الدبل الثقيل ... متى يستخدم في الطعوس ( الرمال ) ؟

[anas]

السلام عليكم
الدبل الثقيل وما ادراك ما الدبل الثقيل ، احيانا اقول ما له فايدة ابد في الرمال وما يزيد الطين إلا بله واحينا اخرى يجمل معك ..
ابغى اعرف متى يتم استخدام الدبل الثقيل في الرمال ( الطعوس ) ؟
وهل احد قد جرب الدبل الثقيل في الطعوس وجاب نتيجة افضل من الدبل الخفيف ؟

[abo fasil]

وكليكم السلام ورحمة الله

يسعدني اكون اول من يرد عليك

1- اكيد الدبل الثقل يستخدم للسحب حتي لو كان موتر صغير ولا تستهين فيه .
2- اذا الارض ممطوره وحاب تطلع نفود او طعس كبير لا تحرق موترك وتشب عليه حط الدبل الثقيل والقير ب 2 وش كيف يفرق معك.
(اهم شي في الموضوع تنسيم الكفرات)

هذا الي اعرف وحسب تجربتي:good:

[أشيقراوي]

اخوي ,,

ابو فيصل ما قصر معاك

بس انا بعطيك اللي عندي


هو استخداماته ثلاث على حسب نظري

1- اذا انت غرزت ولو تغريزه بسيطه اشبكه وريح عمرك وعلى طول تطلع ,,,
2 - اذا كنت بتسحب واحد سواء كان الموتر كبير ولا صغير ,, احسن تشبك الثقيل
3- اذا تبي تطلع قص من وجهه على طول بدون ما تاخذ عزم او كنت متوهق في فنجال ولا خبه في النفود
تشبك الثقيل وتحط القير على 3 او 2 وشف شلون يطلع الموتر بالهداوه

هذي المعلومات اللي عندي ويمكن يكون فيها غلط ,, ولكن هذا اللي اعرفه

حياك الله

[kasb]

هلا أخوي

الدبل الثقيل لا يستخدم إلا في حالات قليلة ، فالأصل أنك لا تستخدمه في الرمل وغيره إلا إذا احتجت إليه حاجة ماسة وإليك بعض النصائح في الدخول للبر (الطعوس)
1-اول أن تخفظ من ضغط الإطارات (تنسم) ومن باب الخبرة أقول أفضل ضغط بين 15 - 18 ، فهذا يريح سيارتك ولا تجور عليها.
2- إذا دخلت للرمل لا تحاول أن تتجه للطعوس مباشرة بل حاول أن تأتيها من اليمين أو اليسار (مسايسة كما يقولون) وإا أحسست أن السيارة ثقلت عليك وتبي تغرز فأملها للجهة المنخفضة وانزل من هذ الطعس وحاول مرة أخرى من جهة أخرى.
3- إذا أردت أن تتوقف ففكر بمكان السيارة فلا بد أن يكون الموقف جيد للانطلاق وحبذا أن تقف بمكان منحدرقليلا (طبعا وجه السيارة للمنحدر).
4- إذا غرزت السيارة حاول أن تنزل أنت ومن معك وتجرفون الرمال التي أمام كفرات السيارة أو خلفها(إذا كنت تريد الرجوع) ويدفعون أخوياك شوي.(نزول اللي معك يجعل السيارة أخف فإذا كنتم أربعة ومتوسط أوزانهم 80 كيلو يكون تخفف على السيارة 320 كيلو)
5- إذا لم تخرج السيارة فشغل الدبل الثقيل وحاول أن تمشي أقل ما يمكن فلا تحاول أن تسرع والبل الثقيل مشغل أو تضغط بنزين بقوة وأنت مغرز ومشغله على الثقيل يعني لن تستطيع الخروج من الرمل إلا عن طريق (هيلاكوبتر) والله يوفق الجميع

أخوك(كااااسب)

[المصطفق]

خلاصت الكلام (تشغل الدبل الثقيل اذاكنت بتروح مسافات طويله طبعا في النفود لانك متدري يقابلك رباض يقابلك شي انت ماتدري وش الضروف .
وللمعلوميه الثقيل اريح للسيارة في النفد من الخفيف)

[شروكي ربع]

خلاصت الكلام (تشغل الدبل الثقيل اذاكنت بتروح مسافات طويله طبعا في النفود لانك متدري يقابلك رباض يقابلك شي انت ماتدري وش الضروف .
وللمعلوميه الثقيل اريح للسيارة في النفد من الخفيف)


بالعكس اخوي ..


الثقيل له من اسمه نصيب كبير ..


يثقل على الموتر ويحمله جهد كبير , وثانيا ماتقدر تسرع عليه ..


وهو ما يستخدم الا وقت الزنقات فقط ..


(( تعلقت - بتطلع شي قوي - تجر احد - .. ))


وما اتوقع ابد انه مناسب تشغيله على طول ..

[tiger_shark]

السلام عليكم يا شباب
الظاهر انه في لبس عند البعض بخصوص الدبلات
خلينا نبدأ من الدفع الخلفي (2*4): الحين كل العزم للكفرات الخلفية 50٪ يمين 50٪ يسار
دبل خفيف: العزم نفسه لكن يوزع على الكفرات الاربع 25 ٪ لكل كفر يعني الكفر الواحد يفر بشكل اخف و بتوزيع افضل، ويستخدم اذا كانت الارض تحتك زلقة يعني رمال او طين او ارض مبللة
دبل ثقيل: ما زال العزم موزع بنسبة 25٪ للكفر لكن العزم ككل مضاعف وهذا يعني انه كفر يفر بشكل قوي جدا، يعني لو كنت مغرز راح تندفن خخخخخخخ.
استخدامات الدبل الثقيل ثلاثة:
1. الطلوع الشديد الانحدار على ارض صلبة
2. في حالة سحب سيارة مغرزة او اي جسم ثقيل
3. في حالة دفع جسم ثقيل مثل جذع شجرة مقفلة دربك
هذا والله اعلم و اذا في معلوماتي شيء خطأ أرجو من الاخوان تصحيحي
اخوكم راكان...
×

[المتزن]

خلاصت الكلام (تشغل الدبل الثقيل اذاكنت بتروح مسافات طويله طبعا في النفود لانك متدري يقابلك رباض يقابلك شي انت ماتدري وش الضروف .
وللمعلوميه الثقيل اريح للسيارة في النفد من الخفيف)

لا يابن الحلال ماهو صحيح هالكلام ابد

هذا خلاص للموتر ماهو للكلام.

الدبل الثقيل ماتشبكه الا بحالات الزنقه فقط.

اذا دقر الموتر بطعس ولايقدر يقوم وانت شابك الخفيف ليا قام يلقلق ويعطب كلتشه. او بالسحب بالطعوس وغيرها حسب قوة المسحوب وكبره او تبي ترقى مرتفع قوي.

ياخي هذا فيه التعشيق الرابع زي الأول والدليل جرب بننفسك عشق الثقيل وقوم الموتر بالرابع او بالثالث اذا هو مغرز غراز متوسط وخفيف.
وبعدين كثر اللفات وانت معشق الثقيل اثناء المشي مسافه طويله يؤثر على العكوس والدفرنس الأمامي.عكس الخفيف اللي تقدر تمشي فيه سرعات متوسطه ومسافات طويله وماله تأثير.

افضل شي للنفد الدبل الخفيف مع تنسيم هوا الكفرات من 25 الى 15 حسب كثافة الرمل.

واذا كنت تمشي صحراء مسافات طويله اشبك الخفيف وامش وانت مرتاح لانه يساعدك على توازن السياره اكثر من انك تمشي عليها بدونه .

[ســـــــنافي]

اهم وظيفتين للدبل الثقيل هي الصعود والسحب

[ابو نايف التميمي]

الثقيل استخدمه اذا تعلقت في الرمال.. على طول يطلعني

يعني يستخدم وقت الزنقه..ولا احلى منه

[جنتلمان نجد]

لي رجعه للموضوع بميئة الله

[ابن مرصوع]

انا مجرد قاريء واستفدت من ردود الجميع
بيض الله وجيهكم ولا هنتم

[الليث]

وانا كذلك اسجل شكري للاخوان الذين افادونا وأثروا الموضوع بمداخلاتهم

تحياتي للجميع

[Under_net]

حسب معرفتي المتواضعة

الدبل الثقيل = الدبل خفيف ميكانيكا

لكن الفرق هو في دوران المحرك و حجم التروس

يعني بالدبل الثقيل المحرك يكون فيه الدوران عالي لكن الإطارات تتحرك ببطء يعني عزم جبار للإطار دون أي يحفر خاصة عند الضغط على الدواسة ببطء ،، هذي يحس بها أصحاب المحركات الضعيفة مايحتاج استخراج عزم مثل الدبل الخفيف باستخدام الكلتش والضغط على البترول قد تحفر السيارة بسببها

لذلك تستخدم لاستخراج عزم السيارة على سرعة منخفضة للجر أو الخروج من تعليقة بمجهود بسيط فلاتستخدم الثقيل للتطعيس واللعب استهلاك عالي لدوران المحرك على سرعة بطيئة في مكان لاتحتاجه .

مع الشكر وأرجو تصحيح المعلومات إن كان بها خطأ

[السائل]

جزاكم الله كل خير
استفدت من المعلومات الوارد في الموضوع بشكل كبير

[aljoni]

السلام عليكم

الدبل الثقيل لو مشيت فيه10 دقائق واكثر تلاحظ درجة الحرارة بترتفع اكثر لو انت حاط الخفيف
الدبل الثقيل وضع للاستخدمات التاليه: السيارة متعلقة او في طلعة صعبة او سحب او تبي تشق وادي
ولكن وضع الدبل الخفيف اريح وافضل للسيارات في الطعوس والاماكن الجبلية, لان الموتر يكون اخف, ومع ذلك ماحطوة الا وله فائدة ولكن كيف تعرف سوال يكثر اجاباته :confused:

[ابو سعد التميمي]

باختصـــــــــــــــــــار

الثقيل اذا بتسحب احد

او بتطلع سنـــده ( طعس مرتفع ) خخخخخ عشق الثقيل والقير في الـ 2 ووكل الله

او بتسحب واحد مغرز

غيره مااخبر شي والربع ماقصروا في الاجابات مشاء الله كلهم كفو

[برق بريده]

مشكور اخوي على الموضوع
وانا قد طبيت بنقره ما كنت اعرف ان الدبل الثقيل له ذيك الفايده
ووالله ما طلعت لمين حطيت الدبل الثقيل وباالثاني

[مكيشيت]

ماقصروا الاخوان جزاهم الله خير

وبالنسبة للأتوماتيك هل هو نفس الفكرة؟؟

[أبو محمود 70]

كلام جميل وماقصروا الاخوان ولكن الثقيل يستعمل عندما تكون السيارة عليها حمل كثير وبالذات فى الشاص عندما يكون الصندوق مليان وتغرف فى الرمل وتكون بالاطارات الاربع تحفر فى نفس المكان فهنا يكون دور الثقيل اما فى الرمل العادى فيكون الخفيف او بدونه والاهم هو التنسيم المناسب .
ولم يحدث ان استعمل الثقيل على طول الرحلة داخل النفوذ المهم تشغيلهما فى التربة الملائمة لهما .
وهذا حسب خبرتى

[abo fasil]

بسم الله

اول شي تنسيم الكفرات

الدبل الخفيف يريح موترك في الرمل والنفود بكل الحالات
حرف n الي بين الدبل الخفيف والثقيل هذا للونش الامامي في حال سحب اي جسم
الدبل الثقيل للسحب والطين والطلوع والنزول الحاد (فعلا الدبل الثقيل عند استخدامة فتره طويلة مستمره يسخن الموتر ويضره)

كذلك الكلام للقير الاتوماتيك,,,,,,,,

[عبدالرحمن السالم]

الله يعطيكم ألف عافيه جميعاً وماقصرتو
الدبل الثقيل يستخدم في الحالات التاليه
1/ سحب اى سياره كانت في النفود سواء كبيره او صغيره
2/ عند تعليق السياره في الرمال
3/ في حاله دخولك إلى رباضه يستخدم الثقيل افضل من الخفيف
ولا تطول على الثقيل بالمشى ضرورته على السياره اكثر من نفعه

واتمني لك التوفيق

[anas]

مشكورين وما قصرتوا الله يعطيكم العافية كلكم
ومن خلال ردودكم تبين لي ان استخدام الدبل الثقيل يكون في :
1- سحب السيارات المغرزة .
2- اذا غرزت وما قدرت اطلع بالدبل الخفيف حينها استخدم الدبل الثقيل .
( ولو ان النقطة الثانية ليست في كل حال ) وش رايكم ؟

[شمالات نجد]

حسب معرفتي المتواضعة

الدبل الثقيل = الدبل خفيف ميكانيكا

لكن الفرق هو في دوران المحرك و حجم التروس

يعني بالدبل الثقيل المحرك يكون فيه الدوران عالي لكن الإطارات تتحرك ببطء يعني عزم جبار للإطار دون أي يحفر خاصة عند الضغط على الدواسة ببطء ،، هذي يحس بها أصحاب المحركات الضعيفة مايحتاج استخراج عزم مثل الدبل الخفيف باستخدام الكلتش والضغط على البترول قد تحفر السيارة بسببها

لذلك تستخدم لاستخراج عزم السيارة على سرعة منخفضة للجر أو الخروج من تعليقة بمجهود بسيط فلاتستخدم الثقيل للتطعيس واللعب استهلاك عالي لدوران المحرك على سرعة بطيئة في مكان لاتحتاجه .

مع الشكر وأرجو تصحيح المعلومات إن كان بها خطأ

هذا الكلام الله يعطيك العافية بالإضافة إلى ما ذكروه الأخوان من سحب شيء ثقيل أو طلوع أو نزول منحدرات حادة سواء في الطرق المعبدة أو خارجها.

بالتوفيق للجميع

[salehhd]

السلام عليكم

اراء مفيدة جداً

هناك استخدام مميز للدبل الثقيل في حال النزول من قص مباشرة ماعليك الا تركب الثقيل وتترك السيارة تنزل مايحتاج بريك ولا شي

[Black VTC]

ما شاء الله تبارك الرحمن على المعلومات والشباب اشبعوا الموضوع بارك الله فيهم خلاص خلصوووووو الكلام مانقدر نقول شي بعدهم الا الدعاء لهم بالتوفيق ....

[ابن وائل500]

الدبل الثقيل مايستخدم الا وقت الزنقات
وشكرا

[fza3]

ماخلو لنا الشباب شي
كفو..... ووفو

[shaheenshah]

السلام عليكم
انا اخالف الشباب كلهم واقول
اذا تبي تريح موترك وقفه تحت الطعس وارقى على رجليك احسن لك واللي يبي يطعس لا يقول بحن موتري
اولا اللي يبي يطعس لازم ينسم الكفرات 15 او 10 (20 ما ينفعك بشي من واقع تجربه)
ثانيا اللي يقول الثقيل يالله يمشي الموتر اكيد يالله يمشي لانه يلقمه بالاول او الثاني
ولكن عشق الثقيل وقومه بالثالث وعطه الرابع وبعدين الخامس ودوس (جرب وبتشوف الفرق بلا دبل خفيف بلا هم يحزنون) وميزة الثقيل بالطريقة هذي ما يبرد عزم الموتر ابد وبتفرقه ايضا في المراقى بشكل كبير جدا
بعض الناس بيقول يخرب عليك عمود الدبل واللي يقول عكوس ودفرنس وووووووو.... الخ
طبعا انت مستحيل انك توصل 80 وانت تطعس واذا وصلتها فانت مهبول ولا يهمك موترك لان حياتك اصلا ما همتك
انا لي اكثر من سنتين وانا استخدم هذي الطريقة والصراحة ارتحت من عطه الثقيل عطه الخفيف ولا شفت بالموتر اي خلاف يالله لك الحمد
والسلام

[فيتامين]

خذ العلم طال عمرك :

1- لسحب السيارة المغرزة ( بنفود أو شعيب ) وإذا بغيت تسحب جرم حطبة إرطأ تخبر الشتاء و فعايله لاتستعمل الخفيف

2- أ ) إذا تعلق الموتر بالنفود
ب) إذا بغيت تطلع طلعة طويلة (نازية) وتهقى إن الخفيف ماينفع وهذا حسب الخبرة وحاول تطلعه
برابع أو بالثالث وإذا قل العزم رجعه بنمرة أقل بحركه سريعة بحيث ماتخلي وقت طويل للتغيير
ج ) إذا صرت بمحقان وحسيت إن الخفيف مايساعد
د ) بالنسبة للنزول من عند قعر طويل فحط القير بنمرة ثقيلة وما تحتاج للدبل الثقيل