نويت اشري كمرة رقمية وابي رايكم

[وشــــام]

بسم الله الرحمن الرحيم

السلام عليكم ورحمة الله وبركاته

الاخوة اعضاء مكشات انا ابشاوركم وابي رايكم .....

نويت اشري كمرة رقمية تكون رخيصة من الـ 350 الى 500 ريال ( تراي طالب وداج ) ولقيت اكثر من نوع وكل محل يمدح اللي عنده !!!!!!!!!!!

انا براسي نوعية بس لقيتها بـ 1300 ريال طبعاً مسحتها من راسي ( X )

لكن حصلت كميرات تايوانية و صينية وبنفس المواصفات :

3 ميقا بركسل
16 ميقا بايت
تسجيل مقاطع فيديو
اظهار الصورة على التلفيزيون
شاشة لعرض المقاطع

ولكن السؤال :

ما أفضل الانواع الرخيصة ؟

كم مدة البطارية ؟

اللي جرب الانواع هذي ماافضلها من ناحية الضمان ، الصيانة ؟

ايهم افضل اللي تعمل على الشحن - بالكهرب - او البطاريات ؟

علماً اني افضل الكهرب ولكن بعض الشباب ما نصحون بها - يخافون يخلص شحنه بالبر -

يوجد نوعيه اسمه Genius تعمل بالبطاريات وله فتحة لتركيب محول للكهرب لكن ما أدري هل تشحن بالكهرب مباشرة او لازم اشري البطاريات اللي تشحن ؟ وكم سعر البطاريات ؟

واخيراً يوجد نوعية اعجبتن قيمته 420 ريال وتشحن بالكهرب لكن عيبه 2 ميقا بركسل ولا يركبله بطاريات والشركة المصنعة اول حرف E والاخير Q ( الوكاد انه 4 حروف وتابعة لشركة ايسر ) ......

ثقلت عليكم لكن المثل يقول:

مكشات مكشاتك .. يمن الدهر شاتك



وسلامتكم .
..
...
....

[صقر]

اخوي خشم الهامل

اذا كنت تبحث عن الرخيص فيه كمرة استعملتها رخيصة وزوينة واسمها (orite) وسعرها 400 ريال
3 ميغا بيكسل
تصوير فيديو /اوديو
تشتغل على حجرات صغيرة
ذاكرة 7 ميغابايت
ويلزمك شراء حجرات اللي يشحنن وشراء شاحن حتى تسلم من نفاد الحجرات

وقابلة للزيادة ممكن تحط فيها ذاكرة .

وهذي بعض الصور اللي صورت فيها.

http://www.mekshat.com/pix/upload/images3/bisbas2.jpg

http://www.mekshat.com/pix/upload/images3/nega2.jpg

http://www.mekshat.com/pix/upload/images3/nega3.jpg

[وشــــام]

السلام عليكم ورحمة الله وبركاته

اخوي صقراشكرك على الرد وبالنسبة للبطاريات وين تباع بالقصيم وكم سعر الحجر الواحد .

بالنسبه للمحول هل يوجد نوع مخصص للكميرة او ما هو النوع اللي تنصح به .

[المترو]

هلا وغلا
واليك بعض المواضيع عن الكمرات كانك ما مريت عليها بالمواضيع المميزه وهي مفيده بنفس الخيمه

وعن الشواحن الموقع فيه الكثير عن هذه الامور قم بالبحث عن المطلوب وتجده ان شالله في مكشات
واليك الرابط
سوني وكانون لا تفوتك ترها طيبه بالحيل
اما سمسونق فلها شواحن على السياره والبيت وبطاريات لثيوم والكمره نفسها ماهي غوليه 500 وتحت لكن ما احد جربها جديده بعماير الراجحي بالبطحاء تجد الرخيص والغالي

http://www.mekshat.com/vb/showthread.php?s=&threadid=5617

[مطحن]

شف اخوي تبي الطرب خذ السوني وتتدعيلي بس تراه تبي ميزانيه يعني فوق 1200

تصويره قزازه توحشششششششش ......

وبالنسبه للعاديات الرخاص اهم شي لا تقرب الكرييتف تراك تتحسف ..... رسم ولد اخوي للمنظر ازين من التصوير به .........

بالنسبه للشاحن بوه كاسيو شاحن ومعوه 4 حجرات قابله للشحن ....... سعروه 180 اللي انا شفت ,,,,,,, وترا الحجرات القابله للشحن عموما غاليات انا شارين 4 بـ 60 ريال كاسيو

ايه صح معلومه مهمه

بالنسبه للكمرات ترا بعضهن ما تقبل الحجرات العاديه المتواجده بالسوق لازم نوعيه معينه هاللي تو انا اقول لك عنهن القدره حقتهن اعلى وبوه انواع قابله للشحن مثل كاسيو وسوني وبوه انواع ما تشحن لكنه ذات قدره عاليه مثل بناسونيك ارخص شوي بس ما تنشحن ثانيه

وانت استخر والله يوفقك للي بوه الصالح

[سامر]

انا عندي كمره منوليتا z1وهي ب1700 و3.2 بكسل وزوم بصري ورقمي 40 وتقدر تركب اي ذاكره للصور معها واللي جاي معها 16 ميقا بايت وشريت 256 ميقا لحالها وكلما زادت الذاكره زادت قدرتها الاستيعابيه للصور ولكن يزيد السعر بعد وتصور لقطات فديو وكل ماتكبر الذاكره تزيد المده واصور بها 5 دقايق فديو واما البطاريه فهي اصابع ولها جهاز شحن ولها جهاز اخر للتشغيل في البيت واما الشاحن والحجر فدور لك الافضل وهو القابل للشحن وترا غالي 4 ب50ريال ولاتاخذ الا الشركات الممتازه مثل gp وخذ نوع nimh واحرص ان القوه تكون عاليه مثل 2100 او 1800 ولاحظ انه يكتب عليه عدد مرات الشحن للحجر up to1000 يعني ان الحجر ينشحن الف مره بدون مشكله وكلما زاد الرقم احسن وتأكد ان الشاحن اللى بتشريه يدعم او يقبل شحن هذا النوع من الحجر


هذي صوره من هالكمره




http://www.mekshat.com/pix/upload/images3/PICT001~3.jpg

[راعي عنيزة]

اخوي يقولون عط الخبز خبازه ولو اكل نصه

لذلك شوري عليك لا تستعجل بشراء كاميرا رخيصه جودتها ما راح ترضيك وبعد مده تقعد تدور غيره وتتخسر مرتين


لذلك اقول اصبر لحد ما يرزقك الله واشتري كاميرا من الماركات المشهوره مثل سوني او كانون او نيكون واترك عنك الرخيصات جينيس وكرييتف وطقتهن تراهن خرطي بالتصوير

وكانك تبي الشور فيه كاميرا حليله عليه عرض من الوكيل وتنفع لك
نيكون 2100
به زوم بصري 3 وزوم رقمي 4 وبيكسل 2.1 <<< بيكسل صدزي مهب مثل هك الصينيات يحط لك 4 بيكسل وهي ما تجي 1 بيكسل
ويجي معه هديه كرت ذاكره 32 ميجا وبطاريات وشاحن والسعر 999 ريال
وضمانهم زين ومجرب وناظر الصور الي بمواضيعي كلهن مصورهن بكاميرا نيكون مواصفاته قريبه لذي


وانت ابخص يا خلفهم

http://images.bestbuy.com/BestBuy_US/images/products/5351/5351219_ra.jpg
http://images.bestbuy.com/BestBuy_US/images/products/5351/5351219_ba.jpg

[وشــــام]

بسم الله الرحمن الرحيم

السلام عليكم ورحمة الله وبركاته

الى الاخوة :

راعي عنيزة

سامر

مطحن

الرحال2003

صقر

اشكركم على الرد والمشورة ....

كلامك يا راعي عنيزة صراحة اقنعن وجازتلي الكمرة هذي لكن هل هي اخر اصدار او يوجد افضل منه





وجزاكم الله خير

[فرد حمزة]

سامر أنا عندي نفس كمرتك وهي ممتازة بالحيل :D:D:D

تصدق أني أدربل فيها :D قولو ما شاء الله عليها وزم ماهو بصاحي عموماً هذي صفحة بطاريات شف قوتها وعدد شحناتها :)


http://www.imaging-resource.com/ACCS/BATTS/images/SANYO2100.JPG

http://www.imaging-resource.com/ACCS/BATTS/images/UNIROSS2100.JPG




وهذا رد لي سابق مقتبس


Originally posted by فرد حمزة
السلام عليكم ورحمة الله وبركاته




نوع الكميرا منولتا Z1
http://img.dpreview.com/reviews/images/minolta_dimagez1.gif

ومن مميزاتها
الزوم فيها الأوبتكال ( الحقيقي ) 10× والزوم الديجتل 4× المجموع 40×
وشوف الزووم يعادل كم في الكاميرات العادية
http://www2.konicaminolta.jp/english/products/consumer/digital_camera/dimage/dimage-z1/img/02_il01.gif
والميقا بيكسل 3.2
وهي كميرى رياضية تتميز بسرعة الغالق وتصوير اللحظات السريعه
ولها مواصفات ممتازة ،
لكن مما شدني لها رخص سعرها بقريباً بما يقابلها والتي تتفوق عليهن بالزوم
فسعرها عند الوكيل 1700 ريال


×=×=×=×=×=×=×=×=×=×=×=×=×

[راعي عنيزة]

^
^
40 زوم اللهم صل على محمد :D الظاهر انك تقدر تشوفن بعنيزه وانت قاعد ببقعا :D :D



اخوي خشم الهامل
الكاميرا ما بدا تصنيعه الا بشهر فبراير 2003
وبالطبع فيه افضل منها ولكن كل ما زادت المواصفات وخصوصا البيكسل زاد السعر
لكن اقدر اقولك انها من ارخص الزين ، وبالسعر ذا ماظنك تحصل سوني او كانون بمثل مواصفاتها ولا تنسى ان معها الذاكره والبطاريات والشاحن ضمن السعر الاساسي ، لان بعض الشركات تحسبهن عليك بزود قروش


وفيه نوع اسمه 3100 نفس مواصفات وشكل ذي ولكن فرقه انه 3.1 ميجا بيكسل وسعره عند الوكيل 1499 ريال

وهذي تجربه له
http://www.dcresource.com/reviews/nikon/coolpix3100-review/index.shtml

وترا الوكيل يقال له العبدالواحد وله محل بالرياض بالعقاريه وذا تلفونهم 4191983


عموما انت اسئل ولا تستعجل وشف بالرياض الوكلا واكسترا وجرير وكمبيومي عشان تضمن ان اختيارك للكاميرا يصير سليم وتعيش معك وقت طويل

وناظر ذا المنتدى المتخصص واسئلهم بعد
http://www.adigicam.com/vb/

[وشــــام]

بسم الله الرحمن الرحيم

السلام عليكم ورحمة الله

اتشرف برد الاخ : فرد حمزة وما قصرت على اعطائي المعلومات الهامة حول بطاريات الشحن ....

والى عموم الاخوة وخاصة راعي عنيزة عندي استفسارعن كميرة hp مواصفاته :

3.1 بيكسل
16 ميقا بيت + ممكن اضافة ذاكرة اضافية
بها زوم
خفيفة الوزن وصغيرة الحجم جداً
تستهلك بطاريتين صغار
به فلاش ايضاً .....

السعر 449 ريال

وعندي سؤال آخر : وش صناعته لانه شركة مشهورة ؟

عند مكتبة جرير في بريدة .