محتار بين سيارتين .. الرجاء الدخول

[راعي الفزعه]

:D كيف حالكم ياشباب مكشات عساك بخير ..

اطرح موضوع هو قديم ولكنه يتجدد مع تطور السيارات وظهور موديلات جديدة وخاصة
اذا بغى الواحد يشتري سيارة جيب ذات دفع رباعي لانها قوية في المدينة وفي الصحراء
وانا في بالي سيارتين هما الاندكروزر GXR وباترول سفاري وابغاكم تنصحون ايهما افضل
من الاخر من حيث المواصفات والتحمل والمكده .
واجابتكم هذه تقرر لي العزم على الشراء .......

ودمتم سالمين ..

:D :D

[القماري]

السيارتين المذكورتين كلاهما ممتاز
النواحي التقنية الباترول الجديد أقوى من اللاند في المحرك وأخف وزن وأصلب في الرمال
اللاند يفضل لما له من معجبين وسوق محلي ( مثل مايقولون شيك بمخباتك) وهي سيارة عملية وصلبة أيضا
بالنسبة لسعر شراء الجديد فالباترول أرخص من اللاندكروزر - صرف البنزين في السيارتين تقريبا متشابه.
الشكل العام (كلاهما راقي ) والنظرة الآخيرة لك كمشتري ومستخدم
مواضيع كثيرة بهذا الخصوص تلقاها في منتدى مكشات ( أبحث عن المواضيع السابقة)

[Y&Y_4X4]

والله انك صادق الأمر يحير لاكن ابي اقول ما اعتقده لك والله يوفقك


بالنسبة للشكل ال GXR حلو الباترول بس السوبر سفاري حلو.

صرفية البنزين مثل ما قال اخونا ماهناك فرق يذكر كلهن يصرفن.

ال GXR اكثر صلابة وتماسك والباترول يهرقل بسرعة.

الباترول اخف وزن واقوى بالطعوس على عكس GXR طربال في الرمل.

المكدة وطول العمر مع توفيق الله سبحانه كلهن مثل بعض النوعين يكدن كد حمير ولا يقولن اح.

من ناحية المواصفات كلهن يجن مع نفس المواصفات اللهم الثلاجة ترجح ال GXR.

للترهيم والاضافات ال GXR اوسع شوي شي سهل.

[الاجودي]

السيارتين كلهن ما عليهن غبار

وكلهن ممتازات وقويات

لكن انا افضل الباترول وهذي الاسباب

1-الباترول ارخص من الاند

2-الباترول اخف من الاند بواجد

3-الباترول اقوى من الاند
الباترول 6 سلندر280 حصان
لاند في اكس ار 8 سلندر 250 حصان
لاند جي اكس ار 6 سلندر 240 حصان

4-قير الباترول تربونك (مزدوج)

5-الاند في حالة البيع افضل من الباترول ويمسك سعره كثر

6-صرفية البانزين تقريبا واحده

والي يقولون ان الباترول يتهربد وتفكك بسعره انا معي باترول له ثلاث سنين ماشفت منه شىء

وانا روحتي للبر واجد بس منب راعي تطعيس ولعب

والي يقول كثرة خربات ماعمري غيرت الا سيور وفحمات وبواجي وفلاتر بس

ونصيحتي لك توكل على الله وخذ باترول


وك تحياتي

[جميل جمال]

اخوي راعي الفزعه ..

انا توني مطلع GXR مالي اسبوع ..

مشالله الموتر ما مثله من كل النواحي ..

انا اقول كانك تاصل سعر الجي اكس ار فخذه وتوكل على الله ..

اول شي الصلابه فيه اقوى من الباترول ..

ثاني شي السعر عند البيع فيه فرق كبير بينهن .. الفرق لمصلحة اللاندكروزر .

بالنسبه لصرفيه البنزين انا عبي التانكيين ومشاني داخل الديره 600 كيلو بالظبط

بالنسبه للنفود الباترول معروف افضل واخف لكن خذ لك لاندكروزر قير عادي وماراح يقصر معك ابد ..

على العموم الموضوع راجع لك لكن صدقني الجي اكس ار هيبه اكثر والتويوتا ما ينعاف لو هي كورلا 79 :D :D

[ذيب البر]

تعال هنا انشدني انا جربت الباترول عدة سنوات والان معي لاندكروزر له معي اكثر من

سنتين انا من رأيي الشخصي ما فيه مقارنة بين السيارتين ابدا بصراحه

لان الاندكروزر يتفوق بكثير في التحمل والقوة والرساوة ولكن الباترول بصراحه

يتفوق بشي واحد فقط لا غير وهو الخفة يعني كانك راعي مطاعس كل اسبوع

لا تتعدى الباترول وكان راعي راكادة بالنفود فالاندكروزر يفي بالغرض وزيادة

بالاضافة للميزات السابقة الي ذكرت اما في الارض غير النفود فلا تطري غير اللاندكروزر


ولي كلمة مشهورة عند زملائي بعد ما شريت اللاند كروزر اقولهم اكتشفت ان

الباترول داتسون مركب له دبل :D


هذا راي شخصي تحيااااااااااااااااااااااتي

[الاجودي]

اخوي ذيب البر

انا اشهد انك ظلمت الباترول

الباترول بشهادة الي يملكون الاند اريح

والي معك كم مديله اذا كان من الشكل القديم معك حق

اما الشكل الجديد فهو قوة وفخامة

ومع الخط خذ رساوة

[الاجودي]

ويسمحون لي عشاق اللاندكروزر على الصوره

http://www.nissan-arabia.com/vb/attachment.php?s=&postid=15384

[Y&Y_4X4]

مع فائق احترامي للرجال الي ظاهرين في الصورة .

العيب منهو فية في السيارة والا في السواق ما تشوف لبسهم وشلون , ما احد يسوي سواتهم الشباب هذولا انكاني مانيب واهم فهم ضاربين روضة نورة مع اول الوسم .

العيب ماهو في السيارة سواء كانت كروزر او باترول .

وبعدين ملاحظ انا اخوي الاجودي , ملاحظ الضغط النفسي الي انت تمارسه في عرض هذه الصورة والصوره الثانية الي في توقيعكم الموقر .

صورة سيارة اكلتن تبن في المطينة ,,,,,,,,,, والثانية صقر شاهين على المرباع واقفة :D :D :D

[طيـــ بر ـــر]

مثل ماقال ذيب البرّ

<< خصوصا انه مجرّب النوعين ..


اللانند كروزر أفضل بكثير من الباترول .. في كل من ( الراحة - الصرفية في البنزين - التماسك - شيك - فخم )

أنا نصيحتي انك تاخذ جي اكس ار - خليجي - من البازعي - تراها أفضل من جيوب عبداللطيف اللي يغيّر المسجّل والمكيف والخطوط والحساسات والأنورا الأمامية والجنوط .. ( في جدّة )


الباترول صح مواصفات حليله ... لكن القهر اذا جا بعد سنة .. وانت تمشي .. على عيون القطط ... وتمسع القربعة والأصوات .. والهربدة .. يتقطّع قلبك .:mad:

[المترو]

الاخ الكريم راعي الفزعه
والاخوان الكرام
ترى نوع السياره يحددها نوع استخداماتك لها يعني انت راعي طعوس حول الديره واستخدام الجيب داخل الديره بنسبة 90 % خذ نيسان لانه خفيف ومريح وماعندك اوذف منه على الازفلت وكذلك ما فيه اخف منه بمطامر الطعوس للمصافيق تطعيسx بتطعيس وكذلك اذا انت من الناس اللي الموتر يطول معه ماهو راعي بيع كل سنه والا سنتين الباترول مناسب جداً لهذا الاستخدام
ورجال راكد سواقتك راكده والمطب توقف قبل ما توصله فهذا ينفع للسفاري

اما اذا كنت راعي بر كل نهاية اسبوع وكل اجازه وكل ربيع وانت لك بخلاء خالي سواء نفود والا جلد واكره ما تشوف خط الزفلت تفضل الخطوط البريه على الازفلت فخذ التويوتا العادي ولا تكثر الابشونان يعني الخرابيط الواجد خله ساده اهم شيء يكون مكيف امامي وخلفي وثلاجه مع العلم انه ثلاجة الفقر بس تقدرتقول تبرد علبة الصحه!!!!!!! وكفرات كروم ولا بعد ماهو لازم توفر فلوسك وكلها جنوط
وفحمات امامي وخلفي وان حصل ديكور خشبي والا بعد ماله لازم ولاهم يكون شنطه وليس ابواب مهــــــــــــــم جداً والاهم لا يكون ابو حفاظه كرمت وكرم السامعين يعني الاسبير فوق ومهو تحت تسحبه فوق كل حصاه وكل عثمور وتقدر تركب تانكي تحت بالموتر وخل عنك خلفية الكزس
واحد عيوب الباترول وسبب القرقعه اللي يقولون لانه مافيه باترول يجي شنطه كلها ابواب قبل اسبوع طلعت مع احد الشباب للبر ولاحظة ان لمبة السقف كل شوي تأشر تطفي وتولع سألته قال الباب الخلفي كل شوي انا اغير ربلاته واوزنه بس يخرب وهو السبب
ملاحظة لنوع التويوتا
G خفيف بس شكله ما هناش واعتبره نواقص احس انه جيب بالغصب
GX حلو اذا ما يهمك الشكل مره والمكيف الخلفي وثلاجة الفقر خفيف بس عيبه ماهو ثابت بالطريق
GXR حلو شكلا وعملي وفيه مواصفات جيده التي ذكرت سابقا بس وزنه ظالم مكينته يعني ثقيل الى حد كبير ويصلح للراكدين وقيره صغير على مكينته يعني القير ماهو مريح المكينه والا صرف البنزين كلهم حول بعض ويمكن GXR اكثر صرف من النوعين اعلاه وفيه ابشنات كثيره للي يدور الزبرقه
وVXR موتر بكل المعنى شكل ومكينه والابشونات موجوده فيه انواع الخرابيط والتلزيق اللي اشوف ان مالها علاقه بالبر بس محرك يعجبك قوه خذ قوه وصرفه حول GXR بس حرام سعره العالي يتمرمط بالبران الا اذا البر يساوي الكثير عندك فهو فداء البر وهو صراحه جامع الزبرقه مع القوه بس كله بحسابه
وجميع جيوب التويوتا تمسك سعرها اذا جيت تبيعها وتتحمل انواع السائقين وكل ماقلت الزبرقه قلت الاعطال

فا شف يا الحبيب احتياجاتك واستخداماتك واختر الباترول او التويوتا انا لا افضل واحد على الاخر الا بالنظر الى ما ذكرت ونا جربت الباترول التويوتا شخصيا احس ان يناسبني التويوتا وانت ابخص بنفسك
وقد يزيد وينقص الاخوان الكرام مما ذكرت عن كل نوع
وسلامتكم