اذا غرزت في نفود أو شعيب وصار واحد من كفرات السيارة يدور والثاني ثابت وش تسوي

[الفحل 2003]

السلام عليكم ورحمه الله وبركاته

يسولف علينا واحد من الزملاء ويقول انه كان معه جمس ونيت ومغرز بشعيب حول ديرتهم ، المهم ما تركوا أي طريقة علشان يطلعون السيارة الا سووها واخر شي شافتهم حرمة كبيرة معها ونيت والظاهر انها ( بدوية ) ونعم فيها من حرمة وقالت لهم ما قدرتوا تطلعون السيارة وانت ثلاثة رجاجيل ابعدوا عن السيارة ( تبي تطلع السيارة ) المهم وشلون قدرت هالحرمة تطلع السيارة هنا السر ؟ اعلمكم وشلون قامت وجابت الحديدة الطويلة حقت العفريتة الموجودة في الددسن أو الهايلكس اللي معها ودخلت الحديدة في وحدة من فتحات الجنط ( في الكفر اللي يدور بوش ) وطلعتها مع الجهة الثانية وقامت وعشقت الموتر حتى وقفت الحديدة ( دقرت ) في الشاص أو السست ومسكت الحديدة الكفر ومنعته من الدوران وعلى طول دار الكفر الثاني اللي ما تحرك من يوم غرز الموتر ، وبكذا طلعت موترهم وهم مستغربين من هالحرمة وخذوها درس ، ونصيحه اللي يبي يطلع للبر والنفود والشعبان قبل ما ياخذ العزبة وفراش النوم ياخذ الحديدة معه .

وسلامتكم

وآسف على الاطاله

اخوكم

الفحل 2003
الرياض

[ماجد الشمري]

(واحد خبل ) <------ يعني افهم من كلامك انك تأيد سواقة الحريم ؟؟؟ معصي مهنا سواقة .... :d

مشكور على الطريقة المفيدة .. لو كانت السيارة تحتوي ديفرنشال لوك ما كان راح يدور الكفر وينتقل العزم تلقائيا للكفر الاخر ...








اخوكم ماجد الشمري

[2majed]

الله فكرة رهيبة تدري ماقد فكرت فيها ...
مشكورalfhal2003
وهذي قصتنا تعلق فينا بليزر في البر وكان متعلق من بطن السيارة الكفرين الامامي الايسروالخلفي الايمن في الهواء والكفرين الثانية في التراب والمشكلة مثل مانت عارف تدور في الهوا يعني التراب في بطن السيارة وحسنا حوسة مابعدها حوسة...وفكرتك كانت تطلعنا بسهولة

[محب الشمال]

فكرة جيده
الله يحفظك

[CRUISE**كروز]

بيض الله وجهك
تصدق احيانا افكار سهلة مثل كذا تفك ازمات كبر الجبال
ولكنها تغيب عن اذهاننا وقت الازمات
بصراحه الطريقة خوووووووووووووووووووووووووووووووووووش فكره
وبروح اعلق السيارة على اقرب رصيف ذا الحين بس عشان اجرب ذا الطريقة

[الوشاح]

alfhal2003

فكرة جيده لاكن احد جربه غير خويك؟؟

لاني اعتقد ان الكفر يبي يدور حتى لو حطيت الحديده......مجرد رأي

[SilverSniper]

لا يا عريفجان.. الكفر ما راح يدور.. وراح ينتقل عزمه للكفر الثاني.. إلا في حالة وجود ديفلوك..

[سراي ليل]

اخوي alfhal2003 فكره زينه
لكن هل لها تأثير على الدفرنس أو الكرونه

[عجمي]

وعليكم السلام ورحمة الله وبركاته.....


تشكر واللة على طرح هذا الموضوع وهذة الفكرة الرائعة اللي اكيد يوم من الأيام راح تفك ازمة



لواحد بعدها بيرفع يدية ويدعيلك ويدعي للحرمة اللة يستر علية وعلى الجميع ,


ومني اجمل تحية ,

.

[الشوق]

بسم الله الرحمن الرحيم
السلام عليكم ورحمة الله وبركاته

معليش اخوي بس عندي سؤال

ماتعتقد ان العكس الخلفي بينكسر؟ لأن التروس ال ورا مهيب تبادليه

[الفحل 2003]

الاخوة الكرام

شكراً على مروركم وابداء رايكم

بالنسبة هل لها تأثير على العكوس أو الجنط فانا لا ارى لها أي تأثير لانها حركة تلقائية بمعنى أنه اذا وقف الكفر المتحرك عن الدوران يدور الثاني تلقائيا طبعا هالكلام اذا كنت معشق السيارة بالاول ومعطيها شوي بنزين وصدقني اذا كنت مغرز تبي الفكه يعني تبي تطلع بأي طريقة كذلك ليس لها تأثير على الكرونة أو العكوس .

وسلامتكم

اخوكم

الفحل 2003

الرياض

[راعي الفزعه]

والله فكره حلوه

ولكن ضروري تعميم الفكره على الشباب وتطبيقها عمليا
واتوقع ان يد العفريته اذا دخلت الى داخل الكفر الذي يدور انها لا تتحمل قوة وشد الكفر وتنعفط بسهولة
وهناك بديل عنها وهو حديد التسليح من 6ملي فما فوق او عتله او مرزبه الحفر وكلها تفي بالغرض ..
وليس هناك ضرر على الدفرنس بشرط الدعس الخفيف الى المتوسط الى ان تطلع السيارة .










:D

[رملان]

اخي الفكره معقوله جدا وتحتاج الي تطوير بعد التجربة
ربما تصلح اكثر للهيلوكس وما شابهها

[الربذي]

لالا مو قصدك كذا سالفه للفائدة انت قصدك تؤيد ان الحريم يسوقن وان هذة مره واحده فكت ازمة ولو ماجت ذالحرمة ماطلعوا
لكن مانقول الا الله يصبر







(واحد مقفل )
شيبانا ول اذا غرست السياره وشلون يطلعونها اذكر قصه يقوله الوالد الله يحفظه يقول مره غرزنا بفرت حمر قديم طبعا القصة قديمه جدا المهم عجزو يطلعونه وقعدو يوم مدري يومين طبعا محملين ركاب بس عجزوا ولااحد وقف لهم ويقول السيارات قليله يالله باليوم تمر وحدة ونوب مايمر سيارات وحاولو يوقفون وحده ورفض صاحبها الوقوف وتمر الثانيه ونفس الطريقه الثالثه يقول نبي نوقفه بالقوه يقول كلن منا نطح السياره له بقناه ولا بعصا يقول منول يبي يوقف بس يوم شاف ذا العصي قال ذولا يبون الشر !!!!؟؟؟! ويقول شف الخبال اكيد لو يبي يوقف ماراح يوقف كلن ناطحه بعصى ّّ
اخوي alfhal2003 تسلم على هذة القصه المعبره ((((((((((((((((((((وترى امزح يابعدهم )))))))))))))))))))
محبك الربذي

[الفحل 2003]

الاخ / الربذي لك مني تسعمية وتسعة وتسعين تحيه
الاخ / رملان لك اغلى واطيب تحيه
الاخ / راعي الفزعة وش تبي من التحيتين علشان تاخذها

شكرا لمروركم يا شباب

انا من الناس اللي ما يحب الحرمة تركب معه اجعل وشلون تبغوني اخليها تسوق مععععععصي .

وسلامتكم

اخوكم

الفحل 2003

الرياض

[Bader-M]

يسولف علينا واحد من الزملاء ويقول انه كان معه جمس ونيت ومغرز بشعيب حول ديرتهم ، المهم ما تركوا أي طريقة علشان يطلعون السيارة الا سووها واخر شي شافتهم حرمة كبيرة معها ونيت والظاهر انها ( بدوية ) ونعم فيها من حرمة وقالت لهم ما قدرتوا تطلعون السيارة وانت ثلاثة رجاجيل ابعدوا عن السيارة ( تبي تطلع السيارة ) المهم وشلون قدرت هالحرمة تطلع السيارة هنا السر ؟

لانها متمرسه

و مره مواقف كثيره مشابهه لها
ونتيجه لهذا اكتسبت خبره و معرفه كبيره

...........

ولو كل شخص منا قص لنا موقف حصل معه او مشكله
وكيف تعامل معها و استطاع ان يتجاوزها
لكان عمت الفائده و ستفداء الاعضاء و رواد الموقع و حتى المشرفين

اشكرا على هذا الموضوع المفيد بكل ما تحمل الكلمه من معنا

بارك الله فيك و ثبت خطاك

[ونش]

الحمدلله والصلاة والسلام على رسول الله وعلى آله وحبه أجمعين يا اخوي يالفحل مع احترامي للاخوان لاكنهم ماهوب فاهمين العمليه وهي انت لما تحط حديده بلجنط علشان الجنط مايدور هو فعلا ما راح يدور نهائيا لان الحديده مدقره فيصبح الكفر كنك ماسك بريك ويدور الكفر الثاني في هذه الحاله كيف السياره تتحرك وفيه كفر ماسك لانه فيه كفر واقف اثنا عملية الطلوع

[2majed]

يااخ ونش كان ممكن تنفع في مثل حالتنا ..
...........
وهذي قصتنا تعلق فينا بليزر في البر وكان متعلق من بطن السيارة الكفرين الامامي الايسروالخلفي الايمن في الهواء والكفرين الثانية في التراب والمشكلة مثل مانت عارف تدور في الهوا يعني التراب في بطن السيارة وحسنا حوسة مابعدها حوسة...وفكرتك كانت تطلعنا بسهولة..
.............

[gasomi]

يقولون الحديث ذو شجون----- سمعت كل مداخلات الشباب والنقاش حول قيادة المرأة ( خروج عن الموضوع )
أولا : قم بتنسيم الكفر حتى يلين وانتبه( لا تحطه على الجنط )
ثانيا : بالنسبة للسيارات ذات الدفع الخلفي الحل سهل قم بسحب الهاند بريك أو( الجالانط )لا تشده بقوة وإلا سوف تنطفئ السيارة فقط سحب قليل ثم ضع السيارة في نمرة واحد على هوينك شوي شوي كي تضع لك طريق ثم تخرج بسهوله وحذار من دعس البنزين بشدة . هذه الطريقة مجربة
ثالثا : بالنسبة للجيوب 4x4 الحل أسهل بكثير
مع تنسيم الكفرات نوعا ما وطبعا الموقف صعب السيارة متعلقة بالرمل على الشاسيه الحل بالنسبة للجيوب هو (وضعية الحبو) مثل الطفل الصغير ولكن تحتاج منك الصبر وعدم السرعة وهي كالآتي : تقوم بوضع الجيب على الدبل الثقيل ونمرة واحد ثم تقوم بالتحرك ولاتدوس البنزين فقط قليل من البنزين كي لا تنطفئ السيارة ، قم بلف الكفرات إلى اليمين وإلى الشمال ببطء وهي تدور سوف تشعر بأن السيارة تتحرك إلى الأمام قليلا قليلا بعدما تتجاوز هذه الرمال قم بوضع نمرة الثالث وهي على الدبل الثقيل سوف ترى عزما لم تشهده في سيارتك . وحاول التطبيق بدقة سوف تتجاوز هذه الصعاب وبالتوفيق

هذه الطريقة تنسب لشخص من مدينة بريدة اسمه : يوسف بن علي البراهيم القسومي وأنا شاهد على نجاح هذه الطريقة ولكن التركيز والهدوء وعدم الخوف لأن البعض يدخل إليه الخوف ويتصرف بسرعة وهذا لن يصل إلى نتيجة .


أبو علي

[gasomi]

استدراك للمشاركة السابقة
ثانيا : بالنسبة للسيارات ذات الدفع الخلفي الحل سهل قم بسحب الهاند بريك أو( الجالانط )لا تشده بقوة وإلا سوف تنطفئ السيارة فقط سحب قليل ثم ضع السيارة في نمرة واحد على هوينك شوي شوي كي تضع لك طريق ثم تخرج بسهوله وحذار من دعس البنزين بشدة . :no2:

تفصيل كي لا نقع في الخطأ هناك مثل ( سلك الكيلو) داخل في الهوب الخلفي حاول أن تشد ذلك السلك قبل دخوله في الهوب عندها سوف يتوقف الكفر عن الحركة حاول أن تشده بقدر يتوازى مع الكفر الآخر ولا تنسى التنسيم . :good:

[اشهب]

كلام نظري وفكره تهبل
بس تطبيقه عمليا ماتنجح
ياخوي بدل ماتخرب سيارك وتصبخه الحديده فوق بنشر الكفر وخلاص

[العـابر]

والله فكرة حلوه
بس عندي سؤال
لو انطلقت الحديدة من الكفر في اي جبهة ولا رفرف راح تنشب الله يستر ؟!!!!!!!!!!!!!!

[فتى التويم]

أقول يالنشامى لا تستغربون بعض الأحيان يطلع من الحريم أفكار منيحه

[فتى التويم]

السلام عليكم ورحمة الله وبركاته

اقول لا تستغربون بعض الحريم تطلع منهم افكار منيحه!@@

[تميراوي]

مشكور وماقصرت والله فكره حلوه وتفك ازمه

[سلكي نت]

يا اخوانانا اعتقد والله اعلم ان ....

الفكرة اكثر من حلوه ... ونفس مبداء تنسيم الكفر ... للان تنسيم الكفر يجعل الكفر يفرش في الارض ويزيد من تاسك جنوبه مع الارض وبذلك يوقف ...

[Abo Nader]

ما فية زي عفريتة الشكمان

[انا ناصر]

شف يا طويل العمر حط تحت الكفر العلق حجر اذا مانفع حط خشبه مشكور اخوي