ابي حل لمشكلة واجهتني بالبرادو vx1 2007 لاتبخلون بالحل

[ابو رسيل]

انا عندي مشكل بالبرادو vx1 2007 وابي الحل
وهي ارتباط الثلاجة بالمكيف يعني اشغل الثلاجة يشتغل المكيف معي ارجع اطفي المكيف مايطفي لازم اطفي الثلاجة هم اطفي المكيف .... ابي افصلهم عن بعض وش الحل؟
سالت الوكالة قالوا انه طبيعي ومن المصنع السياره مصممه كذا ومالك عندنا حل.
مع العلم اني سألت اكثر من واحد معهم نفس سيارتي بس موديل 2005 و2006 ماعندهم هالمشكلة عااااادي الثلاجة والمكيف مالهم ارتباط ببعض .
وتعرفون ان البرادو من ابو جميل مسجله صيني ماركة mx هل يجي معه ريموت ولا لا ؟
وبسأل عن التلبسية الي حول القير الاتوماتيك وقير الدبل ويد الجلنط (التنزاني) افضل اني افصل ولا الجاهز يصلح للبرادو .
وعندي السيارة مع الطريق تروح يسار لازم اميل الدركسون يمين شوي عشان تمشي سيده - دخلته للوكاله مرتين ومافيه فايد وقررت اشوفلي احد يوزنه من تنصحون فيه انا ساكن بالرياض ؟

ابي الحل ؟؟

دام الجميع بكل ود

[مرور الكرام]

أول شي خوفتني أحسب فيه مشكلة كبيرة !!

ثاني شي أنا معي 2007 في أكس 2 ونفس الشي إذا شغلت الثلاجة يشتغل المكيف توماتيك ..

وأنا أحس أنها ليست مشلكة كبيرة مع الوقت تتعود عليها وميزة الثلاجة إذا شغلتها بردت وإذا طفيتها تبقى الأشياء باردة إلى فترة طويلة يعني تحفظ البرودة ..

بالنسبة للمسجل صح أنه مو شد بلد لكنه جميل جداً وإمكانياته رائعة ويشغل جميع أنواع الملفات

ولا يوجد معاه ريموت الريموت كان في موديلات 2006 فقط !!


التلبيسة ما عندي علم عندها ياليت تخبرنا إذا لقيت حل !!

بالنسبة للحذفة لليسار هذي في أغلب سيارات تويوتا

سبق أشتريت كامري 2007 وفيها نفس المشكلة

وأخبرني مهندس الصيانة بصفة ودية أنها مشكلة تأتي أثناء الشحن على البواخر (لم أفهم المقصود بالضبط)

وعلى كلامه ممكن يوزنونها لك بالوكالة على الضمان أو مع كثر الأستخدام يعود طبيعي (على حد قوله) ..

=============

هذي أجوبه أسألتك ..

لكن أنا الي أبي أسألك الآن ..

عندي رجة بالبرادو خفيفة بالدركسون لا يشعر بها إلا الي يسوق السيارة فقط

على سرعة 110

وديتها الوكالة مرتين وما راحت

وديتها ميزان العضيب سوى فحص للكفرات قال السيارة ما فيها شي

وقال هذي رجة تكون بأغلب السيارات الجديدة وتروح مع الوقت ..

هل حدث معك مثل كذا ؟؟؟

ولك تحياتي ،،،

[ابو رسيل]

مشكور اخوي مرور الكرام على ردك السريع ... تسلم والله

لا انا ماعندي هالمشكل ((رجه على 110)) مشيت عليه الى 170 ماشاء الله هادي ولا رجة
شيك على الترصيص او الكفرات او عامود الدبل (الامامي)
الا ماقلتلي مشكلة الحذفة يسار هل هي عندك ولا لا؟؟
الله يباركلك فيه ويطعمك خيره ويكفيك شره ... وتراه موتر مبروووووك عليك

دمت والجميع بكل ود

[برادو]

السلام عليكم

انا معي 2004 vx3 الثلاجه ماهي مربوطه بالمكيف كل واحد لحاله واعتقد انها تنفصل عن بعض بس يبيلها حرفه شوي.
المسجل ياطويل العمر اللي عندي اصلي له ريموت بس مدري عن الصيني.
تلبيسه القير الجاهزه حقت السنيدي ما تصلح ولا بريال جايه بالطول واقترح عليك تفصل وحده بالعرض على مزاجك.
السياره المفروض ما تحذف بس اوزن الهوا زين ورح لميزان ممتاز عندك القحطاني ماريتايم جيدين مجربهم.

[شبح الصحراء]

بالنسبة لحذفة السيارة سيارتي الهايلوكس اول ما طلعتها من الوكالة كان الديركسون غير موزون كان لاف لليمين حاجة بسيطة ودخلها الوكالة وقاولوا وزن اذرعة وبعد ما وزنوها صارت السيارة تلف يمين ودخلتها الوكالة أكثر من مرة وطلعة المسألة بسيطة مجرد وزن ديركسون وصلحوها ووزنوا الأذرعة من جديد ، اظن مثل هالأمور تحصل في كثير من الأحيان في السيارات الجديدة وليست من الشحن بالبواخر ولكنها أخطاء مصنعية بسيطة يمكن معالجتها في الوكالة وعلى العموم كن شديداً مع الوكالة لأني اكتشفت انهم بعض الأحيان يدخلون السيارة لإصلاحها على الضمان ويتركونها دون إصلاح ثم يسلمونها لك على انه تم اصلاحها وهذه احد وسائل تطفيش الزبائن علشان ترضى بالمكتوب ولا تدوخ روسهم فكن شديد معهم وحاول دخول الورشة والتأكد ان سيارتك مرفوعة وهناك عمال تحتها .
بالنسبة للثلاجة مادام انها صنعت على هذه الطريقة فنصيحتي لا تتعبث بها أخاف تبي تكحلها تعميها لأن السيارات هذي الأيام حساسة جداً لأي تعديل .

[مرور الكرام]

لأ أنا الحمدلله ما عندي حذفه بالجيب الخذفة كانت أول بالكامري 2007

والرجة فقط على 110 وإذا عطيته دعسه راحت الرجة

وعلى سرعات عالية الموتر راسي ولله الحمد ولا يوجد رجة ولا غيرة

وعلى فكرة ترى العداد يفصل إلى 190 كأقصى حد للسرعة ..

جربته مرتين وفصل ( طبعاً تجربة ولا ماني براعي سرعة أبد ) ولله الحمد .

[برادو vx]

أخوي أنا معي برادو vx2 قير عادي . .

بالنسبة للثلاجة نفسك بالضبط . . ونصيحة لا تجيها أبد خلها على حالها . .

والمسجل بدون ريموت لكنه من أروع ما يكون (ما فيه صيغة ما شغلها إلى الآن ) . .

أما بالنسبة لرجة . . كانت تجيني بس متى . . إذا كنت طالع نفود وتحمست ذيك المرة . . لأن الموتر

يمتلي تراب من تحت . . (أغسلها بستم) . . ولا كأن شي صار . .

ومرة كنت طالع بوقت مطر وإمتلت السيارة من تحت طين في طين . . إذا مشيت 100 ترج السيارة

كلها فأنا خفت ويوم غسلتها بستم ولا كان شي صار . .و حنا في الخدمه . .

[مدور ربيع]

الثلاجه والمكيف كلهم على نفس الدينمو الخاص بالتكييف .. واذا شغلت الثلاجه كأنك مشغل المكيف
لكن كل واحد يشتغل على حده


واذا كنت تقصد ان مروحه مكيف الهواء .. تعمل بنفس الوقت مع زر تشغيل الثلاجه فأتوقع فيه خلل كهربائي


واللاند معي مفصوله الثلاجه عن مروحه لمكيف .. واتوقع كل السيارات كذا

[برادو vx]

الثلاجه والمكيف كلهم على نفس الدينمو الخاص بالتكييف .. واذا شغلت الثلاجه كأنك مشغل المكيف
لكن كل واحد يشتغل على حده


واذا كنت تقصد ان مروحه مكيف الهواء .. تعمل بنفس الوقت مع زر تشغيل الثلاجه فأتوقع فيه خلل كهربائي


واللاند معي مفصوله الثلاجه عن مروحه لمكيف .. واتوقع كل السيارات كذا

مع احرامي لك أخوي وش إلي خلل كل البرادو 2007 يجي كذا ولا اتوقع انها كلها فيها خلل . .

[ابو الشمقمق]

انا ودي اركب ثلاجة للgx تكفوووووووووووون دلوني
ولا تقولون الgx موب زين تراي مليت من هالكلمة