مهارة القيادة في الرمال فن وذوق رفيع!!!!!!!!!! موضوع نقاش مع وجود مقطع يثبت احترافية

[مسريان]

المقصود في الموضوع هو القيادة في الرمال بشكل عام وليس المراقى فقط لان المراقي يعتبر اسهل انواع التطعيس

هل القيادة في الرمال تحتاج الى حضور البديهة و حسن التصرف ؟؟؟؟

اصحاب الهواية يعتبرونها احترافا يحتاج الى الكثير من الخبرة مع رباطة الجأش وهذا مهم لمزاولتها كذلك اتوقع ان هذه الخبرة تحتاج الى مهارتين..

1- المعرفة التامة بنوعية السيارة والاستفادة من جميع قدراتها وذلك للتخلص من برودة العزم في السيارة طوال فترة القيادة
2- معرفة انواع السيوف والنقر وكذلك الطعوس بمعنى مهارة الالمام بطبيعة الارض الرملية والتفريق بين العزاز والهيال مثل الربضات وغيرها ....

هذا المقطع يخص شركة سياحية في دبي توفر سيارات مع سائقين اماراتيين من المنطقة الغربية (سكان ليوا في الربع الخالي) محترفين في القيادة في الرمال للذهاب بالسواح الى رحلات تطعيس في نفود الربع الخالي .....
يذكر لي احد الاخوة الاماراتيين ان هذه الشركات بدات تتهاتف بالبحث عن السائقين المحترفين في الامارات وتوظيفهم خلال نهاية الاسبوع باجور مرتفعه
طبعا المنطقة معروفة في الربع الخالي ومن اصعب النفود كما تشاهدون مجموعة نقيان طويلة وسوافيها هيال..............

مشاهدة ممتعة حقا لهواة التطعيس لهذا المقطع والذي صور في الصيف وهذا متعمد لكي تكون الرمال متحركة وصعبة !!!!!!! !!!

http://www.youtube.com/watch?v=2MHlQmJA6IY&feature=related (http://www.youtube.com/watch?v=2MHlQmJA6IY&feature=related)

[ذيب زلفاوي]

ياليتني معهم والله الطعوس تهيض
اعرف واحد لو تعطيه كورلا طعسبها سألته شلون اخذت هالخبره قالي ..
اول ماقوم الصبح اروح للبر لحالي عشان محد يضحك علي اني ماعرف اسوق ولا شي واقعد اطعس واغرز ومرات ماجي الا بالليل ومره جاه عج وهو بوسط النفود ومامعه الا قاروره مويه ام ريال هع هع
وستر الله عليه وطلع ومره امطرت عليه وكذا كسب خبره لين طلع فنان

[مسريان]

ياليتني معهم والله الطعوس تهيض
اعرف واحد لو تعطيه كورلا طعسبها سألته شلون اخذت هالخبره قالي ..
اول ماقوم الصبح اروح للبر لحالي عشان محد يضحك علي اني ماعرف اسوق ولا شي واقعد اطعس واغرز ومرات ماجي الا بالليل ومره جاه عج وهو بوسط النفود ومامعه الا قاروره مويه ام ريال هع هع
وستر الله عليه وطلع ومره امطرت عليه وكذا كسب خبره لين طلع فنان


اذا عندك مقطع لكورلا تسوي كذا في الربع الخالي الله لا يهينك لا تحرمنا منه ودنا نشوفه علشان نستفيد !!!!!!!
مهما كان السيارة لها نسبة كبيرة في التطعيس وهذا شي ثابت للجميع ومسلمه والا وش فايدة سيارات الدفع الرباعي

شكرا لمرورك

[قرقور الأول]

^^^^^^^^^^^^^^^^^^^^^^^^^^^^^^^^^^^^^
أبو الشباب....

الرجال ..ذيب زلفاوي .. ما قال ان رفيقه يطلع يطعس بالكورولا في الربع الخالي ..

المقصد انه يطلع للبر القريب منهم و يطعس فيه و يتعلم..

و على هالسالفة أنا كان معي ددسن و رفيقي جيبه خربان و جاي معنا بالاكسنت و الله انه يرقى اماكن ما اقدر ارقاها انا..

و السبب ليس رداة بالددسن و انما ما كان عندي خبرة في السواقة و هو ما شاء الله فنان

[VTC وبس]

تسلم على هذا الموضوع

[مسريان]

صراحة المقطع ممتع جدا ويخلى اصحاب هذه الهواية يتهيضون مما يودي الى امور لا تحمد عقباها
هههههه

[باترول 82]

بصراحه المقطع رائع جدا وخطير

خاصة الدقيقه 2.50 شي رهيب

مشكورين ياصاحب الموضوع

[كاشت وحداني]

واوووووووووووووووو
تهيضت بروح اطعس برجليني
اتوقع الكفرات نوع مخصص للبر
وتسلم ياراعي المقطع
اطربتنا

[ابوحمزة 2009]

d]مشكوووووووووووووور على الموضوع

[سوبر مكشات]

الفن مب القياده بالجيوب كلن يعرف يسوق به

الفن القياده بالديزل


السياره عزم طاااااافي والمهاره انك بروووس الطعوس



الي معه دبل ماله منه

[مسريان]

اللي يلاحظ المقطع في الدقايق 1,06 و1,22 و2,40و2,46 وغالبية اللقطات بصراحة تبين احترافية السواق لان الحركات هاذي اللي يعرف التطعيس يبيلها صملة وقوة قلب وخاصة اللي داخل السيارة...

تصوير المقطع كان في تاريخ 10 من شهر 5 ميلادي يعني في الصيف مما يزيد صعوبة التطعيس بسبب ان الرمال تكون متحركه والسوافي تصبح هيال .


صراحة معجبني اللي يسوق مقفل القزاز ومشغل المكيف و قاعد يثبت ان القيادة في الرمال مهاره تحتاج احتراف وابداع.............

من جد ابدااااااااااااع

[s3ed]

السلام عليكم

اشكرك اخوي على هذا المقطع

هذة المقاطع من امارة الشارقة وبالتحديد منطقة البداير

اسمح لي اضيف هذة المقاطع لمجموعة من الشباب من المنطقة الغربية- ليوا -

سيارات ستوك شد بلد ومسوين مجموعة مع بعض

يلفون كل مناطق الدولة

سياراتهم من نوع جيمني سوزاكي 4 سلندر




http://www.youtube.com/watch?v=ZWlX1UvuEik&feature=related






في النهاية احب اضيف كلمة لو سمحت


السواقة موهبة تصقل بالممارسة

نفس كل هواية مثل كرة قدم وغيرها

[قطب 999]

نسم الكفرات الى 10 وابعد عن الفناجيل يسمح دربك

[sultan911]

الصراحه انا من عشاق البر وكنت اطلع بسيارات كثيره منها مره كان عندي كرسيدا وبغيت اموت من العطش مره تعلقت في قشعه وصارت الكفارات تدور بدون ماتلامس الارض وجلست من الصباح الي المساء حتى اقدرت اطلعها وقلت توبه ماطلع بسياره ماهي دفع رباعي ونسيت وطلعت مره ثانيه وجيت في رباضه وهل مره ماقدرت اطلعها رجعت على رجلي ولا وصلت الطريق العام الا المغرب ورحت اخذت سياره جيب وسحبتها وصاحب الجيب يقول ويش وداك في هذي المنطقه وكيف وصلت وبعدها تبت عندي جيب اروح مافيه جيب خلك في الارض المنبسطه
والصراحه متعه اذا كنت في منطقه بعيد عن الناس ماحولك احد بس اهم شي تعرف الارض زين فيه ارض حتى الجيوب ماتستطيع تقطعها ومشكور على المقطع
والصرحه تهيضت للبر ياحلوه بس يكون معك نشاما يعجبونك

[الرربع الخالي]

ياجماعه جميع سيارات الدفع الرباعي تعتمد على السواق هو المسؤول الاول والاخير عن سيارته اذا خانها بتخونه اضرب لكم مثل (( سلم سياره جيب شاص او اي سياره من سيارات الدفع الرباعي لغشيم مايعرف يعشق الدبل الثقيل او حتى مايعرف متى يستخدم الدبل ونهايته يجي له من يسحبه حتى لو كان صاحب ددسن وانيت بيسحبه بددسنه او حتى صاحب دباب... الجيب ماينفع للغشيم وعلى فكره الجيوب منسوبه للقناصه وفي الاونه الاخيره اصبحة للكشخه... اما الرباضات والتي تشتد حرااراتها في اوقات الصيف والتي توجد بكثره في الربع الخالي فهي هلاك للسياره واللي مايعرف لها الله يعينه اقل الاسبااب بآحتراق القير او كلتش السياره للقير العادي والتماتيك بآحتراق الكلتشات واقصد فيها الغشيم في فن قيادة الطعوس بشتاء انواعها)))

بالنهايه اضرب لكم مثل الا وهو

نجيب شخصين في الثمامه واحد منهم فن بالقياده الرمليه والاخر غشيم والغشيم نعطيه جيب شاص ونطلب منه القياده في الثمامه وكذالك نعلمه كيف يعشق الدبل ولو واصلنا معاه راح يغرز لأن اعتماده الكلي على شي اسمه جيب او اي سياره من سيارات الدفع الرباعي وهو لا يعرف فن القياده والتعامل مع الدبل واليكم هاذين المقطعين سواق هايلكس وسواق جيب في الثمامه...
اول مقطع لصاحب الهايلكس

http://www.youtube.com/watch?v=q9YVYuGlSDw

طبعا واضح ان صاحب الهايلكس سواق


واليكم الغشيم الان صاحب جيب لكسز بكل مقوماته من ديف لوك وخلافه مغرز

http://www.youtube.com/watch?v=XPr3muT4OR0


مودتي

[moooj]

اشكرك ياصاحب الموضوع
والشغلة مهارة وممارسة
الموضة الي طالعين فيها تطعيس بدون دبل حتى على الجيوب
وانا شخصيا شفت بعيني راعين سيارات صغيرة يتمشون على اقل من مهلهم في اما كن تغرز بها الجيوب
شفت ناس يراقون بسيارات صغيرة وانا يالله سترك لااغرز وانا سيارتي دبل
الشغلة هواية مصقولة بممارسة ينتج عنها خبرة ومهارة

[.أبوعبدالرحمن]

فعلا

الوضع يبي له ممارسة وخبرة لا أقل ولا أكثر هي تعتمد على السواق أولا وبعدين السيارة

[عاشق السيل]

كفو والله أنا أشهد إنهم ذيابة !!

والرمل من جد تقول طحين الله يكفينا الشر !!!

أجل لو معهم فتك وش بيسووووون ؟؟؟ ههههههههه لاتزعل علي عارف إنك ماتحب الفتك !!

[فارس ملهم]

عشان تصير سواق
لازم تاكل خابور كم مرة

والدنيا دروس وقوة قلب

ومثل ما قالوا الاخوان الشي ممارسة
واعيد واكرر قوة قلب

[rigidman]

الخبرة تكتسب من الممارسة ورفقة الاخرين والصبر والامر سهل ان شاء الله

القيادة على الرمال فن وقبل ان تصقل هذا الفن بتواجهك بعض العقبات كما واجهت غيرك

تحياتي

[_دربيل_999]

مقطع جداُ راائع..وجلدِ مهو جلدك جره على الشوك..
أخوي الغالي أنا وأنت والكثيرين نقدر نسوق مثل اللي في هذا المقطع وشيء مؤكد الكثيرمننا بيسوق أفضل منهم ..
أتمنى انك تشوفهم على الطبيعة..تتعلق سيارتهم وتنقلب
وتخبط مكائن سياراتهم ويصير فيها كل شيء..!!:D
الشركة السياحية تختار اللقطات وتمررها ولو تعرض عليك بقية الفلم بتغير رأيك في سائقي الدفاشة...:p
عزيزي سواقة النفود فن..بعيدة كل البعد عن سواقة موظفي الشركة السياحية...اللي سياراتهم معدلة محركاتها ومختارة إطاراتها بعناية ومنسم هواها حتى 10 أضف انها سيارة شركة
سياحية لاترحمها مأمن عليها في كل شيء أهم شيء فرحة ودريهمات الزبون...:D

لو بتكون سواقتنا في النفود مثلهم بنحتاج لممول يضمن لي مكينة وقير وووو كل شهر..
لو تروح للنفود بتلاقي بدو على دداسن وهايلوكسات قديمة جداً ولافيها دبل ولا تعديل ولا عليها تأمين...وتتمشى في النفود وبكل بساطة وترقى السيوف وتنزل في الخبب ولاتسمع أزيز محركاتها مثل جيوب الشركة...http://www.mekshat.com/vb/images/icons/icon8.gif

السواقة في النفود تبي لها عرف وممارسة...
ماتبي دفاشة سياحية...

بارك الله فيك..

الروقي

[مسريان]

الاخ الروقي

اللي يسوقون السيارات في المقطع هذولا بدو الربع الخالي منطقة ليوا وهم اعرف من غيرهم بالنفود الكبار(النقيان الطويلة) ومحترفين بالقيادة في الرمال مهوب اجانب من الشركة

والسواقة في الرمل مهيب حكر على احد ولاهوب كل نفود مثل الربع الخالي
هاذي نقيان متصله مع بعض مثل حومة النقيان الي في الدهناء بس انها اكبر
اما السواقه في عروق الدهناء وخببها البدو يصدرون و يوردون الوايت السقس ويبارون العرق مع اللغف لان النفود تختلف في الدهناء عن الرملة وباقي الربع الخالي وخصوصا (نقيان ليوا) المعروفة عالميا بانها اطول تلال رملية في العالم............................

[مقلع الرمث]

مع التحيه على وراااء اهبااال هذا الفن وبسسس

http://www.youtube.com/watch?v=PMR8JmXxrgg&feature=related

[مسريان]

مقلع الرمث

مشكور على المقطع :good2:

[نمر977]

السلام عليكم ويعطيكم الله العافيه وبصراحه كان لي حديث مع واحد من السواقين في الإمارات واللي يطلعوا قروبات (مجموعات) مع الخواجات او حتى غيرهم وحتى الجيب اللي معاه كان مجهز من الداخل وفيه مواسير اعتقد انها المونيوم خلف مرتبة السواق والراكب الأمامي وممتده للخلف على شكل قفص مثل اللي على الجيب الكشف الرانجلرومثبته امام الفاصل بين البابين الأمامي والخلفي من الداخل حتى انها ماتسبب ضيق للجيب من الداخل ولو جت فرصه وسافرت على جيبي هناك راح اركب مثلها

ودمتم سالمين ومن ساهر خايفين

[ZIAD_KSA]

اللي يسمعك صوت حنه الموتر في النفود تراه غشيم ومثل ماقالو الاخوان البدو يصدرون ويوردون الوايت السقس مع النوازي

[moooj]

مع التحيه على وراااء اهبااال هذا الفن وبسسس

http://www.youtube.com/watch?v=PMR8JmXxrgg&feature=related



تسلم يالذيب على المقطع الرائع

[سوالف]

أي غشيم في البدايه يكون في النهايه محترف
والتدريب هو من يطور من مهارة السواق

[moooj]

خذ عندك البدايات والمعاناة مع التغريز:
شباب الحارة
http://www.youtube.com/watch?v=AxZpP3XGIjA&NR=1


وخذ هالمقطع بعد دخول نادي المحترفين : (فيه موسيقا)
http://www.youtube.com/watch?v=QVRISTzzdAU

وش رايكم بسيارتي:eek: :p :D
وسلامتكم

[سعد777]

الفن مب القياده بالجيوب كلن يعرف يسوق به

الفن القياده بالديزل


السياره عزم طاااااافي والمهاره انك بروووس الطعوس



الي معه دبل ماله منه
:good2: :good2: :good2:

[بدوي جنوبي]

متحرف محترف محترف محترف محترف
متحرف محترف محترف محترف
متحرف محترف محترف
متحرف محترف
متحرف
محترف
متحرف محترف
متحرف محترف محترف
متحرف محترف محترف محترف
متحرف محترف محترف محترف محترف







شكرا يا صاحب الموضوع :)

[هبــ حريملاااء ـبوب]

محد يولد عالم ..

التجارب وممارسة المهنة بداية طريق الاحتراف

حتى في الطب !!

[مسريان]

مشكور اخوي
بدوي جنوبي


و ردودك احترافيه ومميزه تخلي الواحد يتحمس للكتابه في قسم السيارات

[راعي النياسين]

وهذا مقطع للفريق ليوا في الطعوس

http://www.youtube.com/watch?v=3-7HZ9NWDn8

[m1m2m3m4m5m6]

ههههههههههه المقطع الاخير بين انهم كلام فاضي وانهم مجمعين اطلق اللقطت وحاطينها ,,,

[الشنه]

هي عل السواق


انا كنت اطعس على هايلكس 88 والله

اني اغرز و حالتي حاله
بس ما أجيب احد عشان مايضحك

[ابوسليمانM]

السلام عليكم مقطع رائع وقيادة اروع
لاكن اهم شي في التطعيس
1-تنسيم الكفرات لان الكفرات المليانة تتعب وتفكك الموتر واكثر عرضة للتغريز
2-اختيار السكة المناسبة والابتعاد عن تقاطع السكك لانة تفكك الموتر وتردي عزمة
3-السرعة او ضغط كل دواسة البنزين تسبب ارتفاع حرارة الموتر وغرس الكفرات في الرمل
اما سيارات الدفع الامامي الصغير في افضل في الرمل لاكن مشكلتها طامنة ومعرضة للخراب
واما الديزل اقل عرضة للغراز في الاسطح المستوية والسر عزمة متوسط لذلك الكفرات لاتنغرس في التراب جراء سرعة دوران الكفر لاكن يحتاج موازنة العزم
واما الربع الخالي فهو غدار لانة ملئ بالرمال المتحركة والمصائد لذلك يجب الذهاب باكثر من سيارة وان يكون بينهم مسافة طويلة لانه تعتمد على معرفة الارض اكثر من فن القياده
والشكر كل الشكر واعذروني على الاطاله

[مسريان]

الاخ ابو سليمان

شكرا على مرورك وفعلا الملاحظات اللي ذكرتها مهمه جدا للقياده في الرمال

[شقرآآآوي]

أهنيك والله على المقطع أخوي ..

مع أني من أصحاب النيسان لكن أعجبني بصراحه ..
وخلفية النشيد شي ثآآآآآآني ..

شكراً لك .. :)

[مدورالصمان]

شكراً أخي العزيز مسريان على الطرح المميز و الردود الرائعة:good2:


طيب ماعندك تطعيس لأنفنيتي أو ماركيز :D

[مسريان]

مدور الصمان

عسى الهواء يطيح والغبار يركد
وابشر بالخير :p

[االكريزي]

ابي اسوي زيهم واجيكم

خخخخخخخخخ

[شبح الصحراء]

تسلم على المقاطع الرائعة والمكان فعلاً مرعب ولكنه يهون عند المتمكن من التطعيس ، على فكرة يا اخوان الكثير منا يستطيع ان يفعل ذلك ولكن على حساب السيارة فلسنا ملزمين ان نصعد السيوف العالية ونستعرض فالأفضل ان نستدير حول التلال الرملية بدلاً من تحديها وطلوعها فقد جربنا التطعيس سنوات وسنوات طويلة ولم نجد من التحديات إلا المخاطرة والخرابات فليس هناك افضل من ان تصل مكانك بسلام حتى لو اضطررت ان تسلك طريقاً ابعد قليلاً .

[ابوطارق1010]

للمعلومية

- كلما زاد عرض محور السيارة (الدفرنس ) كلما كانت أكثر عرضة للغراز وكلما قل عرض المحور كلما كان التحكم بها أسهل
-التنسيم مهم جدا لراحة الموتر بل انه يسقط 60% من الجهد على الموتر خاصة اذا كان الرمل غير ممطور والمستوى المعقول للتنسيم 20 ولا يقل عنها حتى لاينقرص الكفر من الجنط
-وزن الموتر له دور كبير ويستدعي الحذر واخذ العزم وزيادة السرعة قبل الدخول في الاماكن الحرجة
-الخبرة قبل كل شيء وحسن اختيار المداخل ومدى السرعة وحضور البديهة

والله يعيد ايام الربيع علينا وعليكم بالعافية

[سعد الشتيلي]

التظعيس بركاده وبدون جلد السياره هو الوناسه

لكن اللي يجحم السياره ويتهور ما اشوف فيها الا الخساير

واغلب السيارات الجديده تسهل الدخول للنفود جدا

وفيه فرق بين الدفع الرباعي والدفع الخلفي

الدفع الخلفي لو يسوقه واحد متعود على الدبل يبلش فيه بالبدايه حتى لو كان الموتر عزمه قوي

واللي يسوق الدفع الرباعي بعد الدفع الخلفي يعرف قيمة الدبل :)

واخيرا يازين النفود اذا كان ممطور

وياشينه بالصيف

[VIP-503]

مشكوووور

والسوقه فن وذوق واخلاق

والواحد يتحكم بالموتر صح

واذا حس الموتر بينشب يسرق له سرق وتمشي امورة

وانا معي باجيرو ماشاء الله عليه بالنفود موتر

وشوف توقيعي

لك احترامي

[نقاء المطوع]

يووه ذا المقطع جايزلي القصيده الي بووه

بس الي يبي الدح لايقول اح طبعان النفود فيه وناسه وفيه العكس الله يعينك على العس اذا انت لحالك والموتر دفرنس حك خشمك لين تطلعه وبصراحه هي كلها تعتمد على التجربه وكم نقره تطبها تخبص النفود صح وتعرف الممشى السليم والي نهيته علقه حلوه والسيوف تعتمد على المتمرس يصير عارف اتجهت الضل وان الي ورا السيف منزال ولا وره قص اقشر يروح وجه الموتر وخلاصه الكلام تعتمد على الثقه بالنفس ويقول الشاعر الي مب قد النفود ونقرته لايدخله :( وتبي الصراحه على المقطع لو مابه مواتر معه كان احلفلك ماسوى كذا بس دامه انه واثق انه وره احد يساريف وينثر وهو موسع صدره والموتر نشيط يطرربك بالمممشى ;)

ونهاية الكلام الي ماطب بنقره وتصرف وطلع الموتر ماضنه يعرف يسوق

بالعربي اذا انت صمله تقطع النفود وانت مغمض بس بقيدة طبعا
اذا هذولى طارتهم الله يجزهم خير يمرون ام حزم الجمعه ولا ام دكه خميس ويحكمون
اتمنى لك التوفيق على الموضوع الكويس :)

[مسريان]

نقاء المطوع
صراحة القصيده والمنشد مع صور النفود شي يشرح الصدر
ومثل ما قلت لو الموتر مهوب نشيط كان ما سوا شي بس الموتر نشاطه يساعدك ويطربك

[المنتدى2006]

الرمال يا تطرحك يا تطرحها

[Bader-M]

مقطع رائع و الخبرة واضحه من طريقة القيادة

تحياتي اليك