مشكلة الباترول الي مالقيت لها حل

[صامل الهدات]

السلام عليكم ورحمة الله وبركاته



ياشباب عندي مشكله في موتري أقلقتني مالقيت لها حل أو


ماعرفتها عشان ألقى لها حل


طبعاً سيارتي جيب باترول موديله 98 معي له سنه ونص


ما أدري وش جاه فجأه صار الموتر يقطع أقومه بالأول


يقطع وعزمه ضعيف مرة لين يتعدى الضغط أربعة ونص أو


خمسة ثم يبدا


يدز وأعطيه الثاني ونفس الشي يقطع لين يتعدى الضغط


أربعة ونص أو خمسة والثالث والرابع والخامس نفس


الحكاية وعلى الخط بالعافية يجيب 120 وديت الموتر لكم


ورشه وقالو منضم بخاخ وكشفت عليه وصار سليم وبعض


الورش قالو طرنبة بنزين وغيرتها وغيرة البواجي


وأسلاكها والصفاية وظبط الموتر شهر أو شهر ونص بعدين


عود يخرب ورجعت وقلت يمكن الطرنبه تجارية لأني


ماخذها من موزع وغيرتها ثانية من الوكالة ونضفت الليات


والتانكي وكشفت على البلوف وصارت سليمة وظبط الموتر


شهرين أو حولها وعود يخرب وماأدري وش يخرب الطرنبه


فتكفون ياشباب شوفوا لي حل مع هالموتر

[shaheenshah]

بالنسبة لطرمبة الباترول داخل التانكي وتستخدم التبريد عن طريق البنزين فلما ينقص البنزين في التانكي تتعرى الطرمبة وتحتر ومع التكرار يضعف ضخها للبنزين وهذا سبب من اسباب الخرابات في الطرمبات الداخلية في كثير من السيارات وعشان كذا حاول ان البنزين ما ينقص عن الثلث
فاذا كنت من النوع اللي يخلي لمبة البنزين لين تولع بعدين يروح يعبي غير طريقتك ولا ينقص البنزين في التانكي عن الثلث او الربع بالكثير

وبعدين الطرمبات اللي موجوده بالسوق كلها تجاريه حتى لو قالك انها اصلية

[خالد]

انا صارت نفس مشكلتك اخر شي تدري وش طلع من البنزين لاني اول اعبي احمر وبعدين اخضر ورجعت مره ثانيه اخمر وبعده رجت الى الاخضر واللحين انواع التقطيع من المكينه

[عبدالله العلاج]

صارت معي مرة واحد

وغيرت الطرمبه
ولله الحمد الوضع جدا عادي




شكرا لك على الطرح



تأكد من الطرمبه تكون اصليه

[حرب]

اخوي اول شي البنزين الحمر ضروري على قولة اخوي خالد ولاكن تأكد من الخرطوش الي طالع من البخاخ رايح للقربه حقت الهوا لايكون فيها شق وتهرب هوا ولازم اتفكه علشان تتأكد وعلى فكره الخرطوش هذا سعره 200 تقريباً وفيه نوع عند محلات قطع الغيار الامريكي يركبله والين منه وارخص ب40ريال قيمته

[ساهرالليل]

انا مع اخي حرب شف الخرطوش سبق وسواها معاي وسويت له سلكون وشطرطون اسود عريض
خاص للمكيفات ولفيت عليه ........ وضبط معاي

[خالدعبدالعزيز]

خلني بروعك شوي بس عادي احتمال ممكن يكون
لا يصير البوجي يسكر من الزيت الي يجي عليه من المكينه يعني عندك ضعف بالشنبر

[مقلع الرمث]

اخوي اذا كانت السياره ماشيه وااجد يعني فوق 300 غير الليات اللي طالعه من التانكي البنزيم رايحه لم المكينه يجي طوله تقريبا نصف متر اثنين واحد للراجع والثاني الرايح لم المكينه تكون متواكله من الحر والبنزيم ومتشققه وتتعب الطرنبه وتخرب الطرنبه عليك لذالك احلتهن وغيرهن وجرب ولا تركب الا ليات بنزيم ولا تعبي الابنزيم احمر ولا يهمك الاخضر والعب يالاخضر بعدين فيه شي ثاني فيه منظم الهواء هذا ااذا صار خربان يشغلك اشغال لكن انصحك انك تدور لك واحد من ربعك معه نفس موترك وتبدله معه وتجرب الموتر يوم يومين وشف كانه ظبط فهو من المنظم الهواء ومنظم الهواء يكون بعد الفلتر على طووول وانا انصحك قبل ماتغير الطرنبه على قول البعض فيه جهاز او ساعه يعلمك ضغط الطرنبه كم عشااان مااتخسر والله يكون في عونك

[NISSAN 94]

صباحكم خير
مشكلتك نفس مشكلتي تقريبا .
1/ تأكد من منظم الريس شغال او لا .
2/ تأكد من قربت الهواء.
3/ تأكد من الحلق حق الماكينه يمكن يكون مليان تراب.
4/ تأكد من طرمبة البنزين والصفايه.
وانشاالله ترتاح

[عابد]

اخوي اول شي البنزين الحمر ضروري على قولة اخوي خالد ولاكن تأكد من الخرطوش الي طالع من البخاخ رايح للقربه حقت الهوا لايكون فيها شق وتهرب هوا ولازم اتفكه علشان تتأكد وعلى فكره الخرطوش هذا سعره 200 تقريباً وفيه نوع عند محلات قطع الغيار الامريكي يركبله والين منه وارخص ب40ريال قيمته

وأنا مع أخي حرب أيضاً بالنسبة للخرطوش اللي طالع من البخاخ رايح للقربة وإذا ما كان الخرطوش مشقوق انتبه للمشقبيات اللي تمسك الخرطوش قد تكون وحدة منهم فالته صارت معي ولما ركبت وحدة ثانية راح التقطيع.

[الحاتمي1]

استخدم بنزين 95 وانشالله مافي مشاكل
اخوكم الحاتمي

[خيام الندم]

حياك الله يالطيب a_mr_999_@hotmail.com
حل مشكلتك بسيط جدا جدا
راسلني الظهر والعصر

[صامل الهدات]

مشكورين على الردود

والله يعيني بشيك على الخراطيش وليات

البنزين وبغير الطرنبه وبرد لكم خبر

[بيبسي]

انا صارت معي هالمشكله بسيارتين باترول 99 و2001 وكرهتني في الباترول كله غيرت كل شي اخر غيرت كاربيتر لان اللي معي ربع وبعدها تحسن بس ذبحني بالبنزين وبعده حولت للتويوتا ...