أكبر مركز صيانه لنيسان في الشرق الأوسط .. هل هذا صحيح! [الأرشيف]

عبدالرحمن السالم

23/01/2008, 10:48 AM

السلام عليكم .. واسعد الله مسائكم بكل خير ..

أمس كنت اتطلع على الجرائد اليوميه وتحديداً جريده الرياض فشدني اعلان لوكاله نيسان ..

وهي ستقوم بعمل اكبر مركز صيانه لسيارات نيسان في الشرق الأوسط ..

ما ادري يا اخوان هل هذا صحيح؟

وإلى يبي يشوف الاعلان يشوفها على جريده الرياض امس

والله يعطيكم ألف عافيه

شروكي ربع

23/01/2008, 01:30 PM

المشكلة يالغالي مو في المكان ..

المشكلة في الادارة الفاشلة ..

والاخلاق السياحية ..

صدقني لو تتغير الادارة و يسنعون الموظفين كان تعدلت الوكالة ..

والا سيارات النيسان على اسعارها وجودتها خيالية ..

ولكن يرد الناس كثيرا الوكيل السيئ ..

ذئب اليل

23/01/2008, 02:14 PM

المشكلة ماهي في حجم مركز الصيانة المشكلة في كيفيت تعملهم مع العملاء والخدمة الي يقدمونة

لبرتي

23/01/2008, 02:19 PM

فعلاً تعاملهم سيئ

مره رحت لهم علشان الصيانة وباقي على الـ 60 ألف كم كيلو

قالوا لي خذ موعد بعد أسبوع

قلت عسى ما شر ما جيت علشان سني جاي علشان تشييك وبمشي
قال هذا اللي عندي !!!!

راعي البرهـ

23/01/2008, 02:26 PM

تصدقون ان لي عشره ايام اتردد عليهم ابي سير دركسون والا الان تعال بكره تعال بعده(الاداره سيئه جدا)

صاحب الجيب

23/01/2008, 02:38 PM

وعليكم السلام ورحمة الله وبركاته

مشكور أخوي دحيم على الموضوع

ولكن فعلا مثل ما قالو الأخوان العيب في تعامل الوكالة مع العملاء
تخيل تطلب فحمات باثفندر 2005 يقول لك بعد أسبوع والله لو أنا طالب شيء نادر يخرب
ويا ليت يجي بعد اسبوع ولي مشكلة معهم في القير وصلت للمدير الإقليمي كملت ثلاث شهور

وعساك مرتاح أهم شيء الأخلاق
إذا صرت سعودي كل وطى على راسك وأنت في دارك وإذا صرت أجنبي دبر لك القطعة من تحت الأرض قدامي فاكين قير سيارة جديدة بالمستودع علشان يأخذون قطعة

أسد تميم

23/01/2008, 03:06 PM

يا اخوان لاتلومونهم معتمدين على القطاعات الحكوميه مثل الداخليه والحرس ووزارة الصحه والجيش الخ.....؟ ولا يهمهم المواطن الي ياخذ سياره وحده

النداوي HZ2AF

23/01/2008, 03:21 PM

مشكور يا الغالي ننتظر ونشوف

Black VTC

23/01/2008, 04:45 PM

مركز صيانة ضخم بدون قطع غيار متوفرة صراحة وكيل ما يبي يجيب قطع غيار و يخزنها يبي يضمن البيع قبل الاستيراد ...

القيصر007

28/01/2008, 12:23 PM

عبدالرحمن السالم

28/01/2008, 12:31 PM

الله لايهينكم ياجماعه الخير وألف شكر على مروركم ..

صحيح اننا متأذين من الوكيل لكن الشكوي الله

وانا والله قريت الخبر وقلت اخبر الكشاته لانه امر مهم لنا يا اصحاب النيسان ..

وزي ماقالو الشباب ياليته يأمن لنا قطع الغيار قبل لايفتتح هذي الورشه ..

*********

اخوي القيصر007 الشكوي الله وانا اخوك والله يعينك والله
لكن شف اخواني بن محفوظ وابونادر والساهر وان شاء الله مايقصرون معك ياليت تمر على موضوع مشاكل الباثفندر وان شاء الله يفدونك بورشه مضبوطه ..

لاهنتم يالربع وعساكم دوم سالمين

خشيمان

28/01/2008, 12:39 PM

وش الفايدة أكبر مركز والادارة زفت ؟؟!

سمي الزعفران

28/01/2008, 01:11 PM

والله انه مشكله ذا الوكيل
لا اسعار زينه ولاقطع متوفره ولا خدمه زي الناس
الله يعين

عبدالرحمن السالم

28/01/2008, 01:14 PM

الشكوي الله والله .. مابل يد حيله والله

انا متعاني مثلكم بس وش اسوي .. لكن اغديه ان شاء الله بعد مايسوي هالورشه انه يضبط ويغدي رجل :D

خشيمان + سمي الزعفران

حياكم ربي ومشكورين على مرورك الزين

hdd4004

28/01/2008, 01:27 PM

كلام فاضي صراحة
..
انا رايح لهم يوم السبت الماضي عشان اشيك على قزوز الباثفندر بتاعي

يقولون لابد تحجز موعد اعطوني موعد على يوم الثلاثاء

والتشييك فقط بـ 300 ريال
هذا مجرد تشييك
باقي شغل اليد وقطع الغيار

صراحة ماعندك أحد
بس ندور لنا ورشة شغلهم زين ونصلح عندهم

خل عنك الغلا هذي هي اكثر الوكالات اما لا قطع غيار ولا اخلاق وقلة ادب ماشفت زيها في وكاله تقول يصلحون سيارتك مجاناً والله كل مارحت لهم لازم اتهاوش معهم وديت معي واحد من الشباب قلت يمكن البلا مني يوم راح معي قال الله يحلل عبداللطيف جميل والله اخلاقهم مهيب الى هاالدرجه قلت ادب لا اجانب ولا سعودين كلهم سوا

عبدالرحمن السالم

28/01/2008, 01:31 PM

هلا والله ومسهلا اخوي hdd4004

وش هالحاله والله مشكله .. ياخي إلى متى هالمهزله وإلى متى وحنى ساكتين .. والله لو حنى نشحذهم فلوس والا نصلح بلاش على قولتك ..

الشكوي الله يا ابن الحلال .. وعسى ربي يوفقك يارب

ولاهنت على مرورك الكريم

لبرتي

28/01/2008, 01:57 PM

فيه قصة حصلت لأحد الشباب
معه باثفندر 2005
قفل على المفتاح وهي شغالة وفي البر المهم أنه قال بدال ما أكسر المثلث خلني أشيل الربلة حقت المثلث
الربله تقطعت بعدها راح للوكالة وقالوا له مو موجوده وراح نطلبها لك من الطائف بعد أسبوع توصل وكان سعرها 180ريال تخيلوا أنها اغلا من المثلث

المسلسل أستمر 3 شهور وهو ملزق المثلث بشطرطون والوكالة نفس الكلام ما وصلت القطعة

في يوم من الايام كنت طالع للبحرين أنا وهو قلت يا ولد خلنا نمر الوكالة لعلنا نحصل الربله
رحنا للوكيل وأستقبلونا أحلى استقبال وحصلنا القطعه عندها بسعر 8 دينار (80ريال) من فرحة خويي بغى يشتري 2 :)

ما أقول الا حسبي الله ونعم الوكيل على وكالتناااا

احب البرواهله

28/01/2008, 02:16 PM

مع وجود الفضائيات والنت راحت موضة أكبر أطول أضخم ...الخ وثقافتنا تغيرت وعرفنا العالم كيف عايشة وكيف خدمات ما بعد البيع أنا وأنت ما لنا علاقه بالكبر والضخامة لنا علاقه بنوعية الخدمة الي تقدم للعميل وتناسبها مع السعر المدفوع للحصول عليها وأحترامهم للعميل وهذا لن يتحقق بكبر المبنى فقط دون تطوير لنوعية الخدمة وتقييمها كل فتره للرقي بها وتحيتي للجميع

escape_man

28/01/2008, 02:25 PM

العيب مهوب فيهم

العيب بوزارة التجارة من قبل وبحماية المشتهلك من بعد

لاتلومه يوم ياخذ راحته على المواطن

متلحف ومتغطي ومتسند على ظهر مايخاف الله وبالاخير هو تاجر مايشوف الا كم حصل وكم ربح

ويوزع القسمة على المسترزقة الي يحترونه

الدحبول

28/01/2008, 10:37 PM

صعب تشتكي على وكيل في السعودية
انصح الناس تشتري من الموزعين آرخص من الوكالة و إصلي نفس الوكالة
بخوص الاخ لبرتي
إنا رحت البحرين الوطنية وكيل الهوندا و gm قسم قطع الغيار أول مادخلت شفت حركة عندها ولا هم ثقال
والاسعار جيدها وخدمتهم ممتازة
إخذت منه مقص كدلك أمامي ديفل 2002 عندنا في السعودية 2850 حصلته في البحرين 1800 وجلست عندهم نص ساعة واهتموافينا بشكل ممتاز
الموظف يقول سامحني تاخرت عليك بس أول مرة أبيعها أخلاقهم عالية موهب هندي الجميح
تخيل فرق 1050 ريال فرق كبير جدا
يمكن يبون يسونا مثل خدمات إيسيديلكو سريعة

مسايف الطعس

28/01/2008, 10:57 PM

المشكلة والله عندي طلبت صدام باترول 2006 من عند موزع جيت بكرا

وخذته يوم وديته للورشة صار حق أبو رفارف وأنا سلقة موتري

المهم دقيت على الموزع قالي بطلبة من الحمراني قال ياخذ يومين علشان يجي من المستودع الي بسلي

المهم يوم جاء بعد يومين وأمرهم والاقى الصدام صح بس المشكلة أن الصدام فيه خروم ليش ماأدري

المهم قلت للموزع أطلبي على رقم الهيكل قال طيب بعد أسبوع لأنه بيجي من الدمام وأنا في الأنتظار

للعلم أن الصدام موجود في الوكالة بعد الخصم 750 وعند الموزع 590 ياهو فرق وأنا في أنتظاره

هذا وكيل صدام موتر لازم طلبية ياخي مفروض الصدام موجود بالدرازن بس الله يصبرنا على هلوكيل السيئ

z a n h o r

29/01/2008, 01:39 AM

نيسان فاتحين لهم فرع بصناعية الدائري

و على كلامهم انه هو اكبر مركز صيانه لنيسان

طبعا مريت عليه كبير نوعا ما وما عليه زحمه يوم امر عليه

وانا صراحه حظي معهم حلو مره كل مره تمشي اموري صحيح ياخروني شوي وقت التسليم يلطعوني نص ساعه وحولها لكن الحمد الله ماشيه اموري

قطع الغيار فل الفل

عبدالرحمن السالم

29/01/2008, 11:07 AM

الله لايهينكم ياجماعه الخير .. وألف شكر لكم على مروركم الكريم ..

انا متظرر مثلكم صار على حادث وموتري باثفندر 2005 وكنت ابى اغير الصدام الامامي وقالو ماهو موجود بالسعوديه ونبي نجيب دفعه من برا سجل عندنا طلب .. قلت طيب السياره اخليها مرميه بالورشه سكتو ماردو على قلت الشكوي الله وفعلاً سجلت طلب لكن السياره وش اسوي فيها اخليها بالورشه قلت اركب لى صدام تجاري امامي واكرفه بالبران والنفود لين مايقول آمين ولا اني اخذ جديد .. والله واخذ صدام تجاري امامي واصبغه واضبطه والحمد الله ولا اروع اطلع واكشت واضرب فيه ضرب بالنفود ولا زال والله الحمد ..

مالنا الا الكلام الكثير والمشكله انه ماراح يفيد بشي لكن الشكوي الله ..
أخوي
z a n h o r (http://www.mekshat.com/vb/member.php?u=45331) http://www.mekshat.com/vb/images/statusicon/user_offline.gif
هل فعلاً المركز قائم ؟ وهل متوفره قطع الغيار ؟ ووين مكانه الله لايهينك

آسف والله على اسئلتي الكثيره وألف شكر لك على مرورك الكريم

العبقري سابقا

29/01/2008, 12:23 PM

السلام عليكم
الأخ اللي سأل عن الموقع
المركز في صناعية الدائري خلف المسجد وقريب من ألبان الصافي

إذا كنت متجه من الدائري الشرقي للجنوبي ادخل الخدمة بعد مخرج 17 وبتشوف علامتهم كبيرة على يمينك

انا جربتهم وكويسين في الصيانة السريعة لكن الباقي ما أدري عنه

وعلى فكرة دوامهم من 8-4 والخميس 8-1 وبعد كذا يفتح الله

تقبل تحياتي،،،

z a n h o r

29/01/2008, 03:49 PM

بالنسبه للوصف ما قصر اخونا العبقري سابقا

بالنسبه للقطع فانا اتعامل مع فرع خريص القديم الي عند العثيم

والحمد الله قليل اواجه نقص بالقطع وان واجهت ما تطول يومين وهي عندي يمكن ثلاث مرات حصلت

هوي البر

29/01/2008, 09:20 PM

والله أنكم صادقين
أن عندي باثفندر2003 ضيق صدري منضم البخاخ عجزة ألقى في الوكالة لفقة له قطعه ب 270ريال وبعد فتره بغيت أغيره مره ثانية لأن العزم يكون أقل سألة الوكالة قال القيمه 2800 ريال كامل قلت أبغى بس القطعة الصغيرة قال مانقدر..
لكن ما أقول إلا حسبنا الله ونعم الوكيل

ياشباب اللي عنده مستعمل مستعد أشتريه

http://www.sndoqy.com/uploads/d6c1299378.gif (http://www.sndoqy.com/)