سؤال لاهل البر والتطعييس

[رايق1]

عندي تاهو 2009 جنط 20 كروم شد بلد ينفع للبر والطعوس يعني ينشد به الظهر وأذا كان الجواب ماينفع وش الراي ؟ تحياتي للجميع.

[P A T R I O T]

السلام عليكم
اخوي
مشكلتها طامنه والبنشر

[سلطانهم1]

هههههههههههههههههههه

انت اللي ماينشد فيك الظهر بالتطعيس

امزح معك :) ;)

السياره على سواقها ,, أذكر واحد يطعس على كرسيدا ..:eek:

[رايق1]

لا صادق ماقد طعست ولا بطعس لكن احياناً الواحد تخمه يرقى فوق طعس (يعني وش عندك غير هالطعوس تتسلى فيها) بس السيارة جديده وينخاف عليها يا سلطانهم.

[VIP-503]

اقول لك راااايي بجنوط التاهو 16 وهي مميزة ولا تاخذ غير الاصلية و اما بالخط و المدينة ركب العشرين لانها اثقل للموتر وارساء باذن الله

تقبل مروووووري

[(((.ابوتميم .))))]

شف يا طويل العمر اهو يمشي الحال لاكن لا تقعد ترقي طعوس وتسييف ومدري ايش امش في السليم لان التاهو ما ينفع ابداااا بس يمشي الحال ونصيحة لا تروح به واجد للبر لانه ما يتحمل المخابط والتنطيط والرادميات ......الامريكي حساس مررره
تقبل تحياتي اخوك :التميمي

[مكشاتي ون]

طبعاً انت راعي تطعيس خفيف وهذا ما يضر السياره ,,, ولكن لا تنسى اذا جيت ترقى للطعس نسم الكفرات الى 15 وراح يرقى بك أى طعس تختاره بإذن الله ,,
فالمعادله تقول: سائق محترف + دبل + كفرات منسمه = قهر للطعوس

[صليب الراي]

اخوي انت تقول جنط 20 وكروم
ان ما خاب ضني هو الي تجي كفراته سخيفه (رفيعه) مره يعني لو نسمت الكفر بيطلع من الجنط

شخصياً ارى جنط 17 هو المناسب نسم الكفرات قدام 17 والي ورى 15 وتوكل على الله المهم لا تسرع زياده عن الزوم ولا تخابط بالموتر ولا ترقى طعس وانت ما تدري وش الي وراه هماً تذب على قص .. تركد والله يوفقك

[قطب 999]

عندي تاهو 2009 جنط 20 كروم شد بلد ينفع للبر والطعوس يعني ينشد به الظهر وأذا كان الجواب ماينفع وش الراي ؟ تحياتي للجميع.

ما ينفع حتى لو كان السواق حريف تطعيس احسن خذ لك جنط 16 او 17 ويكون الكفر كبير عندك الدنلوب 245/95/16 او اي كفر يكون في ارتفاعه ويحمي اسفل السياره من وعورة البر والتعلق وخلافه

[ناصر الدهمشي]

ما شاء الله تاهو 2009 وماينشد فيه الظهر

وجنط 20 اكيد عريض مايحتاج تنسيم

وبعدين ليه تبي تطعس عليه :)

تبدلني باترول وطعس فيه على كيفك :)

اقول طعس وانت مرتاح بس لا تجر عليه على الخفيف

وبعدين الطعوس ماتخوف وترى ان غرزت مافيها شي

سواقين راليات غرزوا بمواتر عليها مكاين قوية وتعديلات

يعني الغراز شر لابد منه

وبعدين ان ماغرزت ترى ماتعلم التطعيس

وبعدين انت جرب الموتر

طعس على الخفيف من غير دبل

وجرب مره ثانيه بالاوتو لان التاهو الظاهر فيه اوتو

وبعدين جرب الدبل الخفيف 4h وحطه على النمره الثانيه او الثالثه يعني مو الدي


وجرب

وبعدين شف لك طعس ماعنده احد وجرب على كيفك :)

ابتعد عن المهايطيه اللي يقولك انا سواق يمشي 200 ويمشي بالطعوس يقول انا سواق :)

والله يبارك لك بموترك

[بن سليمان]

لا صادق ماقد طعست ولا بطعس لكن احياناً الواحد تخمه يرقى فوق طعس (يعني وش عندك غير هالطعوس تتسلى فيها) بس السيارة جديده وينخاف عليها يا سلطانهم.
صحيح احيانا الواحد تخمه وتمسك تطعيس وخصوصا وقت الامطار الله يغيثنا لكن لا تمسك معك غلط اذا عجزت ترقى طعس معين الا ترقى بالقوه ارفق على الموتر ولا تحاول تجاكر الجيوب الصغيره علشان ما تتحول التسليه لمصيبه
وجنط 20 تكون دعسة الكفر واطيه وخطر يتاثر الجنط من التطعيس وخصوصا اذا ضربت حصاة تكون مدفونه بالرمل

[ابوريناد1979]

انتبه للوجه بس تراه نازل غير كذا ما ادرى

[ahmad995]

نسم للكفرات وطب سمكه على النفود
حط 15 هواء

[رايق1]

لا اسمح لي ياعاشق الشاص في كلمتك التاهو ماينفع انا اعرف واحد من اصدقائي معه تاهو كل خميس تقريباً يروح يطعس ماقد اشتكى من سيارته وصدق الي قال السيارة من سواقها.

[رايق1]

بصراحه دخت ما لقيت الكفر مقاس 245/95/16 والجنط مقاس 17 وين المحل الي اسعاره مناسبه وعنده الي ابي دلوني وشكراً .

[راعي البخاخ]

مــــــــساك الله بالخير اخوي رايق

شــف طـال عــمرك . من خلال التـجارب والـخبره ....>>>>>>>>>>>> اقول لاتقعد تــهــايـط :D
الـقاعدة تــقول : كــل مـاصار الجـنط صـغير والكـفر كبـير كل مـاصارت السياره تمشي بالنفود سلام
وماتغرز .طبعا مـع تـنسيم الـكفرات .يـعني مـقاسات الجـنط ماتكون اكـبر من 16 او 17 انـش حتى
لو الكـفر ماهو عريض. والـتاهو الي مــعاك جنطه 20 انـش ماينفع معك بالنـفود حتى لو على خفيف
ههههههههههههههههههههههههههه جـنط ال20 خله للتكـشخ والمـناسبات والزواجات
لأن لو سمح الله دلخت بالنفود وانت تمشي وتشد عليه بالرمل وفجأه ظربت والا وطـيت حصاة راح تعدم
عليك الكـفر وراح تكسر السياره لأن الكفر صغير مره . الــــــــــــــــــ 20 انش للــخط بــــــس:mad:

[رايق1]

ماجاوبتني ياراعي البخاخ واحد يفيدني ياشباب.

[رايق1]

بصراحه دخت ما لقيت الكفر مقاس 245/95/16 والجنط مقاس 17 وين المحل الي اسعاره مناسبه وعنده الي ابي دلوني وهل المقاس 245/95/16 خاص بالجنط 16 ؟؟؟؟؟؟؟ بعدين ترى فيه ناس مثلي مالهم خبره في هذا الموضوع يعني بتفيدوني وتفيدون الجميع . وشكراً .

[رايق1]

الظاهر مافيه احد يعرف الجواب :confused:

[Gx-R2000]

معليش رحت لي شارع الغرابي بي الرياض يمكن يفيدونك