اللي عنده علم عن هالشيئ يجاوبني واكون له من الشاكرين

[ميزان]

السلام عليكم ورحمة الله وبركاته وبعد : ـ
اسعد الله اوقاتكم جميعاً انا اول مره اشارك بالمنتدى وانشاالله اني من الحظيظين اللي تعرفت على هالوجيه السمحه شرواكم وعندي سؤال يالربع وهو : ـ
انا عندي جيب صالون GXRموديل 2002 وبهذلت بي سلة الوكالة ان ثبتها ماقدرت افكها وان فكيتها ماقدرت اركبها زود على شكلها اللي كنه هودج (القن اللي يحطونه على البعير ) اظنكم تعرفونه , ولاتاخذ غراض كثيره وسمعت ان فيه ورش بالقصيم يقولون انها تزين سلال طيبه بالحيل وشكلها زين على الجيوب وفيها اضافات يمكن يستعملها الواحد مثل عمل الظلال وقت القايله او وقت المطر تكفون يالربع افيدوني وش اسم احسن ورشة مختصة بهن وبحدود كم سعرها ؟ واذا فيه هواتف للورشة يمكن الاتصال بها ؟ مع العلم اني من سكان الشمال ـ الجوف والله يجزاكم خير .

[عبدالله الصالح]

والله يبن الحلال فيه عندنا (بالرس) ورشه حدادة يمكن قد سمعتبة وهي
الضويان للحدادة طبعاً تظبط سلات للجيوب من 98 وفوق بصراحة :good2: :good2: اشوف فية
ناس يجون من الرياض ومن جميع المناطق علماً ان الفكرة والتصميم من عندهم .
والرقم والله ماراح ينفعك لازم تجي وتشوف افضل ولا انصحك تتصل ..
وارجو من اخواني من الرس ان يخدمونك بصور ..
اخوك القصمنجي...

[ميزان]

بارك الله فيك بالقصمنجي وكثر الله من امثالك مرورك ونصيحتك توحي بصفاء معدنك وطيب محياك وانشاالله مثل ماقلت بلكي احد من اهل الرس يفيدنا ويقصر عنا المشوار او اي واحد من الاخوان يبدي لنا رأي آخر والله يوفق الجميع .

[السالمي]

لا وبعد تجي نفي لون البدي

يعني متناسقه مع الموتر

وسبق وشاهدها كثير في القصيم

يعني ركبها وانساها

[نمر بن حثلين]

المشهور بالرس ورشتين

ورشة الوادي هذا تلفونهم

063331596

وورشة الضويان وما لقيت لك رقمها

[ميزان]

السالمي جعلك سالم من كل مكروه وبارك الله فيك على المرور .
نمر بن حثلين ماقصرت ياسمي الطيبين وبارك الله فيك على المجهود الطيب وبارك الله بالجميع .

[شاص]

عندك المواهب والمميز بالرياض يصلحون مثله

[Y&Y_4X4]

السلام عليكم جميعا

توكل على الله ورح للقصيم

[ميزان]

الشاص و Y&Y 4×4 ماقصرتو ا صراحة ولو ان الرياض بعيده علينا القصيم اقرب .
عندي سؤال يالشاص خاص لك :وش نوع الكمره اللي انت مصور بها الشاص بالهرض الممطوره ماشالله منظراً يفتح النفس صراحه وش وقتك يوم اخذت الصوره ؟

[وين يبون بنا]

السلام عليكم ..

اخوي ميزان انا حبيت انبهك على نقطه .. وهي انك لازم تنتبه اذا فكيت السلة وخليت الموتر ( اصلع ) لازم تسكر الفتحات حقت السلة .. والسبب لانك لو غسلت الموتر والا جاك مطر يدخل الماء منهن ويحوس عليك الكهرب .. واسمع السالفة اللي صارت لي وماراح تصدق ..

في عيد الفطر الماضي وقفت موتري بالحوش وكنت فاك السلة قبل بفترة .. المهم اني سافرت للقصيم مع اخوي واهلي ويوم جاء ثاني يوم من العيد امطرت على الرياض .. الزبدة بعد المطر بساعة تقريبا اتصل على واحد من الجيران وقال موترك معلق البوري حقه :confused: قلت ياولد وشلون وش السالفة قال هذا اللي جاك .. ويطلع للشارع وانا معه على الخط ويسمعني والا والله موتري معلق البوري لا ومن زين الامور يشربك بعد .. لدرجة اني شكيت ان فيه احد طاب بالبيت وكاسر موتري .. ماتصدق وشلون ..

المهم اني دقيت سلف من القصيم وجيت راجع ولقيت البطارية على وشك تخلص وفصلتها ويوم فتحت الموتر لقيت فيه ماء عند دعسة البنزين .. ورجعت للقصيم ثانية ..

يوم جيت مريت الوكالة ولقيت عندهم اغطية ( بلاستيك ) كبس لفتحات السلة عدد 6 حبات واشتريتها ب 95 ريال وركبتها والامور تمام ..

لذلك لازم انك تشتري الاغطية هذي لو حبيت تفك السلة نهائيا .. وادري ان ردي مهب لم الموضوع ولكن تحملونا وعذرا على الاطالة ..

تحياتي لكم ..

[ميزان]

ياخوي (وين يبون بنا ) صراحة ...... موضوع الغطيان حقت فتحات السلة ....... هذا اللي ماخطرت على بالي ولافكرت بها ابد لا وازيدك من الشعر بيت عندنا بالحارة هندي كل فترة يقوم بغسل الجيب بهالهوز واسكت ساكت لو مانبهتنا كان رحنا فيها ... مانقول الاجزاك الله الف خير انت والموجودين ولكم خالص تحياتي وتقديري ,,,,