والله يا انا بلشة بلشه لاراحت بلشه ولا جات بلشه

[راعي الفروه]

الله يمسيكم ويصبحكم بكل خير خذيت منحه سياره من الدوله وهي من نوع لومينا طبعا مستخدمه وديتها لصناعيه ابي اصلح حاجات فيها لقيت قطع غيارها نار اعوذ بالله المهم الي يخبر لي قطع مستعمله مثل الدينمو والسلف والكمبروسر المكيف يفزع لي لاني لوشريت الي محتاجه له السياره بكون خسران لان قيمة القطع اغلا من قيمة السيارة اوحد يخبر تشليح عنده قطع الغيار ويكون سعره مناسب يعطيني الوصف الله لا يهينكم الفزعههههههههه

[عاشق الفيضة]

ما أقول إلا الله يكون في عونك أهل التشاليح ما ترحم

[ذيب طي]

اخوي اللي اخبره ان السيارات اللي تمنحها الدولة تكون صيانتها على حساب الدولة اوالجهة اللي تعمل فيها واعرف عشرات الاشخاص منحوا سيارات وتكون الصيانة عليهم حتى السمكرة ..

[راعي الفروه]

عاشق الفيضه تعوذ من ابليس الله يكفينا شر التشاليح
ذيب طي بالنسبه لصيانة السياره على حساب الدوله اذا كان مسلمينها لك في مجال العمل اما اذا منحوها لك واعطوك استمارتها خلاص ماعاد لهم فيها علاقه ومثل ماقال المثل لون فيها خير ما رماها الطير

[رجل كريم]

الدينمو والسلف والكمبروسر المكيف



انصحك تاخذ الدينمو والسلف والكومبرسور الى مصنع لف الاسلاك .. وهم يسوون لك نفس اللفة النحاسية الاصلية وبأقل من نصف السعر وسبق ان احد زملاء العمل سواها لكمبروسر شيروكي بخمسمية ريال وقيمته جديد يوصل الالفين او اقل بشي بسيط .


تحياتي .,

[هـدد]

معليش ياخوي انت غلطان الي تقدم على لومينا او اي سياره امريكي شوفة عينك المقلب لكن هذا درس ان الواحد يقدم على تويوتا اونيسان.(الله يعوضك)

[راعي الفروه]

دكار الله يطول عمرك هل محلات اللف تصلح الدينمو اذا كان الفحمه خربانه ويصلحون الكمبرسر عطني خبر جزاك الله خير مستناك

[رجل كريم]

دكار الله يطول عمرك هل محلات اللف تصلح الدينمو اذا كان الفحمه خربانه ويصلحون الكمبرسر عطني خبر جزاك الله خير مستناك



عمرك طويل في طاعته ان شاء الله ..

محلات اللف تغير لك فقط السلك النحاسي اللي عادة يكون السبب الرئيسي في تغيير الدينمو كاملا .. والكمبروسر نفس الشي . اما الفحمات فامرها هين ماهي بغالية لو تشريها من الوكالة او ترهم لها .. دائما لما يقولك الكهربائي ان الدينمو او الكومبرسر يحتاج تغيير فهذا يعني ان السلك النحاسي تالف والوكالة ماتبيعه لحاله , لازم تشريه كامل والكامل وجهه سبحانه . فانت روح لمصنع لف الاسلاك وعطهم القطعه ويفصلون اخوها بالظبط وتنتهي مشكلتك ان شاء الله ومبروك الموتر .

تحياتي .,

[Magellan]

لا تبتلش ولاهم يحزنون ..
ردها لهم إلا إذا كانت عطيه ماوراها جزية فالله يبارك لك فيها
ولاتهتم من كلام العذال والخرابات
السيارة تحتاج لعناية فقط أكثر من غيرها... يعني ماتبي لها رجل حارة بالحيل
بس أهم شيء إنها نظيفة مهيب مكروفة بالحيل وهذا يبدولي غير مطابقة للي معك لأن شكلها دورية سابقة
عموما هذا موقع مختص باللومينات ، وموضح فيه قطع الغيار وأماكن بيعها وطب وتخير

http://www.ss4ever.com/vb/

[بيبسي]

الله يعينك

[طبيب بيطري]

الله يعينك

[ملاحق السيول]

الله يعنك دور القطع الزينه بس إذاكانت غاليه رجع سيارتهم لهم والله يوفقك إلى كل خير

[بومعطش]

موديل السياره كم؟؟
ووينك بأي ديره؟؟

[هاوي باترول]

اخوي فيه واحد اسمه تشليح ابو احمد بالنسيم وين بالظبط ما ادري اللي يشتغل به يقاله ابو احمد اما التشليح اسمه مدري





اتمنى اني افدتك