الجنوط اللي تنباع عند البناشر وش رايكم فيها يالربع

[ALOTAIBI]

اسعد الله اوقاتكم بكل خير اخواني اعضاء المنتدا الغالي
انا نويت اغير جنوط الجيب موديله 94 جي اكس تخبرون جنوط بلاده شنبر الى جنوط توبلس (الشفه)
لقيت ناس تركب جنوط النيسان بس تفرق عن شكل بلاده
ولقيت جنوط حلو نفس حقت بلاده مثل جنوط الهدد الجديد ونفس جنوط الباجيرو ... عند افغاني مطلعها من كرتون لونه ابيض جديده ومكتوب عليها made in japan ويقول على الشرط ولا تحتر ولا فيها عيب
وسمعت انها تجي من الأمارات
وش رايكم يالربع اشتريها والا اتركها وش تنصحواني
انا في انتظار اردودكم

[.أبوعبدالرحمن]

الجنوط اللي في السوق انت وحظك مرة تظبط ومرة تبهذلك


اعرف واحد من الشباب عنده في اكس ار 99 وركب عليها جنوط تجاري لانه قلبه 2005 والحمدلله مشت معه


وباع الموتر وشرا في اكس ار 2001 وقلبه 2006 وركب جنوط تجارية والى الان الجنوط 100% ولله الحمد



واعرف واحد ركب جنوط واعوذ بالله بهذلته طبعا سيارته اكسنت


يعني انت وحظك واقول لك ليش ما تروح للغرابي للي يبيعون الجنوط المستعملة وتشوف لك جنوط نظيفة

ورخيصة والله يكتب لك اللي فيه خير

[ALOTAIBI]

مرحبا يالغالي ابو عبد الرحمن
يالبناخي انت ما عطينتي رايك في الجنوط اللي عرضت علي تجاري والا اصلي
وبعدين الجنوط اللي لقيتها جديده ليست مستعمله تجي في كرتون يعني كل جنط مغلف في نايلو و موضوع بكرتون لونه ابيض كما ذكرت سابقا
وخايف اني اتوهق فيها .
والجنوط التجاري تحتر مع السفر وبعدين اضر الكفر.
وللمعلومية سعرها 850 ريال
وشكرا على مرورك وردك
وفي انتظار الردود من بقية الاخوه

[.أبوعبدالرحمن]

والله ياخوك ما عندي علم ان شاء الله بتلقى من يفيدك

[راع الحيزى]

الجنط نفسه وش مكتوب عليه ..؟!
تحصل بلد الصنع مسجل في الداخل او على الجنط من برا !!

[بو نوره]

اخي الفاضل
انا مركب نفس الجنوط الي تتكلم عنها قبل خمس سنوات . كرتونها ابيض ومكتوب عليها صنع في اليابان
ركبتها على لاند كروزر وكان سعرها في ذاك الوقت 1000 ريال ( وكنت متردد في تركيبها ) .
ولكن الحمدلله طلعت 100% بجميع المقاييس .
ومن واقع تجربة انصح بتركيبها .

[escape_man]

مداخلة بسيطة ..

الجنوط التجارية غالبا (على حد علمي ) تجي خفيفة الوزن .. يعني لابد انها تسبب رجة

[z a n h o r]

هذي على علمي تجاريه ..

لكن هل هي عمليه الله اعلم

[ALOTAIBI]

ابو عبد الرحمن بيض الله وجهك
......................................
راعي الحيزى مرحبا اخوي سلمك الله
الجنط مكتوب عليه من جوه made in japan
وهناك معلومة ماذكرتها وهي ان الجنوط خفيفه يوم ترفع الجنط وزنه خفيف مدري هاذي ميزه والا عيب بالجنط. وانا في انتظارك الجنوط لين هالحين مشتريتها
................................
ابو نوره هلا ومرحبا اخوي ...الموتر حق مقانيص وبر وحموله وسفر يعني الجنوط اللى ذكرتها تتحمل الضروف القاسيه والا لا؟
......................................
escape_man مرحبا ابشرك يالغالي الجنوط خفيفه يعني على كلامك اذا اشتريتها تبا تسوي رجه ؟
..................
z a n h o r مشكور على التواصل
وانت صادق انشا الله الاخواني ميقصرون
..........................

[هويدي]

توكل على الله وركبهن على الشرط ان كان فيهن عيب او رجه ترجعهن

محاتسيك مركب تجاريات من عام 2002 جنوط سفاري ولله الحمد ما شكيت منهن


اهم شي ابعد عن المستعمل خصوصاً بناشر الغرابي

لأن الغالبيه الا من رحم الله يغشك ويزود عليك السعر


مره دورتلي جنط مستعمل ابيه استبنه لقيت مرشوش وواضح عليه التعديل من الداخل وبدون طاسه بـ 200

رحت شريت جديد بـ 250 وبطاسه بعد :d

[شقران نجد]

يا هلا وغلا بالخال وحي الله الجميع ,,,,,,,

خالي الجنوط اللي تتكتب عنها هي اللي يركبونها معظم الشباب لقلة اسعارها مقارنه مع الأصلي ولا هو في الجيوب بس حتى المرسدس والبي ام يركبون تجاري ولا عندهم مشاكل عموماً محاكيك مركبها على شاص ولله الحمد ما شكيت منها شي وللعلم يالعتيبي لاقلبت الجنط من داخل تلقى بلد الصنع منقوش واغلب اللي في السوق تايوني وصيني للعلم فقط .....

اخوك
السياري

[ALOTAIBI]

هويدي هلا وسهلا ابشرك مستعمل مادور تخبر الموتر غالي وما ركب الا شي يستاهل . ويالغالي التجاري انواع , ماذكرت النوع اللي مركبه , وبلد الصنع ؟ انا في انظارك والله يبض وجهك على الرد
.................
مرحبا يالبناخي السياري
وانا خالك الجنوط اللي لقيتها صناعتها يباني منقوش من الداخل , نفس اللي مركبها ؟
وجزاك الله الف خير يا خالي
..............................
ومشكورين يالربع على نصايحكم وعلى ردودكم والله لا يهينكم يالبنيخي .هذا اللي اقدر اقوله واللي عنده شي لا يبخل علانا
والله يكتب اللي فيه الخير

[هويدي]

ووجهك ابيض يالعتيبي

مكتوب عليها ياباني بس والله العالم انها صينيه او ياباني من الامارات مايندرى

ونوعها جنوط سفاري 2002

وعندي رقم راعي محل بالغرابي لو تبي تستفسر منه عن الاسعار وغيره

ارسله لك بالخاص علشان ما تصير دعايه

[شروكي ربع]

والجنوط التجاري تحتر مع السفر وبعدين اضر الكفر.




مشكله اذا الواحد يقعد يتوقع ويتخيل امور غريبة ..


من اللي قال انها تحتر مع السفر ؟؟

ومن اللي قرر أنها تضر الكفرات ؟؟


يا اخي في قناعات غريبة جدا ..


تدري ان الوكالة تركب جنوط تجارية بعيوني شفتها !!!


وبعدين كل هالعالم اللي تركب تجاري من يوم عرفنا الجنوط ولا واحد قال ان الجنوط التجارية تحتر مع السفر ..


ولا قد سمعنا بكفر خرب من جنط تجاري !!


ما عليك من الكلام ذا رح اشتر وتوكل على الله , والله يبارك لك فيها ..