قصيده الــــوســــم............((( الحر)))...!!!

[((( الحر)))]

اهدي اخواني اعضاء وزوار منتدى مكشات هذه القصيده المتواضعة بعنوان ((الوسم)) وهي مجارات لقصيدة اخي ابن شارخ الموجودة بديوانه بالمنتدى بنفس الوزن والقافيه
ارجو ان تنال اعجابكم....!!!



يالله بمزنً يهول وتذهل بروقه = رعادها ينسمع من قبل بارقها
مزنً حقوقً صدوقً ثقله يعوقه = في مشيها كن والي العرش عايقها
ينشى من الغرب ريحً صلفه تسوقه = والريح من وآلي الاقدار سايقها
من شافها قال ياساتر لمخلوقه = يالله تحفَظ عبادك وانت خالقها
على اول الوسم كلً يطلب اوّفوقه = حساب علم الفلك علمه يوافقها
لا جاء مع الفجر تمطر صافي حقوقه = على أول السر تبدأ في حقايقها
سيلً يسيّل مسيلً تكثر طروقه = من ضلع جمران الى الملقا طرايقها
والظهر من فوق صفرا السر مدفوقه = تصب خيره على القيعان تغرقها
والعصر فوق النفود تسيّل عروقه = مشيه مع النّفد كن احدً يعرّقها
وتالي نهاره تهل بطيب غدوقه = على ديار الوشم تكثر غدايقها
يسيل منها شعيبً مرمسً عوقه = ضيع مجاريه وكل عقوم يشلقها
يملئ الخباري وكل دروب مشقوقه = حتى الحزوم الرفيعه قام يصفقها
نهار خامس تشوف الارض منتوقه = باذر نبات الوسم بيّن مناتقها
وتربع ارض عقب ماهيب محروقه = من حر شمسً طول الصيف تحرقها
يفرح بنبته فِريقً يتبعه نوقه = بدوً من الوقت عجزة عن علايقها
واهل المكاشيت عاشق شاف معشوقه= يضمها لين يسمع دق خافقها
يازين مجلاسنا والصبح بشروقه = في وسط خبرىً ربيع الوسم وافقها
متخالطً حرفه وروضه وثعلوقه = وان هب نسناس تكثر من تعانقها
ريح النفل والخزامى طيب انشوقه = يغشاك عطره مع النسمه تنشّقها
وتلقى الزبيدي يباري نبت رقروقه = لا شفتها تذكر الله ثم تنّتقها
والنار من بيننا تَشعم ومعلوقه = بعروق رمثً وراعي البر يلحقها
في جنبها دلةً صفراء ومدقوقه = دله من الكيف راع الكيف ناسقها
فنجالها كن در الحور برموقه = يسوى ثلاثين من غيره ويفرقها
احب انا البر في ذكره ومنطوقه = كلمه تزيّن وجهه وشفاه ناطقها
وسلامتكم
اخوكم...................((( الحر)))

[ريف النشاما]

السلام عليكم ورحمة الله وبركاته

وأنت سالم وغانم يارع السر وصح لسانك وسلم بنانك على هذه الرائعه

قصيده جزله ووصف جزل ومعاني ترسم مدى شاعريتك

وعمق وأصالة فكرك ونزاهة قوافيك

ومجاراه ممتازه وتشكر عليها

وشكر خاص مني لك بهذه المشاركه

وان شاء الله يحقق الله دعواتك

ويعم الخير جميع بلادنا

أخوك ... الريف

[ابو عمر اللاحم]

صح لسانك يا ابو محمد وتسلم . نسأل الله سبحانه وتعالى ان يحقق ما دعوت به وان يعم به بلاد المسلمين .

يالمغباء ............

احلى تحيه،،،

[بركان]

اخوي الحر
صح لسانك
الله يسمع منك

قصيده جميلة وبالمناسبه
وش رايك في هالبيتين

وهل تستطيع ان تجد لنا باقي القصيده





يالله بنو وارث من غـرق نـوح ***تسمع رعوده قبل توضي بروقـه
ينشي من القبله جنوب عن الصوح***ريح تسوقه وسبعين ريـح تقـوده
يغدي قرايا الوشم لوح على لـوح***للديرة اللـي كـل مالـذة .......

[((( الحر)))]

اخي الكريم ومشرفنا العزيز ريف النشاما
صح بدنك وتسلم والله على هذا الاطراء ولو انا مانستاهل ولا نصه وكثرت علي الله يرضى عليك ترى هذي خواطر والا الشعر لمثلك وشرواك....تحيتي

اخي الغالي ابو عمر نهار

صح بدنك وبارك الله فيك وان شاء الله ان الله يستجيب دعواتك....تحيتي

[((( الحر)))]

اخي العزيز بركان
صح بدنك وتسلم الله يسلمك

هالابيات يالغالي من قصيده كامله سبق ان اطلعت عليها والصراحه يالغالي انها قصيده منحطه الله يهدي قائلها...0
واكيد انك ماتعرف باقيها والا كان ماتسأل عنها :D

على العموم هذي اول ابيات القصيده
يالله بمزن وارثه من غرق نوح
.................................تسمع رعوده قبل تظهر بروقه
ينشى من القبله جنوب عن الصوح
................................... ريح تجره والف ريح تسوقه
للديره الي كل ماردت الروح
..................................ولذة مشاربها يجي من يحوقه
ماورثت عقب ابن صالح ودرموح
.........................الا كفيخ مانظف من(.................)

هذا مايحضرني او اترفع عن الباقي
مع العلم ان هذا الشطر الي ذكرته ليس بالقصيده
(يغدي قرايا الوشم لوح على لوح)

[الهلالي]

تسلم والله يالحر وصح لسانك ولو أني ماخذ عليك في خاطري شوي .
أجل مال الصمان والدبدبة عندك معزة . وأنت سيد العارفين بما لهذه المناطق من عشاق . بل أن ذكر المطروالربيع مرتبط إرتباط وثيق بهذه المناطق..... وش رايك يا حفرلوجيا . ولا يهون باقي المكشاتية .

[((( الحر)))]

هلا بك اخوي الهلالي وبارك الله فيك...!!!

الصمان والدبدبه ماعليهن كلام وهن مراتع الباديه ومنابت العشب...

ولاكن كل على داره...... تدور افكاره...

انا والله اتمنى المطر على ديارنا ...ديار السر

واول ديار السر من الغرب .. وادي الرشا وهو منبت للفقع وفيه ضلع جمران من جنوب والملقا من الشمال
ثم تتجه شرق على الصفراء وهي صفراء السر وهي تحد ديارنا من الغرب وهذي منابت الفقع وتربع قيعانها بسرعه... ثم على النفود وهو نفود السر وتحد ديارنا من الشرق وهالنفود يفصل بينا وبين ديار الوشم...!!!

والله يجيب الخير الي يعم على كل الديار...!!!

[نقا هشال]

اخي العزيز

الحر

انت جزل

ومايجي منك الا الجزل

صح لسانك مليوووون

قصيده بالفعل راااااائعه

وهي من افضل ماقرئت

بصراحه وبدون مجامله

قصيدتك مميزه

اجتمت فيها روعة المناسبه وانتقاء الالفاظ الرائع والسرد الاروع ولااروع

الله يتقبل دعائك

ولاتحرمنا من جديدك الممتع

تقبل فائق تحيتي واحترامي...

[نفل]

وعليكم السلام ورحمة الله وبركاته


اخوي الحر رغم اني مالي بالشعر الا ان القصيدة جذبتني كلماتها
الشاملة وماشاءالله جمعت كل المحاسن بقصيد واحدة .
اثرك شاعر وانا ما ادري ماشاءالله عليك .
وان شاءالله ان الوسم السنه هذه يكون احسن من اللي فاتت
ومشكور وجزاك الله خير

[...الطوقي...]

السلام عليكم ورحمة الله وبركاته

اول شي ابارك عليك بالشهر الكريم واعانك الله على صيامه وقيامه وجميع المسلمين

والله يعطيك العافيه على القصيده اللي تشرح النفس

الله يجيب المطر على الوشم:D والقصيم;) وعلى جميع الديار والشعبان وفياض الصمان:)

دائما مبدع يابو محمد






تحيتي
...الطوقي...

[الشبح2000]

السلام عليكم ورحمة الله وبركاته
تسلم يابو محمد على هذه الرائعة


شاعر ............


ومن يقول غير كذا عليه حققققققققققققققق :good:

[((( الحر)))]

اخي الكريم نقا هشال
تسلم يالغالي على هذا الاطراء الرائع والجميل ولي الفخر ان بعض كلماتي تنال اعجابك واستحسانك
ومع هذا لو اضع 100 قصيده لا يجاري مواضيعك وصورك المميزه لمواسم الامطار التي يعشقها الجميع فبارك الله فيك يالغالي... تحيتي...!!!

اخي الغالي نفل
والله ثم والله انني افخر باعجابك وردك فمثلك يجدر به ان يكون على صدره وسام العُلى... لك وافر الشكر والتحيه...!!!

اخي الكريم الطوقي
الله يبارك فيك ويجعله شهر خير بركه على المسلمين اجمعين
اشكرك على مرورك يالغالي والله يجيب الخير على الديار الي ذكرت وغيرها ولاكن مثل مايقولون(( كل على قرصه يحامي))...!!!

اخي الشبح الفين

والله اسمك يروع وردك يروع حقوق وشغلات كثيره ... على العموم شرفني مرورك بالموضوع واعجابك بالقصيده...دام عزك ياخلفهم...;)

[أبو فالح]

السلام عليكم ورحمة الله وبركاته

خليفة الهزاني ....... ((( الحر )))

هذه القصيدة ( الوسم ) درس تربوي قبل أن تكون إبداع شعري .

بأسلوب أخر .. هذه القصيدة تزرع في نفس المرء حب الحقيقة والرغبة في قول الصدق .

بوضوح أكثر وأكثر ... حين أسجل إعجابي بهذه القصيدة ، وأسعي في ذلك إلى الحرص في المبالغة ،

ونتقاء الألفاظ والتعابير المسرفة في المدح .... فأنا لا أتجاوز ذكر الحقيقة .

ملاحظة :

يستحيل أن تكون هذه القصيدة يتيمة العقد ، بل أراها تدعو إلى أخواتها ... وهي أشبه ما تكون

ِِب ( الرقة ).. ولهذا سأبحث جاهدآ عن ( الفقع ) وأتمنى أن أراه ( أمصلع ) في هذه الخيمة .

تقبل إعجابي ....

[((( الحر)))]

اخوي ابو فالح ....شف يالحبيب اسمك منتقيه انت انتقاء مهوب سهل واكيد انك اخذ لك ايام وانت تراوي وتدور حوله لانه رغم انه دارج بين الناس الا انه اسم رنان ويثير العجب والدهشه وبنفس الوقت يثير الفخر والاعتزاز عندما يكون في مشاركه مكشاتيه . وكذلك على طول يدخل الموضوع عالم الفكاهه والتسليه...

اشكرك على هالكلام والاطراء الحلو والمميز مثل اسمك

والارقى تنبت مع الربيع فاذا شفتها علمني وابشر بالزبيدي المصلع بعدها

اخوك......................((( الحر)))...!!!

[ابو عايد]

احب انا البر فـي ذكـره ومنطوقـه=كلمه تزيّن وجهـه وشفـاه ناطقهـا

هل يعقل أن مثل هذه القصيدة التي كلها روعة وإبداع في المنتدى

صح لسانك اخوي ابو محمد علي هالقصيدة الرائعة

يعطيك العافية ولك التحـــــــــــــــــــــية ,,

وتقبل تحيات // العاشق الولهان

[((( الحر)))]

اخي الكريم والعضو والمشرف المميز.........ابو عايد

شرف كبير لي هذه الكلمات ويعلم الله كم مره قرائتها

صح بدنك اخوي ابو عايد ومشكور على هذا الاطراء

وافر التحيه والتقدير والاحترام لشخصكم الكريم

اخوك................................((( الحر)))

[كاشخ 24 ساعه]

صح لسانك

قصيده جزله ومعبره قرأتها كثيرا وقلما نجد مثل هذه القصيده فى قوه معانيها


تقبل تحياتى واعجابى الشديد بشخصكم الكريم


والله يسمع منك ويزقنا المطر وتزين المكاشيت.

[عروان]

السلام عليكم ورحمة الله وبركاته

ما شاء الله عليك يا بو محمد


قصيدة جزلة بحق. أتمنى من الله أن يحقق أمنيتك و توسم أراضيكم و الاراضي اللي غربيكم شوي للجنوب:D

و تلقط الزبيدي المصلع بيمناك الغالية وعلى قولة القايل هذا غرض روق:D .


تبي الجد عاد, أستمتعت بقراءة القصيدة


صح الله لسانك.

[ميراج]

السلام عليكم ورحمة الله وبركاته

صح لسانك اخوى الحر والله يقبل دعاك

[المري]

صح السانك اخوي ابو محمد وعسى الله يجيب الوسم المبكر..

اخوك / المري

[ميراج]

السلام عليكم ورحمة الله وبركاته

صح لسانك يابو محمد والله يقبل منا ومنك

قصيده رائعه من روائعك

تحياتى

[ابوسالم]

ماشالله تبارك الرحمن
جزالة المعني
بلاغة الوصف
صدق المشاعر
ماأملك الا اني اقول راااائعه من روائع الشعر
رد متأخر لكن قصيدة متجددة لايستطيع قارئها الا ان تتحرك لديه غريزة الاعجاب اللا إرادي
بهذه الدره الشعريه

[ولد]

اخوي((الحر))


صح لسانك

يعطيك الف عافيه على هالقصيده الرائعه