مشكلة الدبل في بليزر 94

[صدام]

السلام عليكم ورحمة الله

الموتر يوكون باب واحد موديل 94

والمشكلة في الدبل الخفيف والثقيل

اذا عشقت الدبل في الغراز تثقل السيارة لكن اللمبة ماتشتغل ولا اشوف الكفرات الامامية تتحرك

يحفر من ورا كنه جمس عادي للاسف :(


على الاسفلت يعشق الدبل ويفز فزة موتر معشق دبله لكن بالرمله يخون


البارح دخلت به محل كله رباضات وحقيقة توهقت به..كل ماطلعته غرز!


اذا احد عنده حل او مر بنفس المشكلة يعلمني..

[بوفايز]

السلام عليكم اخوي

سوي تجربة التالية على الازفلت:
1- فضي الدبل يعني خليه في وضعية (2h) ولف الطارة كامل وخذ دائرة كاملة
2- عشق الدبل (4h) ونفس الشي خذ دائرة كاملة: اذا الدبل شغال لازم السيارة تقوم تقرص من قدام يعني تحس انها الكفرات اللي قدام تزلق شوي. اذا كانت لفتها عادية مثل حالة رقم 1 يعني الدبل ما اشتغل.
3- عشق الدبل الثقيل (4l) و امش قدام بدون ما تلف: اذا حسيت السيارة ثقلت معناها الدبل مافيه شي لكن على الاغلب المشكلة في حساس الدبل ومكانه في الدفرنش الأمامي.

تغييره سهل بس فك وتركيب وقيمته على ما اعتقد 370 ريال (ماني متأكد من السعر)

في احتمال اخر انه عمود الدبل يكون مفصول. لازم تتأكد من وجوده قبل ما تغير الحساس.

أتمنى اني عطيتك جواب شافي

كل الود

بوفايز

[صدام]

وعليكم السلام اخوي ابوفايز..

اشكرك على تفضلك بالرد والاهتمام..

جربت الطريقة الي قلتلي عليها

في الدبل الخفيف مالاحظت انزلاق الكفرات ولكني اسمع قرقعه بسيطة تحت يعني كنشه شبك

وفي الدبل الثقيل، السيارة ثقلت لكن الدركسون خفيف مع اللفه يرجع لمكانه بسهوله

علما بأن اللمبات كانت تشتغل قبل المشكلة والحين ما اشوف ولا لمبة دبل شغالة

فما هو تفسيرها؟

وهل اذا كان حساس الدبل مضروب بتثقل السيارة في الدبل الثقيل مثل ماهو حاصل معي الآن؟


سامحوني على التطويل ولكني من النوع الي يفحص ويسأل قبل لا أطب الورش..

[تنوم]

الظاهر عندك العمود مفكوك او الجنزير مقطوع او مفكوك

[عاشق الموج]

شف يا االغالي انا عندي مثل موترك بليزر 93

وواجهتني مشكله الدبل ما يشتغل خير شر وكانت لمبة الدبل ما تشتغل اثناء تعشيقه

وديتة الورشة وكشف عليه الكهربائي وطلعت المشكله من حساس الدبل الموجود في الدفرنش الامامي

وفعلا غيرته وضبط معى مثل الحلاوة صار

قيمت الحساس الامريكي 250 ريال

وقيمت الحساس الاصلي 500 ريال

وانت طب وتخير

وشغله ولا اسهل منه سهل جدا تغيره

انت في الاول شيك عند كهربائي خله يفحصه لك

تحياتي

[لن أمل من العطاء]

ياحبيبي

السلام عليكم

مشكلتك بسيطه جدا جدا

500 ريال تكفي باصلاحها

اذا متأكد ان الدبل يشتغل والسيارة تصير ثقيله وعند تشغيل الدبل الثقيل تصبح السيارة اثقل

ولكن المشكلة هي ان الكفرات الامامية لا تدور
فيه حساس في الدفرنس الامامي يقوم بعملية شبك التروس ببعضها داخل الكرونه هذا الحساس عطلان

قبل الذهاب لشراء هذا الحساس

اذهب اولا الى اقرب بنشر وارفع السيارة عن الارض اقصد الاربع كفرات كلها
شغل الدبل الثقيل وجعل الكفرات تدور اذا لم تدور الكفرات الامامية اوقف الكفرات واطفئ المحرك للسلامه انزل تحت السيارة من الامام تشاهد الكرونه امام السائق في جهة اليسار ستشاهد انبوب به سلكين الانبوب هذا عبارة عن حبستم صفير اذا شغلت الدبل يقوم بالتمدد لشبك التروس ببعضها افصل السلك من الفيش وانزع هذا الحساس اقصد البستم المذكور انهيت من هذا
ناتي الان للخطوة الثانيه اشبك السلك بالفيش في مكانه وشغل السيارة وشغل الدبل تماما عند تشغيل الدبل سيقوم الحساس بالتمدد يعين يزيد طوله اذا لم يتحرك فيه اي شيء هو عطلان قم بتبديله وتركيبه ويشتغل الدبل
ساحاول جاهدا ان ارفق لك بعض الصور

عندي احساس انك لم تفهم شيء والمشكله مني انا طولت في الشرح
لكن بامكانك مراسلتي على الخاص برقم جوالك وانا اتصل بك واقلك على كل شيء

وتذكر اان صدر رحب

وتذكر انني لن امل من العطاء

[بوفايز]

السلام عليكم يا أخي

من كلامك واضح انها مشكلة حساس الدبل

اذا شغلت الدبل الثقيل وثقلت السيارة معناها ان قير الدبل حول على الترس الكبير يعني قير الدبل شغال مافيه شي.

مثل ما قلت وتفضلوا الاخوان الاغلب ان المشكلة في حساس الدبل.

كل الود

بوفايز

[صدام]

الاخوة الاعزاء..

آسف على تأخري بالرد نظراً لانشغالي

الاخ ابوفايز الحمدلله انها مشكلة حساس

الاخ لن أمل من العطاء:

الله يجزاك خير يالاجودي

طبقت كلامك شبكت الدبل ورفعت السيارة بستم والنتيحة الكفرات الأمامية ماتتحرك!

يعني المشكلة من الحساس كما تفضلتم

شبكت الدبل وفصلت فيش الحساس واختربته بلمبة الاختبار واتضح ان الكهرباء ماهي واصلة للحساس!

مشيت على علبة الفيوزات وكل شي سليم من ناحيتها

بكره ان شاء الله بوديه الصناعية وبتأكد من نتبجة تجربتي واشوف الخلل من وين بالضبط

شكراً للجميع..

[صدام]

السلام عليكم..

اخواني مشكلة الدبل انحلت وحبيت اقول لكم وشلون

بما اني اكتشفت ان المشكلة ماهي في الحساس وانما في الكهرباء الواصلة للحسساس

فانني كنت مضطر للبحث عن كهربائي يفهم طلبي لان ماعندي وقت لفحص كل الاسلاك..

وفعلا الأخ ماجد محمد في موضوعه
http://www.mekshat.com/vb/showthread.php?t=118340

أشار إلى كهربائي فلبيني ممتاز...

رحت للكهربائي وحل لي المشكلة

لا وبعد عطاني ورقة فيها صورة من مخطط كهرباء الدبل والقير حق سيارتي

والورقة جابها من موقع mitchell1 (http://mitchell1) دوت كوم

كهربائي راعي ذمه بصحيح...

[بوفايز]

حمد لله على السلامة اخوي

شغلك تمام ومضبوط بس علمنا من وين كانت المشكلة الله لا يهينك

كل الود

بوفايز

[bosahar]

الله يعطيك العتفيه
انا عندي نفس موترك وصارت لي نفس المشكله والحيين ادور لي كهربائي جيد بالشرقيه

[HAS5SAN]

السلام عليكم..

اخواني مشكلة الدبل انحلت وحبيت اقول لكم وشلون

بما اني اكتشفت ان المشكلة ماهي في الحساس وانما في الكهرباء الواصلة للحسساس

فانني كنت مضطر للبحث عن كهربائي يفهم طلبي لان ماعندي وقت لفحص كل الاسلاك..

وفعلا الأخ ماجد محمد في موضوعه
http://www.mekshat.com/vb/showthread.php?t=118340

أشار إلى كهربائي فلبيني ممتاز...

رحت للكهربائي وحل لي المشكلة

لا وبعد عطاني ورقة فيها صورة من مخطط كهرباء الدبل والقير حق سيارتي

والورقة جابها من موقع mitchell1 (http://mitchell1) دوت كوم

كهربائي راعي ذمه بصحيح...

الحمد لله ع السلامة
والكهربائي ذا
المفروض تسوي له دعاية
انا اشهد انه يستاهل
اي منطقة وش اسم محله