انتبهوا ترى نظام تدبيل المخالفات ماتوقف.

[1231]

السلام عليكم ورحمه الله وبركاته.


حسبي الله ونعم الوكيل خذيت مخالفه تظليل مظلل 02 باب السواق والرديف.

وقفني العسكري وعطاني مخالفه.

(لو بحلف ان العسكري سيارته مظلله).

ياخوان تظليل عن الشمس عن الحراره حسبي الله ونعم الوكيل.

البعض يقول نظام تدبيل المخالفات الغوه وهذا نظام ربا.

وكنسلو النظام.


المخالفه كانت 150 اول ماخذيتها. والحين تقريبا صار لها شهر صارت 300 ريال.

الله لايحلله ولايبيحه.

كل شي ارتفع الببسي ريال ونص

العصير ريال ونص.





المهم انتبهو من المخالفات المروريه تراها تتدبل حسبي الله عليهم وعلى هالنظام.




لآحول ولا قوه الابالله.


وشكرا.

[ولد وايل..]

يارجل....


والله يلومون البعض لما يرتكب بعض الجرائم...!


يجيك واحدن ما يستاهل توقف ع شانه (لالوظيفنه لا ولكن لشخصيته) ويقعد يدور بس تدوووير لأي مخالفه..

[towpaco]

صدقت

الغريب انه صارت لي مخالفتين سرعه وقيمة الواحده 300 ريال ورحت مثلي مثل أي مواطن صالح يدربي راسه وسددتها من البنك بـ 600 ريال
اسبوع واحد وألقى المخالفتين ماتغيروو .. لكن تغيرت قيمتهم طلعت بـ 1200

وأنقز للبنك واسألهم قالوو صح انت سددت لكنك استعدت المبلغ بعد يومين:hot:وأنا اللي أولع وأنهبل

واسددها 1200 ريال وأنا ما أشوف الجاده

[ابو العز بلس]

وعليكم السلام ورحمة الله وبركاته


مايعرفون ربا ماربا
يعرفون فلوس ودراهم تجيهم وهم مسنترين لكن الله فوقهم

ويمحق الله الربا ويربي الصدقات

الله يمحقهم ويمحق دراهمهم

[همس الغدير]

الله المستعان

[منصور الفايز]

وعليكم السلام

الله يعينك وعلى قولت اهل الشام معوضين :)

والتظليل مخالفه مافيها كلام... انا مظلل 01 واخذت قسيمه :(

واللي ذكرته عن التدبيل ...
اذا اخذت مخالفه تظليل 150 ريال فهذا الحد الادنى ويكون لك مهله شهر فقط ... واذا راح الشهر وانت ما سددت راح تكون المخالفه بالحد الاعلى اللي هو 300 وماراح تريد ابداً.... هذا هو النظام والكل عارفه !

لا تخالف .... ولايجيك الا كل الخير ان شاء الله

[صلفان.نجد]

ياشباب ليه تعطون ساهر الحق انه يخالفكم؟ (العاقل) ياخذها من قاصرها ولايخالف النظام وان شاء الله ماعليكم الا العافيه واللي بيخالف النظام الله يعينه على المخالفات ولايشتكي الانفسه.

[ابومعاذالنجدي]

انا عندي سؤال اين العلماء عن هذا الرباء لماذا لم يتكلمون!!!!!!!!!!!!!!!!!!!!!!!!!

[سفاري959]

ياشباب ليه تعطون ساهر الحق انه يخالفكم؟ (العاقل) ياخذها من قاصرها ولايخالف النظام وان شاء الله ماعليكم الا العافيه واللي بيخالف النظام الله يعينه على المخالفات ولايشتكي الانفسه.

بديت اشك انك شغال بالمرور ياخي من زين الجو عندنا يعني سياره عائله بهالشموس ممنوع تظلل ولاتحط بذمتك شي وتشجع على الربا مخالفه اذاما تسددها خلال شهر تدبل ليش الا حراميه الله لايوفقهم

[1231]

الشكر لكل من شارك.

وبعدين ياخي ماهي قطع اشاره ولا تجاوز خاطي تظليل فقط.

عن حراره الشمس .


ورجاء لاحد يقول ظلل عازل خخخ شف الاسعار واغسل يدك وهي مثل التظليل العادي فتره وتخرب.



وشكرا.

[ابوطاقية]

تضليل قزازة الراكب والسائق تحجب الرؤيا وهذي معروفه دوليا
حتي سيارات المستورده من امريكا تجي كلها مضلله الا الراكب والسائق
ومثل ماقال المثل
امشي سيده يحتار عدوك فيك

[صلفان.نجد]

بديت اشك انك شغال بالمرور ياخي من زين الجو عندنا يعني سياره عائله بهالشموس ممنوع تظلل ولاتحط بذمتك شي وتشجع على الربا مخالفه اذاما تسددها خلال شهر تدبل ليش الا حراميه الله لايوفقهم


استر علي!!!!!!! وش اللي اوحى لك اني بالمرور؟ عشان قدمت للمخالفين نصيحة اخّذ الحذر من ساهر؟وانا لااعلم هل هناك رباء من عدمه لان ذلك من اختصاص (الراسخون في العلم)وانا ماني منهم.والعاقل خصيم نفسه.(لاتخالف ولاتخاف).

[صلفان.نجد]

تضليل قزازة الراكب والسائق تحجب الرؤيا وهذي معروفه دوليا
حتي سيارات المستورده من امريكا تجي كلها مضلله الا الراكب والسائق
ومثل ماقال المثل
امشي سيده يحتار عدوك فيك
هذا كلام العاقل ,, اللي يحافظ على ماله .

[ذيب زلفاوي]

انا الي قاهرني جتني قسيمتين وابيكم تقولون العسكري معه حق ولا انا
1- على اذان المغرب ماشي حالي حال هالعالم الا واشوف هالنقطه قدامي واربط الحزام واشغل السكن لان تو الناس على الليل انا عند النقطه وجمبنا مسجد اسمعه يذن المغرب الا ويقولي اصفط واصفط وموقف يجي 20 سياره والشياب يمشيهم والشباب اصفط هذا الي قاهرني
المهم ويقولنا كلكم عدم اضائت انوار ويابن الحلال ونحاول فيه الا ويجينا العسكري الثاني راكب سيارته وقاعد يكتب المخالفات ويعطيناهن ويقول الي عنده شي يروح يشتكي ويشغل الكامري ويمشي

2- كنت بالسوق وموقف وطالع شوووووي من السياره على الشارع طبعا مو انا لحالي فيه كم سياره المهم وينادي يارعي الددسن ويارعي الكامري واترك الي بيدي واروح لمه قالي عطني الاستماره وتعال استلمها على الشارع العام ويمشي واتوهق وطلعت على الشارع الا والله هذا هو واقف ومطلع الدفتر ويحتريني رحت لمه قله سلامات قال موقف خطا قلت باين الحلال مهوب انا لحالي وبعدين ماطلع الا طرف الصندوق مهوب مضيق على الناس قال ابعطيك قسيمتين قلت الشكوى لله اضاهر راسك يابس قال عشان اخلاقك زينه معي ابعطيك وحده بس قلت ميخالف وعطاني وقوف ممنوع

[أبوغيث 2003]

نظام التدبيل ما وقف

ومكتوب على المخالفة اذا ماسددت ترتفع المخالفة للحد الأعلى بعد شهر

والعساكر حسبي الله عليهم اذا حط براسه يعطيك مخالفة ما تقدر تسوي شي

أنا مره دخلت على الدائر الشمالي وعلى طول وقفن دورية سرية

وقالي ما بقى إلا تسحب جلنط !! :eek: دخولك على الدائري غلط ؟؟ :confused:

انا قعدت أضحك وقلت وش غلط أنا معي أهلي بالموتر يعني قاعد أفحط وهم معي

شف عاد البجاحة قال أبعطيك مخالفة (نسيت وش اسمه) قلت كم سعره قال مادري

(تخيلوا مايعرف قيمة المخالفات) بس قال الظاهر انه 400 او 500 قلت ويييييييييييييين يابن الحلال انا ترى على قد حالي قال ابعطيك أجل مخالفة سرعة بـ 300 وانا اللي انشب بحلقة قال خلاص ابعطيك مخالفة تضليل بـ 150 ((صرت كني داخل بقالة وقاعد أكاسر :())وقال المخالفة ماخذه ماخذه احمد ربك اني عطيتك تضليل



الله يكفينا واياكم شرهم

ويعوضنا ويعوضكم الخساير :)

[عاشق وسم]

ما نقول إلا حسبنا الله ونعم الوكيل وهذا اللي نقدر عليه وهو كافي

[* ابو باسل *]

حسبي الله ونعم الوكيل الله يجعلها في رقابهم الى يوم القيامه انا كنت امشي يمكن خمسه وسبعين الا والانيسه حقتهم موقفه على الجنب وتلقط لسيارتي صوره قلت اكيد مارايح يعطوني مخالفه لان ماني مسرع سرعه جنونيه يعني كيف امشي اقل من هذي السرعه وكان معي عدد كثير من السيارات كلنا نمشي بنفس السرعه المهم بعد يومين تجيني رساله تسجيل مخالفه مروريه حسبي الله عليهم 300 ريال سرعه تجاوز السرعه النظاميه بما لايزيد عن 25 كليو في الساعه يعني حسب على الخمسه الي فوق السبعين سرعه .
يالله يامن جاب نظام ساهر ياسميع ياعليم وانت العالم بحالي واقساطي وديوني انك تجعله في سهر دايم مايعرف النوم الين يموت من همه وغمه وضعف حيلته مثل ماتسبب علينا وجعلنا ضعاف حيله امام هذا النظام المجحف امين يارب امين .

[عاشق السيل]

حسبي الله ونعم الوكيل اللي يخالف نقول إنه يستحق المخالفة وهذا ماجنت يداه ،،

لكن اللي تجيه مخالفة ظلم في ظلم من عسكري مايفقه بالنظام شي وأهم ماعليه إنه يخلص الدفتر أو من كاميرة ساهر اللي تصور ماهب ودب وياكثر ماصارت !!

أما تدبيل المخالفات فالله لا يوفق اللي اقترحها واللي اعتمدها واللي أقرها واللي نفذها حسبي الله عليهم جميعا .....

[حبل الوريد]

حسبي الله ونعم الوكيل الله يجعلها في رقابهم الى يوم القيامه انا كنت امشي يمكن خمسه وسبعين الا والانيسه حقتهم موقفه على الجنب وتلقط لسيارتي صوره قلت اكيد مارايح يعطوني مخالفه لان ماني مسرع سرعه جنونيه يعني كيف امشي اقل من هذي السرعه وكان معي عدد كثير من السيارات كلنا نمشي بنفس السرعه المهم بعد يومين تجيني رساله تسجيل مخالفه مروريه حسبي الله عليهم 300 ريال سرعه تجاوز السرعه النظاميه بما لايزيد عن 25 كليو في الساعه يعني حسب على الخمسه الي فوق السبعين سرعه .

يالله يامن جاب نظام ساهر ياسميع ياعليم وانت العالم بحالي واقساطي وديوني انك تجعله في سهر دايم مايعرف النوم الين يموت من همه وغمه وضعف حيلته مثل ماتسبب علينا وجعلنا ضعاف حيله امام هذا النظام المجحف امين يارب امين .






اللهم امين الله لا يحجب ما دعيت

المشكله الي يشوف الحاله يقول الميزانيه واقفه على المخالفات