طريقه الخرز للتخفيف من الام المخالب

[راعي مسكت]

السلام عليكم ورحمة الله وبركاته

كيف نخفف من الم قبضه الطير الي يهوش على العشا ولاعاد له علاج ؟

كيف نخرج الحبارى حيه من كف الطير الي مافيه امل يعطيك فرصه تخلصه منها الا وراسها في كفه ؟

امس في المجلس زارنا واحد من الربع شروا القارين
وعلمنا بسالفه طير طيب سبوق ،
ولكن فيه عذروب وهو الهوشه على العشا.ووحده من المرات شبك وجه الصقار وظربه بالارض مرتين وغفل الطيرولكن حيا وقطع وجه خوينا وشوهه.
المراد باعه وخذه واحد منه لان الحبيب عافه بعد سالفه التشويه
فاستخدم راعيه الجديد طريقه الخرز وانجحت مع الطير
فعند الهوشه لايوجعه وعند الهدد اذا اشتهى يطلع منه حيه طلع منه بالراحه وعلى هونه .


والطريقه هي وضع سوبرغلو في 8 حبات خرز مسباح
(والخرز يختاره على حجم المخالب صغيره يختار خرز صغير وهكذا )
ومن ثم يقوم بتثبيت الخرز في مخالب الطير عند بدايه المخلب او بين الاصبع والمخلب واهم اخرزه الي في الكاشح .
والطريقه مجربه وافتك من (تكفى يافلان افزعلي) :) او السموحه يافلان الحبارى ماتت
وينصح بوضعها لمده لاتزيد عن 15 يوم
وطريقه نزع الخرز سهله (تقوم بفر الخرز يمين ويسار وتطلع في يدك )

[مخبط القشع]

ماقصرت يا مسكت

[قشاع الرمث]

السلام عليكم ورحمة الله وبركاته

عز الله ما قصرت يا راع مسكت
ومهمه جدا خصوصا للي بيعلم فرخ
وده يخليه يداوس الحبارى اكثر من مره .

وزينه للفسقان الي يبي يشري حبارى لطيوره
اعزل من هذا لهذا .

والا لا اخوي مخبط القشع .

مع الشكر .

[مزاع]

أقول المشكل في هالسوات الطير ما عاد يقضب شين

يعني على الشبة في الموتر تصير دعواه زحححححححححححلطي

واللا لا

[صوعان]

طيب ماتضايق الطير ويقعد كل يومه يشتغلها ماهمه الا هي
الحين بعض الطير يقلع العاموديه بسبه الصفره شلون اذا حطيت خرز في مخالبه؟؟

[أبو شعلان]

بسم الله الرحمن الرحيم

الله لايهينك أخوي راعي مسكت عز الله إنها طريقه حلوه بالحيل
وصدقت ( إفتك من قولة الفزعه يافلان )

ــــــــــــــ وتقبل تحياتي ـــــــــــــــــ
:j

[عناز]

السلام عليكم ورحمة الله وبركاته
فيه يالربع طريقه افضل من فكره اخونا راعي مسكت-الله لا يهينه- مبتكره من قبل المؤسسات
المهتمه بتكاثر الحباري وهي عباره عن ماده مطاطيه تلبس بها مخالب الطير فقط اثناء
الهداد للقبض على الحبارى لاخراجها حيه لعمل الفحوصات بعد ذلك
يتم نزعها وتستخدم مره اخرى وعلى ما اظن ان راس الماده
المطاطيه مدور مثل الخرزه
..........عنــــــاز..........

[سرهيد1]

السلام عليكم ورحمة الله وبركاته

مشكور على الموضوع الطيب أخوي راعي مسكت ........... بالنسبة لهذة المشكلة أذا كانت في طير يقوم راعيه بتقليم مخاليبه ولكن بدون تدبيب الروس ( لا يجعلها حاده ) .

ولكن دائماً هذه الحلول سواء هذا الحل أو الذي طرحته أنت تسبب مشكلة في قضب الطير لصيدته حيث أن الفريسة تتمكن من الافلات أحيان كثيره بسبب عدم غرس المخاليب فيها ..... كما أن الطير الذي يلطم سيفقد قدرته على أعطاب الصيده بأسلوب اللطم أو الضرب بالصايد .

هناك حل نتبعه دائماً نحن والاخوان عند تعليم الطيور على حبارى معزولة ....... وهي أن نأخذ سلك كهرباء ثم ننزع الواقي البلاستيكي من على السلك بطريقة السحب .... ونعمد على تقطيعها لأوصال صغيره ثم نلبسها على مخاليب الطيور وهي مفيده جداً حيث أنها تمنع المخلاب من الانغراس في جسد الحبارى كما أنها لا تترك أي أثر على مخاليب الطير ونزعها سريع وعند الحاجة ممكن وضعها من جديد .... يوجد نوع من الاسلاك غلافه شبه مطاطي وهو أفضل ما يستخدم لذلك . هذا والله أعلم

والسلام عليكم

[راعي مسكت]

مخبط القشع .. مشكور على مرورك
قشاع الرمث ..شكرا على المرور
مزاع ..مشكور اخوي لا وابشرك الطير ثابت في السياره .
صوعان ..مشكور اخوي على المرور وبالنسبه للطير ماحتك ولاتعبث فيها ولكن ممكن بعض الطيور عبث.
ابوشعلان ..مشكور اخوي على مرورك .
عناز ..مشكور اخوي على مرورك وعن الطريقه حلوه..وماقصرت ياعناز
سرهيد ..مشكور ياخوي على مرورك وماقصرت على الطريقه الجديده .
الله لايهينكم جميع الحين عندنا 3 طرق .