توقعات بارتفاع أسعار الفتك مع نزول الطراز الجديد من الباترول ..

[نيساني قديم]

هل تتوقعون بارتفاع أسعار الفتك حاليا مع نزول الشكل الجديد من الباترول مع تحفظ الكثير عليه من عشاق البر والمقناص لعدة أسباب لعل ابرزها الغاء الدفرنس الامامي المستقل والاستبنه العلاقي وشهرة الفتك بالكد والتحمل والقوة وسهولة صيانته وتوسط اسعاره مقارنه مع الشكل الجديد الذي كثرت فيه التقنيه والحساسات والتعقيد الكهربائي الذي لايعرف له الا قلة من الورش ..السؤال الأهم هل تتوقع ارتفاع سعر الفتك كما حصل مع اللاند موديل 2007 وتحت من ارتفاع خيالي مع نزول الجديد ام تنزل اسعار الفتك ويقبل الناس على الشكل الجديد...نرجو التفاعل من ملاك الفتك أسطورة نيسان التاريخيه ..

[راعي المجهم]

هذه حركات شريطية السوق

الشاص 2010 أول مانزل قالوا راسين ويخبط وضعيف في الرمل

والقديم أحسن منه راس واحد ومن هالكلام

ومن خلال التجربة طلع الشاص 2010 أفضل جيب تم صنعه إلى الآن

وأثبت كذب وزيف الشريطية الذين يريدون تصريف الموديلات القديمة

؟؟؟؟؟؟؟؟؟؟؟؟؟؟؟؟؟؟؟؟؟؟؟؟


تعديل بواسطة المشرف سوبر VTC

[لاتكب البيالة]

هالكلام ما يبي معلم يالغالي اعتقد اللي شاري معه باترول 2006 ونظيف ممكن يبيعه بحول القيمة اللي شراه به جديد طبعا هذا اذا وقف تصنيع الباترول القديم لكن انا ما وقف تصنيعه فهو ان ما زاد سعره مهوب ناقص

[فيصل العاني]

السلام عليكم اخواني
الي اشوفة واسمعة ان الشباب متحمسين علي نيسان باترول 2010 وخاصة قوة مكينتة وموصفاتة الممتازة وزباين الفتك موجدين وزباين 97 باترول موجدين وكلن علي قد فلوسة واستطاعتة وبنسبة ان النيسان 2010 كلة حساسات فهو اهون من السيارات الامريكية

[«نجم الخير»]

اجل اروح ابيع الموتر كم يسوى 2005 http://smilles.5d5l.com/smile_albums/fun/ddd.gif (http://smilles.5d5l.com/)

[الوسيطاء]

ليه هو رخيص اصلاً ولاكن ان غلى وجت الناس تشتريه فهاذا من غباء الناس

[a2005bdullah]

ممكن يرتفع الفتك لان البترول الجديد صحيح فيه مواصفات عاليه و فخامه بس ما اضن انه يتحمل البر مثل الفتك .
و بالاضافه ان عندنا عقده و تخوف من الاشكال الجديده لان ما نعرف وش هي من لحيه

[اااXااا]

مهب مرتفع

لأن الشكل القديم ما وقف راح يكمل ينزل 2010 :)

[جهام القصيم]

80% من الناس تستخدم الصوالين للتنقل داخل المدن والسفر و20% الباقية اهل بر ومقناص فالتوقع الناس تبحث عن السيارة المريحه والباترول الجديد نظام تعليق الراحة 100% يعنى الباترول من 2009 او نازل يبي يصير دقة قديمة الله يخلف الدراهم الي دفعنها على الفتك

[ساري 111]

ماراح يرتفع لان الشكل الأول موجود الأن بالوكاله

الشي الثاني الباترول الجديد مهب باترول انما هو سياره جديده ويسوق بأسم باترول عشان ينجح

[abuktab]

تحليلي الشخصي وتوقعي .. وقمت بإعلانه للاخوة .. مادامت فئة سته سلندر موجودة بنفس شكل الباترول الحالي فلن يكون هناك ارتفاع باسعار الفتك .. الحالي الا اذا انقطعت فئة سته سلندر ..

[ناصر الدهمشي]

اشتغلوا الشريطية بالاشاعات وكل سيارة لها عشاقها ويبقى الانيق سوبر سفاري 98 افضل سيارة بعيني :)

[أبوياسر1]

ما طيح أهل البر والقنص والطرد بالباترول إلا أنه:
بالدرجه الأولى الوحيد من الجيوب يجي دفرسين بعكس ((اللاند كروزر))..والنشاط بالدرجه الثانية..
يعني يتحمل المناقز والمصافق..

أما الباترول الجديد (( 2010 ))
دفرنس واحد.. فطبيعي أن الشكل القديم بيرتفع
واللي يقول كلام شريطية..اقول له مب هم اللي يحكمون رغبة الزبون وما فيه شي يرتفع إلا وله زبونه..
وبالنسبة للشكل الحالي 2009 وتحت فالوكاله تحاول تصريفه من المعارض..لتنزيل الشكل الجديد وبالتالي انقطاعه من الوكالة..

[عمرولدعلي]

اللي يقول كلام شريطية..اقول له مب هم اللي يحكمون رغبة الزبون وما فيه شي يرتفع إلا وله زبون..

كلام يابعدي ..

[نيساني قديم]

ياجماعة الخير اللي يقول كلام شريطيه وغيره ترى طلب الزبون كماقالوا الاخوان هو اللي يحكم السوق...وبالنسبة لبقاء الشكل القديم نعم صحيح لكن انقطع السوبر وسفاري 2 ماعاد يجي الاالسياحي... لحاجة الحكومة والشركات له.

[باثفندر]

اللي أنا اشوفه ،، ليس من المتوقع !! إلا إرتفع وغلا وقضى واللي مايصدق يدق على الوكاله ..

[نيساني قديم]

جاني خبر منه فوادي تفطرا.....استندرن تزمط على النيساني
ذيه التويوتا يالخوي يامعثرا.....هندل وقيره غرته بالثاني
منه تلوم صاحبك لو هو برا.....ترجع يمين تعادله يافلاني
وان ييت بتحمل بها تعمد ورى.....او تستحي او تاذي البتاني
الناس تتطور وانتا لي ورا.......كنك بصير وتتبع العمياني
فور بوينت فايف تراه قوة موتره......والا الفتك فور بوينت ايت حصاني
محروز يالنيساني يومه يذكرا.....كنه زعيم ويحكم الاوطاني
كل المواتر تتبع الي يامرا.......والا السلق للجاريات تعاني
وتخاف يحكمها بظلم مفترى......لكن حكمه عدل(ن) وميزاني
هاتوا سلق نيسان وانا بحفره.....وهاتوا استندر وطيحو الميداني
عندي انا تفجير شاهين احمرا......فرخ(ن) وسبقه يسلب الاذهاني
والشعر ماهو مخلف كما ترى.....لكنه السلهام يوم(ن) ياني
ارتب الاقوال بين الاسطرا.....مستقبس الشاعر الدهماني
انحن بدو نقطع رمول مقفرا.....مانركب الي اكسله تعباني
يومن يغرز واجب انك تحفرا......وحاول يمين يسار بالسكاني
وان طاح في قصين حول بمبرا......ماصممه للسيح والودياني
والا الفتك كنه على الثرى.....يماري روسه السيتاني
مكيفن قدام والثاني ورا......ابدع ترى في صنعه الياباني
مرحوم يازايد على بالي طرى......في جنة الفردوس يارحماني
مساند المسعود يلي ينطرى......في بوظبي متوكل النيساني
عنده وكاله لمبيعه والشرى.....تسعه وسبعين لين الاني
كاين قديم ومن عقب تطورا......واصبح يماري الرنج فالازماني
لريوسه حطو تراهم سنسرا......وتثبيت سرعه داخل السكاني
ثلاجته تبرد شرا الفليزرا......وبلوتوث وسبيكرن مجاني
يطير بالعرقوب يومه يظهرا.......ويفز فزات الذي باحساني
يوصل ولاتوصل معاه ستاندرا......وعندي على ذلك شهود اعياني
في اربع وتسعين طاح انجكترا.......وجانا فتك في الفيننا واثناني
يومن ترش اثنين نارن قد ورا......ومن التواير غيمة الدخاني
قالو من البترول لايع يفقرا.......قلت السعاده تنشرى باثماني
قالو يحر وقلت قول مزورا......قيد الحراره تحسبه خرباني
خذلك فتك ياخي وخل المسخره........لاوارد امريكي ولا بريطاني
لاصممه شارون وياهتلرا......والي انكتب معروف من العنواني

قصيدة معلقة قيلت في الفتك من شاعر إمارتي ...

[ابوطاقية]

اتوقع والله اعلم
السفارى رايح يرتفع من قيمته لا اسباب
اولها الباترول الجديد غير معروف لانه جديد واغلب الناس رايح تنتظر نتائج المستخدمين الاوائل
2-قيمة اقل نوع من الباترول الجديد الي هو ستاندر اغلى من السوبر سفارى وهذا مايزيد الاقباليه على السفارى
3-الاقبال على السفارى رايح يكون كثيف لانتهاء فترة تصنيعه عام 2011
4-ظهور عيوب تصنيعيه باول موديل جديد كأي سيارات جديده وهذا يعزز سوق السفارى

[Abu Saad]

مهب مرتفع

لأن الشكل القديم ما وقف راح يكمل ينزل 2010 :)

احسنت هذي اكبر عقبة امام الشريطية انه الطراز الاول لايزال يباع في الوكالة كـ2010
فمستحيل يرتفع .

[ملك الإحسآس]

أما الباترول الجديد (( 2010 ))
دفرنس واحد.. فطبيعي أن الشكل القديم بيرتفع

أعتقد إن الباترول الجديد بدون دفرنسآت ..
فورويل ..

[سسته]

انتم الحين لاتفكرون بانة يرتفع او ينزل .... روحوا دور له كتاوت طرمبة تركب علية ... يمكن يصير مثل اخوانه اللي قبلة ...

[ابوو زيد]

8888888

الله يخلف عليك بس

وياليت تترك تفكير البزارين الي لا ياخر ولا يقدم

[سوبر152]

مثل اللي قبلي حفظه الله
اشتغلوا الشريطية بالاشاعات وكل سيارة لها عشاقها ويبقى الانيق سوبر سفاري 98 افضل سيارة بعيني :)

[ابومعزي]

الله يسمع منك

[سسته]

8888888

الله يخلف عليك بس

وياليت تترك تفكير البزارين الي لا ياخر ولا يقدم

لايصير انت وكيلة وحنا ماندري .... :D :D :D :D

[براد نجد]

الباترول الشكل القديم ماهوا منقطع وراح ينزل 2010 و11 و12 ووو الخ00 بس راح ينزل الوكيل بكميات قليلة جداً مثل الشاص نيسان مايجي الا بطلب فقط ويرفع سعرة الوكيل عشان تنحد تشتري الجديد سواء من الفل كامل ولى غيرة بينما الباترول الجديد يكون لة اسم ثاني مثلاً باترول سبشل بس المقصود ان الباترول القديم ماهوا منقطع من السوق والله اعلم 0

[سوبر مكشات]

يقولون 10 غالي فشكل 9 وتحت بيرتفع



لكن الله يكتب الي فيه الخير

[سيف الظفير]

الفتك موجود سفاري 1 دفلك قير عادي كشافات تخشيب فتك

كذلك القناص ابو رفرف اسود


+ الشكل الجديد V8 يبداء من 175.000 الى 315.000

هذا الكلام اللي عليه العلم ماخذه من مسؤول مبيعات نيسان السعودية في الجنادرية امس الثلاثاء 1431/4/15

[عالم مشاعر]

اتوقع والله اعلم
السفارى رايح يرتفع من قيمته لا اسباب
اولها الباترول الجديد غير معروف لانه جديد واغلب الناس رايح تنتظر نتائج المستخدمين الاوائل
2-قيمة اقل نوع من الباترول الجديد الي هو ستاندر اغلى من السوبر سفارى وهذا مايزيد الاقباليه على السفارى
3-الاقبال على السفارى رايح يكون كثيف لانتهاء فترة تصنيعه عام 2011
4-ظهور عيوب تصنيعيه باول موديل جديد كأي سيارات جديده وهذا يعزز سوق السفارى

اقل نوع من الباترول الجديد بـ 175 ألف بينما السوبر سفاري ترى لامس الـ 200 ألف و هو ما فيه مواصفات ، و الـ SE Type 3 قيمته بـ 199 ألف و فيه ملاحة و كاميرا خلفية ، أو تزيد 40 ألف و تاخذ LE Type 3 اللي هو الفل كامل ، و الفرق 40 ألف ريال مقابل مواصفات كثيرة جدا ما تتوفر بالباترول القديم

الباترول الحالي ترى من شهور و هم يجربونه عشان يتلافون شغلة العيوب التصنيعية ، و الشي هذا شفناه في الانفنيتي G35 و الماكسيما الجديدة و للحين هالسيارتين خاليتين من العيوب المصنعية و ان وجدت بتكون قليلة جدا

صدقني لو تركب الباترول الجديد راح تكره القديم ، الجديد من الداخل قمة الفخامة و أوسع و أريح و عزله الصوتي ممتاز ، زجاج النوافذ تراه مدبّل عشان يكون عزله أفضل

[قرم العيال]

الباترول الفتك 2010 راح يستمر

وراحت على الشريطيه هالمره

[سد الصفرات]

نعم يبقى طلب الزبون هو اللي يحكم والدليل نيسان باثفندر 2004 - 2005 لازال مرغوب فيه وتحصل اللي ماشي اقل من (100 الف كم) قيمته في الستينات وهذا السعر من 4 سنوات مقارنه بسيارة السواويق 2006 وراعي البر ابخص.

[منتظر الجديد]

يابوي الشريطية ... هذولا اسمهم العلمي (الدودة الشريطية )
فيهم جشع ونصب واحتيال ... اعوذ بالله .

ولا كيف يرتفع وهو اصلن الفتك ماهو منقطع ! بيستمر انتاجه

[بحر الموده]

الا معاد احد مطلع فيه بعد بطل الدروب

[التعـ King ـديل]

حسب خبرتي ومعلوماتي مااظن راح يرتفع لعده اسباب

اولآ الشكل القديم مازال متوفر 2010

ثانيآ نيسان نزلت الشكل الجديد بعده اشكال وتقتنيات

ثالثآ فئات الباترول الجديد ال8 سلندر مرغوبه جدآ من حيث السعر والمواصفات ابتداء من 170 الف لأقل فئه

رابعا اللي يعرف احد في وكاله نيسان يسئله عن طلبات الشراء وبتعرف هل بيرتفع القديم او لا

اعطيك معلومه بسيطه عن ثلاث شركات فقط وتعتبر الاكبر بالخليج

وكاله المسعود استفذت الدفعه الاولى كطلبات شراء بالامارات

وكاله الحمراني كذلك استنفذت الدفعه الاولى كطلبات شراء بالسعوديه

وكيل نيسان بالكويت كذلك استفنذت الدفعه الاولى كطلبات شراء

هذا بالنسبه للشكل الجديد اللي تقولون ان الناس خايفه منه

[ابو نايف التميمي]

الشريطيه عليهم حركات نص كم

اجل الشاص 2010 راسين ماينفع ههههههههههههه

والحين دور النيسان

طبعا ما اقصد صاحب الموضوع

عموما العاقل خصيم نفسه