احذرو السيول في هذي الفتره من السنه من25/2/1426الى15/3/1426

[خالد العوض]

احذرو السيول في هذي الفتره من السنه من25/2/1426الى15/3/1426 وخاصة على المنطقة الوسطي والجنوبيه والله اعلم

[أبــوريـــان]

اخي خالد هلى تقصد المطار قبل الصيف فهي تكون جداً غزيرة

وشكراً

[خالد العوض]

نعم وهي الفتره الانتقاليه من الشتاء الى الربيع

[3:16]

الله يجيب الخير ونسئل الله ان يجعلها امطار سقيه ورحمه لا سقيه عذاب

[الزعيم&الضعيف]

الله يجيبها آمين هذي رحمة من الله

الله جعلها تعم شعبان ووديان المملكة كلها

آآآآآآآآآآآآآآآمين

[""الشاهين""]

الأخ خالد العوض ألاحظ تحرك ونشاط في السحب التي غرب افريقيا حيث بدأت هذه السحب في التكثف والتحرك نحو السودان تدريجيا اللهم اغثنا ياحي ياقيوم وماهي ملاحظاتك وتوقعاتك ياخالد وشكرا..........

[خالد العوض]

والله شف من خلال متبعتي للأامطار من يوم عمري 14سنه والحين عمري 37سنه يعني23سنه كنت وقت السحب خاصة في الصيف اذا طلعت من المدرسة رقيت للسطح اشوف وراقب السماء اشوف اذا فيه نشو اقعد على الخزان الى العشاء واشوف اذا فيه بروق اتابعها ثم انزل وانام وبكره اقول لبوي وين طاح المطر وهل هوقوي اذا جاء عنه اخبار كنت احيان
ابكي اذا شفت السحابة وماقدرت اروح اشوفه اذكر مره انه جت سحابه قويه جداً وانا اشوفه باالسطح الحقيقه انه سحابه
تهول البرق فيه ياالله يبين من كثر الماء الىبه برقه كنه نجفه ما يفصل ابد يعني الرادو ما فيه امل يشتغل ابدً يوشوش من البرق المهم ما صبرت رحت صحيت ابوي من النوم قلت قم يبه سحابة مايفصل برقه شمال الديره شوي قوه نشوفه قال هاالحين
ياولدي الدنياء ليل السحابه خطيراً يصير فيه برد يكسر القزاز او تغرز السياره بالطين خلها بكره قعدة اصيح عنده قلت هاالحين نروح ورحنا ورتحنا ورجعت نمت ذك اليله مرتاح مبسوط مره وبعدين صار عندي سياره وقمت الحق السحب بنفسي واصور ثم اجلس عند شعيب او شغيه تمشي تحت سحابه تبرق وتمطر واضبط شاهي النعنع وكذا احس انه مافيه بالدنياء اسعد مني ملاحظه البريق معدن والحطب رمث،، انا طولته عليك ياالشاهين تبي توقعاتي عن مطر ها الفتره شف يخوي والعلم عند اول واخر الأ مطار في الفتره هذي نادر ما تخلف وعادة تكون خطيره جداً فيه اقوي سحب تعبر المملكة المزن الركامي الى ينشأ من الجنوب الغربي باالنسبه للقصيم والرياض والمنطقه الجنوبية وهي اقرب منطقه تقع قرب خط منخفض السودان في عام 1403 اذكر كانت الامطار في الصيف في ذي الفتره كانت كثيره وتقريباً كل يوم اويومين يجي مطر واذا مجاء مطر تشوف البروق شمال اوجنوب وبعده قلت الامطار شوي الصيفيه واول كانت اذا دخلت العقرب التاليه بدى يجيء سحب عظيمه اول ما تنشي تحسبه نفيض من لونه وقربه اللارض ثم تبدا تصير مثل الجبال مزن فوق مزن مترادف اكثره فيه برد والله اعلم( اسف على كثر الهرج )

[راعي الحزم]

والله يابو عوض اعلومك غانمه وسواليفك عن المطر تشرح الصدر على قولك أمطار الصيف تخوف بس ياليته تجي الله العالم
هالسنه الامل بالله ثم بأمطار الصيف تصدق يابو عوض من دخلت الوسم الى اليوم ما شفنا سيل يبرد الكبد الا اللي ثاني عيد الضحية وقعد نصف يوم عسى الله يرحمنا برحمته ولا يتكلنا على أعمالنا
سواليف أمطار الصيف (( مارس وابريل )) سواليف لاتنقطع ودائما ما نعمر المجالس بها مغامرات لاتنسى

[خالد العوض]

يارعي الحزم السلام عليكم ياخوي انت عرفت اسمي وان والله ما عرفتك وياخوي تري علومنا علوم ارجال مثل علومك تشرف
وحنا من ديرة وحده وعلشان كذا اب انا يمكن ازور الاهل بالرس بعد اسبوعين وش ريك اعطيك فلم البرديه حقت الرياض عام 1416وتنزله على الجهاز وتخلى الناس يشوفونه لانه وعدتهم بذلك حقين المنتدى وانا عند كلمتي ,هذي ناحيه اما من ناحيت الصيف وذكريات الامطار فيه كانت ايام حلوه وخاصة لهبت نسمت الصيف ومعه ريحت مطر ياخوي كانت امطار وسم الصيف قبل من عام 1407 وتحت كانت كثيره ما تلاحظ انه قلت السنوات الاخيره تذكر السيل الى جانا في عام 1407 واغرق الديره كانت تقريباً تصادف بعد 40يوم من اليوم ان كنت مني غلطان الحقيقه اني السنه متفال خيربأذن الله من الفتره القادمة
وعندي احساس والله اعلم انه السنه يبي يجي امطار من من سنين ما شفنهاخاصة على المنطقه الوسطى والجنوبيه تقول وشلون بنيت توقعاتك او على اى اساس اقولك سبحان الله كان التاريخ يعيد نفسه اشيا جديده صارت هاالسنه 1-برد اول المربعانيه2-سيول على القصيم والمدينه في الشبط3-برد شديد في العقارب هذي السنه مثل ذيك السنين الاوله الى كان يجي فيه سيول قبل دخول الصيف وبعده هذا والله اعلم منى ومنك وكله توقعات تصيب وتخيب وهذا ملاحظتى

[حـــادي]

أخوي خالد العوض صراحة انك مكسب لهذا المنتدى وأنا من أشد المعجبين بمشاركاتك والله يقويك ومالك إلا الدعاء ان شاء الله ، بنسبة لأمطار الصيف فلها نكهه خاصة ويازين شكل الغيم وهو ينشأ في السماء كنه جبال ويقبل عليك من جهة القبلة صراحة شعور لا يوصف أذكر أن أعوام 1413هـ - 1416هـ - 1424هـ مميزة جداً بكثافة الأمطار والسحب بنسبة لمدينة الرياض .
أخوي خالد ذكرت أن الأمطار كانت أكثر قبل عام 1407هـ وقبل هذي الفترة كنت صغير في السن دون 7 سنوات الله يعطيك طول العمر فياليت تذكر بعض المواقف إذا تفضلت علينا وكانت ملفته أو ظواهر جوية غريبة مةرة عليك قبل 1407هـ ولاتحرمنا من سواليف الأمطار تراي احبها بالحيل والله يجيب الخير ويرحمنا برحمتة .
ومازلنا بنتظار البردية الي جت الرياض
أخــــوك حـــادي

[خالد العوض]

اخوي حادي السلام عليكم غالي والطلب رخيص ابشر بس معين ابد الذكريات كثيره جداً وخل اقولك اول اقوي سيل شفته في حياتي ثم اقوي سحابه ثم اقوي برديه سمعت به اوشفته ثم اشياء عجيبه في السحب
اقوي سيل الله يطول بعمرك شفت اثاره . كنا طلعين في رحله للجنوب (ابهاء) في عام 1403 تقريباً وسمعت عن السيل الى جاء
على العقبه حقت جيزان العام الماضي 1402 الى مات فيه ناس كثير ودمر الطريق حق العقبة وجاب الكبري مع الصبة من جذعه الجسور .اذ شفته تقول وش جاب الجسر في ها المكان وش الى شاله من محله وهو بذا الحجم وغير مكانه و السيارت الله يستر علينا وعليك مثل علب الصلصة الفاضيه لعب به السيل وحاطه فوق بعض الحقيقه انه مشهد دمر لايوصف ,
با النسبه للسحب البرديه يقولون اهل الأثله جنوب مدينة الرس 90كلم انه جتهم برديه يقولون وانا ماشفت بنفسي ترى ان حجم البرد كان كبير مره الى درجة انه مات ناس منه وبعارين وحلاال كثير
ام شي انا شفته بنفسي من البرديه عام 1407 الساعه وحدة باليل صحت الناس فيها وطلعو يتفرجون، شمال الديره تكسر بعض القزاز،، وفيه منطقة عندنا اسمه خزاز عام1404 جها برديه السيارت الى صادف وقت البرديه كسرت قزازه وذكريات سحب البرديه كثيره واكثرها بالعقرب التاليه واول وسم الصيف هذي بعض الذكريات القديمه واما الجديده يوم صار عندي امكانيات من كامرة عادي وفيديو وسياره فهي اكثره تصوير اذكر عام 1415 قبل البرديه حقت الرياض بسنه وانا كنت بالرياض ركب المزن جهت الثمامه قبل المغرب وركبت السياره قلت ابروح اشوف السحابه واروح سلمك الله واقعد عند الطعس الى يطعسون
فيه الشباب ماكان فيه ناس واجد وسط اسبوع وحر الجو شوي واتفرج على السحابه وكل ماله تزين ويزيد برقه صار مايفصل ابد يوم أذن المغرب وراحت السحابه عن شوي جنوب وانا اصلي المغرب واروح جهت السحابه وهي مهب عريضه سبحان الله
يعني مايجي عرضه يمكن كيلو بس وفيها ثعل برد صغير لكن فيه العجب!!! انا وقفت يوم شفت الدعو برد وانا ارجع مع دربي واقف قريب من السحابه واشوف فيه رعي ددسن ورعي شبح هذول الله يخلف عليهم القزاز تكسر بس سبحان الله سخيفه السحابه مره والله فيه برد يالله اصك عليه اصابعي . اما البرديه القريبه الى ضربة الرياض انا الحقيقه اول ما شفت الجو عقب صلاة الظهر قلت يالله عسى خير اشوف اول ما تركم المزن على شرق الصناعيه الثانيه جهة سكة القطار الى على طريق الخرج
قلت ابروح اشوف ويوم اني وصلت واثر السيل واجد المهم تمشية شوي يوم جت الساعه تقريباً 3،30 يوم زان بدا مزن يردف من شمال غرب قلت ابروح امر البيت اصلي واتغدا واخذ الكميرا واطلع مره ثانيه المهم وانا بالطريق رايح للبيت اشوف السحابه بدا المزن فيها كانه جبال الهملايا جت طايره وان ربك امرها تجي نشوفه شي عظيم اقبل على اهل الرياض وان فيه ناس اجلهم بأمر الله مع السحابه وهم مايدرون المهم خفت وتحمست رحت بسرعه صليت واكلت وقلت للعيالي هاتو كامرة الفيديوا بالله بسرعه نبي نطلع نصور السحابه المهم يوم جيت عند حي الحمراء كان مخطط المهم وانا ابد اصوره اخذت شوي وانا اصور
المهم يوم نظرت الكميرا اثره مهيب تصور الظاهر من زود الربشه وانا اضغط على زر التسجيل واصور المهم يوم اخذت شوي وانا يدخلن الخوف وانااشوف ثعل البرد ابيض مع السحابه مقبله والله يوم قربت السحابه واسمع صوت كنه منوره حربيه با الطايرات وانا اجيك هاج ادور مكان اغبي فيه سيارتي وعيالي وشوف فيه صاله توه تبنا في مخرج 10 وانا اروح لمه وادخل السياره جوا وانزل من السياره واقعد اتفرج اول نقطه من السحابه طع دب طع دب وعاد تعالى تفرج على الناس الى ما يعرفون وين هي موجهه شي تضحك منه وشي يبكي الناس جاهم حالة هستريا الغريب في ذي السحابه سرعة تشكله وسرعة
جذبه للمزن الى حوله يعني تشوف قطعت مزن ضخمه ما باقي الا شوى وتصير سحابه ثانيه جنبه الا وتجذبه معه يعني السحابه هذي ما عطت فرصه انه يتشكل جنبه سحب ثانيه تعرف لو ها السحابه استمرت ساعة كان وش يبي يصير بالرياض.
الله اعلم
الامكان الى جها برد حجم كبير في المملكه حسب معلوماتي ورح فيها ناس 1- الخفجي قديم 2- سدير قديم3-الأثله قديم
4- نجران حديث قبل 4سنوات ( هذي السحب البرديه الى مات فيه ناس وصار فيه خسائر كبيره) الله يستر
نبي نعرض على مشرف المنتدى ان نسوي موضوع خاص با الاحدث الماضيه عن السيول والبرد واغرب السحب وانا عندي معلومات كثيره بس تبي وقت كثير وشي مؤرخ وفيه ذكريات عن السحب كثيره واشياء مرت على غريبه في السحب انا اقترح نسوي باب خاص واعطيك الباقي من الذكريات والاحدث القديمه والجديده فيه شي مؤرخ باليوم والساعه والدقيه اذبغيت

[أبــوريـــان]

زانت اعلومك اخوي خالد والله انك مكسب للمنتدى....
واحب اضيف اخوي خالد اذكر في عام 1414راح الوالد لصريف(يقع شرق بريدة 30كيلو تقريباً)اذكر في وقتها جانا في بريدة مطر معة
بردلكن الحجم صغير المهم الوالد تاخر..... مهب عاد يتاخر طبعاً ماكان فيه جوال.. قبل اذان العشاء دخل علينا الوالد قلت عسى ماشر قال رح شف السيارة وتعرف ونا اروح يوم شفتاه ولاوش تشوف تقل راميها برشاش ادرايش الي على اليسار متكسرة والي ورى متكسرة
راحت فيها السيارة السيارة اخذت فترة وهي طايحة في المزرعة وكل من شافها ماصدق لين باعة الوالد قبل اربع سنوات
وسلمتكم....
اخوي خالد فكرة جميلة ان نسوي موضوع خاص با الاحدث الماضيه عن السيول والبرد واغرب السحب
مشكور اخوي خالد

أخوك أبوريان

[خالد العوض]

المعذره على الاخطأ با الاملاء لكن حولو تقرونه

[راعي الحزم]

هلا والله بابو عوض ابشر بسعدك أنا حاضر وممنون بس تراي عليمي بالكمبيوتر

والله اعلومك سنعه وغانمة وإن شاء الله تجي أمطار الصيف ونتواعد عند خزاز وناخذ علومك هناك
شكرا لك على ثقتك الغالية

[صوت المطر]

تسلم يا خالد على معلوماتك ..

إيه غرد دايم أخوي خالد ..

ولا يهنون الربع ..

وحبيت أقولكم إن جونا اليوم كنه استوائي ..

سدا وقطيعات توحش ... كنها توحي ببرد سوف يحل على بعض المناطق بإذن الله تعالى ..

وهذه بعض الصور ..

http://www.alboser.com/uploader/aiu/Pictures/101.jpg

http://www.alboser.com/uploader/aiu/Pictures/1102.jpg

واعذرونا عن عدم جودة الصوره لأنها من جوال ..

[راعي الحزم]

صوت المطر وشلونك أنت صادق اليوم الساعة 11 صباحا جتنا رطوبه عالية وتوقعت أشوف النشو لكن ما طلع بس وين موقعك ارجو الرد

[صوت المطر]

يحبيلك يا راعي الحزم .. متوقع مثلي ..بس الأمور إن شاء الله زينه ..

وعسى الله يغيثنااااااااا ... أنا موقعي طال عمرك بالأرياف الغربية ..

يعني ما يمر شي على بريدة إلا وخبره عندنا بإذن الله ..

ومشكووور على تفاعلك .. بس تعال ماقلتي أنت بعد وين موقعك ؟

[جلمود1]

والله انت يا أخ خالد رجل ارصاد درجه اولى أرجو تنميه موهبتك با الأطلاع والدراسه و زيارتك للأرصاد السعودية للأستفاده اكثر وفقك الله لما يحب ويرضى

[حـــادي]

ما قصرت أخوي خالد ولا يهنون الربع ونبي زود من ذي السواليف تراها ماتنمل بس حبيت أسئلك أخوي خالد والأخوان بنسبة لأمطار الصيف هل هناك إشارات أو علامات جوية معينة تحدث يمكن من خلالها أن نتوقع و نقول أنه بإذن الله اليوم أو بكره بيكون فيه نشو أو أن هذا صعب ولا يمكن معرفة ذلك الى بعد بدء النشو كذلك سؤال آخر هل من الممكن أن نعرف أن سحابة الصيف فيها برد وهل البرد هذا كبير أم لا .

شكراً الأخوان تفاعلهم في هذا الموضوع

أخوكم حـــادي

[خالد العوض]

اعطيك الرد انشا الله رد بأ ذن الله يشبع رغبك با التفصيل بس انا مشغول يوم الجمعة بأذن الله

[حـــادي]

عذرك معك أخوي خالد وأدري كلفنا عليك بس مالك الا الدعاء ان شاء الله وأنا بانتظار اجابتك

أخوك حـــادي

[خالد العوض]

اخوي حادي السلام عليكم .
اول بسم الله با النسبه لامطارالصيف كيف تعرف انه بيجي مطر او لا اقول والله اعلم بالصيف فيه علامات
ممكن تلاحظها 1- سحب بدات تظهر من جنوب غرب حتى لوكانت بعيده مد النضر هذي علامه انه بأذن احتما ل
انه بكره يجي مطر بس فيه ملاحظه ودي انك تعرفه سحب الصيف اذجاء بعد العشاء في اغلب الاحيان
انه يضمحل ( يخلاب) يعني يركد ثم من بكره بعد الظهر يبدا يظهر قطع مزن 2-السدا اذا بدا يجي من جنوب غرب انا اتكلام عن الرياض والقصيم طبعاً حتى لو كان سدا خفيف بس يجيء من جنوباً غرب وحتى لوشفته باليل المتأخر مع القمرا لانه بقايا سحب اضمحل قبل ماياصل 3- هبوب جنوبي
او جنوبي غربي او جنوبي شرقي وهو افضل واكثر بخار ماء لانه جيء من جهت المحيط وبحر العرب
4- اذا جاء مطر مثلاً اليوم والكلام عن وسم الصيف طبعاً وجأ بكره والمهب ما تغير من امس اعرف انه بأذن الله ان اليوم يبى يصير فيه نشوء الظهر بأذن الله

الثاني وشلون تعرف السحاب الي فيه برد 1- صوت الرعد يكون متواصل وفي اثنا الرعد تسمع صوت
قعقعه وسط الرعد مهو بأخره السحاب يكون لونه اذا كانت الظهر صفرا وفيه جهه وحدة متواصل البرق معها لاانه اذكان تبرق مع جهه مثل ثم تبرق من جهه ثانيه وتبطيء ماتبرق مع الجهه الي برقة معه اول مره يعني الخلاياء الي بالسحابه ضعيفه شوي والخلاياء كلا ماصارت صغيره كلا ما كانت السحابه قويه يعني المزن من فوق وتحس ان السحابه مضغوطه جداً يعني متراكبه فوق بعض زي شكل حبة الكرومب( الزهره )يسمونه حقين الخضره البرد في غلب الاحيان يكون جنوب السحابه اكثر من شماله.
البرد وشلون تعرف انه كبار من الثعول كل ماصارت بيضاء وفيه زي صوت الهواء القوي وهذا البرد وهو نازل جهت الارض يصدم في الهواء ويطلع صوت قوي - الطيور تهج عن جهت السحابه
والباقي اكمل بعدين عن هذا الموضوع وترا كله من خلال تتبعي للسحب من قديم واقولك مبروك الخير الي جاء اليوم الله يطرح البركه فيه بأذن الله المطر في العقرب الوسط ينفع الارض ويزين الربيع بأذن الله
وابشرك يوم الاربعاء لقينا فقعه شمال مطار الرياض جبا

[خالد العوض]

الأربعاء 21 محرم 1426هـ - 2 مارس 2005م - العدد 13400

--------------------------------------------------------------------------------
عودة الى محليات جريدة الرياض


--------------------------------------------------------------------------------

استمرار هطول الأمطار
السيول تشمل المناطق.. وفيات واحتجازات وبلاغات إغاثة



جريان وادي الغيلانة في رماح

متابعة -الرياض - حمد الجمهور، رماح - مناحي السبيعي، الفيضة - ابراهيم الفهيد، بريدة - ملفي الحربي، الأحساء - أسماء أحمد، الطائف - اسماعيل ابراهيم:
احتجزت مياه الامطار والسيول التي هطلت خلال اليومين الماضيين اكثر من 169 شخصاً في عدد من الاودية والصحاري والاستراحات بمنطقة الرياض.
وقامت 4 طائرات عمودية بمساعدة الفرق الارضية بنقل المحتجزين وانقاذهم حيث حالت السيول والمياه دون عبورهم في عدد من الاودية بمنطقة الرياض وقال مدير الدفاع المدني بمنطقة الرياض اللواء مسفر الجعيد في تصريح للرياض ان البلاغات التي وصلتنا تم مباشرتها على الفور وتم انقاذ الاشخاص المحتجزين والذين علقت سياراتهم في الوحل او احتجزتها المياه دون خسائر بشرية ولله الحمد وحث اللواء الجعيد الراغبين في الخروج للبر الابتعاد عن بطون الاودية ومجاري السيول حتى لا يتعرضوا للخطر.


رماح

في رماح هطلت امطار غزيرة على محافظة رماح والمراكز التابعة شملت الغيلانة والرمحية والمزيرع والفيحانية وروضة خريم وشويه والعمانية والعيطلية وحفر العتش وروضة التنهاه والحفنة وقد تلقى مركز الدفاع المدني بمحافظة رماح 120 بلاغ طلب الاغاثة من المتنزهين بالاودية والشعاب وقد شاركت فرق الانقاذ بمتابعة مدير عام الدفاع المدني اللواء سعد التويجري وتم انقاذ ما يقارب 200 شخص وقد شاركت الطائرات العمودية للدفاع المدني.

الفيضة

لقي طفلان في مقتبل العمر حتفهما غرقاً بتجمع مائي بالمنطقة المجاورة لمنطقة عنز التابعة لمركز نفي بمحافظة الدوادمي أحدهم الابن الوحيد من بين خمس بنات وفي تفاصيل القصة ان أحد الاطفال والذي يبلغ من العمر الثالثة عشرة قد استأذن والده للعب مع اقرانه من ابناء عمومته وذلك قبل صلاة عصر يوم الاحد الماضي ومن ثم ذهبوا جميعاً لمشاهدة تجمع مائي غريب والمجاور لهجرتهم واخذوا باللعب بجوار هذا التجمع المائي ورمي بعض الحجارة فيه واثناء ذلك انزلقت قدم أحد الاطفال ليسقط بوسط الماء ليلحق به ابن عمه الآخر والبالغ من العمر احدى عشرة سنة ليهب بقية الاطفال الى اهليهم حيث تم ابلاغ الدفاع المدني بنفي لتبعية المنطقة لخدماته وابلاغ الدفاع المدني بساجر والذي باشر الحادثة بقيادة رئيسه النقيب غازي بن منصور الغازي وشرطة ساجر والهلال الاحمر حيث تم انتشال الجثث وايداعها ثلاجة الموتى بالمستشفى.

«الرياض» زارت هذا الموقع والذي يوجد في أرض صخرية وفي منطقة منخفضة عن سطح الارض وبجواره مغارات وكهوف وتم قياس عمق الماء بواسطة سيخ حديد ووجد ان عمق هذا التجمع يتجاوز اربعة امتار كما زارت «الرياض» والد أحد المتوفين ويدعى ماجد بن شجاع العتيبي وتم تقديم واجب العزاء وقال انني احمد الله على قضائه وقدره وادعو الله ان يخلف علي بخير وان يكون شفيعاً لوالديه وطالب العتيبي بلدية نفي بضرورة ردم هذا التجمع المائي حفاظاً على سلامة ابناء هجرتهم كما قدم شكره لمدير الدفاع المدني بساجر النقيب غازي الغازي على سرعة التجاوب ومباشرته بنفسه عملية اخراج الجثامين وقدم شكره لجريدة الرياض ولجميع من شارك بالعزاء.

الدفاع المدني من جهته طالب المواطنين بضرورة متابعة ابنائهم والحرص على عدم اقترابهم من التجمعات المائية والمنتشرة خلال هذه الايام بعد هطول الامطار.

ونتيجة للأمطار التي تواصل هطولها على عموم قرى السر خلال الايام الماضية فقد ادى جريان شعيب الفيضة الذي يبدأ من خلف محافظة الدوادمي بمسافة طويلة حيث ادى جريانه بالحاق اضرار بالغة بطريق جفن الديرية مروراً بالفيضة، ولكن وزارة النقل لم تعر هذه المطالبة أي اهتمام حيث ان روتينها السنوي المتمثل بعمل ردم للطريق بالرمال ومن بطن الشعيب قد عاد هذا العام ومشكلاً خطراً على عابري الطريق وذلك لارتفاعه عن مستوى الارض وتجمع المياه في الجهة الشرقية.

تمكنت فرقة من إدارة الدفاع المدني ببريدة مساء أمس الأول من إنقاذ أسرة احتجزتهم مياه وادي الطرفية وتتكون الأسرة من رجل وزوجته وطفليه كما تمكنت إدارة الدفاع المدني من إنقاذ شخصين احتجزا بمياه الوادي و كانت منطقة القصيم قد شهدت خلال الأيام الخمسة الماضية أمطاراً شملت العديد من محافظاتها ومدنها الأمر الذي استنفر جهود الدفاع المدني بمنطقة القصيم بقيادة مدير الدفاع المدني بالقصيم العقيد فهيد بن فرحان الفايدي ونائب مدير الدفاع المدني بالمنطقة المقدم/جهز الفهيدي حيث تم فك احتجاز عدد من العوائل والأشخاص بمواقع مختلفة وقد بثت مواقع الأنترنت صوراً لعدد من حوادث غرق السيارات بالقصيم والتي غالباً ما تنتج عن مغامرات أصحابها وخاصة من الشباب والاستعراض أمام الآخرين وحينما يحدث الفشل ويداهمهم الخطر يلجأون إلى الاستعانة بالدفاع المدني الذي تجاهلوا تعليماته وارشاداته بعدم الاقتراب من المواقع الخطرة.

تعرضت الاحساء مساء امس الأول إلى أمطار غزيرة مصحوبة بعواصف رعدية تسببت هذه الأمطار وتلك العواصف إلى تحطم العديد من لوحات وصور المرشحين للانتخابات البلدية في الاحساء وشوهدت عشرات اللوحات والصور محطمة وبعضها ممزق بفعل الرياح. المدهش ان بعض اللوحات حافظت على تماسكها ووقوفها امام العاصفة ولسان حالها يقول البقاء للاصلح .هذا وقامت بلدية محافظة الاحساء ومنذ الساعات الأولى بتسخير طاقتها المختلفة في سحب المياه من الشوارع المتضررة جراء الامطار الغزيرة.

وقع حادث مروري توفي وأصيب رجل و3 نساء في حادث مروري بالقرب من العطيف بطريق الرياض - الطائف نتيجة انحراف سيارة عائلية بعد أن فقد سائقها السيطرة على عجلة القيادة وانقلاب السيارة عدة مرات حتى توقفت بعيداً عن الطريق ولقي السائق وإحدى النساء مصرعهما على الفور بينما اصيبت امرأتان اصابات بليغة، وقامت فرقة من الهلال الأحمر السعودي بنقلها إلى مركز العطيف الصحي لتلقي العلاج اللازم وجرى تحويلهما لمستشفى الملك فيصل العام بالطائف لاستكمال العلاج.

ومن جهة أخرى وقعت 3 حوادث مرورية على امتداد طريق الطائف - الجنوب نجم عنها اصابات متفرقة لحقت بخمسة أشخاص وقامت فرقة الهلال الأحمر والدوريات الامنية بمباشرة الحادث ونقل المصابين الى المراكز الصحية القريبة.

[محب الشمال]

والله والنعم جميعاً فيكم كلكم والله يحفظكم
علومكم طيبه

[القناص]

اخي خالد العوض

مبروك علينا انت

والله انك ارصاد بالفطره الله يوفقك ويرعاك

[حـــادي]

مشكور أخوي خالد وصراحة انت كنز وأنا ممتن لك بتلك المعلومات التي كثير منها أول مره أعرفة .

بس بسئلك سؤال دائماً الاحظ السحب الرعدية التي تكون ماهي عريضة تكون غزيرة المطر وإحتمالية البرد فيها أكبر هل هذا صحيح ؟

الملاحظ الثانية بنسبة لأمطار الصيف إذا جتنا أيام ورا بعض وكانت فيها أمطار من سحب رعدية عريضة ثم جاء بعدها يوم و كانت السحب ماهي عريضة تكون تلك السحب مطرها غزيرة وبرقها كثير واليوم الي بعدها تكون السماء شبه صافية أو صافية .

[خالد العوض]

اول الشكر لله ثم لصاحب المنتدى وللجميع الأخوة
ثاني ماشأالله عليك معلومة صحيحه في اغلب الاحيان يعني بنسبة 70%100 تكون السحب الصغيره طبعاً هذا في سحب المزن الركامي والسبب ذكرته قبل ها المره واعيده مره ثانيه .
واقول السحب الصغيره (2كلم عرض الىاقصىحد تقريباًمن6او10كلم عرض ) وهي طبعاً المزن الركامي لا تتوسع في السماء على حسب قوتة فهي شديدة التركيز والهوا الصاعد وهو الى يبني السحاب بأذن الله ويقوم برفع المزن الى الاعلى وعملية التلقيح للسحب ونفخ السحب حتى تصبح على شكل انفجار شديد في داخل السحابة طبعاً فيه عامل مهم وهو ان تكون الأرض حارة يعني دفىء
با النسبة للسؤل الثاني نعم اول الصيف اوقبل بعشر ايام يجي فيه سحب تكون عريضه وقويه ومهو شرط انه يجيء بعده على طول سحب صغيره تكون مثل ماذكرت انت لكن ممكن اذ جاء مطر ديم اولا لصيف واخذ يوم مثلاً بدا المغرب يوم الجمعه ويوم جاء من بكره قبل الظهر بدا الخيال حق امس ينقشع تبي تلاحظ شي بدا ينشىء من الغرب وهي قطع مزن طامنه وهذي سبحان الله مثل ماذكرت تكون قويه وبرقه ما يفصل ملاحظة مهمه ان سحب الصيف يكون معها عواصف ترابية شديده والله يعين الى معه ربو اوحساسيه والله اعلم مني ومنك وكلامي مهو قاعده (صواب يحتمل الخطاء)

[بروق@رعود]

خبير ابو عوض
وش أخبار الديره؟

[خالد العوض]

تَسلم عليك