبه معي) والغروب في ارزاقهم .. قال هل كلامي صحيح ؟؟ قلت نعم صحيح .
فتكلمنا وقال اننا نعاني هذه المشكلة كثيرا مع الزبائن .. ولا نعرف ما العمل ؟؟ هم أشهر وأكثر منا خبره حسب ما يراه الناس !!!

قلت سأزودك بصور من تقارير البريدي , والغروب , والوكالة .. وإن مرت عليك مثل حالتي .. اعرض عليهم الأوراق . .. وأخبرهم عن الدرس الذي تعلمته من هذه الحادثة:
((ان الأقدمية لا تعني الأفضلية.. وانك تكسب عملائك بأخلاقك كما تكسبهم بعملك ))يا خالد .
زودته بالأوراق وهي الآن موجودة عنده لمن أراد الاطلاع .... كما انها مازالت موجودة عندي لمن اراد الاطلاع والتاكد عليه المراسله لا اكثر ..
والله على ما اقول شهيد.

[مجالس الرجال]

هاذي والله المصيبة بيضربون بعض بهالتصرفات والضحية الناس الله يهديهم او يضربهم بخسارة ماتقوم لهم بعدها قائمة

[A7MAD-STYLE]

لي تجربه مع البريدي

شريت سيارتين بعد ما فحصتها عنده هالكلام عام 2012م يوم كان سعر الفحص بدي+مكينة+قير+ميكانيكا +كمبيوتر بـ 500 ريال تقريبا

في السيارة الاولى ولسوء الحظ ماكان موجود صاحب الورشه وقتها والعمال بعد ماخلصو الفحص عطوني التقرير والملاحظات وجا المهندس السوداني أو من جنسية أفريقية وشرحلي الخرابات اللي في السيارة
وبعد الاستخارة توكلت على الله واشتريتها

اما السيارة الثانية هوندا اوديسي .. وفقني الله اني جيتهم أبفحصها وكان الشايب موجود في مكتبه وبعد استلام التقرير من العمال ناداني الشايب وقال انت المشتري قلت ايه قال تعال .. وشرح لي الملاحظات اللي بالسياره ونصحني اني ما أغير زيت القير الا الاصلي ولا بينعدم القير علي لان قيرها حساس جدا ولا أشتريه الا من الوكاله فقط والأفضل كمان أغيره في الوكاله .. مشيت على نصيحته وبعد الاستخاره شرينا السياره والحمد لله توفقنا فيها ..

صحيح الشايب حار وطبعه حاد شوي لا كن مايوصل انه يغلط على أحد أو يقل أدبه عليك
علشان كذا أتوقع ان الشريطيه مايعجبهم لأنه ما يعطيهم على كيفهم ودايما ينشب في حلوقهم !!
لأنه احساسي انه ماشاء الله عليه واثق من نفسه و خبره وفاهم وأمين ولا نزكيه على الله