لخبراء الجموس الحمر ابو رفرف [ اسئلة بسيطه ]

[هو1ي البر]

السلام عليكم

علومكم طيبين ؟

المهم يا شباب

انا قررت اشتري لي جمس حوض بهبهاني ابو رفرف
لكن للاسف مالي ذيك الخبره
و عندي كم سؤال بخصوص الجمس الحمر
و ان شاء الله تفيدوني
طبعا انا بشري لون احمر
قبل الاسئله
تنصحوني بالجمس ولالا ؟
و هذي اسئلتي :

* وش احسن مديل بالجمس الحمر من حيث القوة و قلة الخرابات و الحراره ؟
* هل قطع الغيار متوافره ؟ و وين ؟
* وش اكثر الخرابات الشائعه ؟
* التانكي كم يمشي ؟ و تعبيه فل للتانكي كم قيمتها ؟
* تنصحوني دفرنس ولا دفرنسين و هل يفرق مثلا الخرابات و كذا ؟
* تنصحوني قير عادي ولا تماتيك ؟
* الاماكن اللي تباع فيهن الجموس الحمر بكثره وين بالرياض ؟
* اسعار الجمس النظيف و استعمال نظيف حوالي كم ؟
* و هل للجمس الحمر مقاسات ؟


و مشكورين مقدما ~

[هو1ي البر]

وينكم ؟
.
.
.

[escape_man]

معليش اخوي عبدالله .. عندك 9 اسئلة تدل على انك مو صاحب تجربة بالجموس وهذا الي يخوفني والبعض من الي جربو الجمس من الاجابة على استفساراتك ..

الجمس القديم عشق وولع .. يعني الي يقنية يقول هذا موتر انا مولع فيه وماعلي من صرفيته والمقصد اني اطرب عمري ..

مواتر لها 30 سنة ولو انها شد بلد فلابد ان قطعها الي في بطنها مستهلكة وتحتاج صيانة وصيانتها لغير المتولع فيها شقاء وندم ..

شي تلاقيه اصلي باسعار خيالية تقول راكب فياقرا ..

وشي ماتلاقي له قطع الا بترهيم وقلبة راس ..

وشي انقطع ولا يجي منه الا تجاري وياسرع مايتلف ..

والميكانيكيين ينعدون على الاصابع وانا اتكلم عن الفاهمين ..

وخذها قاعدة واختصار .. السيارات الكلاسيك باختصار يبيلها تعب ..

افضل الجموس ميكانيكياً هو الـ 78 اذا مكينته شد بلد وهو انشطها ومكينته تجي زرقاء ..

اذا دفرنسين فافضلها دبل هو الـ 80 ولكن وجهيته غير مرغوبة ولذلك تلاقيها انظف مواتر لقلة من يتداولها ..

صرفية البنزين ما احب اتكلم فيها .. لاني اعشق الجمس كلما صرف وقال هااات ..

الخرابات الي المفروض تهتم فيها الان هو الشاصي واحرص على البدي النظيف والباقي يحله ربك ..

واذا تبي الشور خذ مكينة 350 وزود عليها هوائيات وتسلم من عكاس الـ 454

الـ 454 مكينة جبارة لكن ماتتحمل وياسرع ماتطق ..

خذ 350 والعن خيره ولا يقول لا

اذا انت تبي بر ونفود فلا تتعدى دفرنسين قطع عشرة واقيامها من 12 الى 30 حسب

النظافة ..

اذا فقط طربة صوت ودوران بالديرة ومسكة خطوط فلاااااااا تقرب الدفرنسين .. بيجيب لك المصوع لان الجمس الدفرنسين قاسي جداً..

تبي تداوم عليه وتدوج به كل يوم فخذ تماتيك اما للقومات والكرف والتطعيس فعليك بالعايدي

اسعار الجموس الدنقل ( دفرنس واحد) النظيف يبداء من 15 لين ياصل الخمسينات للي كل شي فيه شد بلد ..

وطبعا الجموس هذي لها مقاسات ( مقاس 25 - مقاس 35) ولكن مايفرقها الا خبير لان الاختلاف الي بينها دقيق في الشاصي والمساعدات ونظام التعليق ولكن بتلاقي مقاسه بالعلامة الجانبية على الكبوت ..

وربنا يوفقك وييسر امرك

[هو1ي البر]

شف يا طويل العمر [ بن غييثات (http://www.mekshat.com/vb/member.php?u=10578) ]
انا صراحه
ابيه حق دوران و طرب و استعراض
يعني مابي اخذه و افجره بالطعوس
ابي شي حق دوران بس و قليل امسك به خط
وش تنصحني ؟

[escape_man]

انصحك بدفرنس واحد بشرط .. شاصي سليم + ركزته حلوه لان بعض الجموس سبحان الله من يقبل عليك تصيبك الدهشة من نصبته وسلامة جلد البدي والصندق واليايات والسست .. متعوب على نصبته وبعضها تقول رخمة :)
الشي الثالث بديه يكون سليم ونظيف بالحيل

بهالمواصفات تلاقي مطلوبك بالعشرين

وعندك الاخوان بنادي عشاق وملاك والحوض الجمس والشفر هم اخبر مني وابحث عن موقعهم بقوقل

[هو1ي البر]

انا كم واحد قالي
الدفرنسين ثقيل و خرابات بس مدري عنهم ~
و ان شاء الله بشيك عليه من الى .
معليش تعبتك
بس ما قلت وش احسن مديل لمتطلباتي ؟

و جاري البحث عن الرابط حق الرابطه
و مشكور و ماقصرت

[عقيدالبيد]

احسن مديلات الجموس 78 الى85

[escape_man]

انا كم واحد قالي
الدفرنسين ثقيل و خرابات بس مدري عنهم ~
و ان شاء الله بشيك عليه من الى .
معليش تعبتك
بس ما قلت وش احسن مديل لمتطلباتي ؟

و جاري البحث عن الرابط حق الرابطه
و مشكور و ماقصرت

قلت لك يالغالي .. 78 بشرط مكينة شد بلد

بدون مكينته مايفرق عن غيره

[هو1ي البر]

قلت لك يالغالي .. 78 بشرط مكينة شد بلد

بدون مكينته مايفرق عن غيره
والله يابن الحلال
اني متردد
و ان شاء الله فهمت مطلوبي
ابيه حق دوران و زرات و خطوط
اما تطعيس و تفجير لا
بس دوران و اروح به الدوام
وش احسن مديل للمتطلبات ذي ؟
و معليش ازعجتك



احسن مديلات الجموس 78 الى85

مشكور على المعلومه

[هو1ي البر]

و تراني اباخذ مكينه 350 اقل حراره و صرفيه [ هذا اللي اسمعه ] !

[escape_man]

مكينة 350 خذ اي موديل .. معاد تفرق

ماتفرق الا في الـ 78 مكينة 454

قضية اختيار الموديل تبقى عليك .. مثلا انا ما احب وجهية السبعينيات واقدر وجهية 81 - 85

وباختيارك لـ 350 اقول احسنت الاختيار

طق عليها هدرز طويل + بواجي واسلاك بواجي اصلية + فلتر رياضي وبتشوفه يتنفس

[شمساوي]

يفيدونك الاعظاء ان شاء الله

[ابو سعد 515]

يفيدونك الربع ان شاء الله

[هو1ي البر]

يفيدونك الربع ان شاء الله

ان شاء الله


يفيدونك الاعظاء ان شاء الله
ان شاء الله

مكينة 350 خذ اي موديل .. معاد تفرق

ماتفرق الا في الـ 78 مكينة 454

قضية اختيار الموديل تبقى عليك .. مثلا انا ما احب وجهية السبعينيات واقدر وجهية 81 - 85

وباختيارك لـ 350 اقول احسنت الاختيار

طق عليها هدرز طويل + بواجي واسلاك بواجي اصلية + فلتر رياضي وبتشوفه يتنفس

والله انا احب وجهة 79 و 84
و خلاص قررت ان المكينه 350
و ماقول الا جزاك الله خير
و الله يوفقك و يرزقك

[الحبيشيGMC]

*السلام عليكم
احسن المديلات للجموس 1979و1978و1983و1984 هذي احسن الجموس وارزها خاصتا الي يجي داخليها لون بيج
*قطع غيار الجمس متوافره واكثر شي تعينه في الدمام واحسن ورشه للجموس ابن مرضاح في الرياض
*خرابات الجمس ما تجي منا والطريق اذا ودك يصمل ولا يخرب بكثره احرص عليه وعلى مكينته كل فتره
*والله ما اتكر كم تعبيته بس الجمس يشرب البانزين بسرعه
*براي وانا اخيك الدفرنش الواحد احسن من الفرنشين معا الممشى مع الخط وهو الشايع في الخليج
*انا مجرب التماتيك والعادي التماتيك والله العضيم ان التماتيك زين على زين والقير العادي مضبوط وهو المتواجد بكثره واما التماتيك متواجد في البقوس
*فيه معارض في الدمام والقصيم
*ولد عمي توه شاري جمس مخزن موديل 1987 مصفح ماشي 50 الف كيلو متر باسم الامير خالد الفيصل بقيمه 37 الف ريال بس الموتر نضيل بشده و على شكل الوكاله
*نعم للجمس مقاسات 15و25و35 وافضل مقاس للجمس وانا اخوك 35

الضاهر اني كثرت عليكم

[الحبيشيGMC]

اسف في غلطه في الرد الجمس الي شراه ولد هعمي موديل 1978

[ابوفهيدان]

اخي الكريم
ان كانك منت هاوي للجموس لاتشتري
لان شغلها واجد ويبيلها شغل وترتيب
يعني يبيلها واحد يحب يشتغل بالميكانيكا
وبالنسبة لقطع الغيار متوفرة واقصد القطع الميكانيكية
اما قطع الديكور والاكسسوار فغالبيتها منعدمة ومالك الا التشليح
والجموس تتشابه كلها بجميع موديلاتها بقطعها المكينانيكة
ونصيحه اخذ مكينة حجم 350 لقلة خراباتها
وموفق خير

[escape_man]

*السلام عليكم
احسن المديلات للجموس 1979و1978و1983و1984 هذي احسن الجموس وارزها خاصتا الي يجي داخليها لون بيج
*قطع غيار الجمس متوافره واكثر شي تعينه في الدمام واحسن ورشه للجموس ابن مرضاح في الرياض
*خرابات الجمس ما تجي منا والطريق اذا ودك يصمل ولا يخرب بكثره احرص عليه وعلى مكينته كل فتره
*والله ما اتكر كم تعبيته بس الجمس يشرب البانزين بسرعه
*براي وانا اخيك الدفرنش الواحد احسن من الفرنشين معا الممشى مع الخط وهو الشايع في الخليج
*انا مجرب التماتيك والعادي التماتيك والله العضيم ان التماتيك زين على زين والقير العادي مضبوط وهو المتواجد بكثره واما التماتيك متواجد في البقوس
*فيه معارض في الدمام والقصيم
*ولد عمي توه شاري جمس مخزن موديل 1987 مصفح ماشي 50 الف كيلو متر باسم الامير خالد الفيصل بقيمه 37 الف ريال بس الموتر نضيل بشده و على شكل الوكاله
*نعم للجمس مقاسات 15و25و35 وافضل مقاس للجمس وانا اخوك 35

الضاهر اني كثرت عليكم


عاد تصدق يالحبيشي ..

مايخش مزاجي شخصياً الا وجهية الشفر 81

ونيتي الي بالتوقيع ثالث ونيت او بليزر بوجية الـ 81 :)

[هو1ي البر]

اسف في غلطه في الرد الجمس الي شراه ولد هعمي موديل 1978
:)


اخي الكريم
ان كانك منت هاوي للجموس لاتشتري
لان شغلها واجد ويبيلها شغل وترتيب
يعني يبيلها واحد يحب يشتغل بالميكانيكا
وبالنسبة لقطع الغيار متوفرة واقصد القطع الميكانيكية
اما قطع الديكور والاكسسوار فغالبيتها منعدمة ومالك الا التشليح
والجموس تتشابه كلها بجميع موديلاتها بقطعها المكينانيكة
ونصيحه اخذ مكينة حجم 350 لقلة خراباتها
وموفق خير


والله اني اعشق الجمس الحمر ~
و ان شاء الله لي نمصيب بواحدن نظيف ~


*السلام عليكم
احسن المديلات للجموس 1979و1978و1983و1984 هذي احسن الجموس وارزها خاصتا الي يجي داخليها لون بيج
*قطع غيار الجمس متوافره واكثر شي تعينه في الدمام واحسن ورشه للجموس ابن مرضاح في الرياض
*خرابات الجمس ما تجي منا والطريق اذا ودك يصمل ولا يخرب بكثره احرص عليه وعلى مكينته كل فتره
*والله ما اتكر كم تعبيته بس الجمس يشرب البانزين بسرعه
*براي وانا اخيك الدفرنش الواحد احسن من الفرنشين معا الممشى مع الخط وهو الشايع في الخليج
*انا مجرب التماتيك والعادي التماتيك والله العضيم ان التماتيك زين على زين والقير العادي مضبوط وهو المتواجد بكثره واما التماتيك متواجد في البقوس
*فيه معارض في الدمام والقصيم
*ولد عمي توه شاري جمس مخزن موديل 1987 مصفح ماشي 50 الف كيلو متر باسم الامير خالد الفيصل بقيمه 37 الف ريال بس الموتر نضيل بشده و على شكل الوكاله
*نعم للجمس مقاسات 15و25و35 وافضل مقاس للجمس وانا اخوك 35

الضاهر اني كثرت عليكم


والله افدتني كثير
و ان شاء الله لي روحه للدمام اشوفهن هناك ~

[العصملي 08]

اخي الكريم بن غييثات
السلام عليكم ورحمة الله وبركاته
كل ماشفت لك موضوع اورد لازم اتأمل شوي في الونيت الشفر اللي بتوقيعك.. ماشاء الله
انا لي فترة ادور قطع عشرة نظيف ولالا لقيت!! اذا تخبرلي شئ نظيف عطني خبر جزاك الله خير..
انتظر ردك ولك كل الشكر

[escape_man]

اخي الكريم بن غييثات
السلام عليكم ورحمة الله وبركاته
كل ماشفت لك موضوع اورد لازم اتأمل شوي في الونيت الشفر اللي بتوقيعك.. ماشاء الله
انا لي فترة ادور قطع عشرة نظيف ولالا لقيت!! اذا تخبرلي شئ نظيف عطني خبر جزاك الله خير..
انتظر ردك ولك كل الشكر

هذا من ذوقك يالغالي .. الصورة معدلة بالفوتوشوب لين قالت آمين ;)

ياخوي قطع عشرة مايوقع .. من يوم تطري بيعته لقطوك ربعك يبونه

تبي 87 مثل موتري لكن نظيف جداً جداً ومكينته 454 عليها كام وبساتم رياضية وبديه روعه لكن يقول راعيه ابي فيه 28

وصلناه الى 25 وعيا يبيع

موقعه لاطلعت من طلعة البديعة الي يسمونها ظهرة البديعة تلاقيه بالمحطة الي قبالك على طول .. ان كان موجود للان ..

ما اخبر غيره وانا اخوك حالياً

[الإستراتيجي]

79


من أحسن ما رأيت في الجموس القديمة لو أنت تبيه رزة وتراثي


وفيه ميزة لو جاك فيه ريحه القدم بعضها تشم ريحه غريبه في الجمس في المراتب أظن أو الطبلون



لكن راح تحس أنك مدمن عليها

القزاز كهرب حلوة وقوية ويازين شكل الموتر وأنت راكب فيه

يعيب هالجموس عادة أنها كثيرة الخرابات تطلب دائما

أعرف واحد دائم الجمس خرابات معه والحل أنك تذهب لمختص جموس يضبطه لك لكن بتخسر على السيارة واجد :(

[هو1ي البر]

طيب ياالاستراتجي
دلنا على هالخبير اللي تقول لاهنت

[ابو عنقا]

اخوي عبدالله

كل عام وانت بخير ومن العايدين الفايزين

نصيحة اخو لك ولا اعرفك

وش تبي بالجمس القديم اذا عنذك قريشات زودهن وخذ جديد

القديم علة والله انك تبلش فيه

عندي جمس موديل 79 نظيف ولافيه اي عذروب بس انا وياه شيل وحط

العام مغير له وجه قير وصوف وجيه مكينه وكلها اصلي في اصلي ولا تحركت فيه خطوه

يعني من الورشة للبيت والآن فيه تهريب

نصيحة لوجه الله لا تقرب اي شي قديم

[العصملي 08]

تسلم يابن غييثات على الرد وماقصرت

[هو1ي البر]

اخوي عبدالله

كل عام وانت بخير ومن العايدين الفايزين

نصيحة اخو لك ولا اعرفك

وش تبي بالجمس القديم اذا عنذك قريشات زودهن وخذ جديد

القديم علة والله انك تبلش فيه

عندي جمس موديل 79 نظيف ولافيه اي عذروب بس انا وياه شيل وحط

العام مغير له وجه قير وصوف وجيه مكينه وكلها اصلي في اصلي ولا تحركت فيه خطوه

يعني من الورشة للبيت والآن فيه تهريب

نصيحة لوجه الله لا تقرب اي شي قديم





والله يا ولد سالت كم واحد
يقولون ماشي زين ولا خرابات ولا شي
بس صرفية بنزين
!

[مطلق السلمان]

أخوي العزيز عبد الله ( 123 )

السلام عليكم ورحمه الله وبركاته ،،،

أخوي بالنسبة لإستفساراتك المتعددة في البداية أشكر أخوي أبن غيثان على تفضلة بالإجابة الشافية والوافية لجميع أسئلتك وكذلك الأخوة الكرام الذين شاركوا بإرائهم وأقتراحهم وأسمحلي على بعض النقاط المهمة للجمس القديم.

1- بالنسبة للجموس القديمة سواء المصفح أو الرفرف الموديل المرغوب في الأسواق من موديل 1978 وحتى موديل 1987.

2- الرقبة في السوق أكثر شي من قبل الهواة لقطع ( 35 ) أكبر فئة فية فئات عديدة قطع 10 قطع 20 قطع 25 .... وعدة فئات ما ذكرتها غير مطلوبة نوعاً ما ولكن الفئة المرغوبة أكثر شي قطع ( 35 ).

3- أخوي الرغبة أكثر شي على الدفرنش الواحد الدنقل لأن الدفرنشين غير مرغوب نوعاً ما.

4- أخوي الكريم لا بد من الأستعانة ببعض معارفك إذا وجودوا ولهم دراية وخبرة بالجموس قبل لا تشتري أي جمس وإذا كان ما عنك أحد ممكن تصور الجمس عدة صور وتطرحها في ( نادي عشاق وملاك الجمس والشفر الحوض أو موقع مكشات الكريم ولكن نادي عشاق الجمس والشفر الحوض راح يكون أفضل بسبب أن جميع الأعضاء لديه دراية بالجموس القديمة وراح يفيدونك بشرط أن الصور تكون واضحة ومن جميع الجهات ومن الداخل والخارج وصور المحركات كذلك.

5- عدم الإستعجال في الشراء وفي حالة رغبة في الشراء تأكد أن مكيف الجمس يعمل !!!.

6- أخوي مثل ما ذكر أخوي إبن غيثان قطع الغيار للجموس القديمة شبه منقطع ونادر ما تجد قطعة والطريق للوصول إليها بشكل سهل راح يكلف عليك مجهود لا يقل عن "" 5 "" سنوات لكي تتمرس وتعرف المداخل والمخارج لهذا الطريق الصعب والحقيقة أسعار قطع الجموس إذا وجدت أسعارها نار جداً وعلى سبيل المثال طقم الشكامين الأصلية يمين + يسار جي إم غير مصنعة ما تحصلها بـــ 4 ألاف ريال وهكذا وأصبح العديد من قطع الجموس تجدها لدى هواة الجموس فقط ما تجدها في المحلات وراح تأخذ وقت كبير لين أتعرف على هاذة الفئة.

7- بالنسبة لأسعار الجموس متفاوتة حسب حالة الجمس الخارجية والداخلية والأسعار تبدأ من 5 ألاف ريال وتصل في بعض الإحيان إلى 50 ألف وأكثر وتصل حتى إلى 80 ألف ريال إذا كان مخزن ، ولكن الأسعار المعقولة للجمس النظيف من 20 إلى 35 ألف.

8- أخوي الجمس القديم بحاجة إلى شئ واحد فقط وهو " الولع والحب " إذا كنت بتشري الجمس بدون ولع راح تزهق منه أسئل أهل التجربة في بعض الأحيان يخرب عليك وتجلس أسبوع أو شهر لين أتحصل على قطعة الغيار وإذا كنت ما ترغبة رغبة جادة راح تحرقه على الفور بالإضافة إلى أكبر مشكلة راح تواجهك قلة الورش اللي تشتغل صح في الجموس لان معظم الورش ما عندهم إلمام أو خبرة في إصلاحه رغم أن مكوناته الأساسية تعتبر بدائية في صناعة السيارات ولا توجد مواصفات معقدة ومع كذا راح تخسر مبالغ كبيرة في سبيل الإصلاح وأتغير حاجات صاحية لين أتحصل الشي الخربان وهكذا وراح أتصلح شي ومع الإستخدام بعد أسبوع يطلع لك خراب جديد وهكذا وأفضل شي أن يكون لديك سيارة أخرى جديدة وأتصلح الجمس على راحتك متى ما خرب.

9- بالنسبة لصرفية البنزين الجمس يصرف كثير وخاصة إذا كان عندك عدم ثبات في دعسة البنزين مرة تسرع ومرة تخفف أنا عندي جمس 85 مكينة 350 أعبي التانكي الواحد إذا كان على الزيرو بـــ ( 45 ريال ) يعني التوانكي الأثنين بــــ 90 ريال هذا طال عمرك بنزين 95 الأحمر ومن واقع تجربة إذا كنت مسافر وأمشي من 110 إلى 120 يوصلني التانكي الواحد أكبر مسافة 300 كيلو فقط ولو أسرعت راح تتقلص المسافة أما داخل البلد يصرف أكثر بسبب كثرة الوقوف والمشي من جديد و 454 يصرف أكثر بكثير.

وتقبل تحياتي وتقديري ،،،،