سيارتي باث فايندر, وابي اركب السبير علاقي وراء وشلون؟

[BASSAM]

السلام عليكم ورحمة الله وبركاته

اخواني ساعدوني . سيارتي باث فايندر 2002 وابي اركب السبير علاقي وراء مثل موديل 2000 وشلون؟

اولا:هل تنصحون ولا لا ؟
ثانيا: دلوني على ورش او محلات تسوي الشي ذا بس يكون شغلهم زين .

انا بالدمام بس ماهو مشكله اذا كان بالرياض او القصيم لاني رايح بالاجازه ان شاء الله.

وجزاكم الله خير

[أيمن]

وعليكم السلام ورحمة الله وبركاته ..
هلا وسهلا أخوي العزيز BASSAM ..

بالنسبة لاستفسارك: فكل شيء غير مستحيل في ترهيم الموتر، ولو تسأل جميع محلات الحدادة فلن يتحرج ويتورع أحدهم بقول "لن أعرف" فانتبه رعاك الله ..
الأمر الآخر، هل حاجتك لهذا الأمر شديدة بحيث أنك ستضحي بشكل الموتر من الخلف والمشاكل الناتجة من تركيب السبير في الخلف من تخريم لـ"بدي" موترك ..
الأمر لك أولا وأخيرًا ..

تحيتي

[BASSAM]

شكرا اخوي ايمن

بس حاجته لتوفير مكان لتانكي الماء لان اللي داخل السياره مزعج وكذلك السبير يكون احفظ له من حصى وجروف الصمان اللي خربته وكذلك استفيد منه كمعلاق واشياء اخرى كثيره.
ولن اغامر ب اي ورشه لذلك سألتكم طالبا النصيحه اذا كان هناك ورشه مجربه وممتازه بالحيل.

ومن ناحيه الشكل بنظري اللي وراء احسن.

وشكرا ايمن لتجاوبك معي.

[ابو ســــاره]

هلا اخوي BASSAM كيف حالك والله انك رجال تحب الحورفه مثلي .

يا طويل العمر انا كنت ابسوي هالمشروع وتكاسلت وهونت وانت شكلك متحمس ولعلك تكمله والمشروع كما يلي
انا ركبت هوك خلفي الجيب والهوك انت عارفه الحديده الي تركب خلف السيارة وتثبت بالشاص لسحب المقطورة .
بعد ما ركبت الهوك قلت يا ولد وراء ما اقلع الاستبنه واركبها بالهوك وقلت للحداد قالي بسيطه نركب لك قاعدة للاستبنه واخليها تنفتح على تحت وممكن اخلي القاعدة متحركة يعني ممكن تهون عن المشروع وترجع كل شي مكانه
طبعاً بالطريقة هاذي ما راح تخرب شي بالسيارة كل العملية فك وتركيب صواميل بالسيارة دون خذش اي شي من بدي السيارة حتى الهوك لو ودك تفكه تفكه وتجدعها هاه وش رايك بالمشروع و التكلفه يا طويل العمر ما راح تعدى خمسمية ريال هاه وش قلت .
اذا عزمت علمنى انت بس وانا اعين واعاون
وسلامتكم ،،،

[Abo Nader]

السلام عليكم ورحمة الله وبركاته

بالنسبه للسبير الخلفي من ناحة عملي فهو عملي ومجربينه على موديل 2001 لكن منظر السياره نوعا ما ليس جيد بالنسبة لوجهة نظري

[BASSAM]

ياهلا ويامرحبا اخوي ابوساره والله مشتاقين لسواليفك الجديده ( وهذاك جبتها) فكره حلوه، بس شكلها بيطلع زين ولا لا ؟ اذا كان عندك صوره حطها لو سمحت.

وأباحاول ابدأ فيها .

ابو نادر هذا اللي نبيه تكون السياره عمليه، وشكرا على المداخله .

[ابو ســــاره]

تدري بخير انسى موضوع الهوك نهائي
ياخي ترى الشغله يوم قعدت امخمخلك فيها لقيت انها بسيطه وسخيفه مره وشوله اصلاً نحط هوك ؟
لو حطينا يا طويل العمر قاعدة بحديده مبسطه اربعه ملي في الجهة اليمنى حول فتحة الشكمان بالشاص مباشرة وطلعنا منها المفصل الي يبي يركب عليه الاستبنا والمفصل هاذا يكون نفس طريقة المفصل في علق اللاستبنه في جيمع السيارات يكون فيه مسمار نفس طريقة الجيب الاندكروزر الي يمسك الاستبنه اذا فتحتها راح تجي العمليه ميه بالميه وبدون اي اصابات لسيارة صدقني العمليه سهله جداً بس رح لم السوري راعي المميز تراه عفريت ويبي يظبطها انشالله والمظهر يا طويل العمر راح يكون الاستبنه الي يشوفها يقول هاذا مخرمها بالباب يعني القاعدة راح تكون مخفية الي حد ماء وتراي ما عندي صور وانا اخوك هاذي كله ما سويت الا الهوك وتراك تبي تخليني اديور على المشروع واكمله عنك لاني اذا تحمست بشغله اسويها على طول .

[BASSAM]

شكرا يا ابو ساره ،هالمره اسهل بكثير. ( بس ابانتظر لين تسويها انت وتحطلي صوره بعد، عشان اخلي الورشه اللي بالدمام تسويلي مثله) تراي امزح

طيب وش السواه باللوحه (احطه على الاستبنه رأيك)؟

وجزاك الله ألف خير .