ما هو الاسم الدارج والعلمي لهذا الشيء؟

[صفوان]

الأخوة الأحباب

السلام عليكم ورحمة الله وبركاته

أردت منكم معرفة الأسم الدارج لديكم والعلمي إن أمكن لهذا الشيء اللي بالصورة.. حيث أنه حصل نقاش بيننا عن اسمه ولم نجد له اسم علمي معروف.:rolleyes: وهل هو سام؟ و ما هي مدى خطورته؟

http://www.mekshat.com/pix/upload/images5/mk5993_Agrab.jpg

http://www.mekshat.com/pix/upload/images5/mk5993_Agrab3.jpg

http://www.mekshat.com/pix/upload/images5/mk5993_Agrab2.jpg

http://www.mekshat.com/pix/upload/images5/mk5993_Agrab1.jpg

http://www.mekshat.com/pix/upload/images5/mk5993_Agrab4.jpg

صفوان

[* ضب *]

شبث

[شبث]

اخي كلنا مخلوقات الله سوا ضب والا شبث تدخل ولا تسلم تقول شبث وتنحاش انظر لهذا المخلوق المميز واعطه بعض الاحترام . واذا كان عندك في الجحر غرفه فاضيه ابنقل عندك ابرد لي تعرف جاينا الصيف.

[* ضب *]

طيب ولا تزعل اخ في الله شبث
السلام عليكم ورحمة الله وبركاته

الشبث كائن حشري سريع الحركة لزقة في بعض الاحيان تنحاش عنه يلحقك
يسمي في بعض المناطق (سطحة العقرب)

واذا تبغي غرفة فاضية شف العقرب شاورها ان وافقت ما عندي مانع

لكن الله يعينك على الريحة

تحياتي لك

[غـريـب]

السلام عليكم

اخواني الأعزاء ( ضب وشبث) ماتلاحضون انكم رديتو باخوي صفوان ولا جاوبتو على الأسئله صحيح انكم من مخلوقات الله وتعيشون تقريبا في بيئه واحده بس اسمحلي اخوي شبث وشلون تقارن نفسك بالضب انت وكراعينك على الاقل الضب فيه شي يوكل سلايق بيض كبده عكره لحم وانت لا بك فايده وتحوم السبد.

اخوي صفوان انا ابي اجاوبك





1- هذا المخلوق اعتقد انه صارور بري ( بس هليم)
2- اما من ناحية سام لا ( جورج)
3- اما خطورته ( كنه واحد رامي واحد بم صتمه على فخذه على بعد 20 متر)

هذي المعلومات فقط للأخ ضب وشبث

بعدين ياشبث احمد ربك انه حاطك بحافضه اخوي صفوان والا المفروض يحطك بطاسه وبالشمس خله يحمس كراعينك


الاجابه شبث

[شبث]

وانا عارف ان مالى شعبيه عند الاخوان راعين البر مع اني مااضر احد حالتي حاله حاط رجلي دايم مسرع ولاعندي سالفه .بس للأسف اخاوني المسلمين محتقريني لأ ني من فصيلة الحشرات . واحسن لي اروح باحد الدول الاوربيه يتدبرون خلقة الله فيني ويد لعوني وبعضهم يهتم فيني ويأكلني احسن انواع الأكل , احسن من عيشتي بهالبر عند كم عج وحر وقل عيشه واخرتها اموت بكل احتقار اذاقربت ادور عيشه عند اقرب كاشت ( لو قشر بصل) يعطيني بالزبيريه وهو يضحك. لاحيات فطريه ولا احد يحاسبه غير الله . وبعدين يا اخ غريب وش فيها كراعيني قمه في الرشاقه ماهو مثل الضب اللي تحبه وتاكله في الربيع كله كرسترول واخر الصيف واول الشتاء اذا جاع ومع شدة البرد يبدا ياكل مخلفاتة داخل الجحر , على الأقل انا اكل دايم ( فرش ) يعني طازج ماهو ( ز...............) .

[* ضب *]

اه شبث .. اشوف قمت تغلط ..
وش جاب لجاب وش جاب الحشرات للزواحف المفترسة

لتكون حطيت راسك براس الضب يعني انت خلاص فوق
لا يحبيبي انت عارف مكان الشبث وين؟؟ تحت ازبيرية.. وحسافة بعد

بعدين وش هذا(ز............) انا عارف قصدك تقصد ( زلطه الاعشاب البرية المجففة)



تحياتي لـ غريب وصفوان ولك وللجميع

[الاجودي]

عليكم السلام ورحمة الله وبركاته

هذا يسمونه اهل الرياض والقصيم شبث

واهل حايل يسمونه عم الشملان

واهل الحجاز يسمونه بشبش

وهذي الاعرفه لك تحياتي

[صفوان]

الأخوان جميع/ ضب و شبث وغريب ..

حيّاكم الله وبيّاكم، وأشكركم على ابداء آرائكم..

وما تا صل بينكم إلى المهاوش:( أنا اللي غلطان وخلوها علي ها المرة..;)

وبالنسبة للمعلومات بأنه شبث، الشبث اللي أنا أعرفه لونه مصوفر يعني مايل إلى الصفار وسريع كما ذكرتم بس هذا اللي بالصورة بطيء جداً وعدائي يعني لو تحط يدك قرضها. وأنا سألت واحد وقال انه "عقرب الجمال"
وهو حجمه أكبر من الشبث والعقرب.
وأما عن الاسم العلمي والخطورة فهذا هو المطلوب الافادة عنه..

وتقبلوا تحيات أخوكم
صفوان

[شَعَّـاااال]

السلام عليكم ورحمة الله وبركاته

مساكم الله بالخير جميع


اخوي صفوان



لعل ما جئت به اليك يكون مفيد


يسمونها (( عنكبوت الجمل ))

معلومات بسيطة عن عنكبوت الجمل

إن عنكبوت الجمل ليس قاتلاً ولكنه عدواني وعضته مؤلمة جداً

تسمى أيضا الشبث

وهي من أشد أعداء العقارب وكثيرا ما تتصارع مع العقرب

فإن تمكنت من قطع ذيل العقرب كسبت المعركة وإلا فهي خاسرة


وانواعها متعدده واحجامها كذلك


وهذا مثال على ذلك وهي صوره من العراق .http://urbanlegends.about.com/library/graphics/camel_spider_sm.jpg



مع التحيه

[شبث]

السلام عليكم ورحمة الله وبركاته. اخوي صفوان تحيه طيبه وبعد , اللي اعرفه والله اعلم انه نوع من انواع مايسما عندنا شبث واعتقد انه ذكر وكبير في العمر لكبر حجمه ولونه مائل للبني او السواد اما الأ نثى فلونها اصفر وتكون كبيره المؤخره بشكل بيضاوي ويزداد حجمها في حالة وجود بيض بها , حيث انها تضع مايقارب 50 الى 100 بيضه وتكون بطيئة الحركه نوعا ما في هذه الحاله والظاهر اللي انت لقيت من شيبان جماعتي الكبار .

[تواق]

شباب هذا معروف عندي بسم شبث وهوا زي ماقالوا الشباب سطحه العقرب بس السوال
الي ماخليت شاب وشايب انت شفته شايلها بعيونك كلهم سمعوا شافوا لالالا
انتم شباب احد فيكم شافه شايلها ولا الدعوا اسطوره


ضب حلاوه زلطه خضروات مجففه هههههههههههههههههههههه


اخوكم / تواق

[غـريـب]

السلام عليكم

اخوي الضب رقم عدد المشاركات للبيع ؟؟؟

اخوي شعال وشو ذا اللي انت جايبه بالصوره لا تروع خلق الله وشكراّ على المعلومات االقيمه والصوره النادره

ياشبث هذا من شيبان جماعتك الا هذا انت ومتطاق انت ولد جيرانكم على حجمه هذا انت سبحان الخالق الناطق

[مهيلان]

( والظاهر اللي انت لقيت من شيبان جماعتي الكبار )

:D :D :D :good:

[الكنور]

ياسلام ياصفون ياضب ياشبث وياغريب اوفيتو ووفيتو

عاد شبث يبى يكبر راسه موضوع ونقاش ودراسه مستفيضه علشانه

وحلاله بعقب البندق مع هامه شبث اللى كاهرنى انه يدرعم ويمشى مليون وما قابله صدمه يعنى

دايم يمشى عدال ولو قابل جحر ضب دخل وما طالع مايعرف يديور ولا يدق ريوس:D


وغريب تراه يحب ثروب الضبان مع الشتيته:p

[راع الكحيلة]

هذا الشبث

له ثمانية أقدام

فلنبدأ من الخلف

أول ثلاث ازواج من الاقدام تكون في نهاياتها ما يشبه الخطاطيف

وأخر زوج من الاقدام الامامية ينتهي بما يشبه المضرب

أما ما تراه في مقدمته والذي يشبه الاقدام الطويلة فهي تستخدمه للمس والتحسس

الإسم اللاتيني

solifugae

أضغط هنا (http://www.mekshat.com/vb/showthread.php?s=&threadid=18751)

تحياتي

[صفوان]

الأخ/ راعي الكحيلة

جزاك الله خير.. يعني طلع هو الشبث!؟:mad: بس هذا اللي مصوره كله لون واحد رجلينه وبطنه (لون بني غاتم) مهو سريع! والشبث اللي أشوفه أحياناً رجلينه صُفر وأصغر بكثير.. وحاط رجله ما يوقف!

على العموم لو طلع شبث أو من فصائله.. شلون خطورته!؟:( يعني لو مر علينا وحنا نصلي ولاّ نتعشا.. عادي ولاّ حط رجلك:D

شاكر لك مشاركتك.. وأثاريك سابقني بالخبر عنه:good:

القلوب عند بعضها.. وعلى فكرة أنا خذيته وحطيته بمدرسة يحنطونه عندهم بالمختبر، وكذلك جبت لهم بعض أنواع العقارب، وذلك للفائدة للطلاب في مشاهدتها.

تحياتي

صفوان

[شبث]

افا اخوي صفوان مهيب هي أحسن الله عزاءنا ، وجبر مصيبتنا . ان لله وان اليه راجعون راح فيها شايبنا ؟ وصار فرجه للبزارين في المدرسه . لاكن للفايد العلميه , اقبل منك الديه ومانيب ماخذ الثار.:(

[صفوان]

الأخ/ راعي الكحيلة

عملت بحث بالاسم اللي انت قلته ( solifugae ) .. ووجدت صراحة معلومات قيمة وأنواع كثيرة!:good:

ومن اللي وجدته إن بعض المواقع تسميه عنكبوت (spider) وبعضها يطلق عليه عنكبوت الجمل (Camel Spider)، وفعلاً ذكر احد المواقع انه سريع:eek: وغريب اللي انا شفته يالله يمشي!
أيضاً ذُكر أنه يأتي على ضوء النور..
أنه غير مؤذي للانسان ولكن من باب الصدفة أو الحدث قد يؤذي اذا كان هناك تحرش به.. (يعني خلك بعيد عنه)
بعد التزاوج أو اللقاح بينه وبين المعزبة يكون هناك تحرش من قِبل الذكر ثم بأتي بعض العروض والرقصات ومن ثم تنتهي القصة بتقطيع الذكر وأكله من قِبل الأنثى:mad: (وش ها النذالة)

صور لبعض الصور اللي وجدتها

http://www.mekshat.com/pix/upload/images5/mk5993_Eremo2.jpg

http://www.mekshat.com/pix/upload/images5/mk5993_sol4s.jpg

http://www.mekshat.com/pix/upload/images5/mk5993_Spin_2s.jpg

http://www.mekshat.com/pix/upload/images5/mk5993_Spin_4s.jpg

http://www.mekshat.com/pix/upload/images5/mk5993_Sun-Spider.jpg

http://www.mekshat.com/pix/upload/images5/mk5993_sunspidr.jpg

شاكرين لكم تعاونكم وجهودكم

تحياتي

[الكنور]

:D :D :D

شبث صفوان معطيك الصقهاء:D

[صفوان]

الأخ/ الكنور..

ترا أخونا شبث يأمر أمر.. بس انت لا تنشبها!:mad:

يالله صدنا واحد فيهم ذيتس الليلة، وخايفين يأثر له:(

تراني ما سفهته.. بس يمكن يوم أنا أرد هو خش بالعرض!

على العموم حياكم الله جميع:)

صفوان

[مرقاب 06]

هذا المخلوق من فصيلة العناكب الذي تعد باأكثر من الفين نوع حول الارض منها السام وغير السام ويعرف الذي في الصوره محليا بالشبث

[الكنور]

اخوى الغالى صفون

لاعدمتك ياغالى وشبث اعرف نفسيته وطبعه زين بالحيل ولو حسيت انه يبى ياخذ بخاطره او انك تبى

تاخذ بخاطرك ماكتبتها والكتاب يبان من عنوانه ومن واقع ردودك لمست فيك الطيب ياطيب

وهذا العشم فيك ياطيب

[صفوان]

الأخ/ الكنور

عُلم.. عُلم

اطلع 50 فوق!:)

حيّاك الله وبيّاك.. وجعل الجنّة مثواك:good:

تحياتي

[عطر الشوق]

السلام عليكم مداخلة
هذ اسمة شبث اسود سام جعلة لايلدغ احد مسلم
الاخ الاجودي عم الشملان مهو هذا اولا حجمة كبير يعني دلخ بعدين لونة اصفر
وشكرا

[راعي القطا]

يااخوي والله أناقد قرصني شبث قبل 3سنوات ويوم قرصني على طول رحت المستشفى ويوم قلتلهم اللي قرصني قالوا لي ماعليك مافيك إلا العافيه والشبث ماهوب سام