يا أهل الباترول الحرارة وضعف العزم ساعدونا

[abuktab]

السلام عليكم ورحمة الله وبركاته....

حيا الله الاخوان ....



عندي استفسار عن مشكلة بموتري فتك 2002

المشكلة الاولى الحرارة ترتفع دايم وخاصة اذا شغلت المكيف

واذا طفيت الموتر بعد ما أخذت به مشوار والحرارة مرتفعه

أصبر لي شوي ثم أجي وأثر الماء بالليات يغلي ويضرب كأنه منضغط ومسكر

عليه شيء والدوره حقته موقفه غرينا البلف وصيخناه ومازالت المشكلة

موجودة وتنزل الحرارة اذا كان الطريق مابه وقفات واذا صارت السرعه 140 ترجع للطبيعه وكل ما زدت الدوسه تزود الحرارة طبعا وعلى حسب

درجة الحرارة بعد .

2- ضعف العزم والتقطيع وبدت تجي تدريج لأني بعد ما وضبته قبل سنة

وزود طلع مثل الفل وكشت عليه وبعد فترة عزمه بدا يقل شوي شوي

حتى الحين يالله يجيب 160 أو 170 واما قبل يجيبهن وانت ما تدري,

وحاليا يقطع وضعيف عزمه والمكينه اذا تعدى ضغطه 3 تحس انه فز

يعني داس له شوي ولكنه موهوب مثل أول

فيا ليت اللي عنده حل يعلمنا ...

علما بأن القزوز فيه تبي تغيير لأنه طلعت صوت انه منكسره شوي ولحمته


والحين رجعت ثانية واللي أتوقعه أنا ان من أسباب الحرارة القزوز عشانهن

بهن شطوب وأما ضعف العزم أتوقع انه بالكنداسه وما جاورها وممكن من

علما بأن البواجي غيرتهن وما زالت العزم دمار

[ضلع الجنينه]

السلام عليكم
بنسبه للحراره ماعندي خلفيه عنها اما ضعف العزم سولها تصفيت مكينه
يعني فلاتر وبواجي وصفايات وغيرها
تحياتي

[أبوعمران]

بالنسبه للحراره يبيلك تغير البلف وتصييخ الرديتر وتماتيك المروحه


والعزم اتوقع البخاخات عندك فيها بلا

[صقر20]

علما بأن القزوز فيه تبي تغيير لأنه طلعت صوت انه منكسره شوي ولحمته

إذا إنشعرت القزوز ماينفع التلحيم
الله يعينك تشتري جديد
ترى هي سبب ضعف العزم والحرارة
موفق أخوي

[طحنون]

الله يعينك على الورش
بس النصيحه انك لا تستعجل في اتخاذ قرارات التصليح
اهم شي تعرف العله اول شي لف على كذا ورشه وخذ الزبده
وفحص الكبيوتر اتركه يولي لان راح يطلعلك انه يبيله تصفيه والدعوه كلها حساسات او وزنيه ديلكو يعني شغلات ماتاخذ نصف ساعه شغل وانتبه من الورش يستغلونك او يخلون سيارتك حقل تجارب
؟؟؟؟؟؟؟؟؟؟؟؟؟؟؟؟؟
والاعضاء ماراح يقصرون معك مثل ماقصرو معي
.................................................. ..........
صارت لي مشكله في موتري راجع الرابط

http://www.mekshat.com/vb/showthread.php?t=142243

[الظافر]

اخي العزيز تأكد من خراطيش الماء وخصوصاً الذي من السفل الارديتر انا عندي نفس السيارةونفس المشكله وغيرت بلف الحرارة و غيرت الخراطيش والقيت الخرطوش الموجود تحت خربان علماً ان شكله زين بس تضغط عليه تحس انه يتكسر من داخل وإن شاء الله انه ضبط

[الحاتمي1]

السلام عليكم ورحمة الله وبركاته

اتوقع لو تلغي البلف الحراره احسن وريح راسك
وسالفة الحراره تاكد من خرط راس المكينه عند التوضيب هذا يعود على الورشه الي توضب عندها
والتقطيع يمكن يعود من السلاك البواجي لانها ما تتحمل الحراره
والسفاري نااااااااااار بالصيف وهذا مفروف
والله يوفق الجميع

[ابن بدران]

المشكلة الاولى الحرارة ترتفع دايم وخاصة اذا شغلت المكيف

واذا طفيت الموتر بعد ما أخذت به مشوار والحرارة مرتفعه

أصبر لي شوي ثم أجي وأثر الماء بالليات يغلي ويضرب كأنه منضغط ومسكر



وعليكم السلام ورحمة الله وبركاته

بالنسبة لغليان الماء وتحصله يطبخ بقربة الأديتر
هذي لها سبب من اثنين :

1- رأس المكينة فيه عله

2- غطاء الاديتر يبي له تغيير (وهذا الأقرب وصارت معي)

ومثل ما قالوا الأخوان شيك على ليات الأديتر كلها احتمال تكون منتهية وتنسفط مع زيادة سرعة المكينة ولا يمشي بها الماء زين ..

والله يكون بعونك

[أحب القمرا]

اخوي الكريم
غير غطاء الأديتر قبل تسوي أي شي وبتنحل المشاكل كلها باذن الله تعالى
(نصيحة مجرب)

[سوبر152]

رأس المكينة فيه عله
غطاء الاديتر يبي له تغيير
تأكد من الكنداسة لاتكون منسدة
وجه الراس
وزن البلوف
تماتيك المروحة

[abuktab]

أخوي طحنون أنا شايف موضوع وراد عليك أبي منك تصور الاماكن اللي أنت

مزينهن وخاصة الاماكن اللي راشهن بهاك البخاخ

[abuktab]

وبالنسبة للي يقول غيرالبلف وصيخه غيرت البلف وصيخته مافيه فايده

لكن غطاء اللديتر ما غيره اللي ما يتعدى 10 ريال ..؟؟؟

علما بأن اني اسمع صوت الماء يغلي والماء يضرب شيء عندي الخرطوش

اللي يمين يعني والله العالم انه شيء طالع من المكينة ويبي يدخل

لوجهية اللديتر ......

[abuktab]

غيرنا غطاء الالديتر ماش مازالت الحرارة ترتفع

وش من حل ثاني...؟؟؟

[باترول4800]

شيك على دبات الموتر كلهن وبالذات دبة البيئة الصغيرة

اتوقع ان فيه شي منهن منسد او الشخالات متكسرة وساده مجرى الهواء

[المونس]

بسم الله الرحمن الرحيم ,الحرارة مشاكلها كثيرة, اول شي ابدا بسهل 1 البلف 2 غطاء الاديتر3 المراوح كهرباء تاكد من تبريدهن خاصة مروحة المكيف, المروحه على السير افحص كلتش المروحة مهم تاكد من سرعتها لانك تقول اذا اسرعت نزلت الحرارة 4 الاديتر ممكن يكؤن السبب 5 طربة الماء احيانا دفعها ضعيف ولا يبين فيها الا اذا هربت ماء,اذا سويت كل الخطوات ونفس الشي خذلك مشوار حتى ترتفع الحرارة انزل والسيارة شغالة شيك على الخرطوش بين البلف والاديتر اذا كان لين ماعندك مشكله واذا كان قاسي ممكن يكون راس المكينة بس تاكد قبل كل شي ان البلف جديد واصلي . اما بالنسبة لعزم السيارة انصحك تاخذها للوكالة خلهم يفحصونها لك ويعلمونك عن المشكلة بسعر رمزي اعجبك صلحها عندهم ما اعجبك خذها وصلحها عند غيرهم ومنها عرفت المشكلة.ارجو من الله التوفيق والسداد والسلام عليكم ورحمة الله وبركاته.اخوك ابوتركي

[أبو أسامة]

السلام عليكم ورحمة الله وبركاته

أخي الكريم : يجب علي وعليك وعلى الأخوان الأعزاء شراء قطع غيار أصليه والله أني لكم ناصح ..... يا أخي الكريم كيف تقول أن غطى الرديتر بـ10 ريال فقط إلا إذا كان تجاري ...... التجاري ما يتحمل ويبدأ ينسم مويه بسرعه ..... يعني تخسرت قيمته ..... مع العلم أن الأصلي قيمته وكاله بـ30 فقط ... وتضمنه أن إن شاء الله ما يهرب ثم الليات التجاريه أول أسبوع وناسه وتمام ...... بس بعد كذا ما تتحمل وتبدأ مع دعسة البنزين وقوة ضغط طرمبة الماء بالأنسفاط ....... بينما الأصلي يطول يعني حوالي سنتين .... ثم الماء للرديتر خذلك أصلي وليس الماء أبو 10 الأخضر لأنه ما يتحمل الحراره العاليه ويتبخر بسرعه ثم بعد ذلك تنقص المويه معك بسرعه قد لا تنتبه لها وبعد ذلك سلم على المكينه .......... معلومات بسيطه ... لمعرفة إذا كان راس المكينه رايح ما عليك إلا أن تفتح غطاء الرديتر ..... وتخلي أي شخص يدوس على البنزين وطالع مع فتحت غطاء الرديتر إذا شفت الماء يطلع برى والفتحه تنوفر أعرف أن راس المكينه رايح .... أما إذا لم ينوفر الماء فالمشكله عندك ليست والحمد لله من رأس المكينه ....... قد تكون من طرمبة الماء ضعيفه أو من الخراطيش تنسفط أو من الغطاء ينسم أو من البلف مجيم أو من الريديتر متسدد من الداخل أو من الخارج ... أو من كلتش المروحه .... أو من المروحة الكهربائية للمكيف ما تشتغل تمام مع تشغيل المكيف ..... أو من وزنية الديلكو الألكتروني ماهي تمام .......

[المميـز]

شيك على موية الراديتر لا تكون ناقصه وانت ماتدري

وبالنسبه للعزم ترا الاكزوز له دووور كبيييييييييييييير بالعزم

ومن المعرووووف ان اكزوووز الفتك داااااااااااااااااااايم ينشعرررر

ومايصلح يتلحم ولا يصلح تركب واحد مثله بـ 1800 ريال تقريبا من الوكاله

ركب راس هدرز بـ 700 ريال اصررف لك وراح يفرق لك بالعزم

[سااااااكت]

انا ياخوي ابقول شيك ع الطرمبه بالنسبه للحراره وركب هدرز قزوز رياضي وجرب انا اقول يبي يزين العزم وتنزل الحراره ولا تغفل عن طرمبة البنزين انا هي مشكلتي بس بال 4500 م 98

[KREEM9]

المشكله ان الباترول كثير من الروس تقوس حتى عندى2006 غيروله راس ولذك انصح بعدم فك البلف باصياف والشتاء وعليك بامروح الكهربا

[الفزعه]

السلام عليكم . اخوي العزيز انا صارت عندي نفس المشكله ولقيت الحل ولله الحمد .
1\غيرت الرديتر.2\غيرت الخراطيش.3\شلت البلف حق الحرارة .
والان حرارة السياره ما تتعدى الربع ولله الحمد.
اتمنى انك تكون استفدت من النصيحه.
وتقبل مروري.

[سوبر VTC]

ياخوان اكبر خطى انك تلغي البلف الوكالة ابخص و غير كذا و ظيفة البلف منع دخول الماء الحار على البارد فاذا وصلت الحرارة درجة معينة و هي 85 تقريبا فتح البلف و دخل الماء البارد مكان الماء الحار غير كذا اذا الغيت البلف و مسكت خط تبرد المكينة لدرجة كانك توك مشغلة و هذا يضير لانه احيانا يكسر ذراع البستم او حتى البستم لان الموتر بارد
و بالنسبة لموضوع الاديتر اعرف رجال كبير ابو عيال معه فتك م2003 وضبه بسسب ان الاديتر موسخ و فور و احتمى الموتر و كان يحط ماء عادي و تلطس الاديتر بسسب الماء العادي

[رجل كريم]

السلام عليكم . اخوي العزيز انا صارت عندي نفس المشكله ولقيت الحل ولله الحمد .
1\غيرت الرديتر.2\غيرت الخراطيش.3\شلت البلف حق الحرارة .
والان حرارة السياره ما تتعدى الربع ولله الحمد.
اتمنى انك تكون استفدت من النصيحه.
وتقبل مروري.




اكبر خطأ انك تشيل البلف لان السيارة راح تبرد وهي على سرعات بسيطة او واقفة ولما تمشي فوق 130 في الظهيرة راح يوصل للأتش . وظيفة البلف او الصمام هو يضعف دخول الماء البارد حتى توصل الحرارة اللي حددها المصنع وله وظيفة ثانية في حال وصلت سرعة السيارة 120 او اكثر فهو يقوم بحجز بعض الماء لاقل من ربع ثانية عشان يمديه يبرد في شفرات الرديتر .. يعني البلف له فوائد كبيرة , انصح بتغيير البلف بواحد اصلي جديد واذا استمرت الحرارة فعندك مشكلة ثانية يبغالها حل .,

تحياتي .,

[آه ياقلبي]

كان عندي نفس المشكله وقدر الله علي وسافرت وعطيت زميلي السيارة الين اجي من السفر وفي أحد الأيام والسيارة معاه ارتفعت الحرارة الى النص فجأه وخاف الرجال لا تنعدم السيارة وجرها بونش الى الصناعيه ولمن جاء للمهندس قال هذي يبيلها مسح راس المكينه وهو مسكين يفك المكينه وما كلمني لأني مسافر ومستحي مني وعندما جيت من السفر عطاني سيارته قلت له عطني سيارتي قال في مشوار وتجيك بكره وهي اصلاً في الورشه المسكين يوم طلع من الورشه وهو خسران فوق 2500 ريال بسبب هالميكانيكي الله لايبارك فيه وهو يجيب لي السيارة تطبخ من الحراراة وقال لي عن الموضوع كان اروح وأغير الأديتر 4 رصات وطني بدل الألمنيوم حق شد بلدها ووالله العظيم أن الحرارة من فضل الله ماتاصل الشخط اللي تحت وياحسرتي على فك مكينة سيارتي وخسارة فلوس صاحبي بدون فائده نصيحه ركز على الأديتر وتماتيك المروحه وغطاء الاديتر ترى ماكل تسييخ سيخت عدة مرات لرديتر الوكاله وماعندك أحد؟
لا تستعجل في التصليح وكما قال الأخوان ابدأ بالسهل ولا تفكر تفك المكينه لأن الميكانيكيين نصابين الا مارحم الله

[الشايب11]

احراره تاكد من المراوح او التمتيك حق المر وحه او البلف حق الحر

اما العزم فهاذ طبع الباترول إذاكانت الحراره مرتفعه

وشكرا

[ابوفيصل السهم]

السلام عليكم ورحمة الله
اخوي والله العالم ان غطاء الاديتر عندك مضروب لان فيه صمامين في نفس الغطاء صمام خروج والاخر دخول واللي عندك خربان يسمح بالخروج ولا يسمح بالدخول .وهذا جوالي اذا احتجت شي0555219984 ابوفيصل

[بن فلاح]

لا يطري عليك تشيل البلف ترى بسبب لك مشاكل كثيرة واسال مجرب