جمس يويكون هل هو زين ؟؟؟

[ريح الخزامى]

السلام عليكم ورحمه الله وبركاته

اخواني احب اخذ رايكم في اليوكون الجمس هل هو زين وموتر حق بر والا ماينفع في الطعوس وثقيل
وهو والله يطقط في راسي هالايام ودي اخذ لي واحد بس من الموديلات القدم شوي من 96 الى 99
لاني والله ماعاد اعرف اسوق المواتر الصغار تعودت على المواتر الكبار لي سبع سنين وانا اسوق جمس ومااااااشي معي ولله الحمد ماخالف ابد الا الاشياء اللي تحتاج لها صيانه مع بعض الخرابات اللي ماتذكر والله
وودي استشيركم في اليوكون صحيح انه اميركي وحرارته في الصيف غثه بس عاد وش نسوي نرهم له مروحه ثانيه ان كانها تركب :)

ابي ردودكم لاعدمتكم تكفون :)

شاكر لكم

[النووي.....؟؟]

السلام عليكم

تبي رايي لا تقرب الأمريكي

لأنه ماهب بنفع للبر الا مريكي

قووي ومريح بس ما مثل التويوتا
شف ابويمن وش يشتري تويوتا
لأنه قوي وهم معروفة منطقتهم

وهذا رأأيي يحتمل الصح والخطا

والله الموفق

[الاجودي]

وعليكم السلام ورحمة الله وبركاته

انحش انحش انحش من هنا الى حايل


لا تقرب اليوكن اذا كنت تبيه للبر والقنص

تبيه للخط ماعليه حليل

اما للبر ماينفع ولا يصف مع الباترول واللاند

ثقيل دم لامنه غرز وثقيل طينه

ويتفكك ويبداء يقرقع ويصجك بالاصوات

[طيـــ بر ـــر]

لاندكروزر .. وبس

[عروان]

اليوكن ممتاز لراعي الكشتات والديرة.

قوي و متين وسيع. يشيل أهلك وأغراضك جميع.

خصوصاً الموديل الجديد منه.

أما اذا أنت راعي مقانيص لا أنصحك به.


تحياتي لك

[القماري]

أخوي ريح الخزامى
أولا حياك الله معنا
ثانيا بخصوص سؤالك أقول الأتي:
اليوكون (أقوي سيارة رباعية دفع موجودة في المنطقة) يعني من السيارات المتعارف عليها. وإذا أردت المزيد من التفاصيل حول قوة المحرك فأبشر.
أما بخصوص التجربة أقول - إذا كنت ترغب في سيارة عائلية واسعة ومريحة وتستخدمها يوميا في الشارع وتخرج بها في العطل للبر والطعوس أو حتى للبحر (فاليوكون) خيار طيب أنصحك به . شرط أن تشتري سيارة نظيفة غير ملعوب فيها (يفضل الجديد). وأقول أنني أعرف شخص يستخدم سيارته اليوكن 4x4 موديل 98 أسبوعيا للذهاب للطعوس ويستخدمها يوميا للذهاب للعمل ويفعل بها (في التطعيس) أكثر مما يفعله أصحاب الباترول (مثلي) وأصحاب اللاندكروزر (ولدي صور موثقة على ذلك) وهي بدون حسد شغالة معاه آخر حلاوة (بالعامي المصري)
عيوبها - ثقل الوزن مقارنة بالياباني - قد تحتاج لتربيط من وقت لآخر - كبر حجمها .
هي لاتقارن بالياباني المتعارف عليه ( باترول - لاندكروزر ) لأنهما قد صنفتا من قبل المستهلكين المحليين كسيارتي بر وآخذتا البطولة على السيارات الأخرى.
أهم شيء أن تشتري سيارة نظيفة ولا تشتري وارد أمريكا - خذ مواصفات الخليج إذا رغبت.
وإذا كنت من أصحاب البيع والشراء والسيارة لاتبقى معك أكثر من سنه فاللاندكروزر هو الأفضل في البيع
وإذا كنت من هواة التطعيس القاسي فالباترول لايخذلك في هذا الأمر ، لكن الركادة لليوكون.

http://images.automotive.com/review_images/98yukon.jpg

وهذا هو 2004
http://199.239.248.45//images/stk/2004/gc2004yukon01.jpg

[Bader-M]

اذا كنت راعي طلعات خفيفه
فخذ يوكون
اما اذا كنت صاحب طلعات كثيرة
وراعي شعبان و صيد
ما فيه مثل التويوتا
...........
ومبروك مقدما

[ريح الخزامى]

ياجعلكم في الجنه ووالديكم وجميع المسلمين

انا الموتر من يوم ظهر اليوكون الجديد وهو عاجبني خصوصا اني مجرب الامريكي وبالذات الجمس معي له سبع سنين مطلعه وكاله ولله الحمد ماقد اشتكى ولا شي ولا هنا مكان ماطبيت فيه ماعدا الطعوس ماقدر اطعس فيه خبركم لو يغطس ياله بهيلكوبتر يظهرونه والا بدبابه اقشرررررررررر لا غرز اما الطلعات والكشتات ماخليت مكان ماطبيته فيه ولله الحمد ماشي تمام التمام اما اليوكون فوالله كثير اللي مدحوه والمقانيص مانيب راعيها ان خربت مره رحنا نقنص ضبان ولا نبعد هههههههه
ابد شغلي كله كشتات وطلعات الواحد بس يبي لا جا هالمطر وسعه الصدر الاه يرقى هالعقوم والطعوس يشوف الامطار والخير ويحس بطعم الجو مهوب الله يخلف اذا جت هالامطار حدنا الزفلت :( مانقدر نتعداه

جزاكم الله الف خير وانا انشالله عقب هالعيد ابدور لي واحد نضيف لعل ان الله يرزقني بواحد نضيف اكرفه ويخدمني والاو الله في الكرف مامثله اكرفه ولا عليك الا بسم الله وكل الرحمن



جزاكم الله الف خير مرتن اخرى وكثر الله من امثالكم

[العليمي]

شف و انا اخوك اذا انت راعي كشتات (( يعني طلعات وقت ربيع و مطر و تمشي مع الأهل و شغل رايقين :D :D )) فاليوكون الدفرنسين مناسب لك ..

أما اذا كانك راعي صيد و مطامر في الشعبان ورى القميري ، والا في ضلعان تدور لك حجلة ناقزه >>> مثل حالتي :D ;) فغير اللا ند كروزر لا تدور ....


واسئل الله العلي القدير أن يكتب لك ما فيه الخير انشاء الله ....

[عربسات]

هلا بك اخوي
انا عندي يوكون 94 باب واحد
ماخليت شعيب ماطبيت فيه وبالرمل زين وحبيب وسيع من داخل ومكينته قويه
وشالين الدرج اللي بالوسط ومركب محله ثلاجه تشتغل 24 ساعة
تاخذلها تيس بكبره واستخدمها تكايه
بس مشكلته البنزين بوسط الديرة
وبالسفر مايشرب بنزين واجد يعني من لينا الى الرياض تعبية وحده ويبقى فيه

وانا اخوك بس يحب الركاده

[الـ ع ـارض]

شف خالي

انا من عشاق اليوكون ومن موديل 93 الى موديل 98 والان معي موديل 2000
وماخليت عرق بالدهنا والا شعيب ولا الصمان الا شبرته باليوكون .
وياما طلعت جيوب لاندكروزر وباترول من الغراز.

العبره مهوب بالسياره العبره بالسواق هذا اولا

ثانيا ولجميع انواع الجيوب لازم تراعي الموتر وتحافظ على صيانته خاصه بعد طلعات البر لمده طويله .
ثالثا وهي خاصه لليوكون ان صيانته سهله اي ورشه او ميكاني يقدر يصله وقطع الغيار متوفره ورخيصه

ونصيحتي لك خذ جديد افضل شي ولا تنسى تستخير الله قبل ما تشتري

والله يختار لك ما فيه الخير

[laith]

اخي ريح الخزامى

اليوكون قوي نعم ولكن لايذهب تفكيرك الى " جموس " الثمانينات وقوتها وتعميرها... الشغل تغير ياصاح واصبح كاي سياره يابانيه بانسبه للبدي اما المكينه ياحليل التويوتا.

اخوك ليث عنده يوكون 2002 وارد الجميح وكاله ... صار له حادث ولحد ذالحين مراكض على قطع الغيار والفاكسات تتوالى من والى المملكه اوخارجها بحثا عن برغي او صاموله ...!!!!!
اما الوكيل " الجميح " حدث ولا......... " الله المستعان لاخدمات ولايحزنون. خذوخل من الدعايه.:mad:

[ريح الخزامى]

عرب سات ,,,,, العارض ,,,, ليث


جزاكم الله الف خير وماقصرتوا على ردودكم والله يكثر من امثالكم انتم واهل المنتدى الباقين والله ماقصروتا الله يعافيكم ويجزاكم خير

والله وانا اخوكم اني مدري وش اسوي ان طلعت البر معي هالقطار هالجمس تقول تسني امشي في فله من كبره ماشالله تبارك الله ولو تطب في الردميه ا ن ابلش فيه ثقيل الله يكفينا الشر وان غطس عز الله اللي افرش فرشتك وكشن غداك عنده يالله يطلع بالتسحيب والحوسه وانا والله اليوم الخميس طلعت يم الخراره وكل ماشفت موتر فوق طعس قام ينغزني قلبي :( ودي بس قلتك ياحيله

ماغير ان مره مره شفت لي شحنه رمل وقعدت اطامر عندها من الفرحه :)

والله انا ودي باليوكون اولا انه وسيع ويشيل وثاني شي صبور يتحمل اكرفه مهوب يخالف والبنزين تعودت على هالجمس كل شهر الله يكفينا الشر حول 800 ريال بس بنزين :( اما الخطوط خذ موووووووتر عز الله انه من الرياض الى الطايف مايخالف ابد يدخلك الطايف ويبقى فيه حول الربع مايصرف ابد في الخطوط والموتر ابد اطيب له ان الواحد يسوي له تربيط اقل شي كل 6 شهور ويشوف الجلب والمقصات وهالامور علشان يعيش الموتر
وانشالله اشوف لي واحد نضيف باذن الله لعل ان الله يرزقنا برزق من عنده انشالله

وجزاكم الله الف خير انشالله

اخوكم

ريح الخزامى

[قناص القرائن]

بنسبه لي يذكر انه إذا مشى واجد قام يهرب زيته ( ينقص) الزيت وهذا حاصل معنى في في الموركري ( لاتقرب امريكي)

[مسري الشاص]

السلام عليكم

من ناحيه القوه فهو قوي

بس عيبه يهرقل يتفكك بسره حق

طلعات بسيطه بس اذا انت راعي قنص وشعبان وطرد

لا تقربه انحش عندك التيوتا