من يفيدنا عن كفرات البالون ماكسس ؟

[برباتوف]

السلام عليكم ورحمة الله وبركاته

يااخوان أنا تعبت من الجنط العريض على الباترول .. سمعت ان افضل جنط للباترول هو جنط الهلل (غير جنط الباترول الشد بلد ) , هل المقصود فيه جنط الباجيرو ؟ وين يباع في القصيم وهل يحتاج رش وكم سعره؟

السؤال الثاني والاهم , وش افضل انواع كفرات البالون بالتفصيل؟ وهل هو جيد بالرمل والحصى ؟ وهل يركب على الجنوط الهلل؟ اخاف يكون شكله قبيح وعريض جداً على الجنط .. لأني دايم اشوف البواترل الي عليهم بالون جنطهم عريض وانا ماابي العريض ..

[جاسم بن زهران]

السلام عليكم والله ياخوى برباتوف انا استعملت جنط الباجيرو شريتهم من الحفر ومعاهم تواير بالون ماكسس جدد ولكن للاسف الجنوط طلعت ترجف وبصراحه تعبت منهااا ومن شكلها القبيح مع العلم ان موترى بترووول 2003 والجنوط بالكرتون جدد شريتهم صناعتهم صينيه ولكن لمن ركبت التواير على جنوط الوكاله ارتحت لارجفه ولا عواار راس وانا اشوف انه مالك الا الوكاله شد البلاد الاصلى لاتغير والسلام عليكم ورحمة الله وبركاته

[برباتوف]

أخوي جاسم

بيض الله وجهك دنيا وآخره اللهم آمين

أنا فعلاً أتوقع أن جنط الباجيرو ماينفع معه البالون .. احس شكله بيطلع قبيح ولكن ماسبق اني شفت واحد .. اتفق معك ..

لكن الغريب أني اشوف الكثير في القصيم تركوا جنوط البرازيلي وجنوط الوكاله وصاروا يركبون الصيني الباجيرو لكن كفراتهم دانلووب الشاهين ..

انا الاولويه عندي طبعا كفرات البالون لكن ماادري وش اركب جنوط .. وبيني وبينك جنوط شد البلد غير موجوده عندي وغالي سعرهم .. انا الي على موتري جنط عريض للاسف ومتضايق منه

[حرباش]

الهلل هو الجنط الفضي العادي

مثل الي يجي من الوكاله على النوع السياحي ( ستاندر )

بالنسبه للبالون
افضل نوع اسمه سيام تاير لكنه غالي جدا ولا يناسب ذوقك لأنه عريض حوالي 600 ريال الحبه بالشرقيه


يجي بعده الهيرو اقل جوده من السيام وايضا غالي نسبيا سعر الحبه 450

يجي بعده الماكسس وسمونه ابو جمل نحيف وسعره معقول حوالي 370

طبعا كلها بالرمل زينه وتنصب الموتر ولكن بالحصى ماتنفع ولا بريال وتشقق على طول

والأنواع الثانيه من البالون ماتصلح اطلاقا

واذا ركبتها يبيلك ترصيص ارضي مثل حق التريلات عشان الرجه اذا طلعت معك

عموما انا دايم اركب البالون للمنظر
اما اذا تبي استخدام عندك الشاهين النحيف وليس العريض
وعندك ايضا دنلوب نحيف ونفس نقشه الشاهين


الأخ ابن زهران رصص ارضي او شيك ذراع الدركسون



بالتوفيق

[برباتوف]

حرباش

بيض الله وجهك يابعدي .. كفيت ووفيت
المشكله شد البلد مايناسبني حتى شكله .. هل فيه احد من الاخوان صارت له مشاكل من موضوع جنوط الباجيرو ؟ ممكن اخونا طاح بشي مهب زين ..

بالنسبه للكفرات الهيرو والماكسس هل بينهم إختلاف في العرض والارتفاع ؟ ام فقط اختلاف السعر لإختلاف الجوده؟

[آل زايد502]

والله ياخوي انا ماجربتها بس بجربها ان شاءالله
وانا اشوف الناس كلهم يميلون الى الماكسس

[حرباش]

حياك الله

ماسوينا شي

بالنسبه لجنوط الباجيرو ماعتقد فيها مشكله

بس اخونا يمكن المشكله عنده بالترصيص

الباترول الي استخدمه حاليا اعتقد الجنوط الي عليه حقت باجيرو بالعكس حلوه وخفيفه

واعتقد انك راح تلقى الطقم اربع بحول الـ700 ريال والعلم عند الله


بالنسبه للإطارات الهيرو والماكسس
ارتفاعها نفس الشي

اما العرض الهيرو تجيك عريضه وبارزه عن الجنط بشكل دائري

اما الماكسس اقل من ذلك

وعموما الماكسس طيب
ولكن البالون بشكل عام لا يصلح للإستخدام المستمر والمشاوير الطويله ويمسح بسرعه

واي خدمات ترانا حاضرين

[برباتوف]

آل زايد

شكراً جزيلاً نورت الموضوع ياخلفهم
وبإنتظار تجربتك

حرباش

أجل الماكسس يناسبني أكثر
خصوصا موضوع البروز على جنب هذا اتوقع على الجنط النحيف بيكون قبيح اذا كان كبير مره وبيطلع كأنه جمس حوض ..
سؤالي الأخير بما انك تستخدم جنوط الباجيرو .. هل تحتاج رش اذا شريتها جديده او لا ؟؟ اذا كانت نفس لون البلد او قريبه منه مااعتقد لكن كأني قريت رد عضو بالمنتدى يقول رشيتها !!

بالنسبه لأخونا جاسم اتوقع جنطه مااخذه من محل نظيف او انه مارصصه .. لأني اشوف نص البواترل عندنا جنوط باجيرو حالياً وتركوا البرازيلي والبلد ..بيض الله وجعك مره اخرى

[التعـ King ـديل]

انا بعطيك عده خيارات للجنوط

اول خيار : جنط الباثفيندر السياحي ثاني خيار : جنط هلل التجاري المبرز اللي يجي اسود من ورا

ثالث خيار : الجنوط الاستراليه رابع خيار : جنط Dz البني المحروق

بالنسبه للكفرات انا جربت السيام متعب وعريض وفيه ثقل

الهيرو مع الاسف ماجربته بس منتشر عند اهل الشرقيه

الماكسس عطيه الرحمن من عرفت البالون مااركب الا هو 900/8 غاط

ويكمل معي سنتين بالراحه وامشي عليه اكثر من 50 الف كيلو بدون ماتتاثر نقشته

انا راعي خطوط ورمله وانا مرتاح مع هالماكسس على الخط تمام وبالبر ولا احلا منه مجرد ماانقص الهواء 25 ودبل خفيف احلا تمشيه

اهم شي ترصص ارضي عند ميزان معروف كل ست اشهر وبترتاح لا رجه ولا هم يحزنون

[حرباش]

ووجهك ابيض يالغالي

الرش هذا ذوق شخصي راجع لك

البعض يرشها لون رمادي مثل جنط الشاص الموديلات القديمه 2000 وطقتها

وبعضهم يرشه اسود

والشي ذا يرجع للرأي الشخصي ويعتمد على الذوق ولون السياره وهل انت راعي تضبيط وحركات او انك تحب الموتر على طبيعته بدون زياده ونقصان

اهم شي اذا بترش يبيلك واحد يصنفره لك ويرشه زين وان حصل فرن مايمنع

لأنك تعرف الجنط اكثر عرضه للخموش والحكوك ووالحراره وغيره

واذا مارش مضبوط بتشوه شكلها مع الوقت

ونصيحتي لا ترش بس حاول تشريه عشان تفتك من الرجه وغيره وتتأكد انه ياباني

وممكن تمر الوكاله اذا حولك وكاله لمتسوبيشي

[حرباش]

اخوي كنج التعديل

كلامك جميل بس بالنسبه للـ Oz او Dz هذا رجته بريال

يعني ادني حكه رصيف او بطناج جامد او حفره وخلافه تحصلها ترج معك على طول

اما الأسترالي فنعم الخيار جنط جميل وخفيف تشيله بصبعين


لاهنت

[قناص المخواه]

للررررررررررررفع

[برباتوف]

شكرا لجميع الإخوه الي اغنوا الموضوع بردودهم واثروه

واتمنى ان يتواصل النقاش حتى نستفيد ويستفيد الزائر ..

ايضا اتمنى من الي عنده صور للجنوط الي ذكروها الاخوان ماشاء الله عليهم يحطها لنا عشان نعرف الجنوط .. لأنه كما تعرفون نشوف جنوط واجد ولا ندري وش اسمائهم

[abofahd55]

برباتوف صبحك الله بالخير


بالنسبه للبالون انا جربت السيام وجربت الماكسس


السيام ثقيل وعريض اما الماكسس خيف وذرب


بالنسبه للجنوط انا عن نفسي ركبت استرالي يسمونه في الشرقيه ( خلاط ) بس رزه علي الباترول

وغيره ما ينفع

وعندك بعد الهلل مع الشاهين كلام كبير


واتمني اني افدتك

بالنسبه للخلاط اذا تبي صوره لهن علي بالون بلغني

[برباتوف]

ابو فهد انا معي ربع استاندرد .. الاسترالي ماينفعليه اتوقع الاسترالي اجمل على الصالون ..

انا معجبني شكل الباجيرو هلل .. لكن هل تتوقع يكون شكله مقبول مع الماكسس؟

[حرباش]

اذا بتركب ماكسس اشوف ان الهلل بيكون شكله ذرب عليه

اما اذا بتركب سيام او هيرو ركبها على استرالي راح تكون فضيعه

[برباتوف]

شكراً حرباش
هذي زبده الكلام

[جاسم بن زهران]

<?xml version="1.0" encoding="windows-1256"?>
<message>السلام عليكم ورحمة الله وبركاته</message>
وجهك ابيض ياخوى برباتوف انت ومن يقرا الرد ياخوى ياحرباش انا بالفعل رصصت ارضى وشيكت على ذراع السكان وشيكت على الهيأه كامله ولا حصلت فيها شى مما يذكر من خراب ولكن مثل ماذكرت انى شلت التواير وركبتهن على جنوط الوكاله ولله الحمد ماشتكيت من شى ابد بما ان الجنووط صناعه صينيه يمكن مالله وفقنى فيهن فحص الكمبيوتر بين ان الرجه فى الجنووط نفسهن يمكن طلع عيب مصنعى يااخوووان ؟؟؟؟؟؟ وبالاخيركلها توافيق وتقبلوو مروورى وشكراا والسلام عليكم.......