كبسة قميري بالصور !!

[السمح]

بسم الله الرحمن الرحيم


بما إن القميري قرّب رجوعه خلوا الكبسة علي اليوم ، بس ودي أقول لكم شي وهو إني ماني من المحترفين في عملية الطبخ .. ربعي يقولون إني أحسن من يطبخ فيهم ، لكن المسألة لا تخلو من المبالغة وهي وحدة من ثنتين : إما إنهم يخفون بي ويقولون كذا علشان كل ما طلعنا يلزقون الطبخ على أخوكم السمح ، أو إن العور مفتح بديرة العميان ، وفي كلتا الحالتين ما عندي مانع إني أطبخ لهم دائماً لأني بيني وبينكم ما أحب تغسيل المواعين بعد الغدا .

كبسة القميري تحتاج إلى المقادير التالية لعدد أربعة أشخاص :


1- عدد 20 قميرية نزل أو حدر أو حسب ما تسمونهن بمنطقتكم .
2- عدد 2 راس بصل متوسط الحجم يفرم فرماً متوسطاً .
3- عدد 1 بيالة زيت ، أو سمن حسب الرغبة .
4- عدد 2 ليمون أسود ، ويفتح فتحتين صغيرة من جوانبه .
5- بهارات ، وملح . ( وإن ما حصل ملح غط اصبعك ترى كلك ملح )
6- عدد 2 ملي كفيك رز . ( إن حصل أبوكاس .. تكفى !! ) .

على ما العيال ينتفون القميري الله لا يهينك املأ البريق ماء وحطه على الدافور ، وقطع البصل ، واغسل القدر الكاتم 10 لتر بشوي أميه .. وبعد نتف القميري وتنظيفها واستخراج جوفها وهذه النقطة ضرورية جداً جداً وخاصة مع جميع آكلات الحبوب لأنه يتربى بين أمعائها دودة شريطية ودائماً نجدها ، ولا يهمونك اللي يقولون أطعم بدون استخراج البطن .. حط الزيت في قاعة القدر وضع البصل المقطع على الزيت وقلب البصل كل فترة قصيرة حتى يتحول لونه إلى الإصفرار ، وفي هذه اللحظة ضع القميري على البصل والزيت وقلب المجموعة ثم ضع البهارات وقلب مرة أخرى .. ستحصل على قدر يشابه اللي بالصورة :


http://www.mekshat.com/pix/upload/images/mat/kich/co1.jpg

ما تشمون الريحة طلعت عليكم من السماعات ؟؟!!
انتبه يجب أن تكون النار هادئة جداً ولكن ليست بشكل يمنع حمس القميري بالبصل والزيت .. غط القدر وبعد قليل قلب المجموعة ثم ضع الماء الفائر على القميري ولا تكثر الماء علشان ما يروح طعم القميري ، ولا تنسى تحط الملح والليمون الأسود ، والفلفل حسب الرغبة ..
احكم غطاء القدر وارفع النار إلى أقصى درجة وانتبه عندما يبدأ صمام القدر بالدوران ، إقصر على النار إلى المتوسط تقريباً ، ثم احسب 25 دقيقة فقط ( إذا كان القدر ماركة سب ) .
في هذه الأثناء اغسل الرز ثلاث مرات وانقعه بالماء البارد وليس الحار علشان مانبي الرز يشرب من الماء العادي ، ولكن من مرقة القميري علشان يجي الطعم غير شكل ..
بعد مرور 25 دقيقة على طبخ القميري أغلق النار وافتح القدر واستخرج القميري وضعها في قدر آخر ، ثم ضع الرز على المرقة وحركه . يجب أن يكون مقاس المرق مناسب مع كمية الرز في القدر حتى ما يصير جريش إن كان المرق زائد أو حب ني إن كان ناقص .. وعادة المقاس يكون بين 2 إلى 2.5 سم فوق سطح الرز ، ويمكنك أن تغرف الزائد إلى القدر اللي فيه القميري ، لا تنسى تذوق الملح ولا بأس أن يكون زائداً قليلاً لأن الرز يحتاج إلى زيادة ملح وستجد أن هذه الزيادة غير موجودة بعد النضج . ( يعني إني خبير ) .
ضع القدر على النار وبعد دوران البلف اخفض النار إلى أقصى حد ممكن ، احسب 12 دقيقة بالضبط ثم أغلق النار .. في هذه الأثناء إذا كنت تحب الزركشة والشغل العدل خذ قليل من الزعفران وانقعه بفنجال مع قليل من الماء ، اغسل الصحن الستيل ( تراه أصح من الملامين ) ، وبعد فتح القدر ضع الزعفران بشكل دائري على الرز في القدر ثم حرك الرز بحيث يختلط الأعلى والأسفل من الرز النثري ويختلط معه الزعفران حتى يجي الرز ملون بالأصفر والأبيض ... اغرف الرز بالصحن وضع القميري على الرز ، حط السفرة وإن حصل بصل أخضر وفلفل تكون كاملة ، شف الصورة :


http://www.mekshat.com/pix/upload/images/mat/kich/co2.jpg

وقل للعيال : ما عايز علينا وصخ غسلوا!! .. وتفضلوا الله يحييكم ، وين ما يسري يمري وياجعل مهابيطه العافية .. وشكراً ..

[شقران]

ابوتركي بارك الله فيك وجزيت خيراً لي يومين وانا احتري عقب يابنات ويوم شفته ماشاء الله هني وعافيه على اللي كله وصلحه بغيت اطب في الشاشة :rolleyes:
يابعدي تسلم والله وعاشت الأيادي.
اخوك /شقران

[عاشق الصحراء]

تسلم يا بعد عمري يا شيخ ..انت شيخ تدري ليه لاني اغليك ولأن الي يفسّر عن ذرعانه و يسنع الكبسه في البر هو اطيب واحد . و بعدين يا عمري ليش ما قلت لي انتّف قمري معك لان احسن شيء تنتيفه و اكله.....عشت يا نور المنتدى و لا يهونون كل الاعضاء و كل الزوار

[البوصلة]

تصدق ان لوحة مفاتيح جهازي غرقانة بالسعابيل وخشتي لاصقة بالشاشة ومصارين بطي مثل الدجاج اللي داخل عليهن بس
حسبي الله عليك :D :D
مشكور وتسلم على هلكبسة

[سنجار10]

السلام عليكم:
بيض الله وجهك ياخوي السمح على هالطبخه اللذيذه جدا (طبعا من شكلها) وتسلم هاليدين ....
والله من ضرب الشوزن في هالحمام ....بس عسا ا لطبخه مامعها حلبي اللي يكسر السنون......................الله يعطيك العافيه على مجهودك الطيب...



سنجار10

[راعي الجيوب]

بيض الله وجهك وماقصرت على هذا الطبخة

[خوي راعي كيف]

لاكن يابو تركي ماشاالله عليك كلش ذكرتة الا عدد اللي يبي ياكلون القميري:p

قل امين الله يجعلكم ماتحدرونة
-
-
-
-
-
--
الا بكل عافية يابعد قلبي
:D :D

بس تعود لة ثاني مرة تطبخ هالطبخة ولا تعزمنا ;) ;) ;)

[الساحل الغربي]

والله والنعم يالسمح لاشلت يمناك
وخادم القوم سيدهم
والظاهر انك مملوح شوي
وتراك يالسمح شوقتنا للقمري
و
و
و
و
والخ.......... ولا وفيناك حقك يالطيب

[السمح]

حبيبي شقران :
حتى في إسلوبك متميز ما شاء الله عليك يابوسليمان .. نفس خفيفة ، ولسان تزلق به الصعوة .. تراي أغبطك .. شكراً .

عاشق الصحراء :
حتى أنا والله إني أغليك من البداية .. ومشكور على التشجيع ، والمنتدى منور بك وببقية الأعضاء الحلوين ، والمرة الثانية إن شاء الله أناديك ترمي لنا وتنتف وتاكل القميري .. شكراً يالطيب .

البوصلة :
الله يقطع شيطانك ياشيخ .. تدري كان معي ناس يقرون الردود فطسنا من الضحك :D :D تسلم يابو دم خفيف ..

سنجار 10 :
راعي الهوى يبين يا سنجار حاط بالك على ضرب الحلبي بالقميري ! الله لا يصدفك ويزيدك ولع ،،، قاله ابن سبيل : " والصيد ولعه ما على الله كمايه " .. شكراً يالغالي .

راعي الجيوب :
ووجهك يالحبيب .. ومشكور على الزيارة ..

خوي راعي كيف :
إلا يا عيوني يابوفهد ذكرت إن العدد أربعة أشخاص في البداية ... بس ماش يالله حسن الخاتمة .. أشوى إن البنات ما يطبن هالمنتدى وإلا كان علوم ..:D :D
وحقك يابوفهد أكبر من مجرد قميري .. بس أنت عطنا فرصة .. شكراً

الساحل الغربي :
أنتم أهل القميري على الساحل الغربي :) وكلها 20 إلى 25 يوم وهو مشرف عندكم .. بس لا تنسونا يا ..
أشكرك أخوي على مشاعرك الدافئة .. بس أنا شوي زعلان عليك .. ليش تقول : إني مملوح شوي ؟! الله يهديك مهوب شوي إلا كلي ملح ، حتى اسأل بعض ناس ويعلمك .. شكراً مرة أخرى .



تقبل تحيات أخيك السمح

[جوال^البراري]

السلام عليكم الاخ السمح انا بعض صور المنتدى ما تطلع عندي ليش ؟؟؟؟

[عبدالعزيز الدباسي]

تسلم الأيادي يا ابو تركي

الحقيقة ولا احسن شيف في العالم يقدر يسوي زي هالكبسة ، ومشاء الله عليك ماخليت شى ما حطيته ، وما اقول الا
يا سعد اللي انت طالع معهم وياحظهم من قدهم اللي انت جالس جنبهم وانت يالغالي قمرهم كلهم





<CENTER><P><IFRAME WIDTH=65% HEIGHT=240 SRC="http://shagrdi.jeeran.com/shegardi1.swf"></IFRAME><BR></CENTER>

[السمح]

الأخ جوال البراري هلا بك وحياك الله .. إذا الصور ما تظهر لك يبدو لي إن عندك مشكلة في إعدادات المتصفح لديك ...
إذهب إلى ( أدوات ) في الشريط العلوي ثم اختر ( خيارات انترنت ) ومن الصفحة الجديدة اختر التبويب ( خيارات متقدمة ) ثم ابحث عن ( إظهار الصور ) وضع علامة صح في المربع المقابل لها ...

حبيبي شقردي .. مشكور على المجاملة اللطيفة كلك ذوق وأدب وما عليك زود يالغالي ...

تقبلوا تحياتي ...

[راع الحبارى]

السلام عليكم


خوش طبخه سنايدي انت


آآآآآآآآآآهه لو نعقد الخوه انا وياك !!! ماهو عاد اخوك يطبخ القمريه وهي على الطلحه



بس يخوي اشوفك حاطن خضاريين مع هالنزل المضبوط


شفتهن ايمن الصحن وايسره



بس يخوي ليه ماشويت الخضاريات


المهم القمري قرب


ضبط شغلك وبالتوفيق


:D

[السمح]

راعي الحباري :

حياك الله .. وخوتك تنشرى يالغالي ... ما دام إنك تحوس بين الطلاح ... :D

وتبي الصدق لا تعلم أحد ... تراك خبري صدق ودقيق نظر .. الله يهديك بس غض الطرف عن أخوك ... ;)

هلا وغلا مرة ثانية وتشرفت بوجودك بالموضوع ...


تقبل تحيات أخيك السمح

[ماكنـــتـــــوش]

اقول أخوي السمح لابارك الله بالعدو يوم انت تلوي مصراني ليه وش انا مسويلك :(

مصاريني يتلون مع اني الصبح والله ودي اكسر الشاشة على هيئة ابو الحروف وادخل وأجيب هالكبسة جعل من سواة تخدمة ام 15 موصفات كاملة مع الهنقلين:D
وتقول يبالغون حرام عليك انا لو انا عندك كليتك انت تسلم والله وعقبال ماتعزمنا واحد وسيع وجه
( وجه ابن فهره ):D
مع السلامة اخوك ماكنتوش
قبل لا اروح اقول اخوي السمح ما الوم الي كابن الشطة بشنقه:D بيني وبينك مايلام .( مطفوق )

[السمح]

هلا عيوني ماكونتوش تسلم والله .. وهذا من ذوقك ...

أهنيك على النفس الخفيفة المرحة التي تتمتع بها ...

والله يتقبل منك دعاءك ، بس ارفعها شوي إلى 17 والهنقلين أقصر الله لا يهينك :D

واللي تشوفه حاط في شنقه مهوب شطة ولكن فلفل ناشف مطحون .. يصلح ؟؟

حياك الله ، وشكراً على الزيارة يالغالي ...

[mfahad]

اولا: انا عضو جديد جدا أرحب اجمل ترحيب بكل الاعضاء

ثانيا: الله يسامحك ياالسمح خليتنا نشوف ونتحسر واللعاب يسييييييييييح

وعلى العموم اكرمك الله احيانا الواحد ياكل بعيونه ، وشكرا للجميع

[السمح]

هلا والله بالغالي الحبيب mfahad وهذي والله الساعة المباركة وحياك بين أهلك وربعك .. وصحة وعافية حتى لو هي بالنظر ( ما صارت هذي ) ..

http://alsam7.jeeran.com/images/mixed/coffee.jpg

[mfahad]

أخجلتـنا بترحيبك يا الطيب وكلك ذوق ومفهوميه
لا وبعد قهوة ها ذي علوم الرجال والابلاش ، ولك مني زود ألف تحيه على تحياك يا السنافي
وسلامه تسلمك

[هواوي]

السمح

السمح

السمح الله يسامحك

ذا الكبسه في ذا الجو وذا الامطار وببسي بارد

اوووووووووووووووووف الان الساعه 11 بقى ساعتين على الغدا يووووووه مشوااااااااار:mad: :mad:

والله من ترتيب السفره واني داري ان اخوياك صادقين يوم يقولون انك احسن طباخ

وترى الكبسه تبان من لونها ومن لون الكبسه انها ما بقى شي في الصحن لا رز ولا طيور ولا شطه

ما شاء الله لا يجيكم شي وبعدين تقولن اعضاء المنتدى صكونا بعين;) ;)

[شوق الصحاري]

ياسلالالالالالالالالام

الصراحة صرت جوعااااااااااااان ......

شكرا لك ........

[شلفان]

الله يعطيك الصحة والعافية وطول العمر والعمل الصالح
تسلم على هالشغل السنع

[السمح]

الإخوان هواوي ، شوق الصحاري ، شلفان :

مشكورين يالغالين على المجاملة الرقيقة ، وأنا أدري إنكم كلكم أفضل في هذه الناحية ..

زيارتكم للموضوع غالية وحياكم الله ...

[الضاري]

اخوي / السمح

الله يسامحك ذبحت أخوك بالدسم من هالموضوع
توي قايم من صحن الغداء ويوم قريت هالموضوع وشفت هالصور ........ هضمت غداي والظاهر اني ابروح للمطبخ ادور حاجة تجدع بالبطن من الجوع
ومشكوووووووووووووووررر على هالمشاركة والله لايحرمنا من مشاركاتك الحلوة
وبالتوفيق انشالله.

[السمح]

هلا والله أخوي الضاري .. ومشكور على الزيارة ...

وابشر بكل ما يعجبك إن شاء الله ...

[تالي الاولين]

.


اسجل اعجابي ياسنايدي فقط لاغير



.

[العبرود]

الاخ / السمح
مشكور على هالطبخه
بس وش خليت لاهل الفنادق اللي اعرفه ان الصيد اذا كان طازه ماحد يحط عليه اي بهارات لانها تذهب نكهة الصيد خاصة وان صيدك القمري كما ان مجرد فتح بطن القمري يذهب كثير من طعمه وانا الي حوالي 20سنه
ماعمري فتحت بطن القمري ومن فضل الله ماجانا الا العافيه

[راعي الرحول]

تحياتي يا طباخ المنتدى وسلمت يداك يا فنان التصوير
وعاشت اياديك بيض كريمات يوم حركت شجون البر في دواخل زوارك
القميري من طبيعته فتنها ويوم انك زبرقته صار غالي الاثمان وصعب المنال
الله يبقيك تدري اني يوم ادخل موضوعك وان جوعان قلت اكيد اني بنقرة اللغف او بالبسيتينات
رح الله يجعل لك بكل خطوة وكل شجرة في البر اقميرية تنطرك

الحمد الله اكرمك الله تراني ما مسحت خشتي حتى اتذوق اصابعك:D ;)

[السمح]

تالي الاولين :
تسلم ياخوي على التشجيع .. والاعجاب متبادل يابعدي ..

العبرود:
مشكور ، وهذا أنا مقدم على وظيفة طباخ بالإنتركونتننتال :D ...
" ما أحد يحط عليه أي بهارات " هذي فيها نظر ... ما أوافقك عليها ...
أما من ناحية إخراج وتنظيف بطن القميري فهو بالنسبة لي أساسي لأني أكثر من مرة أجد في بطن القميري بالذات دودة شريطية ، ولعلك تفتش في المرات القادمة وتجد ما أقول لك .. فإذا كان كذلك وشيء شفته بعيني فما عندي استعداد أن أطبخ أو آكل دودة شريطية مهما كانت الأسباب ..
الله يعطيك الصحة ويلبسك العافية وما تشوف شر ، ولا يجيكم الشر لمائة سنة قادمة فوق العشرين اللي راحوا ..
شكراً مرة أخرى على الزيارة .. والمشاركة ..

راعي الرحول :
هلا بك ومرحبا .. وتقبل الله دعاءك .. وجزاك الله خير ..
والله يمكن إني ما نيب بعيد عن الأماكن اللي ذكرت ...
وش هالوصاخة فيك قم غسل ريحتك زفر من هالقميري اللي أكلته هوا .. :D

[ذيب البر]

هلاااااااااااااااااااااااا باخوي السمح مشكور على ذا الطبخه

بصراحه الواحد عصافير بطنه بتزءزء على راي المصريين

انا بصراحه ما اخفيك راعي طبخ زيك يقولونه اخوياي الي عادة اطلع معهم

ولتبادل الخبره بين الطباخين :D حلووووووووووووه اقول ما تشوف ان خمس وعشرين

دقيقه على القميري واجد يعني الدجاج ما ياخذ ربع ساعه بالكاتم وتلاقاه ذايب ولا وش رايك


تحياتي

[السمح]

تبادل الخبرات همممممممممم اصبر خل أفكر :D ...

طيب ما عندي مانع بس أصير أنا الشيف الكبير .. موافق ؟؟!!

وعلشان كذا ترى الشيف الكبير يهاوش الشيف الصغير ..

شوف حبيبي القميري يبي له على الأقل خمس وعشرين دقيقة .. علشان تاكل وانت مرتاح ..

نعم القميري يحتاج وقت طبخ أكثر من الدجاج .. وهذي حقيقة معروفة عند كل شيفات العالم .. وشلون فاتت عليك هذي ؟؟ :confused:

الدجاج ياذيب البر يبي له بالضبط 12 دقيقة بالكاتم .. ولولا مخافة الله كان أكلته من دون طبخ .. أصلاً هو منهري من كثر الكيماويات اللي يعطونه .. :o

[abwyazaid]

تصدق ياالسمح من شكل القميري والنثريه ودي أرجع للساحل ومالنا يومين راجعين منه
عسى الله يحيينا للصيد الطويل علشان نشبع من ها القميري والنثريات ولعلنا نقابلك هناك.إلا أن كانت وجهتك غير وأفضل من الساحل صيد قل لنا عنها
تحياتي؛؛؛؛؛؛

[السمح]

الله يحييك يابويزيد والحمدلله على السلامة .. وبشر عسى الصيد واجد .. يقولون هالسنة إن الصيد مهوب سيء متوسط .. نرجو أن تكون وربعك قد وفقتوا بالصيد ..
وشكراً على الزيارة يالغالي ولعلنا نلتقي إن شاء الله هناك أو في أي مكان آخر ..
حياك ربي .. وهلا وسهلا ..

[السمح]

بما أن القميري قرب وقته .. قلت ارفع الموضوع للعيال أغديهم يجتهدون أكثر ...
ويتحمسون أكثر في البحث والدوران عن القميري ..
بالمناسبة إذا طبخت القميري ترى اللي يجي لونها داكن إقرب منها لأنها فرخ وتكون ألذ وأهش من اللي يجي لونها أصفر ومنظرها زين .. لكن لا يهمك عليك بالسود .. وذمني وامدحني ..

[السرحان]

أييه يا ابو تركي تسلم والله على الطبخه الزينه وفي الحقيقه الشكل ما يحتاج ,,,,لكن الطعم ما يندرى عنه:eek: ,,, وعادة طبخات بهذا الشكل الطعم لك عليه ,,,, بعدين تعال انا ما ني شايف قميري يا خوى ,,,, طيور منتوفه وخالصه ,,,, والطيور كلها بعد التنتيف تتشابه خصوصا القوقسي مع القميري :D
وكان الطبخه بالبيت ما فيه أي علامه من علامات البر :confused:
ثم يقولون ان القميري طابخ نفسه :mad: :mad:
أنتظرك أنا من زماااان :p

على العموم لااطيل عليك خذ هذه الصور دعم فيها موقفك ,,,,,, ولا يهمك ;) حبيب ألبي:)

http://www.mekshat.com/pix/gallary/data/images/1.01.JPG

http://www.mekshat.com/pix/gallary/data/images/0025.JPG

[al-nashmi]

حبيب البي السمح يمال 10000000 عافيه تسلم على هالوصفه(الروشته):D :D لطبخ السيد العزيز على قلوبنا القميري الله يكثره في هذا الايام.
اخوي كلامك صحيح100% السمر اطعم بكثير (اقصد القميريات) لا يروح بالك بعيد؟؟؟؟؟؟؟؟؟:D :D :D :cool: .

[السمح]

السرحان : :looney:
يامال العافية .. قل آمين عسى الله يفتح على قلبك زيادة إن شاء الله وتصير تعرف الفرق بين الطيور وهي منتوفة .. أما بالنسبة لي شخصياً وكثير من الأعضاء فنفرق بين الطيور وهي منتوفة ومطبوخة وطايرة ولله الحمد .. الحكي باللي ما هوب مفرق بين القوقسي والقميري لين يصيرن بيده :flog: .. صورك حلوة مرة ، وزين هالمرة ما معهن خلط .. يعني فيه تطور ...;)
محاولة جيدة ولكنها فوق القدة عشرة متر بس .. :D :D حاول مرة ثانية ..
الله يوسع صدرك بالصحة والعافية يابومحمد .. تدري إني داخل المنتدى وخاطري مهوب اللي تبي ويوم شفت ردك هذا صرت أضحك لين بغيت أطيح ، وأنا أقول أثاري الرجال ينتظر شي عقب التعليق اللي أنت خابر .. علشان كذا أنا احبك إي والله :heart:

=================

al-nashmi :no:
تسلم والله يالنشمي .. واشهد إنك خبير بأكل القميري :D ...
سبحان الله السمر أطعم بكل شي :heart:
يالله خل بالك يروح بعيد .. وش أسوي :bounce:

حياكم الله جميع ...

[الحزين]

:light: دائما منور

:good: وطباخ بعد !!

:cool: الله يهني اللي يطلعون معك !!

:cool: ياليتني معهم !!

:( مالي حظ !!

;) لكن وين تروح !!



:love2: نجيبك نجيبك !!



:redcar: جهز حالك !!:heart: ترانا نبيك :heart: تقبل أحترامي

[السرحان]

أضحكتني بالحيل الله يسعد الله أيامك يالحبيب ,,,, احبك الله الذي احببتني فيه

خصوصا في قولك ,,,,,,(( صورك حلوة مرة ، وزين هالمرة ما معهن خلط .. يعني فيه تطور ))

أبوتركي الله يهديك ان شاء الله ,,,, زين كذا يوم صفيناهم ما بقى منهم الا 3 قميريات فقط :D :D :D
والله بموت من الضحك لفيناهم يمين يسار ما فيه فايده هن ثلاث ما في غيرهن والباقي قوقسي من الي يحبه قلبك :heart:,,,,, أضحكت علينا الناس وخليتنه فرجه:cool: ,,,,أجل ما حنه عارفين أنفرق بين القميري والقوقسي الله وكبر ,,,,, هين يا أبوتركي مردوده لك قريب ان شاء الله :( ,,,, يا خوي هي وحده صافه مع الفرج هي طاحت وطار الفرج,,, ما صارت قوقسيه وحده أطلعت علي أكثر من بيع السوق ..:p
بعدين تعال مين هذا الي مضيق خلقك لا يكون تركي ولا واحد من اخوانه :no2: قله ترى أهج وارجع مسقط راسي ,,, وياهلا ومرحبا فيك ,,,اذا ما شالتك الارض أتشيلك العيون ,,,,

رساله الى تركي الصغير ,, ,,, ديربالك أتزعل البابا ترى ما يصيد لك قوقسي بعدين :flog:

الله يخليكم لبعضكم .

[رحال]

هلا هلا هلا اخوي العزيز :heart: السمح :heart: يعطيك 1000 عافيه على هذي الطبخه الحلوه والله انك راعيها في كل شئ والحمدلله ان توني متعشي قبل لا اشوف الصور كان الحين اكلت الشاشه :D :D :D .
والله محاوره حلوه اللي بينك وبين اخوي السرحان تركت انا الصور وجلست اشوف الكلام الحلو اللي بينكم
وانا عارف هذا من زود المحبه الله يخليكم لبعض ويخلينا كلنا للمنتدى .
تمنياتي لك يابو تركي بالتوفيق والنجاح .
وتقبل تحيات اخوووووك الرحاااااااااااال

http://www.mekshat.com/pix/gallary/data/images/RAHAAL22.jpg

[السمح]

سلمت والله يارحالنا يارحال مكشات .. تدري إنك ملح المنتدى .. عسى الله يخليك يالغالي ..
ونعم المحاورة التي رأيت طرفها لها طرف أول في موضوع ثاني .. لا أنا آسف ما نيب قايل وين .. إن عرفتها بنفسك زين .. ما عرفت ما أقول وين .. :D ، ولا أخفيك إني أحب السرحان كثيراً كثيراً ..
بالمناسبة أخوي رحال توقيعك الأخير أروع من الروعة تكفى حافظ عليه ولا تغيره .. شكلك فنان بالفوتوشوب .. الله يزيدك ..
مشكور على الزيارة وما قصرت ..

[بدران]

السلام عليكم ورحمة الله وبركاته ...
بالله عندي سؤال يطرح نفسه...
من وين صدتوا هالقميري كله؟
لا تحسبني ابنظلك الله يبارك الله فيه وما شاء الله عليكم.
لا تلومني لي 3 ايام بالعصل والارطاوي ما صدنا الا6 قميريات والا الباقي خاضور
وصفارى ودخل يالله اسفين على الازعاج.

[السمح]

هلا بك أخوي بدران ..
عاد تصدق إنه من نفس المناطق اللي ذكرت .. أو حواليها ..
بس الصيد أرزاق يوم تصيد :) واليوم الثاني يخلف الله :mad:
مشكور على الزيارة ومرحبا بك يالغالي ..

[نجمة سهيل]

ماشاء الله عليك اخوي:heart:ابو تركي:heart:شوفتنا لمثل هالجلسه والمشكله انك قريب من عندنا(مسوي بيقلد) ولاتتصل علينا تعزمنا على الكبسه .انشاء الله الجايات اكثر .ويعطيك 1000000000000عافيه على هالكبسه .
~~~~~~~~~~~~~~~~~~~~~~~~~~~~~~~
تقبلوا تحياتي___
>نجمة سهيل:heart:

[هلا بريدة]

الله قل آمين أوسع صدرك والي ردو عليك بالعافية..........
ياسلامممممممم حقيقة عجزت أصك خشتي من الوناسه وذكرتنا أيام الشباب والطلعات
هالحين بساقة هالعيال عسى الله اخليلنا أولكم
وسلامتكم .

[السمح]

والله إني تأخرت عليكم ياربعي بالرد .. :confused:
نجمة سهيل :
حياك ومشكور يالغالي .. وابشر المرة الجاية من يقول لك والإخوان تفضلوا .. لكن المشكلة بالقميري اللي بيكفي كل الشباب :D بس ما عندنا مشكلة إن شاء الله إنك تبي تجيب القميري وتقول يالله ياعيال .. :D

==========

عبدالعزيز :
لا تقول كذا أخوي عبدالعزيز توك شباب .. علشان عندك ولدين صرت ما تقدر تطلع ولا تروح ولا تجي ما صارت ياخوي .. :D خل البزران بكبد أمهم وطرب عمرك بهالبران من دون تقصير بحقهم .. عسى الله يخليك لهم ويقر عينك بهم ..
حياك يابعدي وهذي الساعة المباركة ..

أغلى تحية ..

[هلا بريدة]

إيــــــهه يالسمح والله إنك صادق .
لكن الجسم ماهو الجسم والجلاده ماهي الجلاده خربتنا المدنية الله إخلف
وبعدين إمنول لاطلعت للبر ماتلقى إلا إرجال مثلك أوشرواك راعين إعلوم أومراجل لاكن هالحين لارحت للشعبان ماتشوف إلاإصبيان الواحد منهم إمسندن الشوزن كن فيها علم وهو ماغير إذير الطير عليك
أبعدين الطير قل وتوسع مساره ماهوب مثل إمنول حول الديره والله إننا نجيب السبعين والميه بالضحوية
لا والبارود بعد أم صتمه (( حبه )) لكن حنا تكفينا بالوقت الحاضر أعلوم الطير أوبس أبعدين إمبارك عليك الشهر الشريف أوسلامتكم .

[ابن شارخ]

هلا وغلا اخوي ابوتركي

الله يصبحك بالخير

بيض الله وجهك على هالموضوع الطيب ، والصور المعبره
عز الله انك حركت فيني عروق مبطي ما تحركت وشوقتنا لطبخات البر.

موضوع شيق جدا وانا الحقيقه اول مره ادخل لهذا المنتدى لكن فكرته جدا ممتازه.

اسأل الله ان يوفق القائمين على هذا المنتدى الرائع لما يحب ويرضى

تقبل تحياتي

اخوك

ابوناصر

[السمح]

أعتذر لتأخري بالرد لأني والله ناسي هالموضوع لين قرب وقت القميري مرة ثانية ..

أبوعبدالعزيز :
والله إنه في أحيان كثيرة يخالجني شعور مشابه لما تشعر به .. ولولا حب البر والمقناص وريحة النفل ودخان الرمث ما طلعت ،، لأن الصيد ما عاد هو مثل أول وما عاد فيه خلا .. يخلف الله علينا ..
مشكور يابعدي على التفاعل ..


ابن شارخ :
حياك الله .. وكل الغلا ياعيوني ..
ويشرفنا وجودك في المنتدى ..
بارك الله فيك .. ومشكور على الزيارة ، وإعطاء هذا الموضوع جزءاً من وقتكم الثمين ..

أحلى تحية ..

[راعي المدّى]

اخوي الغالي ابو تركي ... السمح
وش أقول يابوتركي والله إن حجري امتلأ سعابيل من هالعرض الشيق وهالمنظر اللي يفتح النفس .... بس لاتعلق علي وتقول انت بق....... وش اسوي كبسة هالقميري طيرت عقلي وسعابيلي معه بعد
تسلم والله يعطيك الف عافيه

اخوك :
راعي المدى
sishaye@hotmail.com
وسلملي عليك

[المكحل/ابو]

السلام عليكم
تسلم والله على ها النثرية

لكن مقبل انا على غداء بنات الديك ( سبحان الى خلق او فرق )
توقع ها المقادير ما احصلها عند بندة كلها على شرط؟

الله يخلف على السنسن الماضية ايهههههههه
الله يعطيك الف عافية

[السمح]

راعي المدى :
صحة وعافية وجعل مهابيطة الهنا ..
لو أنه بس بالشوف .. عطني الفرصة ياعيوني حتى يصير حقيقة ..
مشكور وما قصرت على الزيارة ..

=========

المكحل/ابو :
والله شكلك تتكلم من حرقة على سنين مضت ..
أيام عز القميري .. أيام ما تجي الساعة 10 إلا معك فوق الثمانين ..
راحت .. ولن تعود إلا بأمر الله ..
أقول ترى بنات المذن زينات .. وخاصة هالايام ..

أحلى تحية ..

[...الطوقي...]

سلمت يمينك يالسمح
ابداااااااااااااااااع
قميري وش خليت:good: :good:
الله يعطيك الف عافيه
وننتظر ابداعاتك يابو تركي











تحياتي لك
...الطوقي...

[rfvaz]

اسلام عليكم ورحمت الله وبركاته وبعد
ال الاخ العزيز ان الطبخه الي علمتنى عليهى قد اعجبت الاخوان وياليت الا تقاطعنى
بطبخك الشهي واتمنا ان تكون اخي او ابن عمي لكي لافارققك ياطبخ ماهر
:dance: وشكرن

[السمح]

الطوقي :
يامال العافية يالغالي ..
والله إن اللي مثلك يشجع على الكتابة والاستمرار ..
مشكور وكثر خيرك على الزيارة ..

==========

rfvaz :
تسلم ، وهذا من ذوقك وأخلاقك العالية ..
واعتبرني أخوك ، بس قل لي إذا جا وقت القميري وصدت لك من السبعين وفوق أجي أنا وربعي وأطبخ لكم ذيك الطبخة اللي تاكل إصابعك وراها ..:D

أحلى تحية ..

[سيد القصر]

يابو تركي عشرين قمري لاربعه ماتسد الله يطول عمرك
وبعدين عندي رز احسن من ابو كاس
ابوي يسميه رصيص وشاري كيس خاص لعزايمه لان الشيبان مايحبون الا هذا النوع
لانه يجيك بعد الطبخ متلاصق كنه عجينه
يحبونه الشيبان خاصه لصبوا عليه المرقه
ياويحي عنهم راحت فيها ابطونهم:confused: :confused:
وبعدين كفو والله يابو تركي , لاشفت الرجال يساعد ربعه بالمكاشيت وهو الذرب اللي يعدي
ويشيل وينزل فسلملي عليه

[أيمن]

( لقد تم إضافة هذا الموضوع إلى المواضيع المميزة والشيقة في هذه الخيمة (http://www.mekshat.com/vb/showthread.php?s=&threadid=8667) )
مع الشكر للجميع ،،
http://www.mekshat.com/pix/upload/images/flow12.gif

مشرف الخيمة

[القروي11]

مايسمح امرك يالسمح وتعزمنا علي الصحن ابذوقه بس

[الطعس الذهبي]

متى تعزمنى عليه

[د.الكاشت]

شيف وحنا ماندري

[المطلق]

يعطيك العافية أخوي السمح

شرح واضح وضوح الشمس

والصور رائعة جداً

[yazeed421]

السمح السلام عليكم أنت بس جب القميري وزهل عمرك بالطبخ أن بغيته على حطب وأن بغيته على غاز وأن بغيته على كهرب بس خلنا نشوف القميري هذه السنه والله يرزقنا الخير ويرزقنا شكر النعمة

[كبريت]

كبسسسسسسة على الكيييف يالسمح

والله يرزقنا ها السنه من القميري ووياك ومن قراء ومن امن ......

[واحد من البشر]

الله يعطيك العافيه وشذا وشذا وشذا الزين هه
الله لايضر اليدين اللي سوتها بس أبسأل وين القى هالحميمات فيه هي تباع هي

[هوى المنسي]

الف شكر بصرحه شهيتني

[kal]

جزاك الله خير واليوم انا طارد جول قميري وماطرحت منه ألا 13 قمريه نعمه يالله لك الحمد

[متيم البر]

أكثر من رائع

هل يصلح الحمام الزاجل بنفس الطريقة؟؟

مشكووووووووووووووووووور

[maxima20009]

بالعافية وعساة مداخيل العافية ومشكور على الشرح والصور

[راعي ساموده]

بصراحه يالسمح

شف تاريخ كتابة موضوعك لكن ماشاء الله الى الان متسيد ومتربع على القمه ( أجمل طبخة قميري ) بدون مجامله

[سبيع الغلباء]

اخوي السمح...

بديت اسعبل

مشكور على الزين

[المرزم1]

اذنبتو فينا يالربع

[ذيب999]

سلام عليكم ورحمة الله وبركاته

انا متابع للمنتدى من اول مافتح تقرريبا

وكان هذا الموضوع بداية دخولي وتعلمي للطبخ

4 سنوات تقريبا او تزيد شويه

كنت ادرس في الثانوي وطبعت الموضوع واطبق الطريقه

والله ذكريات

يعطيك الف عافيه اخوي السمح

[الساخن]

شغلك شغل والله شهويتنا

[دهران]

الأخ الغالي / أبو تركي .

قل يالله إنه يسمح دربك ويوفقك من وين رحت لوين جيت آمين .

موضوع (( يهيّض )) الله لا يهينك ولا يصغرك .

مشكور وتقبل أعذب وأرق تحية .

[أمطار الخريف]

بيض الله وجهك ياخوي السمح على هالطبخه اللذيذه جدا

[شاص2006]

عافاك الله ومشكور وماقصرت,,,,,,,,,,,

[دبوس 9]

يعطيك العافيه على هالصور والموضوع

[الطالب]

:no: اخوي السمح يازين طبخك لو سلمت بس من الزيت

[الغزال الشارد]

بيض الله وجهك وماقصرت على هذا الطبخة

[مضرب المثل]

تسلم اخووووووي على الكبسه الحلوه

[ẤℓqηαṣṤ ««•]

مشاء الله بالعافيه
تقبل تحياتي

[عايد الحربي]

ماشالله
صور حلوه

[راعي الكبسات]

الله يعطيك العافيه علي الكبسه الحلوه

تحياتي راعي الكبسااات

[عنبري]

ماشاء الله الموضوع له اكثر من 8 سنين مادري من وين طلعتوه