شاص 2010 و2011 وش العلم << امحق عنوان ههههه

[صديق كلم رفيق]

السلام عليكم ورحمة الله وبركاته
مساكم الله بالخير يا اهل مكشات الاعزاء


كنت ناوي اشتري شاص 2010 ، لكن الاشاعات اللي طلعت عنه خلتني اصبر سنه لعل وعسى تتغير المكينه ، لأن اغلب الاشاعات تقول ان عزمه ضعيف ولا ينفع في التحميل وفي النفود


ولا يخفى عليكم إن شاص 2011 نزل ولا اختلف عن 2010 بشي اللهم المرايات الجانبيه وتخشيب الدركسون ، يعني المكينه نفسها :( ، يعني صبري لسنه ما استفدت منه شي :(


فأبي رأي اللي جرب 2010 هل صدق عزمه ضعيف مقارنه بالمكينه الأوله .
ويا ليت بعد اللي يعرف احد من ربعه عنده 2010 ، يعلمنا بانطباعاته عنه .


ننتظر ارآئكم ، فرأيكم يهمني ...

[عـبـود 911]

المكينة مستحيل تتغير قبل 5 سنوااات على الأقل !!

[صديق كلم رفيق]

حياك الله يا عبوود


المكينة مستحيل تتغير قبل 5 سنوااات على الأقل !! مب شرط يا عبووود ، 2010 ما انتشر هاك الانتشار لتخوف الناس منه ، ولما تتخيل معي إن 2011 ما ينتشر برضوا ، اتوقع المصنع راح يكون مجبور لتغيير المكينه .

[صديق كلم رفيق]

117 مشاهدات ، والرد واحد ، انا حزين :( :(

ماهيب هي يا أهل مكشات ماهيب هي << يكسر الخاطر :(:(

كيف اسلوب الاستعطاف :d

[راعي الشاص 10]

مساك بالخير يالاخو

انا جربت اكثر من موديل ومنها العشرة

لا مقارنة بالعزم بين العشرة والتسعة العشرة افضل بكثيييييييير

من ناحية التحميل ارا انه ما فيه فرق ابد وان كان تحميلي بسيط لاكن ما فيه فرق

ايضا العشرة مراتبه اريح وداخلي يفتح النفس مب زي التسعة دينا

[باترول 4500]

الحوض 2010 مكينته مكينة اف جي 4000cc ومكينته اقوى من 2009 وتحت

اما التحميل مثل ما قال اخوي راعي الشاص مافيه فرق

[عبدالله الموسي]

صديق كلم رفيق رفيق مافيه كلم صديق


اقول

أنت صادق يوم تنتظر 2011 على أمل ان تتغير المكينة!!

[صبي مطير]

انا ودي اضيف معلومه الشاص 2010 مكينته راسين والبساتم في المكينه صغيره مقارنه بي 2009 وتحت راس المكينه واحد والبساتم كبيره ويتحمل الجور بي النمر لكن 2010 من واقع التجربه في النفود ترتفع الحرارهومع رقي العروق والمرتفعات الرمليه ترتفع حتى قريبh واغلب الشباب يقولون يطفي تحياتي وتقبل مروري

[غوااص رابغ]

اخوي لا يغرك كلام الناس

انا معي ربع 2010 نتفت ربع 2006 و2009

يارجال لا يغرك كلام الناس والله ثم والله فرق شاااااااااااااسع بيني وبينهم وبالطعوس مجرب مع اكستيرا ومع ربع 2009 وقمت عليهم يارب لك الحمد

فا خذه وماجاك علي

[بليزر]

انا معاي شاص 2010 احس انه متى ما بغيت اطير اقدر من سرعته واحس اني لو بغيت ما اخلي سيارة تتعدى اقدر الحقيقه سياره بالخط و بالبر

[فيصل التميمي]

الان الشاص 2010 منتشر بين اغلب فئات المجتمع يعني لو كان به خلل او عيوب كان ترى اغلب الناس مايشترونه ويشترون 2009 لكن كانك ناوي وصامل اشتراه وتوكل على الله

[ولد الغلباء]

انا معي 2008 والموتر حلو لكن اشوف ان العشره احسن ولا فرق والعشره يمد اطول من الثمانيه

[sa3d]

نصيحه انا جربت مكينه رراسين وراس الراسين افضل في الخط فقط والراس افضل في النفود ومن ناحيتي افضل راس واحد واذا حصلت شاص 2006 افضل من 2009و2010بناء على تجربه وعسى الله يرزقك

[راعي الشاص 10]

انا معي 2008 والموتر حلو لكن اشوف ان العشره احسن ولا فرق والعشره يمد اطول من الثمانيه
غير صحيح المد واحد

من تجربة اتكلم

[راعي الشاص 10]

نصيحه انا جربت مكينه رراسين وراس الراسين افضل في الخط فقط والراس افضل في النفود ومن ناحيتي افضل راس واحد واذا حصلت شاص 2006 افضل من 2009و2010بناء على تجربه وعسى الله يرزقك



انا جريت 99 و 2002 و2006 و2008 2010

العشرة اول ما تشريه ردي شوي وبعد فترة يفرق واجد

انا اول ما شريت عيا يقوم باثنين وبعد فترة صرت ما اقومه بواحد حتى لو ساقه غيري

يعمي ما اقومه الا باثنين

[ابو طلال8666]

اضم صوتي لصوت سعد اذا انت راعي تحميل ونفود وكد خذ2009 وتحت
تقبل مروري00

[صديق كلم رفيق]

راعي الشاص10

مساك بالخير يالاخو

انا جربت اكثر من موديل ومنها العشرة

لا مقارنة بالعزم بين العشرة والتسعة العشرة افضل بكثيييييييير

من ناحية التحميل ارا انه ما فيه فرق ابد وان كان تحميلي بسيط لاكن ما فيه فرق

ايضا العشرة مراتبه اريح وداخلي يفتح النفس مب زي التسعة دينا مساك الله بالرضى والعافيه يا راعي الشاص 10 ، جابك الله :Dيقولون اسأل مجرب ولا تسأل طبيب ، ما تدري قد ايش كلامك ريحني من ناحية عزم الموتر ، اما الشكل الداخلي ففعلا مافيه مقارنه بينهم لصالح العشره طبعا .
لاهنت وعافاك الله .

باترول 4500

الحوض 2010 مكينته مكينة اف جي 4000cc ومكينته اقوى من 2009 وتحت

اما التحميل مثل ما قال اخوي راعي الشاص مافيه فرقهلابك اخوي باترول ، كلامك صحيح ان 2010 اقوى فيه فرق 30 حصان تقريبا لصالح الجديد ، لكن اللي سمعناه من الناس إنه في السفلت خذ ولد ، وإنه في النفود والتحميل لك عليه ... وهذا سبب طرح موضوعي قلت خلني اشوف آراء من جربوه وأصحاب الخبره مثلك وشرواك . لاهنت وشاكر لك مرورك ..

ولد الحويطات

صديق كلم رفيق رفيق مافيه كلم صديق


اقول

أنت صادق يوم تنتظر 2011 على أمل ان تتغير المكينة!! حياك الله يا ولد الحويطات ، وش تبيني اسوووي يا ولد ، لما تكون ودك بالجديد والناس كل فتره مطلعين اشاعه على الجديد ، اللي يقول عزمه بالنفود سيء واللي يقول في التحميل مايسوى التاليه من الغنم ، وإلا يقول يخبط ، فهنا مالك إلا الانتظار ..
لاهنت ، نورت الموضوع ....

صبي مطير

انا ودي اضيف معلومه الشاص 2010 مكينته راسين والبساتم في المكينه صغيره مقارنه بي 2009 وتحت راس المكينه واحد والبساتم كبيره ويتحمل الجور بي النمر لكن 2010 من واقع التجربه في النفود ترتفع الحرارهومع رقي العروق والمرتفعات الرمليه ترتفع حتى قريبh واغلب الشباب يقولون يطفي تحياتي وتقبل مروري هلابك يا صبي مطير، ارتفاع الحرارة مشكلة كبيررررررررررررره .. ، واول مره اسمعها عن الشاص الجديد ، ، شاكر لك مرورك الكريم ...

غواص رابغ


اخوي لا يغرك كلام الناس

انا معي ربع 2010 نتفت ربع 2006 و2009

يارجال لا يغرك كلام الناس والله ثم والله فرق شاااااااااااااسع بيني وبينهم وبالطعوس مجرب مع اكستيرا ومع ربع 2009 وقمت عليهم يارب لك الحمد

فا خذه وماجاك عليحياك الله يا غواص ، طيب كيف الحراراه معك هل هي طبيعية وإلا ترتفع مع الجور ؟
وتشرفنا بمرورك الكريم .

بليزر

انا معاي شاص 2010 احس انه متى ما بغيت اطير اقدر من سرعته واحس اني لو بغيت ما اخلي سيارة تتعدى اقدر الحقيقه سياره بالخط و بالبر هلابك اخوي بليزر ، من ناحية السرعه ، ترى الاكسنت والصني مامثلهن بعد بالطيران:D يمشن 220 بعد:D ، ماهمنا سرعته بالخط وخفته ، يهمنا بالنفود والتحميل ، انتظر رايك يا اخي الكريم ..

[asdali]

كيهاليه بيساب

توم جاكيه عبداللطيف

استخر واشتره والله يعطيك خيره ويكفيك شره

[صديق كلم رفيق]

فيصل التميمي


الان الشاص 2010 منتشر بين اغلب فئات المجتمع يعني لو كان به خلل او عيوب كان ترى اغلب الناس مايشترونه ويشترون 2009 لكن كانك ناوي وصامل اشتراه وتوكل على الله حياك الله يا أخي فيصل ، بالعكس انا اشوف إن انتشاره قليل مقارنه بالتسعه ، والسبب الاشاعات ،
ولاهنت على المرور ويعطيك الله العافيه ..

ولد الغلباء

انا معي 2008 والموتر حلو لكن اشوف ان العشره احسن ولا فرق والعشره يمد اطول من الثمانيه هلابك يا ولد الغلباء ، فعلا المكينه 4500 من القدم وهي على الشاص واثبتت كفائتها وقوتها ، لكن الفطس لهم رأي آخر :mad: ، لكن نقول لعل وعسى يكون التغيير للافضل ، شاكر لك مرورك الكريم

سعد


نصيحه انا جربت مكينه رراسين وراس الراسين افضل في الخط فقط والراس افضل في النفود ومن ناحيتي افضل راس واحد واذا حصلت شاص 2006 افضل من 2009و2010بناء على تجربه وعسى الله يرزقك
سعد حياك الله ، نورت الموضوع ، لكن سؤال لا هنت ،هل فيه فرق واضح ويسوى إنك تضحي بالجديد وتشتري قديم ؟

وجزاك الله خير ، ويعطيك العافيه .


راعي الشاص 10 هلابك ورجوعك للموضوع اضاف الكثير ، حياك الله .

أبو طلال




اضم صوتي لصوت سعد اذا انت راعي تحميل ونفود وكد خذ2009 وتحت ابو طلال 2009 مافيه كلام كل الناس تمدحه ، لكن انا جايز لي داخلية العشره :D ، يكفيك شكل الطاره ، والطبلون صار ليزر:D ، لكن متخوف من ناحية عزمه ، لاهنت يا ابو طلال ومرورك شرفني

[السليطين]

اخوي لا يغرك كلام الناس

انا معي ربع 2010 نتفت ربع 2006 و2009

يارجال لا يغرك كلام الناس والله ثم والله فرق شاااااااااااااسع بيني وبينهم وبالطعوس مجرب مع اكستيرا ومع ربع 2009 وقمت عليهم يارب لك الحمد

فا خذه وماجاك علي


عاد مالقيت الا ربع واكستيرا ؟؟؟؟ اقوى سيارتين !
انت متاكد انهم يقاومونك !!!!!!

[السليطين]

نصيحه انا جربت مكينه رراسين وراس الراسين افضل في الخط فقط والراس افضل في النفود ومن ناحيتي افضل راس واحد واذا حصلت شاص 2006 افضل من 2009و2010بناء على تجربه وعسى الله يرزقك



كلامك صحيح ...

لان الراسين اقوى بالاحصنه , لكن العزم اقل من الراس ..

[السليطين]

بالنسبه للحراره .. بعض الشباب اللي معهم شيصان 2010 يقولون يحتر بالنفود .

وانت اذا كنت راعي نفود خذ 2009 لان عزم المكينه اكبر وينفعك بالنفود .

[هات وخذ]

اخوي السلام عليكم ورحمة الله وبركاته
توكل واشتر شاص سواء 2010 او 2011 تراهن طيبات جدا انا جربت كل انواع الموديلات في الخط والنفود والجبل لكن 2010 عزا الله انه موتر وعزم ما شاء الله تبارك الله
لكن يمكن فيه تغير عن 2009 من ناحية القومه قلي ليه ؟؟؟؟
اقولك هذا علشان الدعسه صارت كهرب بس
واذا تبيه يصير عادي من 2009 فيه ورش معروفه تغير الدعسه من كهرب الى عادي
وشكرا

[أنس بن فهد]

انا جربت اكثر من موديل ومنها العشرة

لا مقارنة بالعزم بين العشرة والتسعة العشرة افضل بكثيييييييير

من ناحية التحميل ارا انه ما فيه فرق ابد وان كان تحميلي بسيط لاكن ما فيه فرق

ايضا العشرة مراتبه اريح وداخلي يفتح النفس مب زي التسعة دينانفس كلامه بالضبط :)
و مآزلت أستخدم الـ 2010 ولا أبيع به ولا أشريبه

ويا حبيبي لو هو يرتفع حرارته بالنفود مع إني ما أوافقهم بالشي هذا عاد الله اكبر يا معذب النفد :D
أنت شف أيهم ازين تركب كل يوم وتستانس وتمتع بالعزم النشيط و الراحه و الديكور الحلو بالعشره
ولا بالتسعة ما تستانس الى بالمراقا بالنفد عشان ما ترتفع حرارته [ هذا على كلامهم :) ]

[نفود حائل]

بالنسبة لعزم 2010 مقارنة بــ2009

بالطريق الطويل 2010 انشط واخف
بالمسافات القصيرة 2009 انشط

بالبر 2010 مايقوم بــ2 الا بتحبيس الكلتش 2009 اخف ويقوم بــ2 زي الواحد

من واقع تجربة لكلا المحركين

ارجو اني افدتك

[أنس بن فهد]

هذا موضوع تم طرحه سابقاً قد يفيدك


الشاص 2010 و بعض الإستفسارات عنه [ للي مجربينه فقط ] ! (http://mekshat.com/vb/showthread.php?t=260121)

[صديق كلم رفيق]

أشكر الجميع على المرور ، لاهنتم وبيض الله وجيهكم

ولاهيب غريبه عليكم يا أهل مكشات ،

من بعد ما شفت الأراء ، واللي كان معظمها مدح بالجديد اما عن طريق تجربه او عن طريق خبره ، عزمت بإذن الله اللي ما تنام عينه اشتريه .

يعطيكم الله العافيه

[ولد وايل..]

عزيزي كل الكلام اللي سمعته إشااااعااااات ناس قذرة....!== شريطية المعارض الله يمسح الظالم منهم...


يبون يصرفون اللي عندهم ولا يعقل موتر جديد يخبط منها 10 مواتر والموتر ماله اسبوع !!؟ ؟؟


صح يوجد اخطاء لكن ما توصل لها الدرجة...


الجديد افضل وخاصه للإستخدام العادي

للتحميل وللشد والسحب يفضل القديم لان الدعسة ميكانيكيه والمكينه راس واحد...

الجديد دعسه ألكترونيه يعني يبرد برأس الطعس ومع التحميل (((إذا الموتر ما تنشط))

تبي العلم...

خذ لك جديييييد..وترى عزمه مهوب الحيل.... لكن مع الإستخدام تعود الشد يبي يخدمك أكثر من القديم....

[ولد الغلباء]

غير صحيح المد واحد

من تجربة اتكلم
الثمانيه اقوى قومه والعشره اطول مده وانا مجرب

[مواطن مدني]

أشكر الجميع على المرور ، لاهنتم وبيض الله وجيهكم




ولاهيب غريبه عليكم يا أهل مكشات ،


من بعد ما شفت الأراء ، واللي كان معظمها مدح بالجديد اما عن طريق تجربه او عن طريق خبره ، عزمت بإذن الله اللي ما تنام عينه اشتريه .


يعطيكم الله العافيه


موفق إن شاء الله .. ماراح تحسف الموتر كفو ويستاهل .. وراح يعجبك في العزم والراحة
الموتر مريح بشكل ماتصوره .. والله يكتب لك الخير كله ..

[أنس بن فهد]

يبون يصرفون اللي عندهم ولا يعقل موتر جديد يخبط منها 10 مواتر والموتر ماله اسبوع !!؟ ؟؟هههههههه , هذي كآنت نكتت الموسم :D:D

[لن أمل من العطاء]

حبيبي

2011 ما يبغالها فقيه

من واقع خبره معروف الراسين افضل واقوى عزما من الراس واحد

والمكينه موجوده على يارات كثيره لتويوتا ولو بها مشكله كان ما ركبوها على كل مواترهم تقريبا
هايلوكس
برادو
اف جيه
استيشن واجن
البك اب (الشاص)
الربع البابين والاربعة ابواب
واكيد سيارات لا نعرفها

فلو كانت بها مشاكل حرارة او عزم لما اعتمدوها في هذه السيارات

لك تحياتي

[naif2010]

عزيزي

من واقع تجربه انا املك شاص 2010

الموتر رهيب ولا أقدر اوصفه لك لكن يعيبه ماتقدر تقومة بالثاني إذا صرت بالنفود

الشي الثاني بالنسبه للحراره ترتفع لكن مهب ماذكر الشباب إنه توصل لقبل حرف h توصل لنص ممكن ولا تتعادى النص

وهذا عن واقع تجربه


وبالتوفيق لك،،

[امير البر]

الشاص 2010 افضل عن تجربه في العزم اما اتحميل كلهم سوا كان معي 2006و2009كلها بثالث يقطع على 110ام ال2010يقطع على 140 وكلها رحت فيها السودان والربع الخالي والشمال واتحميل يزيد عن2طن ب100كيلو توكل على الله واذا تقدر خذ ونش ودفلكو واذا انت طاره في انفود :)خذ عادي؛)

[AL NADER]

والله ما اقدر افيدك

[بلاميعاد302]

السلام عليكم يالشيخ انا معي 2010 وله معي يمكن 10شهور والحمدلله ما فيه اي مشكله وطلعت للبر كم مره والحين ماشي معي 48الف والحمدلله ما شفت منه اي مشاكل وانا انصحك واسأل مجرب ويكفيك انه اقل صرفيه وافخم اما من ناحيه التحميل انا حملت عليه ومسكت خطوط والحمدلله مافيه اي مشاكل والله يوفقك

[العابر2222]

أخووي خذ العلم علي يجمد على الشارب والأخوان ما قصروو في ارائهم

أخوي 2010 و 2011 اقوى بكثير من الي قبلهم ولا فيهن عذروب من ناحية المكينة والقير

العذروب الوحيد... فصلو الغمارة عن الصندوق يعني الصندوق حطوهـ على ربلات متحركه ... يعني طلع نفس الونيتات (الجموس) الجديدة ... مع المطبات والمقصات الصندوق يهتز لحاله ...

الوالد طلعه 2010 وجلس معاه شهر تقريبا وباعه .. وسألته عن السبب قال اذا حملته ونزلت بر اناظر في المرايه اشوف صندوقه يلعب الحاله كأنه بينطلق

هذا هو السبب الوحيد الي ما انتشرت السيارة بسببه يعني اهل الحلال واهل التحميل ما صلحلهم على اني اشوفه شي عادي جدا ...

اذا انت راعي حلال وتحميل شبه يومي ما اشوف انه يصلح ... واذا طلعات وتمشيات وقنص خذه ولا تشاور

[السرحان502]

اشاااااااااااااعة شريطية يبون يصرفون التسعه
الله يمهلك ويرزقك ويحظظك بالسيارة

[مزدهر]

العلم عندي وانا أخوك
في عدد الأحصنة 2010 يفرق عن 2009 بــ 12 حصان 227 حصان مقابل 215
أما في العزم 2009 يفرق عن 2010 بــــ 3 كيلو جرام 39 كيلو جرام مقابل 36

باختصار إذا صار الكمبريشن ((rbm )) فوق 3500 2010 خذ ولد لاكن تحت يبرد عزم الموتر بسرعة خص بالنفود مع التحميل لازم يشد الموتر علشان يمشي
يعني لو كان الكمبريشن على 2000 (( يعني 2 )) وقدامك مرقى بسيط تدوس ما يقبل 2010 بعكس القديم
فيه أثنين من الربع واحد معه 2008 والثاني معه 2010 تقاومو عند سرعة عشرين بنمرة 2 طلع 2008 إلى سرعة 120 بعدها راح 2010

[ملك الجزيره]

:d:d:d:d:d:d:d:d:d:d:dهههههههههههههههههههههههههههه هههههههههههههههههههه

[السليطين]

العلم عندي وانا أخوك
في عدد الأحصنة 2010 يفرق عن 2009 بــ 12 حصان 227 حصان مقابل 215
أما في العزم 2009 يفرق عن 2010 بــــ 3 كيلو جرام 39 كيلو جرام مقابل 36

باختصار إذا صار الكمبريشن ((rbm )) فوق 3500 2010 خذ ولد لاكن تحت يبرد عزم الموتر بسرعة خص بالنفود مع التحميل لازم يشد الموتر علشان يمشي
يعني لو كان الكمبريشن على 2000 (( يعني 2 )) وقدامك مرقى بسيط تدوس ما يقبل 2010 بعكس القديم
فيه أثنين من الربع واحد معه 2008 والثاني معه 2010 تقاومو عند سرعة عشرين بنمرة 2 طلع 2008 إلى سرعة 120 بعدها راح 2010




هذا الكلام الصحيح ...
يعطيك العافيه على المعلومات القيمه ,

[مودع الخلان]

السلام عليكم ورحمة الله وبركاته


2010
الايجابيات من خلال تجربه

1-ديكوره حلوووو ورزه وكنك راكب vxrوطبلونه ليزر والموتر سكبه الصراحه من الداخل

2-الحراره تمام والمكينه راسيين يعني مافيه امل ترتفع

3- الموتر اقتصادي من ناحية البنزين والزيت وياخذ 4 علب بدون سيفون و4 ونص

4-الموتر عزمه قوي قوي يعني الربع 2009 اروح عليه لاخط ولا قومه

5- المراتب لينه يعني خف المطب

6-فيه ارباق لو قدر الله وصار عليك حادث مايحميك الا الله ثم هو
__________________________________________________ _
__________________________________________________ _
السلبيات لل 2010

1-الدعسه الكترونيه (كهرب) ((ولها حل عند ابو وليد الصمعاني ببريده ب600 ريال ))

وعند التحميل خذ خوي واذا بغيت اتعشق 3 يمشي معك ويتغير بالنفود ويتغير عزمه يصير قوي

ولا يبرد يعني اتقومه ب2 علا طول مثل ال2009 وتحت او احسن بعد

لعلي افدتكم

والله علا مااقوله شهيد

اي استفسار
علا الايميل

tameemi.506@hotmail.com

[tlk_2003]

الله يوفقك للافضل ان شاء الله

[عبدالإله9933]

السلام عليكم شباب نبي تجارب ناس حولت الدعسة واير زي القديم والنتائج والسلبيات

[الصافي2]

مشكور كلام استفدت منه .... ولو انه قديم

[المنيعي1]

العشرة أفضل من التسعة بالخط والنفود أما التحميل ماعندي علم
ولكن قطع المكينة الراسين أذا لاقدر الله حصله شي الله يعينك على قطع الغيار غالية ماهي مثل التسعة

[جويات الهمل]

انا معي شاص عشره

وطلعت فيه لربع الخالي اكثر من 8 مرات

يالربع التسعه فيه ميزه والعشره ميزه

ميزة العشره بالرباضه والنمره بواحد مستحيل يربض لو يطول مدى الرباضه

وبالنسبه لراعي التسعه لو ساق العشره مايعجبه

وبرضو راعي العشره لو ساق التسعه مايعجبه

العشره طياره مو شاص

وبالطعوس محمل عليه تانكي 700 لتر بنزين حديد

واربع جراكل 200 لتر صار مثل التريله من ثقله

ولا همته العروق ولا الربابيض

اشتره ودعواتك لنا

ودمت بود

[البواردي ،]

السلام عليكم
ــــــــــــــــــــــــــــــــــــ


لآ يغرك ّ كلام النآس ؛ أشتر جديد و مآ جاك ّ عندي
معي 2011 ستين عام _
أفضل من التسعه و العشره أن بغيته ممشاء خط و أن بغيته تحميل و نفود * بس فيه حاجه تأثر عليه شوي ف النفود و الي هي : دعسة الكهرب

الأخوان ذكرو أنه يمكن الوآحد يغيرهآ من كهرب إلى عادي ، و صدقني بغيرها
لو أحد أكد و أثبت أنها ما تظره مستقبل ً _


ختآم ً :
أستخر و الله يكتب لك الخير و الخيره

ــــــــــــــــــــــــــــــــــــ
منصور

[مرقاب 1]

ارحب


اذا انت تحمل حمول ثقيلة مثل اكياس شعير او غيره من ماشابة ذلك في الوزن خذ من 2009 وتحت واذا ما معك الا عزبتك واغراض خفايف خذ 2010 او 11 او 12 بعد المكاين من 10 وطالع راسين عزم وقوة وفالبر مع النفود و مع الحمل ماعندك احد !!!!

من 2009 وتحت المكاين راس واحد وفي البر ابشر بسعدك لو تحمل لين تستوي السست ماعندك مشكلة :)

وسمعت في القومه مع الزفلت بوجه العدو الـ 10 وطالع يقوم على اللي من موديل 9 وتحت عشان المكينة راسين !!

اتمنى اني افدتك ولاتستعجل ولاتشتري الا متثبت من اللي استخدم وجرب عشان تكون مقتنع ولك تقديري

[صاحب مبدا]

التحميل يحتمد على الستت لا يغروك انا عندي عشر احمل فية 60 كيس شعير ويمش عاادي بس يثقل شووي

[ابونبيل]

المشكله هي انك تبني قراراتك على كلام الناس صدقني لو انك شريت 2009 بيقولون لك ورا ماخذت 2010؟

واذا خذت 2010 قالو لك ورا ماخذت 9 ترا 10 مشاكل ومن هالكلام

انا اعرف واحد معه 9 وواحد معه 10
راعي ال9 مايشكيه ابد بس متحسف انه ماصبر لل10 مركب مريح ومكينه اكثر اقتصاديه ونشاط اكثر

الجديده يقولون تبرد بالنفود لاكن طلع كلام جرايد شف راعين الربوع شلون يراقون ولا برد عزمها

المشكله الناس يخافون من الجديد مثل الهلي 2006 قالو يحترق ومايصلح والحين سعره نار والناس ترغبه اكثر من 5 وتحت حتى بالسوق صار مايفرق زي اول بين ال5 والجديد




خذ الشاص الجديد وريح راسك