معي جيب انسم ليش ؟؟

[أبو يوسف]

السلام عليكم ورحمة الله وبركاته

عنوان هذا الموضوع كثيرا ما نسمعه ممن يمتلكون سيارات الدفع الرباعي وليسوا ممن اعتاد المكاشيت

في الحقيقة انت يا صاحب الجيب لا تملك عصا موسى بامتلاكك عصا الدبل
الدبل مساعد للسيارة وليس الفانوس السحري الذي يستطيع انتشالك مما وقعت فيه
قد تستطيع المشي في الرمال وأنت لم تخفض من هواء الاطارات ولكن يجب ان تشغل الدبل
ولكن أضرار هذا العمل أكثر من محاسنه
1- عدم استخدامك للدبل الا عند الحاجة يساعد على اطالة عمره الافتراضي
2- أنت حينما تدخل النفود والاطارات مليئة بالهواء فأنت تثقل الحمل على الماكينة وبالتالي ارتفاع الحرارة
3- تساعد بفعلك هذا إلى تفكيك السيارة وخلخلة تماسكها
أخيرا هناك أمر قد لا تعبأ به ولكنه مهم وهو افساد الطريق على من بعدك بـ ( البطنجة )

لذا نصيحة عندما تدخل الفود قلل من هواء الاطارات وليكن الضغط 20 حتى تنعم بالراحة الجسدية والنفسية وتتفرغ للاستمتاع بمنظر الصحراء الساحر


ما ورد أعلاه يعبر عن وجهة نظر وليس بالضرورة أن يوافقني الكل والموضوع مطروح لابداء الآراء

مع التحية والتقدير
أبو يوسف

[nahham]

صح لسانك ابو يوسف

بارك الله فيك

[ابو شكاع]

ابو يوسف
كلامك صحيح
والقيادة بالبر وخصوصا النفود فن
وقمة الفن هنا هو انك تمشي بالنفود وتاخذ راحتك بدون ماتغرس وبنفس الوقت ما تجور على الموتر
شكرا لك

[ريف النشاما]

السلام عليكم ورحمة الله وبركاته

:D

مبروك الأسم الجديد -- بس وين التمايم :)


وموضوعك ممتاز وهذا شي علمي قرأته في أحد النشرات المختصه بالسيارات وهو يحافظ على السيارة



وهذا في الصحراء عموما ولكن في الأماكن التي فيها جلد وحصيان مايكون النقص مرة يعني على 25 جيد


تحيتي

[أبو يوسف]

اخوي نهام
اشكرك على مرورك
واهلا بك


اخوي ابو شكاع
سعدت بمرورك وزادت سعادتي بمشاركتك

استاذي ريف النشاما
ازداد الموضوع اهمية بوجودك وتوقيعك
أما التمايم ف نحتري الربيع كود الذبايح ترخص ونسويه مندي موثق مثل اللي بخيمة الطبخات
شكرا لمرورك الكريم


وتقبلوا تحيتي

[أبـ [مطلق] ـو]

أبو يوسف ..

موضوع رائع جداً

وكلامك عين الصواب .. والصراحه كثير الي نشوفهم يترزز بهالجيب ويقول ما يحتاج ننسم

النفود لابد من التنسيم زي ما قلت لراحه السياره وراحت الشخص نفسه

يعطيك العافيه على الموضوع المميز

تحيااتي

.

[عاشق الجبل]

وعليكم السلام ورحمة الله وبركاته


فعلآ أخي أبويوسف هذا مايقوم به غشمان الجيوب الذين لايمتلكون الخبرة الكافية .

ذكرتني بأحد الشباب في أحد مقانيص الرمله ، كان معه جيب في آكس آر ومركب عليه كفرات ميشلان هواها 40

حاولنا نقنعه بتخفيف الهواء ورفض بحجة أن الموتر 8 سلندر ونشيط .

وأقتنع بعد ماطاح برباضه ودخن الكلتش


عمومآ موضوع تشكر عليه أخوي أبويوسف

[اسيزو 4x4]

السلام عليكم ورحمة الله وبركاته

أبو يوسف كلامك عين العقل والصواب وبارك الله فيك

ويا كثر اللي يتفلسفون بالنفود قبل ما يبدى يدخل يقول أنا ما احتاج تنسيم أبد :o

ويقول يا عيباه أنسم -- وش ييقولون الناس هذا الغشيم منسم كفراتة يعني مايعرف يسوق :confused:

وتلاقية شوي ويغرز الى الشاص وتعال شفة كلن يمر من عندة منسم ومرتاح وهو أشقا عمرة وسيارتة :D

وبارك الله فيكم يالمنسمين :D

أبو حمود ;) :D ...

[((( الحر)))]

مشكور اخوي ابو يوسف على هذا الموضوع المهم والرائع

وانا اوافقك الراي جملة وتفصيلا.

وافر واحلا تحيه

[المربد]

موافق على طول من تجربة .‍‍!!

ولكن هل من تحيليل علمي او منطقي للعملية؟

سؤال: هل لعرض الكفرات اثر ، يعني اللي كفراته بالون وسيارته صغيرة هل يحتاج ينسم؟

[aziz2727]

تسلم اخوي ابو يوسف وجميع المشاركين
صحيح من الضروري تنسيم الكفرات عن الدخول للنفود
لراحة السياره اولا" والاستمتاع بالمناظر ثانيا"
ويعطيك الف عافية

[محمد حمد]

التنسيم مهم في الرمال ماأزيد على كلام الاخوان !!
صار موقف لسائق سيارات رالي محترف على ما أذكره بالضبط هو يا باخشب يا بن سليم المهم من الموضوع
راح يتجول في الصحراء بسيارته الخاصة من نوع جيب وغرز ولا قدر يطلع السيارة وراح يطلب المساعده لإخراج سيارته
فأتوا مجموعه من الناس ونسموا كفراته وطلعوه فقال ما كنت اظن ان تنسيم الكفرات يساعد السيارة .... ماكان عنده خبر عن
اختراع الذره وهو تنسيم الكفرات .... منقول من احد المجلات

[حـاتـم]

السلام عليكم ورحمة الله وبركاته

صح التنسيم مهم جدا للراحه الموتر وراحتك انت بعد

بس فيه مشكله نسيتوها وهي ((التكاسل في تعبيه الكفرات))
اغلب الناس ماينسم علشام مايعبي الهواء ويتأخر

وعلى فكره بالنفود مقل الدهناء ولا مايحتاج تنسم لان الموتر يتمشى

وطحنا برباضه ومع الثقيل والديف لوك طلع الموتر ولا حتى تنزل من الموتر
طبعا ايام الشتاء بكفرات دنلوب عادي

بس فالنهايه يجب تنسيم الكفرات علشان ماتعور الموتر



وشكرا اخوكم / حاتم

[salehhd]

كلام جميل وكلام معقول

يعطيك العافية ابو يوسف بس وين التمايم

[أبو يوسف]

اشكر الجميع على المشاركة والتكرم بالمرور

والتمايم تحتريكم بس حددوا الموعد


ويا هلا

[شاص]

صح لسانكم جميعاً كفيتوا ووفيتوا

[أبو يوسف]

مشكور اخوي شاص على المرور

[CRUISE**كروز]

كلامك ماعليه اعتراض
لكن نترك التنسيم احيانا خوفا من البنشر بعد انت تجتاز الرمل
اما اللي دايم مجهز اغراضه فلا له عذر

[مزاااجي300]

كلام عين العقل وهذا الموضوع رد على موضوع طرحته

الف شكر يالغالي

[kssa]

مشكور ابو يوسف


والدليل شف الهايلكسات والدداسن منسمين الكفرات ويتمشون في النفوذ


بس قل لي ...

وش سويتو في التعليقة اللي في توقيعك

ما سولفت بها لنا

http://www.mekshat.com/pix/upload02/images59/mk7084_4tunerk.jpg

[التعـ King ـديل]

موضوع قديم بس مهم وخاصه اننا بوقت طلعات البر

[sgl2002]

والله اني اعجز من التنسيم واكسل

وعلى حسب الممشى وبعض الاحيان ما احتاج تنسيم بس اذا دقر ع طول انزل وانسم

[ابو طاهر]

كلام سليم وفي محله

ولا ازود علية شيء ما شاء الله تبارك الله

وهذا المفروض الي يصير

ولك التقدير والاحترام

[kssa]

انا من النوع اللي ما ينسم اتعيجز من تفخ الكفرات مرة ثانية

عشان كذا ما ادخل كثير في النفود


لكن اعتقد ضغط 20 مناسب جداً