مغناطيس صغير لتوفير البنزين

[القانوص]

السلام عليكم ورحمة الله وبركاته
استفسار للجميع
من فيكم جرب المغناطيس الى يركب على ماسورة البنزين ويخفف الاستهلاك من البنزين
الى جرب هالشىء يفيدنا الله يرحم والديكم جميعا.

[ABU_ASER]

يا خوي وش فائدته ؟؟؟
البنزين رخيص والحمد لله
كم يعني بوفر عيك ؟؟؟؟؟؟؟؟

[بدوي جنوبي]

اول مره اسمعها
كيف تخفض استهلاك البنزين ؟

[هويدي]

جربته ايام غلا البنزين مالاحظت اي تغير

شكله للي مايعرفه ( زي القفيز عليه مغناطيس ) وتشده على لي البنزين

[لاتكب البيالة]

السلام عليكم
هذا اسأل عنه الكنترول كد جاب طاريه باحد المواضيع

[moooj]

رجعتني 15 سنة ورا كنت مركبه على كرسيدا ولا لاحظت اي تغيير

[نفود حائل]

الله يستر شكل البنزين بيرتفع

الله لايحدنا على هالامور

[شاص2007]

انا شفته ببرنامج امريكي قامو بتجريب هذي القطعه واكتشفو انها نصب بنصب

[asdali]

وعليكم السلام ورحمة الله وبركاته

كلام ما يدخل العقل وش دخل المغناطيس باستهلاك المحرك للبنزين !!!!؟؟؟؟؟؟؟؟

مجرد تفكير بسيط تعرف ان الدعوة كذب في كذب

[شفر 10]

أخبر كنت أسأل عنه قبل 7 سنوات يوم كان البنزين غالي
وكل المحلات قالوا نصب

[ابودعسان]

هذا نزل وقت غلا البنزين
قد جربته على جيب لاند ايام الغلا
وحمود هو حمود لا زاد ولا نقص
يعني نصبة في نصبه

[moto4arabs]

اللي اعرفه ان المغنطيس مش يوفر بنزين
ولكن يقوم بتنظيم دخول المواد الموجوده في البنزين على البخاخات فقط لاغير
مما يحدث تغيير طفيف غير ملاحظ ولكن تأثيره على المدى الطويل مفيد للمكينة والبخاخات
هذا والله اعلم

[بو خليفه]

كله كلام فاضي و تسويق للمتنوجات وهمية

تبغي توفر بنزين اشتر اوروبي فقط

[ابومشخص]

شي ماهوب من الوكاله وغريب واغلب الناس ماجربوه انحش منه لا يلعب بموترك

[rayes3]

السلام عليكم

اخوي انحش عنه كلام فاضي ونصبه شركة تسوقه قبل 15 سنه في طريق العروبه وهو عبارة عن مغناطيس مغطى ببلاستيك وسعره غالي انخدعنا فيه وبعد سنوات طلع تحذير من وزارة التجارة عن الشركه في جريدة الرياض صفحه كامله

[_ذيب ثهلان_]

يسمونه اول الجعل اضاهر بعد هههههههههههههه
شكله نصبه

[alwssam6]

اول مره اسمعها

[وله الامطار]

انا جربت المغناطيس خرطي ماله فايده كلام تجار لترويج سلعتهم

[درب الصحراء]

من واقع تجربة ولا احد قالي

على فكتوريا موديل 97 من 5سنوات وهو موجود وفيه فرق واضح

وهذي القطعة ما تنفع الا للمكاين 8 سلندر واثرها طفيف على 6 سلندر

وعيبها انها ما تنفع الا اذا كان البنزين يوصل للبخات عن طريق لي ولا ينفع اذا كان معدن

والله اعلم

[majeds]

خاف ان الموضوع كتب عام 1401 لووووووووووول

[مغلي]

هههههههههههههههههههههه

لعبوا علي فيه وشريته ذيك الايام
لا منه فايده ولا شي
فكره من واحد ... لعب علينا فيها وبس
جربته 7 سنوات مامنه اي فايده
200 ريال قيمته ذيك الايام
واستفدت منه في تجميع المسامير الي بالشارع حول بيتي عشان افتك من تنسيم الكفرات
ههههههههههههههههه
صدق افكار وحنا نصدق وندفع ... وتاليتها نقطه بالزباله