اول موتر طلعت عليه البر

[حـاتـم]

السلام عليكم ورحمة الله وبركاته

هاذا اول موتر لي طلعت عليه البر وكان ميتسوبيشي((ادلعه مسمس ))

الموديل /1992
المكينه 2600 بنزين
والله بالرمل قوي جدا ونان مجربه بالاول يرقاء النفود عادي مب لزو شد عزم

عيوبه

البليتين 24 ساعه يلذع

والان هو بالورشه علاج طبيعي يبيله توضيب وانشاء الله اذا خلص اطلع عليه مره

استمتعوا بالصوره
http://www.mekshat.com/pix/upload/images10/mk17635_msms.jpg

وانتم اخواني وش اول موتر طلعت عليه؟

وشكرا

اخوكم /حاتم

[Khalid AlGhamdi]

http://www.ship.edu/~mtappl/image1.jpg
تشبه هذي بس اللون ابيض وغمارتين :)


وعليكم السلام ورحمة الله وبركاته

ماشاء الله من مبطي والميتسوبيشي الوانيت مشهور بعزمه :) الله يعطيك خيره ويكفيك شره

اما عن اول موتر طلعت به للبر كان مع عيال الحارة

كان عند جيراننا ددسن منطول عند بابهم والله مادري كم موديله لكن كان الصدى ماكله اكل حتى ان فيه شق بالحوض تشوف اللي داخل الحوض من برى :D

وحنا 6 يعني ثلاث قدام وثلاث ورى

وشغله لنا اخو واحد من الشباب بالجيب حق الدوريه من الساعة 7 الصبح ماشتغل الا الساعه 9 ، الشرطة في خدمة الشعب :D

وطلعنا للبر وظعنا وماعرفنا الطريق الا بشق الانفس وطبخنا غدانا وياسلام كانت كبسه ولا اروع

وبعدها جا واحد من العيال بتفلسف جايب لنا شجره يقول زينه مع الشاي ونسويها ونشرب الشاي وبالصدفة واحد من اخوان العيال اللي معنا متعدي من عندنا ونعزمه على بياله شاهي ويوم شاف الشجره قال وشو هذا !! قلنا زينه مع الشاي .. قال هذا الغنم ماتاكله وانتم تشربونه مع الشاب ( انا بديت احس بمغص :confused: )

وبعدها قررنا نرجع للديره قبل المغرب لان الانوار الامامية طاحت وحنا نمشي والكنداسه طاحت والبريكات فلتت ماصارت تمسك بريك وحطينا كل هالاغراض بالحوض المنشق على امل انها تتصلح بعدين

ولكن هيهات .. لاننا قلبنا وحنا معودين وانا دخلت المستشفى انشعر كتفي :D قعدت ثلاث ايام وطلعت
ثمن صفقني ابوي زود وقال لاعاد اشوفك تطري البر :(

ولكنها مازالت عندي من اجمل الكشتات :D

[حـاتـم]

ههههههههههههههههههههه
اخوي ابو معاذ دايم هالطلعات ذكرياتها حلوه
وانا اسميها (( طلعات القراده ))

دايم تصير معنا مواقف لاتنسى

وشكرا لمرورك

اخوك / حاتم

[غيّام]

موضوع متميز كتميزك اخي الكريم

اول موتر طلعت عليه جمس ورحنا للصمان قبل عشر سنين

بس حلوه تدليعة الموتر

تسلم اخي
اخوك المحب
غيّام

[حـاتـم]

شكرا على مرورك اخوي العزيز غيام

[بو خليفه]

أول سيارة طلعت بها البر هي بليزر 1981م و كفرات بلون جداً كانت ممتعة الرحلة حوالي 15 سنة

[عريدان]

الظاهر بيصير موضوع أول موتر طلعت عليه للبر زي موضوع ليلة الدخلة بالنسبة للجـ..... الآخر. يعني بكى وذكريات وهو مبسوط أصلاَ.

[حـاتـم]

اخوي بو خليفه مشكور على مرورك

عريدان ؟ (( كيف الحال ))

والله مافهمت قصدك

وشكرا

اخوكم /حاتم

[عبدالهادي]

داتسون 83 غمارة والله وش قد جاها من الكرف والبهذلة

[أبو يوسف]

ددسن 92 جي ال
بس ما كنت اطعس عليه ومتحسف الحيييين لأني ما شبعت منه

موضوع رائع يحرك الذاكرة التي بدأت تصدأ

مع التحية

[بواسامه]

هلي موديل 78 كريمي

الله المستعان

[دله وفنجال]

السلام عليكم....
والله اول موتر طلعت عليه Gx 91 والماريه احترق الكلتش(أخوك مطفوق مايعرف) هذاك اليوم وكان يوم عيد الفطر ولا حولك احد الله لايعيدة....

[اسيزو 4x4]

أول موتر طلع علية أخوكم أبو حمود البر باترول 91 على أيامة كان شي

مشكور يا بعدي ( حاتم ) على الموضوع الأكثر من رائع .....


.

[شاص]

مع الوالد بهلي غمارة موديل 83 أبو شطرطون أحمر و مرسوم على بابه نخل وبعارين

[الـمـطـيـري]

السلام عليكم
شكرا اخوي على الموضوع الي مايطري على البال :)
اول موتر طلعت فيه قنص سوبر مديل 81 بسنه 86
واكثر كان الصيد واجد والبر فاضي :)
عكس الحين

[ع.ف.الدرويش]

السلام عليكم ورحمة الله وبركاته

بصراحة أول طلعة لي و للبر كانت من 14 سنة
مع واحد من خوالي طلعنا بصني بكس كريميه موديلها 84 يمكن أقدم أو أحدث ناسي
كانت طلعه خيال وعلى قد الحال يعني ما أبعدنا واجد :d

الله يرحم زمانٍ مضى

[salehhd]

موضوع شيق

ولي رجعة

[فتوة]

على هلكس سنة 76وحلناها حصى حتى نسوي صبة للبيت

[عاشق الجبل]

وعليكم السلام

موضوع متميز أخي حاتم


أول سيارة طلعت فيها للبر مع الوالد رحمه الله ( نيسان ربع موديل 77 اللون أحمر )

[ابـ معزي ـو]

اول موتر طلعت عليه ددسن 92 لها اللحين معي ومغبره للحين من كثر السنين اللي جلست معي
الله يخليها وش حليله صبرت على الكرف

http://www.mg10.com/vb/uploaded/almaha_2.gif

<<< متهور من يوم انه صغير :D

[حـاتـم]

ياهلا بالاعضاء

مشكورين جميعا على ردودكم وتفاعلكم مع الموضوع ونشوف جديدكم

ولكم التحيه جميعا

وشكرا

اخوكم /حاتم

[الموادع]

طلعت اول مرة على 200 ال 88 و طاردت حصني صغير .... و انكسر علي المقص !!!!
==============================================
و ذلك قريب من منازل (( عبلة )) بين جنوب القصيم و الدوادمي !!!!!!!! عند غدير عبلة بالقرب من الديرة الخربة !!
==============================================

[صفوق الشمري]

اول طلعة لي كنا على 3 سيارات جمس حوض 78 عبارتين لونة ازرق
وددسن 82 غمارة على عزها ماحد قدنا
وددسن 81 غمارة
الله وكبر يازمن راااااااااح
الله يعطيك العافية على الموضوع الرائع
ولكم تحياتي
اخوكم : صفوق الشمري

[anas]

آخخخخخخ بس .. تصدقون يا جماعة وانا اقرأ ردودكم ودي أبكيييييييييييييييييييييييي ما أدري ليش ...... تذكرت ايام لن تعود الى قيام الساعة .... يبغالي وقت حتى استرجع الذكريات ولي عودة ان شاء الله .... وتسلم لي يا حاتم على المواضيع الحلوة هذي .

[anas]

معليش الموضوع شيق صراحة .... وبانوا الشيبان من خلال الردود ;)

[عاشق البران99]

أول موتر طلعت عليه للبر كان هايلكس موديل 83 غمارتين وكان وقتها شي ( وكالة ) ..

المكان ... حطابة على ما أظن ...

[ع.ف.الدرويش]

للرفع..

ودنا بمشاركات شياب هالمنتديات الطيبة

[فتى الدهناء]

يووووه ذكرتني بذيك الأياااام ... الله المستعان

تذكرون يوم كانت محطات البنزين... ( براميل ) :D

يوم كان برج الجوال .. ( برج كرهب ) توه ماكبر :p

تذكرون السيارات البخاريّة ؟! ..... ولا مالحقتوا عليها :)

تذكرون الإهرامات وهي عظم .. وسور الصين العظيم يوم كان عقم .. ؟! :D

ااااااه بس يزينها من أيام

أذكر أول موتر طلعت عليه للبر .. ( مابي أقول كنا نكشت على سياكل .. أخاف ماتصدقون )
المهم أول موتر هو .... متسوبيشي .. حوض غماره .. 82 ..:D

كل قرن وأنتم بخير

:j

[ع.ف.الدرويش]

أذكر أول موتر طلعت عليه للبر .. ( مابي أقول كنا نكشت على سياكل .. أخاف ماتصدقون )


:)

قبل فترة سألت الوالد الله يحفظه عن كشتاته من قبل
يقول زمان أول وأنحن بالديرة (يعني الزلفي) نطلع على سياكل وإلا على الحمير (وأنتم بكرامة)
وزود على كذا مهنا عزب..!
كل شيء بالقدر الكبير >>>>> القدر السحري
أحاول أنا أتصور الكشته أحس إنها مضحكه (هههههههههههههههههههههـ:D)
الله يرحم زمان أول....:cool:

[ال معلى]

اول طلعه كانت يوم كتت بثالث ثانوي يمكن قبل

9 سنين كنت قايل للوالد الله يحفظه اني اذا خلصت المدرسه

بنروح للبر وبنرجع يوم الجمعه انا والشباب وكان معي جمس

صالون موديل 79 وكان ورده وكاله فاكه الشايب المهم

طلعنا للمدارس في الصبح وقلت لخوياي بتدرسون قالو ايه

قلت انا بسبقكم انا ورفيقي والحقونا بعد الطلعه الله <<< زمان راح:rolleyes:

المهم خلصو الدراسه ويوم جوء للخريم الا الجمس حافر ومغرس من الساعه

9 ليتني درست وعينت خير ابرك لي وعقبها صرت كل فتره وفتره اطلع للبر

وسلامتكم

[أمجد]

أول موتر طلعت عليه للبر مع أخوي الكبير
كان هالكلام عام 1987 م إذا ما خانتني الذاكرة

والموتر جمس صالون موديل 80 قير عادي (اللي منعفت) وكانت رحلة قنص وغرزنا الله يسلمكم تغريزة عمري ما شفت أغبى منها لأننا كلنا نتعلم وجا جيب من حقات الجيش اللي استبنته على الكبوت وحاول يطلعنا وغرز معنا لأن الجمس ثقيل ومغرز على سنع وأكلنا خابور على كيفك والحمد لله إن ربك ستر