اعصر مخك وشارك

[خطــاب]

السلام عليكم ياشباب ابشركم شريت موتر GXR اللون ذهبي واللوحه ( ن م ر xxx )
ترقبوا الصور قريب..
ممكن تقولون لي وش الاشياء الأساسية والضروريه اللي المفروض يسويها مالك الجيب الجديد, سواء كانت اشياء تخص السيارة او العزبه وملحقانها؟
حقيقة انا افكر اجلس على الموقع واسوي مثل الملف يحتوي على افضل الاشياء من خلال ردود الشباب, مثال بالنسبه للعزبة نجد ان الاغلب يفضل مثلا استخدام العزبه البلاستيكيه المبطنه من الداخل
بالنسبه للساكتون مثلا الاغلب يفضل نوع ديانا 27 او 35 او 80.. وهكذا
اذا فيه اقتراحات فلا تبخلوا علينا علشان الكل يستفيد
جزاكم الله خير
خطـــاب

[SilverSniper]

حياك الله أخوي خطاب..
الله يبارك لك في جيبك ويا جعله انشاء الله مركوب العافية..
تجهيزك لجيبك يعتمد على حاجتك وميولك.. ان كنت راعي طلعات قنص .. أو كشتات سيول.. أو تطعيس.. أو طلعات نفود.. وهكذا..
على العموم.. أنا بأفترض حاجتك له للصيد.. وبأفيدك باختصاصي... التسلح :)
يلزمك يا طويل العمر..
1- ساكتون 27 ديانا أو فايروخ.. اترك الأسباني لأنه مزعج.. والأمريكي لأنه ضعيف.. والانجليزي ان لقيته فلا بأس.. تكون صتمه صغيرة (4.5mm)
2- ساكتون 85 فايروخ.. للطيور الأكبر.. يمكن الاستعاضة عنها بخرازة ولكن وجودها محبب.
3- خرازة برنو تشيكية مزودة بمنظار مقرب.. للضب والأرنب والطيور البعيدة..
4- شوزن .. نصف أوتوماتيكية .. يعتمد نوعها على ميولك.. اما بينيللي ( الأفضل في رأيي ) أو بيريتا أو ريمينجتون أو براوننق.. وهكذا..
5- صندوق لحفظ الذخائر .. يكون مقسم من الداخل لعلب الخرازة وكراتين فشق الشوزن وعلب الصتم..
6- سكين للذبح صغيرة.. يفضل نوع أوبينيل أو ما يماثلها في الجودة..
7-كمية كافية من الذخيرة لكل رحلة..

[ابو شكاع]

خذ رايي واذا جاز لك سوه واذا ما جاز لك امسط به

تلبيس الأرضية مهم

وبعد تلبيس الشنطة مهم

نسيت اقول مبروك عليك الموتر ...

والسلام

[مشغول]

ما شاء الله مبروك عليك الجيب

رايي انا انك تركب مساعدات جبرايل ويايات حمولة 150 كيلو إذا انت راعي بر بس على خفيف ولا تبي شكل الموتر يتغير .. واذا انت راعي حمولة ثقيلة حط يايات 200 كيلو وما فوق .

ولا تنسى منفاخ الهواء ضروري

وهلا بك

[ابو مساعد]

وعليك السلام ورحمة الله وبركاته

اهلا وسهلا فيك عضو جديد في منتدنا ومبروك الجيب وشايف على وجه الخير .

الاخ خطاب مستلزمات القنص بسيطه جدا :cool:

1. قدر ضغط حسب حاجتك ومستلزمات الطبخ .
2. جركل ماء اذا انت ماتحب تفصيل تانكي .
3. الفراش اذا انت من هوات النوم بالبر وفرشه للجلوس وقت الراحه ووقت الغداء .
4. الشراع وهو عباره عن قطعه كبيره من قماش الخيام 3×3 تستعمل للظل اوقات الحر .
5. القهوة واغراضها والشاي واحتياجته.
6. الماجلان والايكم هذا حسب الرقبه .
7. السلاح وما تقدر تامينه وتامين ذخيرته .

والى البر دقري والله يوفق الجميع بعد اول طلعه تحس انك ناقص اشياء تقوم بتامينها لاحقا .

تحياتي لك بالتوفيق

[خطــاب]

SilverSniper
يعطيك العافيه على ردك السريع وعز الله كفيت ووفيت..

ابو شكاع
ماقصرت والله.. انا حاط في بالي تلبيس الارضيه وبالنسبه لتلبيس الشنطه مافهمت قصدك كيف البسها.. تقصد الفرش اللي على باب الشنطه؟؟
وبالنسبه للتلبيس انا اعرف تلبيس البلاستيك الشفاف بس.. هل فيه شي افضل من البلاستيك؟؟

مشغول
بارك الله فيك وبالنسبه لمساعدات جبرايل ويايات حمولة 150 كيلو.. وش فايدتها للموتر؟ووين القاها فيه؟ وبكم سعرها؟ وهل تلغي ضمان الموتر؟ وهل تحوس شكل الموتر او تغير فيه؟
وش افضل نوع للمنفاخ؟ وبكم؟ ووين؟
انا عارف انك تقول وش ذا الكمخه اللي بلشنا به ذا وش له والجيوب والبر..تحملوني اذا ماعلمتوني من بيعلمني...

للجميع::
بالنسبه لضمان الموتر هل ضروري المحافظه عليه.. انا ودي اتعبث في الموتر واخاف يلغي الضمان؟ هل الضمان مهم لذي الدرجه ولا اعفل الموتر؟
انا قال لي واحد من الشباب حط مانع صدأ تحت الموتر من عند z-bart ... عندكم خالفيه عنه؟ هل هو مفيد ولا ماله سنع لانه الظاهر ب 1500 تقريبا؟
التظليل حق القزاز وش افضل شي مع اللون الذهبي؟ ولا ما اظلل اصرف؟

[مشغول]

هلا بالحبيب خطاب

أما المساعدات واليايات تنفعك في رفع الموتر من ورا وما تخليه يطامر او يدبج او يدق او .. مدري وش يقولون ..على العموم اليايات والمساعدات الاصلية حقت الوكاله خفيفة وما تصلح للحمولة الزايدة . طبعا لو ركبت مساعدات جبرايل ويايات حمولة 150 كيلو ما يتغير شكل الموتر .. لكن لو حطيت 200 كيلو بيطلع شكل الموتر مرتفع من ورا وشكله شين ..انا ركبت 200كيلو وفي نفس الوقت فكيتها وركبت 150 وطلعت مناسبة .
اما السعر 450 المساعدات 450 اليايات تقريبا .

اما المنفاخ اشتر ابو جمل ( كمل ) السعر تقريبا 230 ريال شارع الغرابي .. ودور الاصلي .

وهلا بك في اي وقت

[محب الشمال]

الله يبارك لك فيه ويعطيك خيره ويكفيك شره
اقول رايي
اذا انت راعي مدينه ولا تروح للبر دايم ولا تنام فيه خله على حال
لكن اذا بغيت بعض الاستعدادات
عندك منفاخ الهواء
بطاريه اضافيه تتركب احتياط
واذا فيه مجال كفر سبير زياده
واذا شبكت الماجلان والكنود خل الي يركبها من تحت الطلبون عشان تكون مخفيه منظرها احلى
شاحن بطارية من ساكو
لستك ورقعه ومكبس رقعه
اذا غيرت الشبك العلوي فوق التنته اشتر من الوكاله سداد الفتحات عشان الماء ما يدخل على السياره ويعدم الكهرباء
عليك بالمحلات الجيده حتى لو غاليه ثمنها فيها
والله يستر عليك

[وهبى]

مبروك عليك السيارة والله يعطيك خيرها ويكفيك شرها

القلص
منفاخ الهواء
الاشتراك
عده كامله من مفاتيح ------الخ
عفريت تمساح اى جيك
اشتراك يوجد نوعين نوع العادى ---ونوع الثانى هو من تشرك السياره من سياره اخر لون الجهاز اصفر
جهاز كنود
جارمن
يتبـــــــــــــــــــــــــع
تلبس الارضيه نايلون
تلبيس الكشنات
تلبيس السكان
يتبـــــــــــــــــــــــــــع

عزبه للشاى والقهوه
تحتوى عل --شاى قهوه -سكر -ملح -بهارات للدخل على لطاير --كم سيخ شوى للدخل ههههه لاتضحك
فناجيل -بياللات -2 ابريق شاى -دله -ولعه --اضبطك ههه--ليف - مشغال صغير -زنجبيل -اذا تبى السوبر ماركت كله حاضر
وحاضرين للنشاما


وســــــــــــــــــــــــــــــــؤال للمشغول ارجوا الاجابه عليه
االمساعدات واليايات هل لونهم صفر و---وما احسن نوع ---لاخلا ولاعدم يامشغول -نسيت --كم اسعارهم
محبكم بالله
ابو بندر الحربى