ملاك الباثفايندر مشورة لا هنتوا

[ابوعلي الحربي]

السلام عليكم ورحمة الله وبركاته
يا الربع انا ودي ودي في شوركم انا قريبي معه باث فايندر 2002 فل كامل ماشي 90 الف نظيف بكل ما تعنيه الكلمة صيانة دورية اول بأول وصراحة انا الجيب ودي فيه وداخل مزاجي خصوصا ان قريبي رجال محافظ ومن العمل للبيت انا طلبته الجيب وقالي ان جاز لك فداك بالي تجيب المهم يا الاجواد شوركم اتوكل على الله واشتريه لان الي معي المبلغ صراحه ما يجيب جيب جديد وكيف رساوته في الخط هو طبعا قير اوتوماتيك
والشكر مقدم يا اهل الخير والجود

[AZOO9Z]

و عليكم السلام و الرحمة الله و يركاته

هلا أخوي أبوعلي ما شاء الله تبارك الله نظيف الموتر و هذا الشي يشجع بصراحة على أنك تأخذه

و انا معي باث موديل 2004 يفرق قوة المكينة عندك 2002 و تحت مكينته 3300 أتوقع أو 3000

لكن 2003 الى موديل 2005 مكينة أكبر 3500 انا ما جربت 2002 و تحت للأسف لكن أتوقع أن

مكينة الـ 2002 أقل خرابات من 2003 و فوق و بالنسبة للرساوة بشكل عام الجيوب اقل من الصغيرة رساوة

لكن لا بأس فيه و قياتده أشوفها ممتعة بالنسبة لي هالجيب خاصة ( الباث فايندر ) . و أسأل أحد مجرب 2002.

و بالنسبة للباث فايندر بشكل عام يبله دلع يعني يبي لك تشيك عليه كل فترة و تحافظ عليه أكثر من غيره لأنه( نيسان ).

و الله يكتب الي فيه الخير و اذا كانه من نصيبك فالله يطعمك من خيره و يكفيك شره .

[ساري 111]

الموتر كد جربته ع وقته طبعاً

الموديل زين ولافيه مشاااكل ورساوته حلوه بالحيل بالنسبه كاجيب

بس عيبه مكينته ضعيفه شوي بالنسبه لموديل 2003 واعلى

لكن انت اخذه وجربه

[كورابيكا]

_اقول توكل على الله ياشنب واشرررررررررررررررررررررررر_
http://up.arab-x.com/July09/Dc349435.jpg

[البرحه]

اذا الموتر نظيف وتعرفه فترى النظيف قليل

[ابوعلي الحربي]

يالله تحيي الرجاجيل يا الاجواد انا بستخير الله والخير الله بيسره لي ودامكم تمدحونه فشوركم وهداية الله وبالنسبه للمكينه انا ما تفرق معي اهم شي الموتر نظيف ونصايحكم الخيره الله يبيض وجوهكم انتم ومن تحبون وما نستغني عنكم يا اهل الخير والطيب يا اهلي

[مرير الشوق]

ابو علي

خذ نصيحتي موتر تعرفه ولا موتر تجهله
تعرف وين راح ووين وصل ووش سوى له من صيانه وش يبي ووش يطلب تراه
انا اشوف اني اشتري الموتر المعروف افضل .... من اللي بالسوق
توكل على الله واستخر واشتر والله قوة الباثفندر

[الستانس]

اشتر وتوكل على لله
انا مجرب المكينتين ماشاء لله المكينه القديمه حقها فيه ولكن فيها حنه زايده عن الكبيره

واللي عندي مديل 2000 وعندي 2004
ماشاء لله 2000 مقد شكيت منه إلا في ايامه الأخيره بدي يخربش بس مهب في مكينته
واقولك اشتر وتوكل على لله

[ابوعلي الحربي]

هلا بالغالين اليوم صليت الاستخارة والنيه اني بشتريه ان شاء الله والله يوفقكم ويرزقكم احسن منه مليون مره والمعذرة والسموحه اشغلتكم معي

[اسير الغضا]

الله يطعمك خيره ويكفيك شره ومبروك مقدما

[الكايف2]

توكل علي الله الموترالله يبارك لك فيه مبروك كان معي واحد ولا احلي منه مشي معي 350000ثلاث ميه وخمسين الف ولا ارسي منه بس المكينه اقل من اللي بعده بس مايهم بالتوفيق هاذا اللي عندي من واقع تجربه

[الشبح1]

ابو علي مساك الله بالخير

عندي باث 2002 على ايدي من الوكاله قير تماتيك
بسم الله ماشاءالله 244000 بدون مشاكل
قبل شهر فقط غيرت السيور داخلي وخارجي حقت بلده مع زيت وفلتر القير حق بلده
وصراحة موتر والله يرزقك

[ابوعلي الحربي]

هلا وغلا ابشركم بعد الاستخارة ارتحت للجيب واليوم كلمت قريبي وقالي فدااااك والنيه ان شاء الله بشتريه والشكر لكم يا اخوان على هذا التفاعل والله يبيض وجهيكم

[ابوعلي الحربي]

بسم الله الرحمن الرحيم
ابشركم يا اخوان اشتريت الجيب الحمدلله وشكرا لكم جميعا على النصح والله يرزق الجميع احسن منه والسموحه يا هلي ان كان هناك قصور

[بو الجموس]

يا شباب بسألكم
الباث موديل 2002 و2003
توماتيك او قير عادي كم تجي اسعارها؟؟؟

[روحي شمالية]

والله ما ادري لاكن واحد شاري باثفاندر 2005قبل ثلاث شهور ب62

[بو الجموس]

والله ما ادري لاكن واحد شاري باثفاندر 2005قبل ثلاث شهور ب62
انا متخوف من موديل 2005
لأنه مثل ماقلت في احد المواضيع انه ينباع بالهبل ابي اعف السبب ليه؟؟؟
وهل احصل موديل 2002و2003 هالوقت ولا