جيب ربع نيسان ولا تايوتا (( محتار )) ابي الشور

[كبريت]

السلام عليكم

تعرفون دخل الشتاء وابو الشباب يبي يغير المزيونه اللي في التوقيع

لانها احيان ما تاكل عيش تغرزبك صحيح ان الغراز له متعه بس موب كل مرة ههههههه

المهم فانا ناوي اشتري سيارة ومحتار بربع النيسان 2004

فارجوكم توضحولي بعض النقاط وهي

كثير مانسمع عن النيسان انه يتفكك فما ادري وش معنى يتفكك
هل معناها يبدا يطلع اصوات في البدي وهل هذا الصوت منه ضرر يعني (( مكينة - مساعد ....... الخ ))

هل النيسان خربات ؟؟

ارجو انه مايجاوب الا اللي معاه باترول

وان كان في ملاحضات اخرى ارجو انكم تعلموني اياها

شكرا لكم على مروركم

[سفاري]

شف اخوي انا كان معي نيسان ربع موديل 92 والله الباترول حلو مرررررره وان جربته ما راح تغيره هو يتفوق على التويوتا الربع في الراحه فهو ايح من التويوتا لكن التويوتا يعيش معك اكثر واقل خرابات

اما مسألة ان البترول يتفكك فهذا عيب قديم في الباترول والناس ماهوب راضين ينسونه مع العلم ان التفكك حسب سواقة راعيه لو تطعس وانت ما تنسم اظن انه اي موتر يبي يتفكك .
بالنسبه للباترول الي كان معاي مافيه طعس بالرياض الا رقيته وماشاءلله تبارك الله مافيه صوت ابد

مع العلم ان الباترول الكامل ( اربع ابواب ) هو اقرب انه يتفكك من الربع لان الربع جامع نفسه

اذا انت معاك فلوس التويوتا الربع وتبي تتحمل عدم الراحه فيه فهو افضل والباترول اذا شريته ما راح تتحسف يعني الي تشريه فيه الخير والبركه

الله يكتب لك الصالح

[صنهات]

بالنسبه للاختيار اتوقع التايوتا افضل من عدة نواحي
تماسك السياره
اقل صرفيه بنزين
اقل اعطال
ارخص قطع غيار
المردود المالي الممتاز عند البيع
عيوبه.........
ارتفاع ثمنه

ولاتنسي تستخر بالله والله يعطيك من خيره ويكفيك شره

[كبريت]

طيب الاسعار الله لايهينكم

ووش الافضل 2004-2005

وهل هو تانكين

بالنسبة للباترول

وشكرا لكم

[فتى التويم]

السلام عليكم ورحمة الله وبركاته
والله يا ابو محمد ان كان تبي رايي خذ لك ربع باترول فهو افضل واريح ومتماسك وخفيف نفس ولا يطيح سعره واجد خاصه اذا كنت بتبيعه في وقت امطار وخير وربيع وان كنت ناوي على واحد فخذلك 2004 لأنه يجي بخاخ

[كبريت]

مشكورين وما قصرتو

بس ماقلتولي سعر الربع 2004-2005

وشكرا

[كبريت]

معليش بزعجكم

1- هل هو تانكين والتانكي الواحد كم يمشي وكم فله

2- هل يجي فيه دف لوك

وهو على ما اضن انواع وش النوع الزين للبر وشكرا

[1001001]

انا ابي افيدك

انا عرضت الموضوع قبلك فتفضل وزور الرابط التالي وماقصرو الشباب
http://www.mekshat.com/vb/showthread.php?p=314675#post314675

وارجو اني افدتك

[بواسامه]

افيدك اكثر من خوي لي مجرب وميكانيكي بدائره ماااااااا حكوميه ويقول كل السيارتين الربع تستخدمها دائرته

يقول وبكل ثقه خذ تويوتا

لان كرت التويوتا تغيير زيت وسير وفلتر وبس
اما النيسان يقول كرته مليلن قطع واشياء استهلاكيه

وعليك الحساب

[أبو أسامة]

أخي الكريم

أنت جرب التايوتا الربع وراح تشوف الويل من قصة الظهر .......................
أما أنه قوي فهذا لاشك فيه .........................
أما أنه يقلب بسهوله فهذا لاشك فيه .....................
أما أنه يشيل معك أكثر من واحد فهذا مستحيل إلا إذا اللي راكبين ورى بايعيين روسهم ................
أما أنه يمسك سعره فذا لاشك فيه ..................... ماهو لأنه زين لا لأنه تايوتا ....................
أما أنه يشرب بنزين أقولك أيه يشرب ونص واللي يقولك لا مع أحترامي له أن معندهم سالفه ........... بس شربه للبنزين معقول لأنه جيب وليس أنه مايشرب ........ يعني 17 ريال ماتمشني إلا 100 كيلو أو أقل ..... يا أخوان 17 ريال تمشيني بالصني 280 كيلو..........

وأنا أقولك وش حادك على الربع سواء نيسان أو تايوتا ............... ما تقدر تشيل معك ناس واجد ولا عفش واجد ومستحيل يجي فيهن تانكيين أحجامهن صغيره ...

أخذلك شاص على الأقل عفش وتانكيين وأنت مرتاح ........................ بس للراحه ربع النيسان أريح من الشاصات ومن ربع التايوتا
وإذا تبي ربع نيسان أو شاص نيسان فلا تشتري موديل تحت 2004 لأن ما تحت 2004 كلبليتر يعني يشرب بنزين............

وأما إذا تبي ربع تايوتا أو شاص تايوتا فلا تشتري موديل تحت 2000 لأن ما تحت 2000 كلبليتر يعني يشرب بنزين ..........

والله يوفقك لما يحبه ويرضاه .........

والرأي رأيك ...............

والسلام عليكم ورحمة الله وبركاته .................

[طارق الحربي]

عز الله ان كلام ابو اسامه يبرد الكبد ولا يهونون الربع

بس الربع التيوتا اذا لك قدره عليه من فوق 2000 فخذه ولا تشاور طبعا عشان الرساوه وعشان مايقلب لا سمح الله ركب له جنوط وكفرات عراض واتكل على الله

اما الراحه فغير المساعدات وركب مساعدات اريح

اما على صرف البنزين في الباترول ربع رغم ان 2005 و 2006 بخاخ مع ذلك يصرف اكثر من التويوتا


بس النيسان ارخص واريح طبعا بس يتفكك بسرعه خصوصا الشنطه

[كبريت]

مشكورين على الردود الحلوة

بس
1-ما قلتتولي وش معنى ينفكك
2- الباترول الربع انواع وش النوع الزين للبر بينهم؟؟
3- والمواصفات لني امكن اخذه من الوكالة ( يعني دف لوك - فتحة ............ الخ) وشكرا

[لبرتي]

أبو محمد مساك الله بالخير

أنا معي باترول 2005 ربع والحقيقة أنه ليس لي ولا ادري بكم مشري لكن أتوقع أن سعره فوق 60ألف
والتفكك معناه رجه في الكفرات من ناحية الاذرعة وأحياناً بعض المسامير في البدي ترتخي مع المطانيج هذا اللي أعرفه
ومن ناحية القوة خذ عزم وبخصوص سؤالك عن التفكك فأنا نصحني واحد وقال دائماً خل كفراتك حول الثلاثين وفي البر أو النفود 25 وراح تحس بالراحة وفي العزم ومكينته 4500بخاخ ولا يوجد في دف لوك ولا أي شي طبعاً اللي معي سياحي مره لكن من ناحية البنزين ما يصرف مثل القديمات لأني جربت موديل 94 وموديل 98 ينتهي البنزين على طول وخاصة وقت التطعيس لكن البخاخ لا والله ما تحس انه يصرف وهذا أنا شي لاحظته بنفسي

والله يوفقك أخوي

أخوك أبو راكان

[الفهد454]

اخوي ابو محمد اذا بتاخذ خذ ربع 2004 اماراتي يجي فتحة ودف لوك هذا الفل ابشن لكن اذا تبي موتر للبر وجامد خذ الاستاندر اشهد انه موتر مع اني موتري استيشن 98 وموتر ماعليه خلاف لكن اهم شي البوالين

[توونا]

اسال الله ان اكون لك ناصح فاني قد جربت الاثنين ولم اجد اقوى عزم واريح مركب من النيسان الربع تحت 98موياخسارة الايام والسنين الي راحت كني راكب على ظهر حمارعلى التايوتا وعليك بصيانته الدوريه وملاحظته كما تلاحظ طيرط عموما اي سيارة لان السيارة ان هنتها هانتك ولك فائق احترامي وتقديري0

[الربذي]

السلام عليكم
خذ بترول وتوكل على الله صدقني مع ابن عمي 92 وماشي ماشاء الله 360 الف وزي الحلاوي ولاتفكك ولاخرابيط هذا اذا انك راعي مطامر يمكن
بس الربع غالى المستعمل مكروف مره مره حق ناس لك عليهم بصراحه واقولها بالفم المليان 80 بالميه من اصحاب الربوع اناس غير عاقلين وغير طبيعيين بتصرفاتهم وغير كذا غير مريح ولله انك يمكن تبيعه بنفس اليوم وجربه احد الزملا ء!!! وجرب الباترول مريح امن عزمه رهيب

[حرباش]

السلام عليكم ورحمة الله وبركاته


حوار ونقاش رهيب جدا وكالعاده الخصمان احدهم من تويوتا والآخر من نيسان


اما بالنسبه لرأيي انا افضل النيسان على التويوتا يعني اذا بتاخذلك موتر اشوف انك تاخذ ربع نيسان بخاخ ويفضل 2004

طبعا خبرتي في هذا المجال مااتوقع انها تفوق على خبرتكم ولكن اقول هذا الكلام ومنقول عن رجل كبير سن ويعمل في سلاح الحدود ( ان الباتروول افضل من الشاص ومن الربع التويوتا في البر) ولما سأل عن السبب قال النيسان اذا ربض في الأرض وحاولت تطلعه يدف عمره ويمشي معك ، اما التنك يبقى تنك




تحياتي لكم

[طارق الحربي]

بالنسبه للنيسان مايجي ابدا بدف لوك

[patereot]

اخوي انا معي جيب ربع باترول 2004
والله شف منيب قايل لك اني فاهم
بيقعد يقولون لي ربع تويوتا انشط واقوى وما يتفكك وانه ازين جيب في العالم بقوله معليش
الربع التويوتا فيه ميزه وحده انه يمسك سعره وهذا شي حلو فيه فا اذا انت والله بتشتري وبتبيع ان انصحك بالربع التويوتا ولا تشاور احد بس اذا انت والله تبي تستعمل خذ لك ربع نيسان
والله هو نشيط نشيط ويمشي في البر مشي يطيب خاطرك يمشي دروب ما يمشيها التويوتا التويوتا قلبته ما يبي لها شي ومريح ومن ناحية الصرفيه انا معي باترول 2004 بخاخ فل كامل تانكي واحد طبعاً ما يجي تانكيين
فل التانكي ب 71 ريال يمشيني 500 كيلو بسرعه 120كم س.
وفي البر والله انه ما يصرف ابداً ابداً ابداً
وشكل حلو
وراحه
والله من ناحية التفكك انا والله ما شفت منه هالشي
بس انا من النوع الي احافظ على السياره اغير كل شي بوقته
وتطعيسي موب هذاك التفجير يعني محافظ

والله مدري وش اقولك بس انت اسأل وابشر بسعدك

[محب الشمال]

كان عندي ربع موديل تسعين وكنت كارفة كرف غير طبعيي وما شاء الله تبارك الله عليه
يعني يستحمل
وجربت الاندكروزر الربع صراحه قوي لابعد الحدود واقوى من الباترول الربع طبعأً موديل تسعين
صراحه الربع الاند يستحمل اكثر من الربع الباترول
مع العلم اني من عشاق الباترول لانه خفيف ما شاء الله تبارك الله عليه وسهل انك تطلعة الجبال او الطعوس واريح من الاندكروزر
اذا كان بتطلع ربع فعليك اول بالاندكرزر هذا اذا كان فعلاً زي القديمات محافظ على قوته وليس مثل الجي اكس ار ما عندك احد
وكلهن احلى من بعض
وممكن انك تطلع باتترول عشان التطعيس افضل من الاندكروزر الربع
والله يحفظك ويرعاك

[كبريت]

مشكورين وصراحة هيضتوني للباترول

بس برضه الباترول الربع انواع ( S - Sg-..........) فما ادري وش النوع حق البر

[nahham]

انا اعتقد انهم قريبين من بعض وبالنسبة لي افضل الباترول

اتمنى لك التوفيق

[طارق الحربي]

اخوي ابو محمد

ربع الباترول يجي s وسفاري وسوبر سفاري على ما اظن

[كبريت]

مشكور ابو حربي


بس وش النوع اللي يصلح للبر ولا مافية فرق

وشكرا على ردك

[حرباش]

أخوي الربع يجي نوعين

استاندر(عادي) و سفاري

والفروق هي :-
1- الصدامات تجي من لون السياره في السفاري والعادي لا تجي سوود.
2- يجي للسفاري انوار ضباب (كبوس في الصدام)والعادي لا .
3- السفاري يجي معه جنط 16 والعادي لا جنط عادي فضي ومقاسه 15
4- السفاري يجيله دقن امامي اسفل الصدام والعادي لا
5- السفاري يجي ثلاجه والعادي لا.
6- رموت كنترول للسفاري .

هذي بالنسبه للفروقات المتأكد منها


اما الي شاك فيها :-
1- مراتب كهربائيه الحركه للسفاري.
2- انوار الطبلون تجي بيض للسفاري والعادي صفرا برتقاليه
3- تخشيبه داخليه للسفاري والعادي نيكل .
4- المراتب مخمل في السفاري والعادي قماش .

طبعا اتكلم عن الموديل 2005-2006 اما غيرها مالي به علم
وزي ماشفت الفروقات ماهي الا اكسسوارات اما ميكانكيا ماضن فيه ولا فوق وفرق القيمه تقريبا اكثر من 27 ألف

العادي قيمته تقريبا 78 اما السفاري 105 او 115

وانصحك بالعادي اذا انت راعي جلد ومطامر لان الكماليات ماتدوم مع الكرف :(


اذا فيه اي اضافه او تصحيح للمعلومات لا تبخلون علينا
تحياتي لكم
حرباش

[nahham]

مامن قصور ياحرباش

كفيت ووفيت

بارك الله فيك

[كبريت]

مشكورين الله يسلمكم

وخلاص انشاله عازم بس ناقصني الاستخارة

وشكرا لكم

[النفود الشرقي]

أقول بس يا أبو محمد

لا تعدى ربع التويوتا 2005


تراه زين والكل يمدحة
وهو صبور زيادة عن اللازم ههههههههه
يارجال لاتعداة بس مع العلم أنة غرامي بس ماحصل
ما حصل لي ألا غزال النفود ((الذيب الأمعط))



هذا والله أعلم

والسلام ختام
والصلات على النبي

[كبريت]

مشكورين الشباب كلهم

بس انا رحت الوكاله وشفت الباترول الربع وشفت الباث وصراحة اعجبني الباث كاشكل

لكن مدري هو حق بر وانا سمعت ان صرفيته اقل من الباترول

واعطونا مزايا الباث لاهنتو

ومعليش شكلي تعبتكم معي

لكن ماخاب من استشار

[escape_man]

ربع النيسان اسلك وارخص قطع غيار

بس انحش منه

صرفية بنزين تخليك على الحديده وثقالة طينه في الممشى وقرقعه ماتدري وين تطلعلك معه

الله يرحم ايامك يالبليزر