هل تؤيد فكرتي اني اجدع الستبنه

[اشهب]

طيب وشرايكم ودي افصل توانك لموتري جيب فكس ار مادري وين احطهم
وافكر اشيل الستبنه واحطه محله الان زي مانتم عارفين التيوبلس مايبنشر
وشوله انقل استبنه على الفاضي
كم واحد فيكم كفارته تيوبلس عمره بنشر بالبر شرط والا واحد علشان كذا ا\مسك استبنك وبعه اكسب قروش وحط محله تانكي
من يؤيد فكرتي ومن يعارض والي يعارض يقول ليش يعارض

[ابو سلمان]

والله يالاشهب كلام غلاط والله لو تصادف وتبنشر في الديرة مهوب البر ان تناحس ويضيق صدرك .. خل عنك الكلام الفاضي
لكن يمال العافية موترك استبنه او استبنتين اذا كان وحدة مالك الا تحط التانكي داخل الموتر او اذا كان استبنتين شل السفلى وحط مكانها تانكي :cool:

[line]

http://www.mekshat.com/pix/upload/sign/images/mk9589.gif[/img]:

[اشهب]

يا بعد تسبدي يا بو سلمان وشلون ابنشر
التيوبلس مايبنشر
التيوبلس يعطيك فرصه انك تروح للبنشر تعبي هواء واذا كنت بالبر معي طرمبة هواء حقة البيوك المشهوره اعبيه
صدقني انا ابي تشجيع منكم علشان اروح ابيع الستبنه
واطق محله خزان
والا علمن وين احط الخزان
لاتقول لي عب جركل
اذا ماعندي بزبوز يخر نطحي مارتاح نفسيين

[أبو تركي القطامي]

والله يخوي ماالله حدك تشيل الأستبنه وتحط مكانها تانكي
وياكثر المحلات غير محل الأستبنه تحط فيها تانكي
وأنت حر بموترك بس أنك طلبت المشوره وعطيناك

[الجيب الربع]

السلام عليكم ورحمة الله وبركاته

أخي أشهب

الأستبنه ماعنها غناة لاكن شف الرابط هذا ينفعلك الموضوع

وأخيرا ركبت تانكي لـGXR اسطب لكزس (http://www.mekshat.com/vb/showthread.php?s=&threadid=20523)

لك أجمل تحية

[دواس]

ومن قال التيوبلس ما يبنشر ?

الكلام هذا اذا وطيت مسمار ينسم شوي شوي

لكن اذا وطيت قزازه او حجر بينشق الكفر ويخلص هواه بسرعه
واذا كنت مسرع ولا امداك توقف بسرعه تصلخ عليك الكفر واذا نزلت منتب لاقي الا الجنط

[الربذي]

السلام عليكم ورحمة الله وبركاته
هلا باخونا اشهب ماعليش انا ضد هالفكرة قل لية
افرض انفقعت الكفرة بنشرت وتفرغ الهوا بسرعة تبي تقعد تمنن خلق الله تشر هذا يشطفك وهذا ركبة :D قديمة خل التانكي ينفعك فكة وركبة مكان الكفرة المبنشرة (على بالي انكت:p )هناك العديد من الخيارات تلفق الخزنات بالجوانب او تحط الاستبة وراء لان الاسبير لايمكن الغناة عنة تبي تقول اخويانا اكثار اكلم علية ويجيني لية تمننهم
والمعذرة يالذيب الاشهب على الهرج الواجد لكن انت طال عمرك بعمل الخير طلبت مشورتنا مع التعليل

[حد السيف]

السلام عليكم ورحمة الله وبركاته
اشهب
اشك بصدق كلامك
لانة كلام مايدخل العقل ابدا
الله يهديك بس

[اشهب]

قبل كل شي شكرا لكم على النصايح
وتراي كنت جاد لو فيه ردود تقول لي شل الستبنه شلت ابو الي جابه
لان ابوي الله يرحمه كان يقول لي دايم الي ماله راي ياخذ من راي الرجال دليل
وانا صراحه دغه يعني هدر مامن هكاذهانه
فقلت اسالكم وانتم علمتون
واشكركم كلكم
واشكر اخوي الجيب االربع الي حط الرابط لانه فعلا مهم
واشكر الربذي والقطامي وحد السيف ودواس وابوسلمان واشهب........هذا انا اشهب
قايل لكم هدر

[قرم]

بسم الله الرحمن الرحيم
والله فكره ثوريه يا شهيبان !!

ما أحد فكر فيها غيرك . لكن تخيل معي ! افرض ضرب عليك كفر او ضربه حجر وأنت بالخلا ومعك 500 لتر ماء وما معك إستبنه وش السوات ؟ خل الماء ينفعك .
وش المانع من حمل جالون ابو 20او40 مع الإحتفاظ بالإستبنه . انا شخصياً لازلت أستخدم الجوالين للماء وأشوفهن عمليات بس يبن تثبيت وشوي ركاده .ياكثر ما شلنا من الماء معنا وثقل سيارتنا ويوم نرجع وما إستهلكنا إلا مقدار بسيط.على كل حال:good: :good: :good: :good: :good: :good:

[حفرلوجيا]

العزيز اشهب , عسى بس مالك من اسمك نصيب :(
شف يالعزيز : قالوا لك الأخوان فكرتك ثورية ..
خلني اقول لك موقف مر علي , كنت في سيارة جديدة , وأجد مافيها الكفرات , نصيبنا وطينا حصى بعضهن تقل شلفا , واحد من الكفرات صار من صيد امس ولا ينفع فيه الترقيع , الله يجيرك صرت باقي الرحلة أناظر الكفرات الأربع تقل عيالي بس أتدرى عليهن :( رغم إن عدة رقعهن موجودة لو بنشرنا مرة ثانية , وورانا سيارة ثانية فيها شلة دببة لو تبيهم يشيلون الجيب على ظهورهم ماعندم مانع :)
وبعدين تعال : اللحين كأني فهمت تضحيتك بالإستبنة على شان الماء , معك بعارين؟! :mad:,, شف لك تانكي داخل السيارة والسلة تولى العفش واللي يقصر من الماء عليك بالجوالين .. وإعقل وخل عنك هالتفكير ,, وهذي ابتسامات :):) على شانك اشهب :(

[ولد وايل]

السلام عليكم ورحمة الله وبركاته...

الله يعافيك ولا يبتلينا انت تتريق والاا من جدك اصدق والا.........

[اشهب]

:D :D

البوك فاضي والمزايين بالشام.......والعين ملت من وجيه الجماعه
على هالتوقيع انت الي الله يعافيك والا يبلانا
مير انا مهبول استبنه وانت مهبول بنات بس الطفره هي الي ماسكك
الله يهديك وشتبي بالمزاينن هن الي فضن بوكك واغضبن ربك ويمكن يدخلنك النار

[بدوي متحضري]

السلام عليكم ورحمة الله وبركاته:
الأستبنة والعفريتة ومفتاح العجل والماء
من الضروريات التي لابد للكل أن يحملها سواء في داخل المدن أو خارجها وأي واحد يجيب رأي بالتخلي عن واحدة من هذه الأشياء مع إحترامي له كلامه غير صحيح.

[اشهب]

اشكر البدوي المتحضر على نصيحته وان كان الاختلاف بالراي لا يفسد للقضيه ود

يقول قرم:

والله فكره ثوريه يا شهيبان
همن قال حفرولوجيا:

: قالوا لك الأخوان فكرتك ثورية ..
اوجعن قلبي من كثرت تكرار كلمة ثوريه
جان احساس اني ثور على هالفكره انتم توحون
زوج هالي تقلد السمكه هي وشفايفه الي تقل شفايف بطة ماتعرف تسبح
http://www.abunawaf.com/store5/cowd.jpg

[سنتافي]

السلام عليكم ورحمة الله وبركاته
اخوي الاماكن الي اقترح عليك انك تحط الاستبنه فيها
1- فوق السقف
2- في الخلف في الخارج مثل بعض الجيوب الي يجي الاستبنه فيها بره
3-فوق الكبوت ان امكن بس يبيلك تفصل كبوت ثاني
هذه بعض الفكار http://www.ezboard.com/images/emoticons/nerd.gif

اما انك تستغني عنها فا الشباب ما قصرو بالرد عليك

http://www.mekshat.com/pix/upload/images5/mk8041_1121.JPG

[ابوقاسم]

لاتستحي يخوك من السؤال والتغيير ما يجي من نفسه ..............
واخذ ما قالوا الجماعة ................
وانت ابخص بنفسك................
ولك تحية مني ..........

[* الخطيب *]

يكفي ماقاله الاخوة لك ، وسوف أحكي لك تجربة شخصية :

سيارتي vxr 2003 خلفية لكزس (قل ماشاء الله و لاتعلم أحد ) ومرت بي نفس حالتك ، لكني أبدا مافكرت تفكيرك ( معليش ) ورأيت أن الماء جدا مهم ،فقمت بتفصيل توانك ألمنيوم جانبية تحت الدعسات ، وماقعدن أسبوع الا أنا جادعهن لمافيهن من صوت تضايقت منه (خويك حساس) وتراهن للبيع . ثم فصلت تانكي ألمنيوم داخل الشنطة وسافرت به مرة ثم حسيت برطوبة فما صدقت أن وصلت ديرتي حتى فكيته ثم بعته بنصف القيمةتقريبا .
ثم فكرت وقررت بعد : 1/استخارة2/مشاورة3/مقارنة سيارتي بالسيارة ذات الاستبنة المعلقةتحت اشراف الوكالة4/قراءة في الكتالوجات المختصة 5/ توفر المادة ، قررت مايلي :

تغيير كامل الخلفية ونقل الاستبنة من تحت لفوق وذلك بتغيير بابي الشنطة الخلفية كاملين ، ثم تركيب تانكي ألمنيوم مكان الاستبنة سابقا تحت . وهذا ماحصل بحمد الله والنتيجة مرضية جدا وأنصح فيها ، وأنا أعرف ان بعض الاخوان : الخلفية اللكزس عندهم أجمل وأفضل ، لكن هذه رغبتي ، وللعلم : قد يقال : لماذا أصلا ماشتريت استبنة معلقة ، وأقول : لما جزمت لم أجد السيارة بالمواصفات التي أريد الا واستبنتها تحت فقدر الله شراءها ، والحمد لله وأسأله البركة .

تبي تقولي :كم التكلفة ، أقولك : العملية كلفت 5000ريال .
تم بيع الأبواب السابقة بـ 1600
صافي المبلغ : 3400ريال ، غير قيمة التانكي .

وسلامتكم ..................

[Bader-M]

8
8
8
8
طويلب العلم
يوم قريت ردك هنا حذفة موضوعك
لذالك تستحميك غذرا
<<< عجاز حتى الرساله الخاصه متصعيب كتبتها :D


.........
ياشباب ليه
كل هذه الحوسه

.......
خل معك جركل ازرق
وعلى قولة القايل

( كويس و رخيص )

بدال متخرم سيارتك و تشوه شكلها على غير سنع

وسلامتكم

[راعي المجاهيم]

اخوي اشهب اللي في راسك سوهو اطقع اتشوف البنشر ومشاكل الطريق


لو بنشر عليك كل بيوقف ولو احتجت ماء ضنك بيوقف احد ؟؟؟؟؟؟؟؟؟؟؟؟؟؟؟؟؟؟؟؟؟ مااضن لان مطلوبك موب واضح فكر في كلامي زين وتوكل على الله واجدع الاستبنة ومفك العجل فكر فيها المــــــــــــــــــــــــــــــــــــاء عصب الحياة والتانكي هو حاوية لعصب الحياة

[نقا هشال]

هلابك اخوي

واستبنة السيارة من اهم مقومات الرحلات والكشتات فلذلك لاتفرط بها...

[اشهب]

هالحين اجدعه والا مجدعه
شكلي ابجدع روحي من القهر

[سنتافي]

السلام عليكم ورحمة الله وبركاته


لو بنشر عليك كل بيوقف

وين ما خبرت انهم سوو خطوط سريعه وسط البر ولا فتحو محلات بنشر وسط النفود http://www.ezboard.com/intl/aenglish/images/emoticons/laugh.gif يا خوي مطفشتك الاستبنه حطها بالسقف واخلص ولو هي مهب مفيده على ظنك كان محد شالها معه واذا ضاقت بالحيل اشترك كفر نفس الارتفاع بس العرض اخف بكثير وبكذا يكون عندك استبنه خفيفه ونحيله جدا تنط بالسقف او اي مكان واذا مره ظاقت مره حطها بحجركhttp://www.mobile4arab.com/vb/images/icons/icon10.gif

http://www.mekshat.com/pix/upload/images5/mk8041_1121.JPG

[قرم]

بسم الله الرحمن الرحيم


اخوي اشهب الأستبنه ل ر اعي السيار ه بمثابه طوق النجاه في المركب لا يستخدمها البحار ابداً

الا في حالات الغرق مهما ضيقت عليه مايفرط فيها :D إياني وياك تفرط فيها .:director:

[أبو يوسف]

الله يهديك بس

الحين بعض الناس معهم استبنتين وانت بتجدع الاستبنه
انا مرت علي اشهر مامعي استبنه والله ايديني على قلبي
هذا وانا بالديرة
اجل وشلون بالبر
والحين افكر اشتري ثانية

مع التحية ..