محاولة لنقل المعركة بلا تايوتا بلا نيسان بلا هم

[البرتقالي]

السلام عليكم ياوجيه الخير


بغيت اشتري لي مويتر وبعد ماعصرت المخيخ عصرا مبرحا :D
استقر الفكر على اكسبدشن فورد وبس ونيسان وتويوتا ومازدا ودايو خس :p
المهم امرني الله ورحت لوكالة جميل << بالله *************:D
قصدي رحت لتوكيلات الجزيرة ولقيت واحدن شمري سنافي شرواكم
مشى معي وجاوبني على الاسئلة اللي تدور بمخيخي الباطن قبل اسأله ;)
لقيت الايدي بور والليمتد الفرق بينهم تقريبا ثلاثتلاف ريال ينطح ريال
طبعا لمصلحة الليمتد مع انه جايب العيد بالثلاجة اللي بالمرتبة الثانية
جايه بالنص وآخذه مكان راكب وزنه مية وعشرين يورو طن :mad:
كلهم مراتب جلد وكان ودي انهم مخمل بس الشكوى لغير الله مذله
كلهم الوطايات الجانبيه تغطي خشتها بعد ماتسكر الباب :)
كلهم مثبت سرعة وفتحة وجنط عشرين وهلم جرا
الفرق الوحيد الثلاجة مثل ما سبق ذكره
والليمتد يجي لون واحد والايدي بور يجي لونين
الرفارف والصدامات والمرايات ذهبي يختلف عن لون الموتر


والسعر للايدي بور 162500 والليمتد 165500
أبي رايكم وهداية الله ولاتزعلون مني يا جابانيز :D

[aooa]

لو سالتني عن تويوتا والا نيسان كان عطيتك العلم ... بس الامريكي ما عندي خبر فيه .. لكن ان شاء الله الاخوان يفيدونك ...

[الجيب ولهان]

لاتاخذ العلم الا من واحد مجرب نوع السيارة لفتره طويلة اي نوع من السيارات خاصه اذا كانت نوع جديد او قليل ... وفقك الله.

[عاشق السناف]

الله يوفقك لخير

[باثفندر]

تبي الشور مادامك ماتبي غير هالموتر ،،، خذ اللي بدون ثلاجة لأني شفته بالوكاله مكانها إسمحلي على الكلمة
( غــبــي ) بمعنى الكلمة وإذا تبي خذلك ثلاجة أصلية
( بفرق القيمة ) وحطها ونقلها على كيفك !!!

وبالنسبة للوطايات أشوف عند جارنا الموتر واقف له كم يوم ووطاياته نازله !! يمكن معلقة ،،

[abo tayyar]

والله يالغالي ما عندي خلفيه عن السياره لكن إذا كنت راعي طلعاات كثيره للبر ما انصحك فيه وعموما الامريكي لأن الياباني معروف بقوة تحمله .....

والله يوفقك ان شاء الله ...

[سوبر مكشات]

مالك نظر باليوكن
او ارمادا
او سكويا


ترا راعين الاكسدبشن يشكون من مرتبه السواق قاسيه


واستاجر هالنواع كله وشف

[خشم العرمة]

لعلك تحط الاكسبورر في بالك والسبب النقاط راح اعدها على عجالة واذا تبي الاستزادة راسلني واعطيك بالتفصيل الممل
1- السعر مقابل المواصفات عادل جدا مقارنة مع السيارة من نفس الفئة البرادو والا الباثفيندر
2- في الخط مريح جدا
3- في البر ماعليه كلام خصوصا النفود اسأل مجرب ولا تسأل طبيب
4- الايرباقات موجودة في الامام وفي الجوانب من الاعلى وفي نفس المراتب الامامية ايرباقات تخرج على الجانب
5- المقصورة من على شكل قفص فولاذي مدعم حتى لا تنكمش المقصورة على الركاب وقت الحادث لا سمح الله
6- مثبت سرعة
7- مانع انقلاب
8- مانع انزلاق
9- نظام قفل الدفرنس اتوماتيكي
10- جميع فئات الاكسبلورر بدفع رباعي حقيقي يعني دفرنسيس وليس كروس اوفر
11- جميع انظمة الامان قامت بتطويرها شركة فولفو
12- صرفية البنزين ممتازة
13- مكيف حلفي ومكيف امامي
14- حساسات خلفية
15- ازرار الابواب
السعر في حدود 98 الف للفئة xlt المتوسطة

بالتوفيق

[سعد777]

طيب نعطيك الراي من ناحيه ايش انت حدد ونحن نجاوب
وبعدين فيه رابطه كلهم حقين اكسبدشن يفيدونك يارجال

رابطة ملاك اسد الصحراء ( الاكسبدشن4×4 / 2×4) (http://www.mekshat.com/vb/showthread.php?t=179090)

[سفاري959]

اذا بدفع هالمبلغ عز الله ما حطيته في امريكي نصيحه الامريكي لا تشتريه جديد خذه مستخدم استخدام بسيط وطايح من قيمته واجد واسمحلي اذا تقارن الفورد في النيسان والتايوتا المقارنه ظالمه هذا رايي الشخصي والله يكتب لك الصالح

[اليكي]

الموتر ماعليه كلام ... بس تره ماهو حق بر .. وصعب بيعته . اما الوكاله ماعليهم كلام من افضل وكالة السعوديه

[ابوراكان تبوك]

الموتر ماعليه كلام ... بس تره ماهو حق بر .. وصعب بيعته . اما الوكاله ماعليهم كلام من افضل وكالة السعوديه

زد على ذلك المبلغ اللي تحطه في السيارة وهي امريكي أصلاً

نصيحة اخ لأخوه لا ستعتجل

[رفيع المقآم]

الله يوفقك ومبرووك مقدما

[أبوالمثنى]

لا يهمك الي يقول الامريكي مايصبر ومدري ايش

والله الامريكي فيه اعتماديه عاليه ويفضل بعض الاحيان على الياباني

ياشين التعصب للياباني

وانا والله موتري ياباني لكني انصحك بالاكسبدشن

والله يعطيك خيره ويكفيك شره

وانصحك تاخذ اللمتد

[شمالات نجد]

فكر بالاكسبلورر الناس هابه فيه بقوه واتوقع انه بيكون له صولات وجولات في السوق مستقبلاً من ناحية الرغابة والسعر

على سبيل المثال الفكتوريا كيف كان سابقاً والآن

سلام

[طير شلوى نجد]

ياخوي سعر فوق الميه حرام تحطه بأمريكي وانت يأخوي ماقصرت وصلت سعر الياباني يكفي بالياباني انه شيك متى مابغيته زبونه جاهز

[لبيد بن ربيعة]

أهنئك على ذوقك العالي وأتمنى لك التوفيق مقدما

ومن وجهة نظري الاكسبديشن الايدي بور اجمل بكثير من الليمتد ، حقيقة اللونين تعطي السيارة تميز خصوصا الذهبي مع الأبيض

وبالنسبة لردود بعض الإخوان : لا تعليق !!

[المميـز]

الاكسبدشن سيارة معروفه وقويه ومواصفات لايعلى عليها

ومكائن وقير الفورد معروف من عمر الدنيا يتحمل الكد والمد

ولكن مايعيب الفورد ان سعره يطيح بسرعه والسبب طبعا يرجع للشريطيه وليس للسياره




والسعر للايدي بور 162500 والليمتد 165500


مثل ماذكرت طال عمرك هذي قيمة السيارة

إذا ماعندك مشكله بعد سنه تبيعه بخساره ... اقولك توكل على الله وخذ الموتر اللي بدون ثلاجه

:::::

وراك ماتصبر وتشوف الباترول 2010 :)

::::::

واخيرا
بعد الاستشاره عليك بالاستخاره
واسأل الله أن يكتب لك اللي فيه الخير

[الوادعي 2008]

ترى عندهم خدمه تجربه الموتر يخليك تسوق اخوه مستخدم.. والاخ الشمري اللي فرّجك على الموتر وعطاك المواصفات .. له مجال يعطيك خصم 1000 ريال او اكثر ..

وللمعلوميه لاتوجد شركة سيارات تعطيك ضمان من الصدام الى الصدام ولمدة خمس سنوات او 200.000كيلو غير التوكيلات الجزيره ..
اطلق شركه ثلاث سنوات او 60.000 الف ..

ومافيه احد يأخذ وكاله الا يبي يستخدم .. الا واحد مزنوق يشتري اقصاد ويبيع كاش واللي هاذي حالته يأخذ تويوتا لان سعرها يزود ماينقص .. ومن وجهة نظري تويوتا صارت عندي دعايه .. بحكم اني جربت الاكسبلورر ..

يالغالي :
ادرس وضعك من جميع النواحي من حيث العائله وعددهم .. واحسب خدمة السياره 10 سنوات خدمه كأقل حد ..وحط شخصيتك في الاعتبار ان كنت راعي بر .. او سفريات .. دياركم بعيده .. وغيرها من النواحي المهمه كالأمان من السرقه .. الخ.

اتمنى لك الخير والتوفيق في اختيارك .. والاهم من ذلك اسأل الله الخيره .. في صلاة الاستخاره ..:good2:

[سيف الظفير]

يا بعد حيي

لقيت قبل فترة 2008 اسود مجهمً يحبه قلبك بـ 85.000 ريال وممشاه قليل وسعودي ونظيف بالحيل مع رجال ابو عيال وكبير مستخدم الفورد حشمة

فـ نصيحة لوجه الله

خذلك نظيف مستخدم احسن لك ووفر على عمرك مبلغ كبير

165.500-85.000= 80.500

[هبــ حريملاااء ـبوب]

وعليكم السلام ورحمة الله وبركاته

مع احترامي لرأيك ورأي الاخوان .. قيمته مبالغ فيها مقابل نظيره الياباني

اخوي انا ماخذ أرمادا دبل فل كامل Le بـ 158 .. وطبعا المواصفات اكثر والاداء افضل
من ناحية المحركات اقوى والبدي رياضي وارسى .. واللي يتكلم على الضمان نيسان ضمانها معروف
يا اخوي معطيني على الددسن 150 ألف كيلو ضمان او خمس سنوات وكرت مختوم من الشركة الام والموزع خل عنك ..

وبعدين الارمادا جرم امريكي بتقنيه يابانيه .. يعني عصفورين بحجر وبأقل قيمة واكثر مواصفات .. والرأي لك

اما التايوتا عقب ما بكى ريسها ونزلت دموعه بأمريكا فاعرف ان وضعهم مدحدر وموقف لا ينسى لنهاية امبراطوريه .. وسلامة الجميع ..

[التعـ King ـديل]

الاكسبدشن حلو وسمعته زينه عند اللي جربوه بس معليش مع احترامي للموجودين تقل بقره من كبر حجمه

انا اوافق اخوي خشم العرمه على نصيحته لك بالاكسبلورر

واوافق رأي سيف الظفير بخصوص المستعمل تلاقيه ارخص بفرق كبير حتى لو موديل السنه

[بن سليمان]

الاكسبدشين اختيار موفق للحجم الكبير وهو الافضل حاليا
لكن انصحك تاخذ اقل نوع وتوفر فلوسك ما دامه نفس الشكل ونفس المكينه بس ركب فيه شاشة نفقيشين حقت الوكاله يطلع تمام التمام
ولا تنسى انه كل ما كبر الجنط كانت الكفرات اغلى

[البرتقالي]

شكرا لرصع خبراتكم

اخوي اووا
من قال لا أعلم فقد افتى
شكرا لنقاء سريرتك

الجيب ولهان
اخوي معه اكسبدشن امريكي 2004
وشايف نفسه علينا من زين مركبه وقلة اعطاله :)

عاشق السناف
ويوفقك يابعد حيي

باثفيندر
صدقت وربي وغبي قليلة على دميجة اللي صنعه

ابو طيار
يابعدي تصدق اني كنت اطاعس بكراون فكتوريا 91 ولو اني ما اعرفه كان قلت دفرنسين
فيه ميزة اذا قابل الرمل مقفاه يناقز ويمشي مهوب مثل الكابرس اذا برك كنها بركت جمل
اما طلعاتي للبر فهي تقريبا عشرة بالمية من ممشاي بزحمة الرياض وغثاه

سوبر مكشات
اليوكن مدري ليش احس انه امتداد للعباراتين 79
لاخيرة ولا كفاية شره والأرمادا يمدحونه بعض الناس بس ما بي اطبح على عماها
أما سكويا حكايتها حكاية اجل سيارة بميتين الف مافيها دبل :(

خشم العرمه
الاكسبلورر شكله رهيب ووذف
بس مشكلته صغير شوين على عايلتي
والا وش ملحه ويازين سعره

سعد 777
من كل النواحي أي شي يطري ببالك معارضة احتجاج اتفاق نصر
وتسلم يا خلفهم على الرابط

سفاري 959
معك والله اشتري مستعمل 2009 اصرف لي
بس رحت للمعارض مالقيت معروض الا تويوتا ويوكن والاكسبدشن بالقطاره
بالنسبة للمقارنة يمكن تكون ظالمة برايك لكن ما اخفيك كان معي
تويوتا 81 و 83 و 86 و 87 و91 وغيرها ماشفت منها الا القلق ووجع الراس
ولا يهون النسيان مدري النيسان الامريكي يابعدي راحة وسعة وخفة
وصرفية بنزين صح واللي يبي يستعمل ولاهوب راعي بر واجد
اعتقد الامريكي انسب له خصوصا مع ارتفاع اسعار الياباني وخف وزنه ;)

اليكي
تشكر على التواصل يا صاح
لكن وشلون مهوب راعي بر اخبر الوالد الله يعافيه
كان يقول مافيه مقارنة بين الامريكي وغيره بطعوس الثويرات ولينا وماجاورها :p

ابو راكان تبوك
ياهلا بأهل تبوك تشرفنا
والأمريكي وش فيه والله لو انه اكسنت كوريا والا الجيب الروسي اللي كنه عشة حمام

منوتي الشاص
ويوفقك ويستر عليك يابعدي

شمالات نجد
الفكتوريا موتر والاكسبلورر فورد والاكسبدشن فورد وكل واحد يقول الزود عندي

طير شلوى نجد
هذا رايك للي يبي يبيع ويشتري
ودري اشوف رايك بالنسبة للي يبي يستخدم اقل شي عشر سنين
ولا هنت اخوي

لبيد بن ربيعه
تسلم لي وبالتأكيد الايدي بور افضل بكثيررررررررر

المميز
مابي ابيع الا بعد عشر سنين على الأقل إن الله عطاني عمر
او بعد ما اشتري بيت على الاقل :)

الوادعي
الله لا يهينك على هالمعلومات المفيدة
ومادام الشمري بيده يخصم دواه عندي البناخي

سيف الظفير
ما اخفيت لفيت على المعارض بالنسيم ما لقيت اكسبدشن الا بالقطاره
رحت لصالة الموتر لقيت 2007 امريكي ستاندر بـ 97000
واذا 2008 سعودي ايدي بور بـ 85000 عز الله انه يستاهل

ددسن 2008
كان معي ددسن 2008 قصدي 1985 وكالة اذكر بالشتاء ما يشتغل المسجل
من وقتها كرهت النيسان مع انها اخف نفس من التويوتا وافضل بالفرامل والحرارة
لكنها اسوأ بالكهرب احيانا تجي نص الليل تلقى لمباتها مولعة

ملك التعديل
أو ملك النيسان
وش احلى من البقرة اذا عطتك لبن مصفى
بالنسبة للاكسبلورر قلت رايي عنه فوق
ورايك وراي سيف الظفير له احترامه وتقديره

بن سليمان
صدقت الكفرات تبي تصير اغلى
بس مايهم كل سنتين او ثلاث زيادة الف ريال
وبالنسبة لاقل نوع ينقصه اشياء واجد مثل الشاشة والحساسات
والدعاسات ثابته والجنط 18 واللون واحد وبدون فتحه و و و و


بالنهاية اعتذاري من العزيز بدوي جنوبي

[مخاوى ابوه]

خذه ولا تشاور
مع ابوى واحد يمدحه مره مره
وانت جربه وشف
واهم شي استخر
والله يكتب لك اللى فيه الخيره