علامةالشيك أنجن

[ابو بريك]

ألآخوة الكرام وأهل المعرفة بعد التحية سؤالي هو انا عندي قراند شيروكي وأغلب الاحيان تضهر لمبة الشيك أنجن بالطابلون وأفحص السيارة وللة الحمد لاشي اريد الحل مع السبب..وشكرا.

[مهراس]

السلام عليكم ورحمة الله وبركاته:

أبو بريك هلا ومرحب فيك:
اذا ولعت عندك لمبة check engine فهذا معناه ان هناك عطل في محرك السياره وله رقم يظهره جهاز الأعطال عند بعض الورش.
أول شي تفحص كمبيوتر السياره طبعا بالجهاز (بعض الورش ياخذون 50 ريال لأظهار ارقام الأعطال)، ولكن هناك طريقه سهله تطلع بها أرقام الأعطال من السياره بواسطة اللمبه نفسها للموديلات من 93 الى 97 اذاكانت سيارتك من ضمن هذه الموديلات، وسوف اشرح لك كيف الطريقه:
1- احضر ورقه وقلم
1- تفتح وتقفل السوتش ثلاث مرات ( يعني ON - OFF - ON - OFF- ON) في مدة 5 ثواني أي بسرعه.
2- لاحظ لمبة check engine سوف تعطيك ارقام الأعطال كالتالي:
مثلا اذا كان رقم العطل 35 سوف تولع اللمبه اولا ثلاث مرات(ثلاث غمزات) للرقم 3 ثم تطفي قليلا ثم تولع خمس مرات للرقم 5(خمس غمزات) واذا فيه رقم ثاني نفس الطريقه، وما عليك الا كتابة أرقام الأعطال واعطيك ترجمتها من كتاب الأرقام عندي.
أرجو انك استفدت من شرحي المتواضع ولو ماعرفت كيف اشرح لك على الجوال.
تحياتي. أبوفهد.

[أبو يوسف]

ممكن اخوي مهراس توضح اكثر
وهل يتطبق على الشرروكي الكلاسيك 99 ؟؟
أنا اذا فصلت اي سلك تطلع اللمبة يعني مهب عطل بالمكينة ،، حتى لو فصلت حساس المروحة
مع الشكر

[مرقاب الشرق]

حلها بسيط وانا اخوك رح لبنشري وخله ينظفلك فلتر المكينه بالهوا وانشا الله تدعيلي .

[مهراس]

السلام عليكم ورحمة الله وبركاته:

ابو يسف ليس كل عطل يطلعه الكمبيوتر يوقف السياره وكلام ابوفارس صحيح اما سيارتك اشوف لك اذا كانت زي القراند شيروكي او لا. تحياتيز
أبوفهد

[المربد]

هذا يحدث غالبا يحدث في السيارات المستوردة استعمال امريكا، والسبب فيها هو( متحسس الكاربون والتلوث البيئي) يكربن بسبب تغير نوعية البانزين عندنا ، وافضل شيء تنظيف متحسس الكاربون وان شاء الله تزول المشكلة

[ابو بريك]

الاخوة/ مهراس
ابو يوسف
ابو فارس الشمري
المربد
اشكركم على تجاوبكم معي وان شاء اللة نستفيد من خبراتكم.امس فصلت البطارية ورجعتها وراحت اللمبة.

[مهراس]

السلام عليكم ورحمة الله وبركاته:
اذا سمحت يابو بريك تعطينا خبر اذا جات اللمبه مره ثانيه، احتمال ترجع دامك فصات البطاريه فقط،
وقوللي اذا ما عرفت الطريقه علشان افسرها لك بالصور كود تعرفها والأخوان بالمنتدى.

[خيال الغلبا]

طيب واذا كانت تولع في اللاند 93 قير تماتيك
ولم اجد لها حل عند احد الكل يقول لايوجد السي دي حقها
فماالعمل

[الربذي]

الاخ العزيز ابوبريك انا كل شوي تولع معي اول مره ضاق صدري بصراحة واروح للورش قالو لازم الوكاله وقبل كل ذلك طرحت موضوعي هنا ماقصروا احبابي تفاعلوا وهذا طبع اعضاء مكشات راعين فزعات لاخلاء ولاعدم
وبالاخير طفت من كيفه ولعت يجي ثلاث مرات وتطنيش وبعدين تمل وتطفي !!!
ومثل ماقال اخونا المربد
لكن طريقة اخونا مهراس رائعة والحين ودي تولع عشان اطبق طريقته الي اول مرة اسمع بها وماقلتلك اعضاء في جسم واحد اللهم احفظهم واهدهم صراطك المستقيم
وبمناسبة الوكاله بصراحة نصب في نصب مره رحت انا واحد الزملا للوكاله قال ابي تشييك
ربع ساعه وقالو رح للمحاسب ويطلع من الكمبيوتر عندة فاتورة فيها 450 ريال من غير تغيير الزيت والسيفون وباسعار مبالغ فيها لا وخويي مبسوط لانهم قالوا له سيارتك سليمة ويقول كل شهر او شهرين امر عليهم واشيك عندهم والفحص 450 ريال وسيارة صني قزاز عادي وشلون الجيب فل كامل
ابو يوسف تسمحلي رشفة من اهالكاسه والشاهي الي كنة دم غزال !!!

[ابو بريك]

رجعت ولعت من جديدواللة طفشتني.........

[time]

فية طريقة يمكن تحل المشكلة بعض الاحيان افصل سلك البطارية لمدة 10 ثواني تقريبا وان شاء الله تروح .

[مهراس]

السلام عليكم ورحمة الله وبركاته:

اخي الربذي: الطريقه اللي تكلمت انا عنها فقط للقراند شيروكي من 93-الى 97 حسب مافي كتب الأصلاح، عافاك الله، وياليت الطريقه هذي تصلح لكل السيارات كان عرفنا الخلل فين ووفرنا الدراهم.

تحياتي

[عـبـود 911]

هل تنفع للأفالون 96

[car×car]

طيب فين القى جهاز الكشف على الكمبيوتر وبكم يبناع وفين ؟؟؟؟

[ابومعاذ3]

السلام عليكم

شدني موضعكم عن لمبة ( شك انجن ) انا عندي فرد فكتوريا موصفات امريكية واللنبة تولع وتطفا على كيفها
سألت كهربائي قال هذي اللنبة تولع على اي خلل لو بسيط يقول حتى لو يتجمع الكربون على اصابع البطارية تولع لو تضعف فحمات الدينو ولو شي بسيط تولع حتى إختلاف البنزين واحتراقة يولعها عند اصحاب المواصفات الأمريكية
فصلت البطرية وشبكتها طفت فترة ثم ولعت !!!!!
قمت فكيت الطبلون ومكعت ابوها ومسطت بها في الأرض واسترحت في القيادة في السفر خاصة في الليل لأنه تضايقك في الطبلون
تحياتي

[بدون لوحات]

اطفى السياره وشغل السويتش (5) مرات ورجلك على البنزين بالضغط والرفع

[مهراس]

السلام على من اتبع الهدى

الأخ بدون لوحات من وين جبت هالفكره، وهل اللمبه تطفى وماعاد ترجع، ولك جزيل الشكر

أبو فهد

[المتطور]

انما عندي يوكون استخدام م99 فيه نفس المشكلة رحت كهربائي وفصل البطارية وطفيت لمدة ثم عادت المهم ضحك علي الكهربائي واخذ 50 ريال قيمة شغل يد وعشان يشيلها
المهم انا مبسوط اني عرفت هذا المنتدى ورجاله قبل ما يضحكون علينا الكهربائييين ويسنزفون اموالنا لقلة خبرتنا
فجزاكم الله كل خير
وياليت يا اخي مهراس لو تعرف اش اسوي في لمبة الصيانة هذي في اليوكن تخبرني ولك الشكر

[الكلاسك]

دام السياره ماشيه تمام ومعطيها حقها من الصيانه مثل الزيت والسيفون وفلتر الهواء وماء الاديتر والبواجي واسلاكها لا تهمك لمبة الشك انجن اسفهها وطنشها :mad: خلك ثقل ولا تطير في العجه :cool: رجال عقل وثقل تخبل فيك لمبه :confused: تولع ولا ما تولع دلع مكاين :D واحد من خوياي مولعه لمبة فيها صورة مكينه ولها سنتين والرجال ما جاب خبرها يعني باختصار اذا ما تغيرت عليك السياره وولعت اللمبه طنشششش لكن اذا ولعت وتغيرت السياره ذيك الساعه خلك ذروق :j رح ابحث عن المشكله وتحمل بثارة هالاتراك النصابين ( الا ماندر ) وغيرهم من الشوام وبس تصير انت كذا :good:

[الكلاسك]

الموضوع بالمختصر المفيد اذا ولعت اللمبه والسياره ما تغيرت عليك من حيث ادائها وانت معطيها حقها من الصيانه مثل الزيت والسيفون ونظافة فلتر الهواء وماء الاديتر والبواجي واسلاكها اذا كلش تمام طنش اللمبه واعتبرها ما ولعت:cool: وخلك ثقل:mad: لا تطير في العجه وتحتار :confused: وتخاف :j وتقعد تدقها بتسوه عند الناس :( اعتبرها دلع مكاين .
لكن اذا تغير اداء السياره وولعت اللمبه معناتها ان الدعوه جد عاد ذيك الساعه لا تطنشها :no2: رح دور لها صيانه والله يعينك على هالاتراك النصابين الا ما ندر والاشوام يوووو عندي سالفه بس ما يتسع المجال لذكرها هالشوام والاتراك معظمهم يتربصون بجيبك ودهم يمعطون اللي فيه :director: وانت مسيكين ما غير تقلب عييناتك فيه ولا تدري وش السالفه:looney:

[car×car]

تولع ولا ما تولع دلع مكاين :d


صدقت

[مهراس]

الأخ المتطور

أهلا بك وبمشاركتك الطيبه وتقبل تحياتي، وردا على سؤالك أقرأ موضوعي عن كيفبة التعامل مع هذه اللمبه التحذيريه:http://www.mekshat.com/vb/showthread.php?t=54465


عزيزي الكلاسك اشكرك على تشريفك الخيمه والموضوع، وهذه اللمبه لا تهم كثير من الناس وانا أشوفها والعه في كثير من السيارات وخاصة المصنعه من شركة جنرال موترز ولكن اذا لم تكن تعنيهم هذه اللمبه فليس هناك فرق بين قيادة هذا النوع من السيارات ذو التقنيه المتقدمه وقيادة الونيت مثلا، وللمعلوميه اهمال هذه اللمبه يؤدي الى الأمور التاليه:
1- زيادة التلوث البيئي بسبب عدم الأحتراق الكامل للوقود والذي بدوره يحفز حساس الأوكسجين والعادم لتشغيل اللمبه.
2- ضعف أداء المحرك بسبب خلل في بعض اجهزة التحكم في أداء المحرك والذي يؤدي الى توليع اللمبه
.3- احتمال ظهور خرابات أخرى في محرك السياره وذلك يؤدي الى زيادة تكاليف الأصلاح وأضاعة الوقت
واخيرا فان اصلاح عطل اللمبه لن يكلف الكثير في بادىء الأمر ومن هنا ظهر مصطلح (الصيانه الوقائيه) كما تراها وتسمعها في وكالات السيارات، أليس هذا مرادف للمثل الدارج.... الوقايه خير من العلاج، ولست خسرانا مع السيارات كلما اعطيتها اهتماما اعطتك عمرا أطول بدون مشاكل.

أبو فهد

[عاشق الديNالي]

السلام عليكم
ياجماعة الخير انا صارت معي نفس مشكلتكم وراح احكيلمم قصتي :
شريت دينالي 2005 استعمال امريكي وماجاله اسبوع الا واللمبه مترززه بالطبلون وارتفع ضغطي غيرت لها قطع استهلاكيه بحكم انها سياره مستخدمه والامور تمام ومازالت اللمبه شغاله نفسي اكسر الطبلون:mad: من القهر وفريت على اكثر من ميكانيكي اللي يقول فلتر هوا واللي يقول بواجي واسلاك بواجي كل من يفتي على هواه مع اني مغير كل شي فيها بس وكذا يوم ماعندي اشغال وافتح الكبوت وناظر الفيوزات وطلعها مافيه شي ونا اطالع الفيوزات تعلق عيني على اقطاب البطاريه وبالذات القطب الموجب مصدي هو والصاموله حقته بس وافتح الاقطاب كلها وبخها ببخاخ مزيل الصدأ وافركها لين صارت الامور تمام وارجع اشبكها وشغل الا مالها وجود بالسياره ونط من الفرحه :Dوصقعت بالسقف ههههه بس وبرضه كان الخوف بقلبي قلت ليكون بكره تولع وكرفتها اسبوع ونص وللحين ماطلعت ياشباب وهذي تجربتي واتمنى اكون افدتكم بدل شفتو كيف احنا شلون مضحوك علينا من الميكانيكيين بس خلها ع الله مايمنع انكم تسوون فحص كمبيوتر من باب التأكد والاحتياط بس لااحد يضحك عليك ويقولك كراسي قير او مكينه لان هاللمبه مشكله كهربائيه بحته وليست ميكانيكيه على خبرتي المتواضعه والله اعلم واسف على الاطاله
اخوكم

عاشق الدينالي