طلب (تكفووووون لولا ظروووف الوقت ماقلت تكفى)

[رحال ملهم]

غريب ملهم من القريات يسلم على اعضاء منتدى مكشات ويقووووول ابي صوووور
لقرية ملهم ديرتي الحيبية التي تقع شمال الرياض 80 كيلوو وشرق حريملاء 25 كيلو
وش اعلووومها من امطار وخير تكفووون ابيها حالا الشووووق ذبحني
تقبلوووا تحيات ابو غريب
ولكم جزيل الشكر

[k.a.z]

والله انا من القصيم وكلمت لك ناس اعرفهم من أهل ملهم وساكنين خارج ديرتهم ولا يدرون نزل مطر بملهم وإلا لا!!!! .
عمومًا اجتهدت ولم احصل نتيجة وإنشاء الله يجهزون الشباب لك مطلوبك.

[رحال ملهم]

يعطيك العافية يالطيب

[صيف القصيم]

لوني غريب من قرية ملهم زودتك بصور سواء جهاالمطر والى ماجها من شان كلمت تكفون ولاكني بعيدوالمعذرةو القريب منها انشالله يشاهد نداك ويزودك بالمطلوب وتحياتي لغريب ملهم والله يرد غربتك

[رحال ملهم]

معقوووولة كل هذا المشاهدات ولا رديتوووو
لكن املي فيكم كبير

[رحال ملهم]

هذا والله من طيبك ياصيف القصيم لاعدمناك

[رحال ملهم]

والله مايجني النوم لين احصل صوووورة لديرة
كلن يتصل علي ويقووولووون وينك يابووو غريب عن لامطار
والخير

[رحال ملهم]

معقوووولة مافي أحد يعرف ملهم ولا ماهو حوووولها
الله يكوووون في العووووون

[طبعي شمالي]

والله مالومك

لي سنتين مارحت الديره احس اني لي سنتين ماشفت اهلي

[رحال ملهم]

والله أني كنت الوم اللي يضيق أن غاب خله**بين جربت المحبة والفراق وقلت توووبة


وهذه والله حالتي ياعالم

[العون]

أخوي غريب ملهم إن شاء الله إنه سايلة الشعبان عليها ..
وإذا ماسالت اليوم بكرا إن شاء الله تسيل ...

[رحال ملهم]

يالعوون انت تعرف اذا جاء المطر وش يكووون شعوووورك ؟؟؟
فهذا شعووووري مارتاح لين اشووووف صوررر لها

[الذيب444]

والله يغريب ملهم انا مثلك بعيد عن الديره ولا ارتحت حتى سمعت الاخبار عنه وجاني صور .
بس ماقول الله يعينك ويصبرك بس انشاء الله سايله لانه نزل خير على الديار كله تقريبا وشباب مايقصرون ,
تقبل مروري.

[ابو فيصل 99]

والله لونها قريب اقل من300كيلو لااروح بنفسي واخبرك عن الاحباب ولديار
لاكن البعد شن 500

[رحال ملهم]

لاهنت يالذيب
وانت يابو فيصل ماتقصر قول وفعلد

[رحال ملهم]

كل هذا المشاهدات ولااحد حوووول ملهم

[البديري 2008]

وااله يذيب أني ماعرف ملهم والا اروح أصورها للك

[الذهب الأبيض]

طيب أخوي أهلك وربعك وجماعتك مافيهم أحد معه كميرة جوال ويرسلها وسائط أو ويدخل على الإنترنت وينزل بعض الصور لو يرفعهن على غير موقع مشكات إذا كان غير مسجل فيه ، ترى المسألة أسهل مما تتصور ، لكن الكلام هي سايلة أو لا ؟ أتوقع إنها سايلة لأنك تقول إن كل يتصل علي ويقول وينك ياغريب عن الأمطار ...

لك تحياتي ،،

[أبوتركي الخالدي]

هلا بك أخوي غريب ملهم

وانشاء الله مانتب غريب
بالنسبة لملهم أنا مريتها أمس الأثنين قبيل صلاة العصر وأبشرك الديره ممطوره

وجاها خير

طبعا المزارع الي قبل السد اغلبها مليان من المطر

السد ماهناش الا سي بسيط
أما الدير القديمة فهي كذلك ممطورة بعد ومليانه مناقع
أشوف فيه كم شلال منها الي مازال يصب ومنها الي قد صب وانتهى

بعد ما تعديت الدير قل المطر والمناقع كذلك قلت بشكل ملحوظ
إلى أن ارتفعنا شوي للمخطات الجديدة

وواضح عليها انه جاها صبة قويه أكثر من الي قبل

طبعا الي جاه مطر قوي في ملهم

هو الي من جهة حريملاء قبل السد
وكذلك المخطط الي فوق بعد جاه مطر زين وقوي

أرجو أني أفدتك والمعذرة في عدم كمال الوصف بالنسبه للنخيل والمزارع وغيره

مع تحياتي أخوك أبوتركي الخالدي

وهذه مع البيعة
اضغط هنا لتحميل ملف .mp4
(1.04 ميقابايت) (http://www.joreyat.org/file/l36p617vpg7p/)

[F A H A D]

الخير عام ...امس انا بملهم العصر ..... والمطر قوي عليهاعسى الله ينفع بها ان شاءا الله ....
شعيب ملهم ماشي ومشيه قوووووي بالحيل

وهذي صوره
http://www2.0zz0.com/2008/11/04/09/511378791.jpg