اللي جرب أو عرف من جرب تركيب طرمبة بنزين الـ Vxrأو Gxr بدل طرمبة اليوكن ..يعطينا رأيه

[نجر بن محماس]

اللي معه يوكن من تحت موديل 2000 ونازل يعرف البهذلة وشلون تكون مع طرمبة البنزين.....
يا ما غيرناها.....ويا ما انقطعت في أحلك الظروف وأبعد الأماكن؟
برغم الحرص الشديد على عدم نزول مستوى البنزين عن الثلث...لكن بدون فائدة..

أخيراً....
سمعت أن هناك طريقة لتركيب طرمبة الجي إكس آر بدل طرمبة اليوكن...وتولف توليف
وقرأت مشاركة سابقة في خيمة السيارات حول الموضوع لكنها ما حفلت بآراء المجربين

أتمنى من كل من لديه معلومة أكيدة عن نجاح أو فشل التجربة أن يتحفنا بها هنا
والله يرعاكم

[نجر بن محماس]

اللي معه يوكن من تحت موديل 2000 ونازل يعرف البهذلة وشلون تكون مع طرمبة البنزين.....
يا ما غيرناها.....ويا ما انقطعت في أحلك الظروف وأبعد الأماكن؟
برغم الحرص الشديد على عدم نزول مستوى البنزين عن الثلث...لكن بدون فائدة..

أخيراً....
سمعت أن هناك طريقة لتركيب طرمبة الجي إكس آر بدل طرمبة اليوكن...وتولف توليف
وقرأت مشاركة سابقة في خيمة السيارات حول الموضوع لكنها ما حفلت بآراء المجربين

أتمنى من كل من لديه معلومة أكيدة عن نجاح أو فشل التجربة أن يتحفنا بها هنا
والله يرعاكم

[المدقق1]

اخوي نجر
من تجربة احد الاصدقاء ترهيم طرمبة GXR للجمس الصالون اللي معه حتي الان ناجحة بقوة وله اكثر من شهرر
وسبق طرحت هذا الموضوع علي الرابط ادناه واختلفت الاراء يمكن الاطلاع
http://www.mekshat.com/vb/showthread.php?t=39329

والله الموفق

[عاشق هدوء]

اخوي نجر بن محماس مساء الله بالخير كانك في الليل وصبحك الله بالخير كانك في الصبح وبعد
اعلم ما تعانيه من قهر وغيض على طرمبة البنزين لان اخوك جراله اللي جرالك السالفه ما فيها
اني شريت يوكن 98 قبل سنه تقريباً وبعد ماشريته فتحت الدرج حقه ولقيته مليان فواتير وبعد فحصها لقيتها طرمبة بنزين ليوكن وبليزر صراحه خضني بطني لاكن قد شرينا والامر لله المهم ياطويل العمر بعد شهر تقريباً صار الموتر يطفي على وانا امشي في الخط حتى مرة كانت العائله معي وطفى علي على الدائري وربك ستر وبعدين رحت للورشه وعرضت عليهم المشكله قالوا طرمبة بنزين قالت يالربع لقيت فواتير تو راعيه اللي شريته منه مغريها مالها شهر قالوا يمكن مهيب اصليه قالت ياولد مايبغالها واروح للوكاله الجميح لكن مالقيتها قالوا رح لبالبيد الوكيل الثاني قلت بالبيد بالبيد ورحت قالوا الطرمبه تجي كامله مع العوامه رغم ان العوامه يمكن فصلها عن الطرمبه قالت هاتوها قالوا رح الى فرعنا في الصناعبه تلقاها عنده ورحت للصناعيه نبي نخلص ولقيتها وبعد اخذ ورد وبعد الخصم قالوا 950ريال قلت هاتها اخذتها وانطلقت اسابق الريح الموتر في الورشه والامور مصلحه جينا الورشه وركبناها ب200ريال واخذت الموتر مستانس :D الطرمبه وكاله وبعد شهرين طال عمرك والقاري عادت حليمه لعادها القديمه قام الموتر يطفي في كل لفه :eek: قلت ياولد مال هالموتر عندي مقعاد لابيعه بيعة قرشة الايتام وانزله للمعارض والقاء المعارض مليانه مثله وكل ماسالت لي واحد عن الطرمبه قال توني مغيرها :confused: زاد تصميمي على بيعه بلي هيبه :mad: لين لقيت هاك الوجه الخير على مثل موتري ونشدته عن الطرمبه قال الناس يشتكون منها لكن فيه ورشه في النسيم يرهمون له طرمبة تايوتا ويمدحونها قلت ياولد :confused: ورى ما اروح للورشه اشوف الموتر داخل مزاجي لكن هالطرمبه كرهتني فيه رحت للورشه ولقيت راعيها قصيمي وقالي نغيرها لك ب1200ريال وانشاء الله تضبط يقول انا من اربع سنوات اغيرها ماقد جاني احد يشتكي منها قلت غيرها والرزق على الله وغيرناها يالحبيب ولها حوالي خمسة شهور زي الحلاوه بسم الله تبارك طولت عليك والسالفه ماتسوى لكن قالت ابين لاخونا نجر بن محماس ماهوب الحاله الي مر بها المعاناة واسم الورشه عندي اذا تبيه انا مستعد ولكن انصحك اذا عرفت نوع التايوتا الي تركب طرمبته عليه تشترها انت وتركبها في اي ورشه يمكن توفر نصف القيمه وأسف على الاطاله يانجر :D

[المدقق1]

اخوي عاشق هدوء
اسعفنا بعنوان الورشة
جزاك خيرررررررررر

[نجر بن محماس]

الحبيب الغالي:مدقق1 لا هنت يالغالي وبارك الله فيك

الغالي الحبيب:عاشق هدوء بيض الله وجهك على ها الإفادة المهمة
عز الله إنك فتحت لي باب أمل كبير
ولو تكرمت:
1-وش نوع طرمبة التويوتا؟؟يعني أي سيارة؟
2-هل تغير عزم الموتر؟؟ هل جربته في طلوع وشد ....يعني حالات يبان فيها عزم الموتر؟
3-عنوان الورشة عطناه على الخاص بارك الله فيك

لا تخلينا يالغالي تراك طيرت قلبي من الفرحة

[سوبرمان]

أخوي نجر بن محماس
السلام عليكم ورحمة الله وبركاته
أولاً : صبحك الله بالخير إن كان صباح ومساك الله بالخير إن كان مساء .
ثانياً : أنا معاي سوبربان موديل 1999 دبل ومثلك زهقت من طرمبة البنزين ، وبعدين بفضل الله عز وجل إنحلت المشكلة ، فإذا أنت في الدمام فعطني خبر علشان أفيدك ولايهونون جميع الأعضاء .
والسلام ،،،،،،،

[عاشق هدوء]

السلام عليكم ورحمة الله وبركاته
الاخوه الكرام نجر و المدقق1
ابشرو بسعدكم
1- نوع الطرمبه طرمبة جيب تويوتاء vxr لكن الموديل ما ادري لان صاحب الورشه رفض يعلمني
2-بالنسبه لعزم الموتر من احسن ما يكون يمكن ما ابالغ اذا قلت احسن من حقة بلده
3-عنوان الورشه/ النسيم شارع المعارض ورشة البريدي
اتمنى ان اكون افدتك وتقبل تحيتي
اخوكم عاشق هدوء
حاولت ارسالها لك على الخاص لكن يمكنك مقفله عموماً مافيه شي يستاهل الخاص واتمنى الفائده للجميع

[نجر بن محماس]

الغالي الطيب:سوبر مان
الله يصبحك ويمسيك بكل خير
أشكر لك من أعماق فؤادي هذا الحرص والفزعة لمساعدتي
وكم تمنيت إني من سكان الشرقية.....لكن لألأسف أنا من الرياض
وتكفا إذا عندك علم فلا تبخل علينا...
بارك الله فيك

الحبيب الغالي الشهم:عاشق هدوء
بيض الله وجهك وجزاك كل خير على ها التوضيح
وترى الخاص جاهز الآن لاستقال أي معلومة مهمة
أكرر دعائي لك بالتوفيق والتسديد

[نجر بن محماس]

up up

up up

[salehhd]

بشر نجر بن محماس

ضبطت معاك

[الساجي1]

الغالي :سوبر مان

تكفى الفزعه انا من الشرقيه

[سوبرمان]

الساجي1
السلام عليكم ورحمة الله وبركاته
أما من ناحية الطرمبة فهناك محل إسمه [عالم القطع ] وفيه شخص إسمه [ معتز ]على شارع الملك سعود بالدمام بالقرب من محل قطع غيار الجميح وأنت متجه غرب توجد عنده طرمبات يجيبها من أمريكا جديدة من دون العوامة وهي على نوعين [ عادي - نوع ممتاز ] العادي سعره بحدود [ 300 ] ريال والممتاز بحدود [ 450 ] ريال والحقيقه أنا أخذت من النوع الممتاز وبفضل الله عز وجل السيارة ماشية الآن وصار لها فترة ، ولكن هناك شيء مهم ويجب أن تغيره وهو فلتر للبنزين ويركب في الشاصي تحت باب السواق وهو رخيص بحدود [ 30 - 40 ] ريال وهذا الفلتر هو الذي يحرق طرمبة البنزين إذا كان ممتلىء بالأوساخ القادمة من الخزان أما من ناحية التركيب فأسال صاحب المحل معتز وهو يدلك .
آمل أن أكون قدأفدتك .
تمنياتي لك بالتوفيق ،،،،

[الساجي1]

الله يعطيك العافيه
ياسوبرمان